LIKE SUANLƐ 09
Fa ɔ wun mantan Ɲanmiɛn srɛlɛ nun
?A nin-a kunndɛman le kɛ be kle ɔ like ng’ɔ fata kɛ á yó’n? ?A usa ɔ wun kosan cinnjin wie mɔ a kunndɛ kɛ be tɛ be su man wɔ-ɔ? ?A kunndɛ kɛ be fɔnvɔ wɔ annzɛ be wla ɔ fanngan? ?A kunndɛ kɛ a nin Zoova amun afiɛn mantan? Ɲanmiɛn srɛlɛ’n kwla uka ɔ sa kwlaa sɔ’m be nun. ?Sanngɛ wafa sɛ yɛ ɔ fata kɛ a srɛ Ɲanmiɛn-ɔn? ?Ɲanmiɛn tie srɛlɛ’m be kwlaa? ?Ngue yɛ á yó naan Ɲanmiɛn w’a tie ɔ srɛlɛ mun-ɔn? Maan e nian.
1. ?Wan yɛ ɔ fata kɛ e srɛ i-ɔ? ?Yɛ ngue yɛ e kwla kɛn i ndɛ e srɛlɛ’n nun-ɔn?
Zezi seli kɛ ɔ fata kɛ e srɛ e Si m’ɔ o ɲanmiɛn su lɔ’n i kunngba cɛ. Zezi bɔbɔ srɛli Zoova. Ɔ seli kɛ: “I sɔ’n ti’n, amun liɛ’n, wafa ng’ɔ fata kɛ amun srɛ Ɲanmiɛn’n yɛ: ‘E Si m’ɔ o ɲanmiɛn su lɔ’n ...’” (Matie 6:9) Kɛ e srɛ Zoova’n e nin i e afiɛn mantan kpa.
Sɛ é kwlá sé’n, e kwla kan sa kwlaa ndɛ e srɛlɛ’n nun. Sanngɛ sɛ e waan Ɲanmiɛn tɛ e srɛlɛ’m be su’n, ɔ fata kɛ be nin i klun sa’n be wɔ likawlɛ. Biblu’n se kɛ: “Srɛlɛ kwlaa nga e srɛ [Ɲanmiɛn] m’ɔ ti i klun su’n, ɔ sie i su tie.” (1 Zan 5:14) Zezi kannin ninnge ng’ɔ fata kɛ e kan be ndɛ e srɛlɛ’n nun’n be nun wie’m be ndɛ. (Kanngan Matie 6:9-13 nun.) Kɛ é srɛ́ Ɲanmiɛn’n nán maan e kan sa ng’ɔ o e su’n i ngunmin ndɛ. Sanngɛ maan e la Ɲanmiɛn i ase wie, yɛ e srɛ i kɛ ɔ uka e wiengu mun.
2. ?Wafa sɛ yɛ ɔ fata kɛ e srɛ-ɔ?
Biblu’n wla e fanngan kɛ ‘e kan ndɛ ng’ɔ o e awlɛn’n nun’n i kwlaa e kle Ɲanmiɛn.’ (Jue Mun 62:8) Ɔ maan ɔ fata kɛ e srɛlɛ’n, ɔ fin e awlɛn’n nun. Kɛ é srɛ́’n, e kwla man e nɛn’n su annzɛ e kwla srɛ e klun lɔ. Sɛ e koto-o, annzɛ e tran ase-o, annzɛ e jran nglo-o, nɛ́n i sɔ’n yɛ ɔ ti cinnjin-ɔn. Ng’ɔ ti cinnjin’n yɛle kɛ maan e kle kɛ e ɲin yi Ɲanmiɛn. E kwla srɛ Ɲanmiɛn blɛ kwlaa nun, ɔ nin lika kwlaa.
3. ?Wafa sɛ yɛ Ɲanmiɛn tɛ e srɛlɛ’m be su-ɔ?
