1. ?Wafa sɛ yɛ e nin Zoova e kwla di junman-ɔn?

KƐ Zoova yili sran mun, ɔ kunndɛli kɛ ɔ nin bé dí junman. Kannzɛ andɛ’n fɔ o klɔ sran’m be nun, sanngɛ be nga be nin Zoova nanti klanman’n, be nin i di junman cɛn kwlakwla. Kɛ é bó jasin fɛ’n, annzɛ é klé sran’m be like naan be kaci Zezi i sɔnnzɔnfuɛ’n, “e nin Ɲanmiɛn yɛ e di junman nin-ɔn.” (1 Korɛntfuɛ Mun 3:5-9) Kɛ Ɲanmiɛn m’ɔ kwla sa’n kwlaa yo’n, ɔ fa junman cinnjin sɔ’n man e kɛ e di’n, ɔ ti e sran bulɛ dan. Sanngɛ, nán jasin fɛ’n i ngunmin yɛ sɛ e bo’n, ɔ́ klé kɛ e nin Ɲanmiɛn e di junman likawlɛ-ɔ. Like suanlɛ nga nun’n, é wá kán ninnge wie mɔ kɛ e yo be’n, ɔ kle kɛ e nin Zoova yɛ e di junman’n be ndɛ. I wie yɛle e awlofuɛ mun nin asɔnunfuɛ’m be ukalɛ’n, nin e niaan’m be nun sɔlɛ’n, nin anuannzɛ’n i junman be bo suanlɛ’n, ɔ nin kɛ e kunndɛ kɛ é dí Zoova junman’n i kpa trá laa’n.—Kolɔsfuɛ Mun 3:23.

2. ?Ngue ti yɛ ɔ fataman kɛ e fa junman nga e di man Zoova’n, e sunnzun e wiengu’m be liɛ’n niɔn?

² E kwlaa e afuɛ’n timan kun. Yɛ nán e ngba yɛ e ti juejue-ɔ. Asa kusu’n, sa nga be o e su’n, ɔ nin ninnge nga e si be yo’n,  be ti fanunfanun. Nán maan e wla fi i sɔ liɛ’n su. Nán e fa junman nga e kwla di man Zoova’n e sunnzun e wiengu’m be liɛ’n. Pɔlu seli kɛ: “Maan sran kun niɛn i bɔbɔ i nyoliɛ’n, sɛ ɔ wun kɛ ɔ ti kpa’n, ɔ́ yó i fɛ, ɔ maan ɔ su fa-man sran uflɛ liɛ’n sunnzun-mɛn i liɛ’n.”—Galasifuɛ Mun 6:4.

3. ?Ngue ti yɛ e kwla se kɛ sran ng’ɔ niɛn i awlofuɛ’m be lika’n, ɔ nin Ɲanmiɛn be di junman likawlɛ-ɔ?

³ Zoova kunndɛ kɛ e nian e awlofuɛ’m be lika. I wie yɛle kɛ ɔ fata kɛ e kunndɛ sika naan e fa nian e awlofuɛ’m be lika. Kɛ ɔ ko yo naan aniaan bla kpanngban b’a kwla nian be mma kanngan’m be lika’n ti’n, be ka be awlo lɔ. Asa ekun’n, kɛ e si nin e nin’m be kwlá nianman be wun lika kun’n, ɔ fata kɛ e nian be lika. Ninnge sɔ’m be yolɛ’n ti cinnjin. Afin, Biblu’n se kɛ: ‘Sran ng’ɔ niɛnmɛn i fuɛ’m be lika’n ɔ ti tɛ, nga b’ɔ ti tɛ’n tra su’n yɛlɛ sran ng’ɔ niɛnmɛn i bɔbɔ i awlo’n i lika’n, ɔ timan Ɲanmiɛn sufuɛ, i tɛ liɛ’n tra sran ng’ɔ lafiman Klist su’n.’ (1 Timote 5:8) Wie liɛ’n, e awlobo’n i lika nianlɛ’n ti’n, ɔ yo e kɛ e diman Zoova junman’n i kpa kɛ nga e klo’n sa. Sanngɛ, nán e sa sin bubu e. Afin kɛ e nian e awlofuɛ’m be lika’n i sɔ’n jɔ Zoova klun.—1 Korɛntfuɛ Mun 10:31.

