SRAN WIE’M BE TƐ SU KƐ CƐCƐ. Dɔɔtrɔ bian kun waan be nga be fa Biblu’n be kle like’n, be ti kɛ sran mɔ su fa fluwa kun mɔ be yili i afuɛ 1920 nun’n, ɔ́ klé andɛ fluwa sifuɛ’m be like sa. Be nga be lafiman Biblu’n nun ndɛ’n su’n, be kwla usa kɛ: ‘?Laa ɔrdinatɛli kun mɔ w’a saci’n, be kwla fɛ i su fluwa’n be kle sran kun i like, naan ɔ nian su di ɔrdinatɛli nga be yi be andɛ’n be su junman?’ Be bu i kɛ Biblu’n kwlá yoman e ye andɛ.

?Ngue ti yɛ bé kó fá Biblu’n mɔ nán andɛ sa yɛ ɔ o lɛ’n i nun afɔtuɛ’m be su-ɔ? Like ng’ɔ ti sran’m be cinnjin andɛ’n, yɛle ɛntɛnɛti nin ɔrdinatɛli’n. Ndɛ nin afɔtuɛ nga be klɛ be sie i ɛntɛnɛti su cɛn kwlakwla’n, be diman be yalɛ. Asa ekun’n, fluwa sifuɛ’m be sin televiziɔn nun titi be man sran’m be afɔtuɛ. I kpa bɔbɔ’n, b’a yi fluwa kpanngban kpa naan sran’m be nian be nun afɔtuɛ’m be su be nanti.

Andɛ’n, miniti kwlakwla nun’n, sran’m be kwla si ndɛ uflɛuflɛ mun. Biblu’n kusu’n, be klɛli i nun ndɛ’n i afuɛ kɔe 2.000 yɛ. ?Ngue ti yɛ bé kó dí i nun afɔtuɛ’m be su-ɔ? ?Be nga be waan sɛ e fa Biblu’n e kle like’n, ɔ ti kɛ e su fa siansifuɛ’m be fluwa kun mɔ be diman su kun’n é klé like sa’n, be ndɛ yoman fɛ yɛ ɔ o lɛ-ɔ? Be ndɛ’n timan su. Afin, ndɛ nga siansifuɛ’m be kan’n, ɔ kacikaci ndɛndɛ kpa. Yɛ ninnge nga be yi be’n, be blɛ’n sin ndɛndɛ kpa. Sanngɛ, like nga klɔ sran miɛn i wun’n, ɔ kaciman. Kɛ ɔ fɛ i lalafuɛ nun lele andɛ’n, sran’m be kunndɛ kɛ bé sí like nga ti yɛ be o asiɛ’n su’n. Yɛ be kunndɛ kɛ bé dí alaje. Asa ekun’n, be kunndɛ kɛ be nin be awlofuɛ mun nin be janvuɛ’m bé trán klanman.

Kannzɛ be klɛli Biblu’n i nun ndɛ’n w’a cɛ’n, ɔ kwla yo e ye sa’n kwlaa nun. Ɲanmiɛn m’ɔ boli e’n yɛ maan be klɛli Biblu’n i nun ndɛ’n niɔn. Ɔ kwla uka e naan y’a wun sa nga be tɔ e su’n be trawlɛ. (2 Timote 3:16, 17) Asa ekun’n, afɔtuɛ nga be o Biblu’n nun’n be blɛ sinman le. Be klɛli i Biblu’n nun kɛ: “Nyanmiɛn i ndɛ nga ɔ ko kan’n, wuun w’a kan ɔ kaci-mɛn i.”—Ebre Mun 4:12.

?Ndɛ nga Biblu’n kan’n ti nanwlɛ? ?E kwla di i nun afɔtuɛ’m be su andɛ, annzɛ be blɛ w’a sin? ?I nun ndɛ’n, ɔ kaciman? Fluwa Sasafuɛ Tranwlɛ’n nga, ɔ nin nga bé bɛ́ i sin’n, bé wá úka e naan y’a wun kosan trele kɛ nga lɛ sa’m be su tɛlɛ’n.