Afuɛ kwlaa nun’n, Nizan anglo’n i le 14 su’n, Zifu’m be di Delɛ Cɛn’n. Be yo sɔ naan be wla kpɛn delɛ mɔ Zoova deli be Ezipti lɔ’n su. Kɛ ɔ deli be’n, ɔ fa be ɔli mɛn ng’ɔ seli kɛ ɔ́ fá mán be’n nun. Afuɛ 33 nun’n, Zezi nin i akoto’m be dili Delɛ Cɛn’n Zerizalɛmun lɔ nglo sua kun nun. Kɛ be wieli like di’n, Zezi seli kɛ: ‘Amun nun kun wá yí min mán.’ Ndɛ sɔ’n yoli akoto’m be ya dan, ɔ maan be usɛli i kɛ: ‘?Wan-ɔn?’ Zezi tɛli be su kɛ: ‘Sran nga n su fa kpanwun nga n mɛn i’n niɔn.’ Zezi fali kpanwun sin kun mannin Zida Iskariɔti. Kɛ ɔ yoli sɔ cɛ’n, Zida jaso fiteli.

Zezi srɛli Ɲanmiɛn, ɔ bubuli kpanwun nun fa cɛcɛli i akoto nga be kali lɛ’n. Zezi seli kɛ: ‘An di kpanwun nga. Ɔ ti min wunnɛn mɔ amun ti’n n su fa man’n i nzɔliɛ.’ I sin’n, ɔ fali duvɛn klowa kun, ɔ srɛli Ɲanmiɛn, kpɛkun ɔ fa mɛnnin i sɔnnzɔnfuɛ mun. Ɔ seli be kɛ: ‘An nɔn duvɛn nga. Ɔ ti min mmoja mɔ maan Ɲanmiɛn kwla yaci sran’m be sa tɛ mun cɛ be’n i nzɔliɛ. E nin amun é wá dí famiɛn ɲanmiɛn su lɔ. Maan amun yo i kunngba’n afuɛ kwlaa nun naan amun wla kpɛn min su.’ Ɔ maan afuɛ kwlaa nun’n, kɛ cɛn sɔ’n ju’n, nnɔsua’n Zezi i sɔnnzɔnfuɛ’m be yia be yo i kunngba’n. Andɛ’n be flɛ aɲia sɔ’n kɛ e Min’n i Nnɔsua nun Aliɛ.

 Kɛ be wieli like di’n, akoto’m be sili akplowa naan bé sí be nun sran ng’ɔ ti sran dan’n. Zezi seli be kɛ: ‘Sran ng’ɔ bu i wun kɛ ɔ ti amun nun kaan’n i yɛ ɔ ti amun nun sran dan’n niɔn.

‘Amun ti min janvuɛ. Ndɛ kwlaa nga min Si kunndɛ kɛ n kan kle amun’n n kan kle amun. Ɔ cɛ kan’n, ń kɔ́ min Si sin ɲanmiɛn su lɔ. Amún ká wa, yɛ klolɛ mɔ amun fa klo amun wiengu’n ti’n sran’m bé sí kɛ amun ti min sɔnnzɔnfuɛ. Ɔ fata kɛ amun klo amun wiengu kɛ nga n fa kloli amun’n sa.’

I sin’n, Zezi srɛli Zoova. Ɔ seli i kɛ ɔ sɛsɛ i sɔnnzɔnfuɛ mun, yɛ ɔ uka be naan be bo yo kun be di junman. Ɔ srɛli kɛ maan Zoova i dunman’n yo sanwun. Zezi nin i sɔnnzɔnfuɛ’m be toli jue manmannin Zoova, kpɛkun be fiteli. Siɛn’n, blɛ m’ɔ fata kɛ be tra Zezi’n w’a mantan koko.