4. (1) ?Wafa sɛ yɛ siɛ nin niɛn’m be kwla kle kɛ Ɲanmiɛn i sulɛ’n ti be cinnjin tra like kwlaa-ɔ? (2) ?Kɛ be yo sɔ’n, wafa sɛ yɛ i bo gua-ɔ?

⁴ Klistfuɛ nga be le ba’n be kwla uka be mma mun naan Zoova sulɛ nun’n, be fa ninnge wie’m be sie be ɲrun kɛ bé yó. Siɛ nin niɛn kpanngban be yoli sɔ. Ɔ maan, be mma’m be fali ajalɛ kɛ bé dí Zoova junman’n blɛ kwlaa nun. Wie mun bɔbɔ be tuli ajalɛ be ɔli mmua kpa. Be nun wie’m be ti ngaliɛ difuɛ. Wie’m be kacili atin bofuɛ, yɛ be ɔli lika nga be mian jasin bofuɛ’m be wun lɔ’n nun. Wie’m be kusu’n, be di junman Betɛli. Kɛ ba’m be kɔ lika mmua’n, be si nin be nin’m be kwlá wunman be tikatika. Sanngɛ, be wla be fanngan naan lika kwlaa nga be o’n, be di Zoova junman’n titi. Afin, kɛ be wun kɛ Zoova junman’n i dilɛ ti be mma’m be cinnjin tra like kwlaa’n, i sɔ’n yo be fɛ. (3 Zan 4) Akunndan nga Ani buli’n, i wie yɛ siɛ nin niɛn sɔ’m be bu-ɔ. Ani fɛli i wa Samiɛli mannin Zoova naan ɔ yo i liɛ mlɔnmlɔn. Siɛ nin niɛn sɔ’m be wun i wlɛ kɛ, kɛ sran kun nin Zoova be di junman’n, i sɔ’n ti aɲrunɲan like dan.—1 Samiɛl 1:28.

5. ?Wafa sɛ yɛ e kwla uka aniaan nga be o e asɔnun’n nun mun-ɔn? (An nian foto ng’ɔ o kan like suanlɛ’n bo i bo lɛ’n.)

⁵ Sɛ e awlobo’n i lika nianlɛ’n, ɔ tinman e su dan’n, maan e uka e niaan nga be kpinndinman’n, annzɛ nga b’a yo oke, annzɛ e niaan nga sa uflɛ o be su’n. Asa ekun’n, e kwla uka be nga be nian sran sɔ’m be lika’n. Maan e nian sɛ e asɔnun nun’n sran sɔ’m be wie o lɛ mɔ e kwla uka be o. Wienun-ɔn, aniaan bla kun niɛn i osufuɛ wie mɔ w’a yo oke’n i lika. E kwla ko niɛn i osufuɛ sɔ’n su cɛn kunngun naan i kusu w’a kwla yo ninnge wie mun. Asa kusu’n, e kwla uka sran kun naan w’a tran aɲia’m be bo, annzɛ w’a kwla toto i ninnge mun, annzɛ w’a kwla ko nian sran wie osu dɔɔtrɔ lɔ. Kɛ e yo sɔ’n, e nin Zoova e di junman likawlɛ. Afin, Zoova sin e lika tɛ sran wie’m be srɛlɛ’n su.—An kanngan 1 Korɛntfuɛ Mun 10:24 nun.

6. ?Kɛ be se kɛ be sike sran’n, i bo’n yɛle benin?

