LIKE SUANLƐ 53
Fa like kpa yiyi ɔ ɲin su
Zoova ti ‘Ɲanmiɛn kun m’ɔ di aklunjɔɛ-ɔ.’ (1 Timote 1:11) Ɔ kunndɛ kɛ e kusu e di aklunjɔɛ wie. Kɛ e sie blɛ e fa yiyi e ɲin su’n, i sɔ’n jɔ i klun. Like suanlɛ nga nun’n, é wá wún wafa nga e kwla fa like kpa e yiyi e ɲin su naan Zoova i kun w’a jɔ e wun’n.
1. ?Ngue yɛ ɔ fataman kɛ e wla fi su kwlaa naan y’a fa like kun y’a yiyi e ɲin su-ɔ?
?Kɛ á yíyí ɔ ɲin su’n, ngue yɛ a klo i yolɛ-ɔ? Sran wie’m be liɛ’n be ka awlo lɔ be lo wunmiɛn kan, wie’m be kanngan fluwa kun nun, annzɛ be tie miziki, annzɛ be nian flimun, annzɛ be kɔ ɛntɛnɛti su. Wie mun ekun be nin be janvuɛ mun be to balɔn, annzɛ zevideo annzɛ kusu be kɔ nzue wuɛlɛ kan. I kwlaa yoli-o, ɔ fata kɛ like nga e fa yiyi e ɲin su’n ɔ yo ‘e Min’n i klun su.’ (Efɛzifuɛ Mun 5:10) I sɔ’n liɛ’n ti cinnjin. Afin be ɲin su yiyilɛ ninnge wie’m be nun’n, sran’m be yo nzaje sa mun, be kunndɛ bla annzɛ bian sukusuku, annzɛ be yo bae dilɛ ninnge wie mun. Zoova kpɔ be ɲin su yiyilɛ wafa sɔ mun. (Kanngan Jue Mun 11:5 nun.) ?Ngue yɛ ɔ kwla uka e naan y’a fa like kpa y’a yiyi e ɲin su-ɔ?
Sɛ e janvuɛ’m be klo Zoova’n, i sɔ’n úka e naan y’a fa like kpa y’a yiyi e ɲin su. Kɛ nga e fa wunnin i like suanlɛ nga be sinnin lɛ’n be nun kun nun’n sa’n, “sran ng’ɔ nin ngwlɛlɛfuɛ’n be nanti’n, ɔ́ káci ngwlɛlɛfuɛ,” sanngɛ sɛ e nin be nga be kloman Ɲanmiɛn i mmla mun yɛ e san nun’n é “ɲán ndɛ.”—Ɲanndra Mun 13:20.
2. ?Ngue ti yɛ ɔ ti cinnjin kɛ e nian blɛ nga e fa yiyi e ɲin su’n su-ɔ?
Kannzɛ bɔbɔ e fa like kpa e yiyi e ɲin su’n, sanngɛ ɔ fata kɛ e nian blɛ nga e fa yiyi e ɲin su’n su. Sɛ y’a yoman sɔ’n, e su ɲanman blɛ naan y’a yo ninnge cinnjin kpafuɛ mun. Biblu’n se e kɛ ‘e fa e blɛ’n e yo ninnge nga be ti cinnjin’n.’—Kanngan Efɛzifuɛ Mun 5:15, 16 nun.
SI NDƐ’N NUN KPA EKUN
É wá kán like nga e kwla yo naan y’a yiyi e ɲin su kɛ ng’ɔ nin i fata’n sa’n i ndɛ.
3. Nán fa like tɛ yiyi ɔ ɲin su
?Ngue ti yɛ ɔ fata kɛ e kpa like nga e fa yiyi e ɲin su’n nun-ɔn? An bo VIDEO’N, i sin’n an koko kosan yɛ’m be su yalɛ.
-
?Ngue ti yɛ e kwla se kɛ Rɔmun lɔ sonja nga be tu ngondin lele be nun kun wu’n, be ngowa kanlɛ sɔ’n ɔ nin ajulisu ngowa kanlɛ wie’m be ti kun-ɔn?
-
?Video’n nun’n, be ɲin su yiyilɛ’n i su like benin yɛ Danin wa wunnin i wlɛ-ɔ?
An kanngan Rɔmunfuɛ Mun 12:9 nun, i sin’n an koko kosan yɛ’n i su yalɛ.
-
?Wafa sɛ yɛ Biblu’n nun ndɛ mma nga kwla uka wɔ naan w’a fa like kpa w’a yiyi ɔ ɲin su-ɔ?
?Ninnge benin wie mun yɛ Zoova klo be-ɔ? An kanngan Ɲanndra Mun 6:16, 17 nin Galasifuɛ Mun 5:19-21 nun. Kɛ amun ko wie ndɛ mma kun nun kanngan’n, an koko kosan yɛ’n i su yalɛ:
-
?Ninnge nga be boboli be su lɛ’n be nun onin yɛ be ta be wun ninnge nga sran’m be fa yiyi be ɲin su andɛ’n be nun-ɔn?
