Kɛ Zezi wuli’n, aɲanbeunfuɛ bian kun mɔ be flɛ i Zozɛfu’n, ɔ wa seli Pilati kɛ ɔ mɛn i atin naan ɔ ko yi Zezi i fuɛn’n waka’n su. Ɔ guaguali Zezi i fuɛn’n i su ayre fannin yɛ ɔ fali tannin kpa kun cicili i wun. Ɔ ko sieli i asieliɛ uflɛuflɛ kun nun. Kpɛkun ɔ kondoli yɔbuɛ dan kun sieli i asieliɛ sɔ’n i nuan’n su. Ɲanmiɛn ɲrun jranfuɛ mun be su kpɛn mun be ko seli Pilati kɛ: ‘Ɔ cɛman naan Zezi i sɔnnzɔnfuɛ mun b’a ko wuɛ i fuɛn’n naan b’a se kɛ w’a sɛ i sin nguan nun.’ Pilati seli kɛ: ‘Amun ko kata asieliɛ’n i nuan’n su kekle kpa, yɛ amun fa sonja mun naan be nian su.’

Kɛ cɛn nsan sinnin’n, bla wie mun be ɔli Zezi i asieliɛ’n su lɔ nglɛmun ndɛ kpa. Be wunnin kɛ b’a kondo yɔbuɛ ng’ɔ o asieliɛ’n i nuan’n su’n. Anzi kun o asieliɛ’n nun lɔ. Ɔ seli bla mun be kɛ: ‘Nán srɛ kun amun. Zezi cɛnnin nguan. Amun wɔ be ko se i sɔnnzɔnfuɛ mun kɛ be to i Galile lɔ.’

Mari m’ɔ fin Magdala’n ɔ wanndi ko boli ndɛ’n su kleli Piɛli nin Zan. Ɔ seli be kɛ: ‘Sran kun w’a fa Zezi i fuɛn’n w’a wɔ.’ Piɛli nin Zan be wanndi ɔli asieliɛ’n su lɔ. Kɛ be niannin lɔ mɔ b’a wunman Zezi i fuɛn’n, be sali be sin awlo.

Kɛ Mari sɛli i sin asieliɛ’n su lɔ’n, ɔ wunnin anzi nɲɔn asieliɛ’n nun lɔ. Ɔ seli be kɛ: “Be yili min Min’n be ɔli. N siman lika nga be ko sieli i’n.” I sin’n ɔ wunnin bian kun. Ɔ bu i kɛ fie’n i sunianfuɛ’n niɔn. Ɔ seli i kɛ: “Nja, kle min lika nga a ko sieli i’n.” Sanngɛ kɛ bian’n seli kɛ, “Mari!” ɔ wunnin i wlɛ kɛ Zezi-ɔ. Mari kpan seli kɛ: “Like klefuɛ.” Kpɛkun ɔ trali Zezi nun. Zezi seli i kɛ: ‘Kɔ naan ko se min niaan mun kɛ a wunnin min.’ Kɛ ɔ seli sɔ cɛ’n, Mari wanndi ko toli Zezi i sɔnnzɔnfuɛ mun, kpɛkun ɔ seli be kɛ ɔ wunnin Zezi.

Kɛ ɔ cɛli kan’n, Zezi i sɔnnzɔnfuɛ nɲɔn be fin Zerizalɛmun be su kɔ Emaisi. Bian kun toli be atin’n su, kpɛkun ɔ usali be ndɛ nga be su koko su yalɛ’n. Be tɛli i su kɛ: ‘?A nin-a timan wie? Ɲanmiɛn ɲrun jranfuɛ mun be su kpɛn mun be kunnin Zezi i cɛn nsan yɛ. Sanngɛ bla wie mun be waan w’a sɛ i sin nguan nun.’ Bian’n seli be kɛ: ‘?Amun lafiman Ɲanmiɛn nuan  ijɔfuɛ mun be ndɛ’n su? Be seli kɛ Klisi’n wá wú, kpɛkun ɔ́ sɛ́ i sin nguan nun ekun.’ Ɔ yiyili Ɲanmiɛn Ndɛ’n nun kleli be. Kɛ be juli Emaisi’n, Zezi i sɔnnzɔnfuɛ mun be seli i kɛ ɔ su be su. Kɛ bé dí like mɔ bian’n srɛli Ɲanmiɛn’n, be wunnin i wlɛ kɛ Zezi-ɔ. Kpɛkun ɔ mlinnin be ɲrun.

Zezi i sɔnnzɔnfuɛ nɲɔn sɔ mun be wanndi ɔli Zerizalɛmun. Be ɔli sua kun mɔ akoto mun be yiali nun lɔ’n i nun. Be kannin sa ng’ɔ juli’n i ndɛ kleli akoto mun. Kɛ be o sua’n nun lɔ’n, Zezi fiteli be kwlaa be ɲrun. I klikli’n nun’n, akoto mun b’a bumɛn i kɛ Zezi-ɔ. Sanngɛ Zezi seli be kɛ: ‘An nian min sa mun. An kan min. Be klɛli i kɛ Klisi’n wá cɛ́n nguan.’