⁶ Be nga be nin Ɲanmiɛn be di junman’n, be sike be wiengu mun. Glɛki nun ndɛ mma nga be kacili i Wawle nun kɛ sran ng’ɔ to amun’n, “an sike i” i bo yɛle kɛ “an yo aofuɛ’m be kpa.” (Ebre Mun 13:2) Ɲanmiɛn Ndɛ’n kan sran wie mɔ be yoli be wiengu’m be ye’n i ndɛ. Sran sɔ’m be kle e ajalɛ kpa. (Bo Bolɛ 18:1-5) Sɛ e ɲɛn i wun alaje’n, maan e uka e wiengu mun. Sɛ “e nin be e lafi Krist su” o annzɛ be nin e lafiman Klist su o, maan e uka be.—Galasifuɛ Mun 6:10.

7. ?Kɛ e sike blɛ kwlaa nun Ɲanmiɛn junman difuɛ mun’n, ye benin yɛ e ɲɛn i-ɔ?

⁷ Kɛ e sike blɛ kwlaa nun Ɲanmiɛn junman difuɛ mun’n, e kle kɛ e nin Ɲanmiɛn yɛ e di junman-ɔn. (An kanngan 3 Zan 5, 8 nun.) Kɛ e yo sɔ’n, e bɔbɔ nin sran nga e sike i’n, e ɲan su ye. Biblu’n se kɛ, kɛ e yo sɔ’n, “e wla e wun fanngan.” (Rɔmfuɛ Mun 1:11, 12) Maan e kan sa kun mɔ aniaan kun yoli’n, i ndɛ. Be flɛ aniaan sɔ’n kɛ Olafu. I nun m’ɔ ti gbanflɛn kan’n, cɛn kun akpasua sunianfuɛ kun m’ɔ leman bla’n ɔli be asɔnun’n i osu nianlɛ. Sanngɛ, b’a kwlá ɲanman sran kun asɔnun’n nun m’ɔ kwla sike i-ɔ. Olafu ko usɛli i si nin nin mɔ be timan Zoova i Lalofuɛ’n, sɛ be kwla sike aniaan’n nin o. Be seli Olafu kɛ be kwla sike i. Sanngɛ, ɔ́ lá ala’n bo lɛ. Ajalɛ nga Olafu fali’n w’a yomɛn i nsisɔ. Lemɔcuɛ ngunmin kun sɔ’n yoli Olafu fɛ kpa. Nglɛmun kwlaa kɛ bé dí like’n, be koko ndɛ wie’m be su yalɛ. Akpasua sunianfuɛ’n wlali Olafu i fanngan kpa. I sɔ’n ti, Olafu fali ajalɛ kɛ ɔ́ yó blɛ kwlaa nun Ɲanmiɛn junman difuɛ. Olafu dili ngaliɛ difuɛ junman’n nvle kpanngban nun afuɛ 40.

8. ?Kannzɛ sran’m be kaman lɛ siman ye’n, sanngɛ ngue ti yɛ ɔ fata kɛ e yo be kpa titi-ɔ? An fa sa kun yiyi nun.

⁸ Wie liɛ’n kɛ e yo aofuɛ’m be kpa’n, be kaman lɛ be simɛn i su ye. Kannzɛ ɔ ti sɔ bɔbɔ’n, sanngɛ maan e yo be kpa titi. Wafa nga e kwla yo aofuɛ’m be kpa’n, ɔ sɔnnin. Maan e kan kun ndɛ. Aniaan bla kun nin bla kun m’ɔ fin Ekuatɛli’n be suan Biblu’n nun like Ɛspaɲin lɔ. Be flɛ bla sɔ’n kɛ Yesika. Cɛn kun’n kɛ bé súan like’n, nn Yesika sún. Aniaan bla’n usɛli i sa nga ti yɛ ɔ sun’n. Ɔ seli kɛ ka naan w’a ɔ Ɛspaɲin lɔ’n, ɔ ti yalɛfuɛ. Cɛn kun liɛ’n, ɔ leman aliɛ naan w’a fa mɛn i wa bla’n, nzue yɛ ba’n nɔnnin-ɔn. Kɛ ɔ́ lúɛlúɛ i wa’n naan ɔ lafi’n, ɔ srɛli Ɲanmiɛn. W’a cɛman kpɛkun, Zoova i Lalofuɛ nɲɔn be wa toli i, be mɛnnin i fluwa kun. Sanngɛ, ɔ kannin ndɛ tɛtɛ kleli be. Kpɛkun, ɔ titili fluwa’n nun. Ɔ seli kɛ: “?Aliɛ nga ɔ waan á fá mán min wa’n, yɛle nga?” Aniaan bla’m be kunndɛli kɛ bé fɔ́nvɔ i, sanngɛ w’a fɛmɛn i su w’a siemɛn i be nuan bo. I sin’n, aniaan bla’m be blɛli i like kan. Sanngɛ like ti nga ti yɛ Yesika sun’n, yɛle kɛ, kɛ bé súan like’n, ɔ wa wunnin i wlɛ kɛ Ɲanmiɛn tɛli i srɛlɛ’n su. Sanngɛ w’a siemɛn i nzɔliɛ. Yesika fuali kpa kɛ ɔ́ sú Zoova. Nanwlɛ,  ye nga aniaan bla sɔ’m be yoli Yesika’n, i bo guali kpa dan.—Akunndanfuɛ’n 11:1, 6.