Wafa nga Ɲanmiɛn tɛ e srɛlɛ’m be su’n ɔ sɔnnin. I wie yɛle kɛ Zoova fɛli i nuan ndɛ’n mɔ yɛle Biblu’n mannin e. Blɛ sunman’n, kosan nga e fa usa e wun’n e wun be su tɛlɛ’n Biblu’n nun. Ɲanmiɛn Ndɛ’n i nun kannganlɛ’n kwla “yo maan sran ng’ɔ siman sa’n ɔ yo ngwlɛlɛfuɛ.” (Jue Mun 19:7. Kanngan Zaki 1:5 nun.) Kɛ sa’m be tɔ e su’n, Ɲanmiɛn kwla yo maan e wla gua ase. Ɔ kwla yo maan blɛ mɔ e mian ukalɛ wun’n, i sufuɛ’m be uka e.
SI NDƐ’N NUN KPA EKUN
Maan e nian wafa nga a kwla tu ɔ klun srɛ Ɲanmiɛn naan i klun w’a jɔ su’n, ɔ nin wafa nga Ɲanmiɛn srɛlɛ’n kwla yo ɔ ye’n.
4. Like nga Ɲanmiɛn kunndɛ kɛ e yo naan w’a tie e srɛlɛ’n
?Sɛ e waan Ɲanmiɛn tie e srɛlɛ mun’n, ngue yɛ ɔ fata kɛ e yo-ɔ, yɛ ngue yɛ ɔ fataman kɛ e yo-ɔ? An bo VIDEO’N.
Zoova kunndɛ kɛ e srɛ i. An kanngan Jue Mun 65:2 nun, i sin’n an koko kosan yɛ’m be su yalɛ:
-
?A bu i kɛ Ɲanmiɛn kunndɛ kpa kɛ ‘ɔ́ tíe ɔ srɛlɛ mun’? ?Ngue ti-ɔ?
Sɛ e waan Ɲanmiɛn tie e srɛlɛ mun’n, ɔ fata kɛ e yo like ng’ɔ se e kɛ e yo’n. An kanngan Mise 3:4 nin 1 Piɛli 3:12 nun, i sin’n an koko kosan yɛ’n i su yalɛ:
-
?Like benin yɛ sɛ e yo’n, e kwla lafi su kɛ Zoova tíe e srɛlɛ mun-ɔn?
Alɛ blɛ nun’n, be nga be kun alɛ’n be bue nɲɔn’m be srɛ Ɲanmiɛn. ?Kɛ a niɛn i sa’n, Ɲanmiɛn kwla tɛ be bue nɲɔn’m be srɛlɛ’n su?
5. Ɔ fata kɛ e srɛlɛ’m be fin e awlɛn’n nun lɔ
Sran wie’m be liɛ’n, be suan srɛlɛ mun yɛ be kan flan nun, afin i sɔ yɛ be kleli be-ɔ. ?Sanngɛ i sɔ yɛ Ɲanmiɛn kunndɛ kɛ e yo-ɔ? An kanngan Matie 6:7 nun, i sin’n an koko kosan yɛ’n i su yalɛ:
-
?Ngue yɛ a kwla yo naan kɛ á srɛ́ Ɲanmiɛn’n w’a ‘kanman ndɛ kunngba’n w’a flanman nun-ɔn’?
Aliɛ ba kwlaa nun’n, bu like trele kun mɔ Zoova yo mannin wɔ’n i akunndan, yɛ lɛ i ase like sɔ’n ti. Yo sɔ cɛn kwlakwla lele lemɔcuɛ kun. Sɛ a yo sɔ’n, á wá wún kɛ a kannin like fanunfanun nso be ndɛ ɔ srɛlɛ’n nun.
Siɛ ng’ɔ ti kpa’n, ɔ kunndɛ kɛ i wa’n kɛn i klun ndɛ kle i. I kunngba’n, Zoova kunndɛ kɛ e kan e klun ndɛ e kle i.