?Ngue yɛ ɔ kwla uka ɔ naan w’a fa like kpa w’a yiyi ɔ ɲin su-ɔ?
Usa wɔ wun kɛ...
-
?Like wie o nun mɔ Zoova kpɔ i-ɔ?
-
?Min ɲin su yiyilɛ’n ti’n min ɲin kpa ninnge wie’m be su?
-
?E nin be nga be kloman Zoova’n yɛ e yiyi e ɲin su tikatika-ɔ?
Like nga e si kɛ sɛ e yo’n ɔ kwla kpɛ ndɛ man e’n e su yoman. I wafa kunngba’n, sɛ e wun kɛ e ɲin su yiyilɛ wie o lɛ m’ɔ kwla kpɛ ndɛ man e’n, ɔ fataman kɛ e fa e wun e wla nun.
4. Fa ɔ blɛ’n yo ninnge nga be ti cinnjin kpa’n
An bo VIDEO’N, i sin’n an koko kosan yɛ’n i su yalɛ.
-
?Video’n nun’n, kannzɛ aniaan’n faman like tɛ yiyimɛn i ɲin su’n, sanngɛ ngue yɛ ɔ yo m’ɔ timan su-ɔ?
An kanngan Filipufuɛ Mun 1:10 nun, i sin’n an koko kosan yɛ’n i su yalɛ.
-
?Wafa sɛ yɛ Biblu’n nun ndɛ mma nga kwla uka e naan blɛ nga e fa yiyi e ɲin su’n w’a sɔnman ngboko-ɔ?
5. Fa like kpa yiyi ɔ ɲin su
Kannzɛ be ɲin su yiyilɛ wafa wie’m be o lɛ mɔ Zoova kloman be’n, sanngɛ be nun kpanngban o lɛ mɔ i klun jɔ su-ɔ. An kanngan Akunndanfuɛ’n 8:15 nin Filipufuɛ Mun 4:8 nun, i sin’n an koko kosan yɛ’n i su yalɛ:
-
?Be ɲin su yiyilɛ wafa benin yɛ a klo i kpa-ɔ?
A kwla yiyi ɔ ɲin su kɛ ng’ɔ nin i fata’n sa kpɛkun a di su aklunjɔɛ.
SRAN WIE’M BE WAAN: “Be ɲin su yiyilɛ wafa nga nzaje sa yolɛ’n, ɔ nin bian nin bla kunndɛlɛ sukusuku’n, ɔ nin bae dilɛ o nun’n be timan tɛ. Kɛ ɔ bɔbɔ a yo ninnge sɔ mun’n yɛ ɔ ti tɛ-ɔ.”
-
?Sɛ be se wɔ sɔ’n, á tɛ́ su sɛ?
NDƐ’N I KPƆLƐ BOLƐ
Zoova kunndɛ kɛ e fa like kpa e yiyi e ɲin su.
Ndɛ’n i nun flanlɛ
-
?Be ɲin su yiyilɛ wafa benin yɛ ɔ fata kɛ Klisifuɛ’m be kpalo be-ɔ?
-
?Ngue ti yɛ ɔ ti cinnjin kɛ e nian blɛ nga e fa yiyi e ɲin su’n su-ɔ?
-
?Ngue ti yɛ a kunndɛ kɛ like ng’ɔ jɔ Zoova klun’n yɛ á fá yíyí ɔ ɲin su-ɔ?
NDƐ WIE MUN EKUN
?Wan yɛ ɔ fata kɛ ɔ kle e like ng’ɔ fata kɛ e fa yiyi e ɲin su’n niɔn?
“?Miziki wie o lɛ mɔ be manman Zoova i Lalofuɛ’m be atin kɛ be tie-ɔ?” (jw.org su ndɛ)
Ninnge wie mɔ be kwla uka wɔ naan w’a fa like kpa w’a yiyi ɔ ɲin su’n.
“?Amun ɲin su yiyilɛ wafa’n ti kpa?” (Sasafuɛ Tranwlɛ’n, afuɛ 2011, Ɔktɔblu 15)
Like nga ti yɛ bian kun kacili ninnge ng’ɔ fa yiyi i ɲin su’n.
“Biblu’n maan sran’m be kaci” (Sasafuɛ Tranwlɛ’n nun ndɛ)
Like ng’ɔ ukali niɛn kun naan w’a kpalo be ɲin su yiyilɛ nga bae dilɛ ninnge’m be o nun’n.
Maan e kpalo be ɲin su yiyilɛ ninnge nga bae dilɛ o nun’n (2:02)
Ninnge wie mɔ be kwla yo ɔ fɛ ekun'n
KOSAN NGA SRAN’M BE TA BE USA’N
?Ngue yɛle Biblu’n nun like mɔ Zoova i Lalofuɛ’m be nin sran’m be suan’n?
A kwla fa Biblu’n nga a klo’n naan Zoova i Lalofuɛ kun w’a kle ɔ like. Ɔ osufuɛ mun nin ɔ janvuɛ’m be kwla tran like suanlɛ’n i bo wie. Be deman sika.