9, 10. (1) ?Ngue yɛ blɛ sunman nun’n Izraɛlifuɛ’m be yoli-ɔ? (2) ?Wafa sɛ yɛ aniaan yasua’m be kwla uka asɔnun’n i nunfuɛ mun andɛ-ɔ?

⁹ Blɛ sunman nun’n, Izraɛlifuɛ’m be tuli be klun yoli ninnge wie mun. (Ezipt Lɔ Tulɛ 36:2; 1 Be Nyoliɛ 29:5; Neemi 11:2) Andɛ kusu’n, e kwla fa e blɛ’n nin ninnge nga e le i’n, ɔ nin ninnge nga e si be yo’n e uka e niaan Klistfuɛ mun. Sɛ e yo sɔ’n, Zoova yrá e su. Kpɛkun, e klun jɔ́.

¹⁰ Zoova wla yasua nga be o asɔnun nun’n, be fanngan titi kɛ be yo asɔnun kpɛnngbɛn, annzɛ asɔnunfuɛ’m be lika nianfuɛ naan be nin i di junman. (1 Timote 3:1, 8, 9; 1 Piɛr 5:2, 3) Be nga be yo sɔ’n, be kunndɛ kɛ bé úka be niaan mun naan be su Ɲanmiɛn kpa. (Sa Nga Be Yoli’n 6:1-4) ?Asɔnun kpɛnngbɛn’m b’a man amun junman wie mun asɔnun’n nun? Ɔ kwla yo sran nga be ba aɲia’m be bo’n be nun sɔlɛ, annzɛ fluwa’m be su nianlɛ, annzɛ jasin fɛ bolɛ junman’n i siesielɛ, annzɛ asɔnun i nun yɛinyɛin yolɛ junman’n i su nianlɛ, annzɛ junman uflɛ. Aniaan nga be di i sɔ junman’n, be di aklunjuɛ.

11. (1) ?Wafa sɛ yɛ Ɲanmiɛn Sielɛ Sua’m be kplanlɛ’n junman’n i dilɛ’n yoli aniaan bla kun i ye-ɔ?

¹¹ Blɛ sunman’n, aniaan nga be kplan Ɲanmiɛn sulɛ sua mun’n, be ɲan janvuɛ uflɛ mun. Be flɛ aniaan bla kun kɛ Margi. Ɔ dili Ɲanmiɛn Sielɛ Sua’m be kplanlɛ junman’n lele afuɛ 18. Aniaan bla talua nga be ba sua sɔ’m be kplanlɛ wie’n, ɔ fɛ i wun mantannin be. Yɛ ɔ kleli be junman’n i dilɛ. Ɔ seli kɛ, kɛ bé dí junman  sɔ’n, be wla be wiengu fanngan. (Rɔmfuɛ Mun 1:12) Kɛ sa kekle wie’m be tɔli i su’n, i janvuɛ ng’ɔ trali be blɛ sɔ nun’n, be wlɛli i fanngan. ?Amun nin be nga be kplan Ɲanmiɛn Sielɛ Sua mun’n, b’a di junman le? Kannzɛ bɔbɔ amun siman sua kplan’n, amun kwla di junman sɔ’n wie.

