Zezi klo Zan Batɛmun yofuɛ’n i sa kpa. ?Sanngɛ wafa sɛ yɛ sran sunman be bu Zan-ɔn? Zezi fali sunnzun ase kun m’ɔ kwla uka e naan y’a tɛ kosan ngalɛ’n su’n. I waan i blɛ su sran’m “be fa ba kanngan wie mɔ be titi ase gua bo mɔ be kpan flɛ be wiengu nga be nin be kan ngowa’n. Be se kɛ: ‘E boli blo mannin amun, sanngɛ amun a siman able. E yili ngwlɛ, sanngɛ amun a sunman.’”​​—Matie 11:16, 17.

?Sunnzun ase nga Zezi fali’n, i bo’n yɛle benin? I bɔbɔ yiyili nun. Ɔ seli kɛ: “Kɛ Zan bali’n, ɔ diman like, yɛ ɔ nɔnman nzan kɛ sran onga’m be sa. Sanngɛ sran’m be waan: ‘Mmusu kun kle i yalɛ.’ Sran wa’n kusu bali, ɔ di like yɛ ɔ nɔn nzan, sanngɛ sran’m be waan: ‘Amun nian! Bian nga ti aliɛ safuɛ nin nzan nɔnfuɛ. Ɔ ti lapo defuɛ nin sa tɛtɛ yofuɛ’m be janvuɛ.’” (Matie 11:18, 19) Zan fɛli i wun mannin Ɲanmiɛn naan ɔ́ káci i liɛ klonglo. Ɔ maan like ng’ɔ ɲɛn i’n, ɔ ju i. W’a nɔnman nzan le bɔbɔ. Ɔ nin i sɔ ngba’n, i blɛ su sran’m be seli kɛ mmusu kun kle i yalɛ. (Kalɛ 6:2, 3; Liki 1:15) Zezi liɛ’n, ɔ yoli ninnge nga sran’m be yo be titi’n wie. Yɛle kɛ ɔ dili like yɛ ɔ nɔnnin nzan. Sanngɛ ɔ yoli i sɔ’n ngwlɛlɛ su. Ɔ nin i sɔ ngba’n, sran’m be seli kɛ ɔ ti aliɛ safuɛ nin nzan nɔnfuɛ. Ɔ maan kannzɛ bɔbɔ á kún ɔ wun mán sran sɔ mun’n, ɔ su yoman be like fi.

Zezi seli kɛ i blɛ su sran’m be ti kɛ ba kanngan wie mɔ like nga be wiengu’m be yo’n, be bumɛn i ndɛ’n be sa. Sɛ be janvuɛ’m be bo blo’n, be siman able. Sɛ be yi ngwlɛ’n, be sunman. Zezi kɛnnin i ekun kɛ: “Sanngɛ kɛ sran kun yo sa’m be nuan su sɛsɛsɛ’n, yɛ ɔ kle kɛ ɔ si ngwlɛlɛ-ɔ.” (Matie 11:16, 19) Ɔ maan ‘sa’ nga Zan nin Zezi be yoli’n, be kle kɛ sran’m be tɔnnin be suɛn ngbɛn.

Zezi seli kɛ i blɛ su sran’m b’a kaciman. I sin’n, ɔ buli klɔ wie m’ɔ yoli abonuan sa’m be su lɔ’n, be sufuɛ’m be fɔ. Be yɛle Korazɛnfuɛ mun nin Bɛtsaidafuɛ mun ɔ nin Kapɛɛnaɔmunfuɛ mun. Ɔ seli kɛ abonuan sa ng’ɔ yoli be klɔ sɔ’m be su’n, sɛ ɔ ti kɛ Fenisi klɔ nga be flɛ be Tir nin Sidɔn’n be su lɔ yɛ ɔ yoli be’n, nn lɔfuɛ’m be kacili be nzuɛn’n. Ɔ kannin Kapɛɛnaɔmun i ndɛ wie. Lɔ yɛ ɔ dili Ɲanmiɛn junman’n i dan lika-ɔ. I waan lɔfuɛ’m b’a kaciman be nzuɛn’n wie. I sɔ’n ti’n, ɔ kannin klɔ sɔ’n i ndɛ seli kɛ: “Jɔlɛ dilɛ cɛn’n nun’n, jɔlɛ nga bé dí wɔ’n, Sodɔmun klɔ’n i liɛ’n bɔbɔ’n ɔ́ yó sɔsɔ trá wɔ liɛ’n.”​​—Matie 11:24.

I sin’n, Zezi mɛnmɛnnin i Si Ɲanmiɛn. Afin Ɲanmiɛn fɛli i ndɛ’n m’ɔ ti cinnjin’n “fiali akunndanfuɛ mun nin sa sifuɛ’m be wun.” Sanngɛ ɔ yili i nglo kleli wun ase kanfuɛ mɔ be kwla fa be sunnzun ba kanngan mun’n. (Matie 11:25) Zezi yiali sran sɔ mun naan be blɛ i sin. Ɔ seli kɛ: “Amun kwlaa mɔ amun su fɛ’n, yɛ amun kwlaa mɔ trɔ w’a ti amun’n, amun bla min sin, yɛ ń yó maan amun wla gúa ase. Amun fa amun ti wla min kɔmin su waka’n i bo, yɛ amun fa like nga n kle’n su. Afin n ti wɛtɛɛfuɛ, yɛ n ti wun ase kanfuɛ. Ɔ maan amun wla wá gúa ase. Afin min kɔmin su waka’n i sualɛ yo fɛ, yɛ min trɔ’n ti fokofoko.”​​—Matie 11:28-30.

Like ng’ɔ ti Zuifu’m be Ɲanmiɛn sulɛ wafa’m be su kpɛnngbɛn’m be cinnjin kpa’n, yɛle be nannan’m be nzuɛn’n i su falɛ’n. I sɔ’n ti’n, mmla kaka nga be kpɛli’n be tin nvlefuɛ’m be su. I wie yɛle Wunmiɛn-lolɛ-cɛn’n i su mmla tɛkɛtɛkɛ nga be kpɛli’n. ?Sanngɛ Zezi liɛ’n, ngue yɛ ɔ yoli naan sran’m be wla w’a gua ase-ɔ? W’a faman Zuifu’m be nannan’m be nzuɛn’n w’a fa sannganman Ɲanmiɛn ndɛ’n nun. Ɔ maan kɛ ɔ yiyili Ɲanmiɛn ndɛ’n nun kleli sran mun’n, be wla guali ase. Asa ekun’n, be nga be wunman be wun fɛ mɛn siefuɛ’m be ti’n, ɔ fɔnvɔli be. Be nga kusu mɔ fɔ m’ɔ o be nun’n ti’n be sa sin bubu be’n, ɔ guali be awlɛn su nzue wie. Zezi kleli be like nga be kwla yo naan Ɲanmiɛn w’a yaci be wun sa’n w’a cɛ be’n, ɔ nin like nga be kwla yo naan be nin Ɲanmiɛn be afiɛn w’a sɛ’n.

Be kwlaa nga be ba Zezi sin mɔ be kplin su kɛ bé fá be ti wlɛ́ i kɔmin su waka’n i bo’n, be kwla klɛn be wun man Ɲanmiɛn yɛ be kwla su i. E Si Ɲanmiɛn kusu i like yolɛ yoman ya, ɔ si sran aunnvuɛ yɛ ɔ yo sran ye. Ɔ maan i sulɛ’n timan kɛ trɔ nɔnninnɔnnin wie mɔ be fa sua sran’n sa. Yɛle kɛ “i mmla’m be su falɛ yoman ya.”​​—1 Zan 5:3.