Zezabɛli tili sa ng’ɔ juli Baali i nuan ijɔfuɛ mun be su’n. Ɔ maan ɔ fali ya dan kpa. Ɔ sunmannin sran naan ɔ ko se Eli kɛ: ‘Ainman’n, ń kún wɔ kɛ nga a fa kunnin Baali i nuan ijɔfuɛ mun sa’n.’ Srɛ kunnin Eli dan. Ɔ wanndi ɔli aawlɛ flɛnnɛn’n nun lɔ. Ɔ seli Zoova kɛ: ‘Zoova, w’a yo kpa sɔ! Maan n wu kpɛkun.’ Kɛ mɔ Eli w’a fɛ dan’n ti’n, ɔ ko lali waka kun bo lɛ.

Anzi kun tinngeli i, kpɛkun ɔ seli i blɛlɛ kɛ: ‘Jaso naan di like.’ Eli wunnin kpanwun kan yɔbuɛ nglɛnglɛ wie mun be su, ɔ nin nzue klowa kun. Ɔ dili kpanwun’n yɛ ɔ nɔnnin nzue’n naan w’a la ekun. Anzi’n wa tinngeli i ekun, yɛ ɔ seli i kɛ: ‘Di like. Afin ɔ ɲrun atin’n te wa.’ Ɔ maan Eli dili like ekun. I sin’n, ɔ nantili cɛn ba ablanan (40) kɔnguɛ nin wia nun, lele ɔ juli Orɛbu oka’n su lɔ. Ɔ wluli yɔbuɛ buɛ kun nun naan ɔ́ láfi. I sin’n, Zoova nin i be ijɔli. Ɔ usɛli i kɛ: ‘?Eli, ngue yɛ a su yo i wa-ɔ?’ Eli tɛli i su kɛ: ‘Izraɛlifuɛ mun b’a nantiman ndɛ nga be kannin’n su. Be sacili ɔ tɛ yiwlɛ mun, yɛ be kunnin ɔ nuan ijɔfuɛ mun. Siɛn’n min yɛ be kunndɛ kɛ bé kún min-ɔn.’

Zoova seli i kɛ: ‘Fite ko jran oka’n su lɔ.’ I klikli nun’n, Zoova yoli maan aunmuan dan kpa kun fitali yɔbuɛ buɛ’n i ɲrun lɛ. I sin’n asiɛ’n kejeli, kpɛkun sin kun jueli. I sin ekun’n Eli tili sran kun nɛn. Sran sɔ’n i nɛn’n ti wɛtɛɛ. Eli fɛli i tralɛ’n kɛtɛli i ɲrun. Ɔ fite jrannin yɔbuɛ buɛ’n i ɲrun lɛ. Zoova usɛli i sa nga ti yɛ ɔ wanndili’n. Eli tɛli i su kɛ: ‘Min ngunmin yɛ n ti ɔ sufuɛ-ɔ.’ Sanngɛ Zoova seli i kɛ: ‘Nán ɔ ngunmin-ɔn. Sran akpi nso (7.000) be te su min Izraɛli mɛn’n nun. Kɔ naan ko sie Elize min nuan ijɔfuɛ, naan ɔ kaci wɔ.’ Be ja nun lɛ’n, Eli ko yoli like nga Zoova seli i kɛ ɔ yo’n. ?Kɛ a niɛn i sa’n, sɛ ɔ kusu a yo like nga Zoova se wɔ kɛ a yo’n, ɔ́ úka wɔ? Ɛɛn, ɔ́ úka wɔ. I nun mɔ nzue’n jrannin’n sa kun ekun juli. Maan e kɛn i ndɛ.