12. ?Wafa sɛ yɛ e kwla uka e niaan nga sanvuɛsa ɲan be’n mun-ɔn?

¹² Kɛ sanvuɛsa ɲan e niaan mun mɔ e uka be’n, e kle kɛ e nin Zoova yɛ e di junman-ɔn. I wie yɛle kɛ e kwla man sika. (Zan 13:34, 35; Sa Nga Be Yoli’n 11:27-30) Asa ekun’n, e kwla uka be naan be yo be lika’n i nun yɛinyɛin, annzɛ be siesie be ninnge nga be sacili’n be ye. Be flɛ aniaan bla kun kɛ Gabliela. Ɔ fin Polɔɲin. Kɛ nzue dan kun tɔli’n, ɔ sacili i sua’n. Aniaan nga be mɛntɛn i wun koko lɛ’n, be wa ukɛli i. I sɔ’n yoli i fɛ kpa. Gabliela seli kɛ blɛ kekle sɔ nun’n, i akunndan w’a trɛnmɛn i sa nun ninnge nga be sacili’n su. Sanngɛ, ye nga aniaan’m be yoli i’n, i su yɛ ɔ fɛli i ɲin sieli-ɔ. Ɔ seli kɛ: “Sa sɔ m’ɔ juli’n kleli kɛ, kɛ e o Klistfuɛ’m be afiɛn’n, ɔ ti kpa dan. I sɔ’n man aklunjuɛ.” Be nga sanvuɛsa ɲan be mɔ aniaan’m be uka be’n, kɛ be kan sɔ wie-ɔ. Be kwlaa nga be nin Zoova di junman mɔ be uka be niaan mun’n, be di aklunjuɛ yɛ be wun kpaja be.—An kanngan Sa Nga Be Yoli’n 20:35; 2 Korɛntfuɛ Mun 9:6, 7 nun.

13. ?Ngue ti yɛ kɛ e uka e niaan mun’n, e klo Zoova kpa ekun-ɔn? An fa sa kun yiyi nun.

¹³ Be flɛ aniaan bla kun kɛ Sitefanin. Ɔ nin jasin bofuɛ wie’m be ukali Zoova i Lalofuɛ nga alɛ’n ti’n, be jasoli be nvle liɛ nun ɔli Etazinin lɔ’n. Be ukali aniaan sɔ mun naan b’a kwla ɲan sua nin ninnge wie mɔ be sa mian be wun’n. Sitefanin seli kɛ: “Kɛ aniaan sɔ’m be wunnin wafa nga aniaan’m be yili be sran klolɛ’n i nglo be lika’n, ɔ yoli be fɛ dan. I sɔ’n wlali e kusu e fanngan kpa. Aniaan’m be bu i kɛ e yɛ e ukali be-ɔ. Sanngɛ, be kusu be ukali e wie kpa. E wunnin kɛ be klo sran, be bo ti kun, be lafi Zoova su, yɛ be fa be wla guɛ i su. I sɔ’n yoli maan e wa kloli Zoova kpa. Kpɛkun, e wa buli ninnge kwlaa nga anuannzɛ man e’n i like cinnjin kpa.”

14, 15. (1) ?Ngue yɛ Ɲanmiɛn nuan ijɔfuɛ Ezai yoli-ɔ? (2) ?Wafa sɛ yɛ e kwla niɛn i ayeliɛ’n su-ɔ?

¹⁴ ?Amun kunndɛ kɛ amun nin Zoova dí junman kpa trá laa’n? ?Amun kunndɛ kɛ amún kɔ́ lika wie mɔ be mian jasin bofuɛ’m be wun lɔ’n nun? Ɔ timan cinnjin kɛ e tu e wɔ lika mmua naan y’a yo e wiengu’m be ye. Sanngɛ, aniaan wie’m  be niannin Ɲanmiɛn nuan ijɔfuɛ Ezai i ayeliɛ’n su. Kɛ Zoova usali kɛ, “?Wan yɛ ń súnmɛn i ɔ? ?Yɛ wan yɛ ɔ́ dún mmua e ɲrun ɔn? ?Wan yɛ ɔ́ íjɔ e nuan-an?” Ezai tɛli su kɛ: “Min-ɔn, sunman min.” (Ezai 6:8) ?Amun tu amun klun di junman man Zoova i anuannzɛ’n? ?Ninnge benin wie mun yɛ amun kwla yo be-ɔ?

