ZOZIASI le afuɛ mɔcuɛ cɛ, yɛ ɔ yoli Izraɛli ngua lɔ akpasua nɲɔn’n be su famiɛn’n niɔn. I yɛ ɔ yoli Izraɛli famiɛn mun, be nun bakan’n niɔn. Ɔ maan i klikli nun’n, kpɛnngbɛn’m be ukɛli i naan w’a sie famiɛn diwlɛ’n.

Kɛ Zoziasi yoli famiɛn’n, ɔ fɛli i wun mantannin Zoova lele afuɛ nso. Ɔ fali famiɛn kpa mun kɛ Davidi nin Zozafati nin Ezekiasi be ajalɛ liɛ’n su. I nun m’ɔ te yo gbanflɛn’n, Zoziasi yoli yakpa like kun.

Izraɛlifuɛ’m be dan lika be boli tete ninnge’m be yolɛ bo i osu w’a cɛ. Be sɔ amuɛn mun, be koto be bo. I sɔ ti’n, Zoziasi nin i sran’m be yiyili amuɛn wafawafa kwlaa nga be sɔ be’n lika wunmuan’n nun. Nán junman kaan yɛle i sɔ’n, afin be nga be sɔ amuɛn’m be sɔnnin. Zoziasi nin i sran mun yɛle nga be bubu amuɛn ba’m be nun desɛn’n su lɛ’n.

I sin’n, Zoziasi sieli sran nsan kɛ be nian Zoova i sua’n su naan be siesie i ye. Nvlefuɛ’m be boli sika be mannin junman sunianfuɛ mun naan b’a fa di junman’n. Kɛ bé dí Ɲanmiɛn i sua’n nun lɔ junman’n, Ɲanmiɛn ɲrun jranfuɛ Ilkiza wunnin like nanndoliɛ kun. Be wunnin Ɲanmiɛn i mmla mɔ Moizi klɛli i laa’n. Ɔ mlinnin i afuɛ kɔe wie yɛ.

Be fali fluwa’n ko mannin Zoziasi naan w’a se kɛ be kanngan nun be kle i. Kɛ bé kánngan fluwa’n nun bé kɔ́’n, Zoziasi wunnin kɛ nvlefuɛ’m be faman Zoova i mmla’n su. Ɔ yoli famiɛn’n i ya lele trali su. I ti’n ɔ titili i wun tralɛ’n nun kɛ nga amun wun i yɛ’n sa. Ɔ seli kɛ: ‘Fluwa nga i nun ndɛ’n, e nannan’m b’a faman i ngba su, b’a diman su. Ɔ maan Anannganman w’a fa e wun ya dan kpa.’

Zoziasi seli Ɲanmiɛn ɲrun jranfuɛ’m be su kpɛn’n Ilkiza kɛ ɔ usa like nga Zoova wá yó be’n. Ilkiza ɔli Ɲanmiɛn nuan ijɔfuɛ bla nga be flɛ i Ilda’n i sin, naan w’a usɛ i. Ilda waan be ko se Zoziasi kɛ Zoova waan yoo: ‘Ń wá yó maan ɲrɛnnɛn tɔ́ Zerizalɛmu nin i nunfuɛ’m be su. Be tɛ mɔ be yoli’n, nin amuɛn mɔ be sɔli be’n ɔ nin be ayeliɛ tɛtɛ’n w’a yi asiɛ wunmuan’n ti. Zoziasi, sanngɛ kɛ mɔ wɔ liɛ’n, ayeliɛ nga ɔ ti su yɛ a yoli’n ti’n, ɲrɛnnɛn nga ń fá yí i klɔ nga su’n su yoman ɔ ɲrun.’