LIKE SUANLƐ 33
Riti nin Naomin
Blɛ wie nun’n, awe kpɛnnin Izraɛli lɔ. I sɔ’n ti’n, Izraɛli bla kun mɔ be flɛ i kɛ Naomin’n, ɔ nin i wun nin be wa yasua nɲɔn mun be ko trannin Moabu mɛn’n nun lɔ. Kɛ be juli lɔ’n, w’a cɛman, Naomin i wun’n wuli. I wa yasua nɲɔn mun be jali Moabu bla. Be flɛ kun i yi’n kɛ Riti, yɛ be flɛ kun liɛ’n kɛ Ɔrpa. I sin’n, Naomin i wa yasua nɲɔn mun be wuli.
Naomin tili i kɛ awe nunman Izraɛli lɔ kun. Ɔ maan, ɔ seli kɛ ɔ́ sɛ́ i sin. Kɛ ɔ́ kɔ́’n, Riti nin Ɔrpa be suli i su. Sanngɛ ɔ seli be kɛ: ‘Amun ti bla kpa. Amun niannin min nin min mma mun e lika. N kunndɛ kɛ amun ɲan bian ekun be ja. Amun sa amun sin Moabu lɔ.’ Be seli i kɛ: ‘E klo wɔ. E kunndɛman kɛ é yáci wɔ.’ Naomin seli be kpɛ sunman kɛ be sa be sin. Ɔrpa sɛli i sin. Sanngɛ Riti w’a sɛmɛn i sin wie. Naomin seli Riti kɛ: ‘Ɔrpa sɛli i sin i osufuɛ mun nin i amuin mun be wun. Su i su naan amun wɔ.’ Riti seli i kɛ: ‘N su yaciman wɔ. Ɔ nvle’n káci min nvle, yɛ ɔ Ɲanmiɛn’n káci min Ɲanmiɛn.’ ?Kɛ a niɛn i sa’n, ndɛ nga Riti kannin’n ɔ yoli Naomin sɛ?
Ɔrzu kpɛlɛ blɛ nun yɛ Riti nin Naomin be juli Izraɛli lɔ-ɔ. Cɛn kun’n, Riti ɔli ɔrzu isalɛ bian kun mɔ be flɛ i kɛ Boazi’n i fie’n su lɔ. Bian sɔ’n ti Raabu i wa. Ɔ tili i kɛ Riti ti Moabufuɛ naan ɔ nin Naomin be tran klanman. I sɔ’n ti’n, ɔ seli i junman difuɛ mun be kɛ be yaci ɔrzu’n wie fie’n nun naan Riti isa.
Cɛn sɔ’n nun nnɔsua’n, Naomin usali Riti kɛ: ‘?Wan fie su yɛ a dili junman andɛ-ɔ?’ Riti tɛli i su kɛ: ‘Bian kun mɔ be flɛ i kɛ Boazi’n i fie’n su yɛ n ɔli-ɔ.’ Naomin seli i kɛ: ‘Boazi ti min wun’n i osufuɛ. Kɔ i fie’n su lɔ titi naan a nin i talua mun be di junman. Lɔ liɛ’n be su kleman ɔ yalɛ.’
Riti dili junman Boazi i fie’n su lɔ lele be wieli ɔrzu’n i kpɛ. Boazi wunnin kɛ Riti kwla junman di, naan ɔ ti bla kpa. Blɛ sɔ nun’n, sɛ bla kun nin i wun b’a wuman ba naan bian’n wu’n, i osufuɛ kun kwla fa bla’n yo i yi. Ɔ maan Boazi jali Riti. Kpɛkun be wuli ba yasua kun. Be flɛli i kɛ Obɛdi. Ɔ wa yoli Davidi i nannan. Kɛ Riti wuli ba’n, ɔ yoli Naomin i tranfuɛ mun be fɛ. Be seli Naomin kɛ: ‘Zoova fali Riti mannin wɔ naan ɔ nian ɔ lika. Siɛn’n, w’a man ɔ anunman kun. Maan e la Zoova ase.’
“Janvuɛ’n wie kusu ti kpa tra be niaan.”—Nyanndra Mun 18:24.
Ninnge wie mɔ be kwla yo ɔ fɛ ekun'n
AMUN LAFI ƝANMIƐN SU KƐ BE SA
Riti—“A ti bla kpa”
?Ngue ti yɛ Riti nin Bɔazi be aja’n ti cinnjin ɔn? ?Ngue yɛ Riti nin Naomi be kle e awlobo tranlɛ’n su ɔ?
AMUN LAFI ƝANMIƐN SU KƐ BE SA
Riti—“Kan kwlaa nga á kɔ́’n, e nin wɔ ɔ”
?Ngue ti yɛ Riti kplinnin su kɛ ɔ́ yáci i osufuɛ nin i nvle’n kɔ́ lika uflɛ ɔ? ?Nzuɛn kpa benin yɛ ɔ yili be nglo mɔ be ti’n ɔ yoli Zoova i awlɛn su sran ɔn?
