Like kwlaa nga Farizifuɛ’m be yo’n, be yo be fa kunndɛ dunman. Sɛ be yo sa kpa’n, be kunndɛ kɛ sran’m be sie i nzɔliɛ. Farizifuɛ’m be jran lika nga sran’m be kwla wun be lɛ’n yɛ be srɛ Ɲanmiɛn-ɔn. Be suan Ɲanmiɛn srɛlɛ wafa wie mɔ be ti tɛnndɛn kpa’n. Kpɛkun kɛ be kɔ Ɲanmiɛn sulɛ sua’n nun lɔ’n, annzɛ be o anngɔnda’m be su’n, be kan ndɛ kunngba’n flan nun. I sɔ’n ti’n, ndɛ nga Zezi kannin’n, ɔ boli sran’m be nuan. Ɔ seli kɛ: ‘Nán amun srɛ Ɲanmiɛn kɛ Farizifuɛ mun sa. Be bu i kɛ sɛ be kan ndɛ kpanngban’n yɛ Ɲanmiɛn tí-ɔ. Sanngɛ i sɔ yolɛ’n ti ngbɛn. Srɛlɛ’n ti sran kun nin Zoova be afiɛn ndɛ. Nán amun kan ndɛ kunngba’n flan nun sa trilili. Zoova kunndɛ kɛ amun kan amun klun ndɛ kle i.

‘Wafa ng’ɔ fata kɛ amun srɛ Ɲanmiɛn’n yɛ: “E Si m’ɔ o ɲanmiɛn su lɔ’n, maan ɔ dunman’n yo sanwun. Maan ɔ Sielɛ’n i blɛ’n ju. Maan be yo  ɔ klun sa’n asiɛ’n su wa kɛ nga be fa yo i ɲanmiɛn su lɔ’n sa.”’ Asa ekun’n, Zezi seli be kɛ be srɛ Ɲanmiɛn naan ɔ man be cɛn ba kun nun aliɛ, ɔ yaci be wun sa’n cɛ be, yɛ be srɛ ninnge uflɛ wie mun ekun be ti.

Zezi seli be kɛ: ‘Nán amun yaci Ɲanmiɛn srɛlɛ. Amun srɛ ninnge kpakpa mun amun Si Zoova i sa nun titi. Siɛ nin niɛn’m be kunndɛ kɛ bé fá like kpa bé mán be mma mun. ?Sɛ amun wa kun se amun kɛ amun mɛn i kpanwun’n, yɔbuɛ yɛ amún fá mɛ́n i-ɔ? ?Sɛ ɔ srɛ amun jue’n, amún fá wuo mɛ́n i?’

Ndɛ sɔ mɔ Zezi kannin’n, ɔ yiyili nun. Ɔ seli kɛ: ‘Sɛ amun fa ninnge nga be ti kpa’n man amun mma mun’n, nán amun Si Zoova yɛ ɔ su fɛmɛn i wawɛ’n manman amun-ɔn.’ Like ng’ɔ fata kɛ amun yo’n, yɛle kɛ amun srɛ i.’ ?A nanti Zezi i afɔtuɛ sɔ’n su? ?Ngue yɛ a kɛn i ndɛ ɔ srɛlɛ’n nun-ɔn?