¹⁵ Kɛ Zezi kán jasin fɛ’n i bolɛ’n nin sran’m be ukalɛ naan be kaci i sɔnnzɔnfuɛ’n be ndɛ’n, ɔ seli kɛ: “Fie’n w’a yo ye, sanngɛ i su junman difuɛ’m b’a sɔn-man. I sɔ’n ti, an se fie i fuɛ’n maan ɔ fa sran wie mun ekun maan be ko di i junman’n.” (Matie 9:37, 38) E kwla ko di atin bofuɛ junman’n lika nga be mian jasin bofuɛ’m be wun lɔ’n nun. Annzɛ e kwla uka sran uflɛ m’ɔ kwla di i sɔ junman’n. Aniaan kpanngban be wunnin i wlɛ kɛ wafa nga be kwla kle kɛ be klo Zoova nin sran’n, yɛle kɛ be ko di atin bofuɛ junman’n lika nga be mian jasin bofuɛ’m be wun lɔ’n nun. ?Ninnge wie’m be o lɛ mɔ sɛ e yo be’n, e kwla di Zoova i junman’n i kpa tra laa-ɔ? Sɛ e yo i sɔ ninnge mun’n, e klun jɔ́ kpa.

16, 17. ?Ninnge benin wie mun ekun yɛ sɛ e yo be’n, é dí Zoova i junman’n i kpa trá laa’n niɔn?

¹⁶ ?Amun kunndɛ kɛ amún kó dí junman Betɛli lɔ, annzɛ amún kó úka be nga be kplan Ɲanmiɛn sulɛ sua mun’n? ?Amun kunndɛ kɛ amún dí junman lɔ cɛ́ kan, annzɛ amún fá cɛn wie mun lemɔcuɛ kun nun kó úka be? Zoova i anuannzɛ’n mian be nga be tu be klun be di junman nga be fa man be’n, be wun. Zoova klo be nga be tu be klun be di junman kwlaa nga be fa man be’n.—Jue Mun 110:3.

¹⁷ ?Amun kunndɛ kɛ amún súan ninnge wie’m be yolɛ naan amun a kwla di Zoova i junman’n i kpa? Amun kwla klɛ anuannzɛ’n i fluwa kɛ amun kunndɛ kɛ amún dí Ɲanmiɛn Sielɛ’n i jasin bofuɛ’m be suklu’n wie. Suklu sɔ’n uka aniaan nga be di Zoova i junman’n blɛ kwlaa nun’n naan b’a kwla di Zoova i junman kpa w’a tra laa’n. Ɔ fata kɛ aniaan sɔ’m be kunndɛ kɛ bé kɔ́ lika kwlaa nga anuannzɛ’n se be kɛ be wɔ lɔ’n nun. ?Amun kunndɛ kɛ amún yó sɔ wie?—1 Korɛntfuɛ Mun 9:23.

18. ?Kɛ e nin Zoova e di junman cɛn kwlakwla’n, ye benin yɛ e ɲɛn i-ɔ?

¹⁸ Kɛ mɔ e su Zoova ti’n, e ti sran kpa, e klun ti ufue, e yo e wiengu’m be ye, yɛ e klo be. Aliɛ ba kwlaa nun’n, e kle kɛ e wiengu’m be ndɛ lo e. I sɔ’n ti’n, e klun jɔ. Yɛ e wla gua ase. (Galasifuɛ Mun 5:22, 23) Kannzɛ sa nga be o e su’n be ti sɛ ti sɛ’n, kɛ Zoova sa’n maan e yo e wiengu’m be ye, naan e nin Zoova e di junman tititi.—Nyanndra Mun 3:9, 10.