Zezi flɛli i sɔnnzɔnfuɛ nnan kɛ be wa tra sran kɛ be fa tra jue’n sa. Be yɛle Piɛli nin Andre nin Zaki nin Zan. Siɛn mɔ be o Kapɛɛnaɔmun’n, Wunmiɛn-lolɛ-cɛn’n nun’n, be sran nnun be ɔli Ɲanmiɛn sulɛ sua kun nun. Kɛ be wluli lɔ’n, Zezi kleli sran’m be like. Wafa nga Zezi kleli be like’n, ɔ boli be nuan. Afin ɔ kle like kɛ sran kun m’ɔ le kwlalɛ’n sa. W’a kleman be like kɛ be mmla klɛfuɛ’m be liɛ’n sa.

Wunmiɛn-lolɛ-cɛn sɔ’n nun’n, bian kun mɔ mmusu kun kle i yalɛ’n, ɔ bali lɛ wie. Ɔ kpannin kekle kpa seli kɛ: “?Zezi m’ɔ fin Nazarɛti, ngue yɛ a bɛ i yolɛ-ɔ? ?A bali e nunnunlɛ? N si wɔ kpa, a ti Ɲanmiɛn i sran!” Sanngɛ Zezi ijɔli mmusu ng’ɔ o sran sɔ’n i nun’n. Ɔ seli i kɛ: “Muan ɔ nuan! Fin bian’n nun fite!”​​—Marki 1:24, 25.

Kɛ mmusu’n tili ndɛ nga Zezi kannin’n, ɔ yili bian’n i ase. Ɔ yoli maan bian’n usuli dan kpa, yɛ ɔ kpannin kekle kpa naan w’a fin bian’n nun w’a fite. Sanngɛ “w’a yoman bian’n i like yaya” (Liki 4:35) Sa sɔ’n boli be kwlaa nga be o Ɲanmiɛn sulɛ sua’n nun’n, be nuan! Ɔ maan be usali be wiengu kɛ: “?Ngue sa yɛle nga?” Be kɛnnin i ekun kɛ: “Nanwlɛ, wafa ng’ɔ kle like’n, e nin-a wunmɛn i sɔ le! Ɔ kwla mmusu mun bɔbɔ. Kpɛkun, be sro i.” (Marki 1:27) Nanwlɛ, abonuan sa sɔ’n i ndɛ’n truli kpa Galile mɛn wunmuan’n nun!

Zezi nin i sɔnnzɔnfuɛ’m be jasoli Ɲanmiɛn sulɛ sua’n nun lɛ, kpɛkun be ɔli Simɔn mɔ be flɛ i ekun kɛ Piɛli’n i awlo lɔ. Kɛ be juli lɔ’n, be wunnin kɛ ayrɛ dan kpa w’a gua Piɛli i sia bla’n i wun. I sɔ’n ti’n, i sɔnnzɔnfuɛ’m be srɛli i kɛ ɔ yo i ye. Ɔ maan, Zezi wunngeli i wun lɔ naan w’a trɛ i sa’n, kpɛkun ɔ mɛnnin i su. Be ja nun lɛ’n, bla’n yoli juejue. Kpɛkun ɔ suli Zezi nin i sɔnnzɔnfuɛ mun. Atrɛkpa’n, ɔ tɔnnin aliɛ mannin be.

Kɛ wia’n tɔli’n, sran kpanngban kpa be fali be tukpacifuɛ’m be ɔli Piɛli i awlo lɔ. Ɔ maan e kwla se kɛ klɔ wunmuan’n yiali Piɛli lɔ. ?Ngue ti yɛ be yoli sɔ-ɔ? Be yoli sɔ afin be kunndɛ kɛ be yo be tukpacifuɛ’m be juejue. Ɔ maan ‘be kwlaa nga be le tukpacifuɛ’n, be fali tukpacifuɛ wafa kwlaa be blɛli i. Yɛ ɔ fɛli i sa fuafuali be su naan b’a yo juejue.’ (Liki 4:40) Nanwlɛ, kɛ nga Ɲanmiɛn nuan ijɔfuɛ’m be fa kannin’n sa’n, Zezi yoli be nga tukpacɛ wafawafa o be su’n, be kwlaa be juejue. (Ezai 53:4) Sran nga mmusu’m be o be nun bɔbɔ’n, Zezi yoli maan mmusu’m be fin be nun be fiteli. Kɛ mmusu’m bé fín sran’m be nun bé fíte’n, be kpan kekle kpa se kɛ: “A ti Ɲanmiɛn i Wa.” (Liki 4:41) Sanngɛ Zezi ijɔli be. W’a manman be atin kɛ be ijɔ kaka. Be si kɛ i yɛ ɔ ti Klisi’n niɔn. Ɔ maan Zezi w’a kunndɛman kɛ mmusu’m be ijɔ kaka naan sran’m be bu i kɛ mmusu’m be su Ɲanmiɛn Kpli wie.