6. Srɛlɛ’n ti like cinnjin kun mɔ Ɲanmiɛn fa cɛli e-ɔ
?Wafa sɛ yɛ Ɲanmiɛn srɛlɛ’n kwla uka e blɛ kwlaa nun-ɔn? An bo VIDEO’N.
Biblu’n se kɛ srɛlɛ’n kwla uka e naan e wla w’a gua ase. An kanngan Filipufuɛ Mun 4:6, 7 nun, i sin’n an koko kosan yɛ’m be su yalɛ:
-
?Kannzɛ bɔbɔ kɛ e srɛ’n nán blɛ kwlaa nun yɛ e su sa’m be wie’n, sanngɛ wafa sɛ yɛ srɛlɛ’n kwla uka e-ɔ?
-
?Ninnge benin mun yɛ a kunndɛ kɛ á kán be ndɛ ɔ srɛlɛ’n nun-ɔn?
Nian nga wie
Kɛ ɔ fɛ i laa lele’n, kɛ sran’m be srɛ’n i agualiɛ su’n be sɛ kɛ “maan ɔ yo sɔ.”—1 Be Ɲoliɛ 16:36.
7. Maan e srɛ Ɲanmiɛn cɛn kwlakwla
Ɔ ju wie’n e ɲanman e ti, ɔ maan e wla fi Ɲanmiɛn srɛlɛ’n su. ?Wafa sɛ yɛ Zezi kleli kɛ Ɲanmiɛn srɛlɛ’n ti cinnjin-ɔn? An kanngan Matie 14:23 nin Marki 1:35 nun, i sin’n an koko kosan yɛ’m be su yalɛ:
-
?Ngue yɛ Zezi yoli naan w’a ɲan blɛ w’a srɛ Ɲanmiɛn-ɔn?
-
?Blɛ benin nun yɛ a kwla srɛ Ɲanmiɛn-ɔn?
SRAN WIE’M BE WAAN: “Srɛlɛ’n ti blɛ sacilɛ, afin sran fi tieman.”
-
?A bu ndɛ sɔ’n i sɛ?
NDƐ’N I KPƆLƐ BOLƐ
Kɛ e tu e klun e srɛ Zoova’n e nin i e afiɛn mantan, e wla gua ase, yɛ e ɲan wunmiɛn e yo i klun sa’n.
Ndɛ’n i nun flanlɛ
-
?Wan yɛ ɔ fata kɛ e srɛ i-ɔ?
-
?Wafa sɛ yɛ ɔ fata kɛ e srɛ-ɔ?
-
?Wafa sɛ yɛ srɛlɛ’n kwla uka e-ɔ?
NDƐ WIE MUN EKUN
Srɛlɛ’n i su kosan wie mɔ sran sunman be fa usa be wun’n be su tɛlɛ’n.
“Ninnge nso m’ɔ fata kɛ e si be Ɲanmiɛn srɛlɛ’n su’n” (Sasafuɛ Tranwlɛ’n, afuɛ 2010 Novanblu 1)
Like nga ti yɛ ɔ ti cinnjin kɛ a srɛ Ɲanmiɛn’n, ɔ nin like nga a kwla yo naan w’a si Ɲanmiɛn srɛ kpa’n.
Sran nga Biblu’n kle kɛ i yɛ ɔ fata kɛ e srɛ i’n.
“?Ɔ fata kɛ e srɛ be nga be flɛ be sɛsɛfuɛ mun?” (jw.org su ndɛ)
Video nga kle kɛ e kwla srɛ Ɲanmiɛn’n blɛ kwlaa nun, nin lika kwlaa.
Ninnge wie mɔ be kwla yo ɔ fɛ ekun'n
KOSAN NGA SRAN’M BE TA BE USA’N
?Ngue yɛle Biblu’n nun like mɔ Zoova i Lalofuɛ’m be nin sran’m be suan’n?
A kwla fa Biblu’n nga a klo’n naan Zoova i Lalofuɛ kun w’a kle ɔ like. Ɔ osufuɛ mun nin ɔ janvuɛ’m be kwla tran like suanlɛ’n i bo wie. Be deman sika.
