KƐ DAVIDI kunnin Goliati’n, Abnɛli m’ɔ ti Izraɛli sonja’m be su kpɛn’n fali Davidi ko kleli Saili. Saili kloli Davidi kpa, i ti ɔ fɛli i yoli i sonja’m be su kpɛn. Ɔ fɛli i kɛ ɔ tran i awlo lɔ.

I sin’n, kɛ alɛ kunfuɛ’m be nin Filistifuɛ’m be ko kunnin mɔ bé bá’n, bla’m be sro jue kɛ: ‘Saili kwlali sran akpi kun (1.000), Davidi kwlali sran akpi blu (10.000).’ I sɔ’n yoli maan Saili fɛli i ɲin cili Davidi, afin ɔ ti kɛ be manmannin Davidi trɛli i bɔbɔ Saili’n sa. Sanngɛ Saili i wa Zonatan w’a fɛmɛn i ɲin w’a ciman Davidi wie. I liɛ’n, ɔ nin Davidi be klo be wiengu kpa, i sɔ’n ti, ɔ nin i be tali be wun nda kɛ bé ká janvuɛ tititi. Be su kpɔciman be wiengu le.

Davidi si jru bo kpa, kpɛkun kɛ ɔ bo’n, ɔ jɔ Saili klun fɔun. Sanngɛ Saili i ɲin m’ɔ blo Davidi wun’n ti, le kun ɔ yoli sa tɛ kun. Kɛ Davidi bó jru’n, Saili mannin i cua’n su, i waan: ‘Ń sán Davidi i cua sa kpan, ɔ́ fíti talɛ’n!’ Sanngɛ Davidi ciɛli i wun yɛ cua’n sinnin ɔn. I sin’n, Saili i cua’n to fuannin Davidi ekun. Ɔ maan Davidi wa wunnin i wlɛ kɛ ɔ fata kɛ ɔ sɛsɛ i wun.

?Kasiɛ nga Saili boli’n te o amun klun? I waan sran nga ɔ kun Goliati’n, ɔ́ fɛ́ i wa bla’n mɛ́n i kɛ ɔ jɛ i. Nga ɔ́ wá kɛ́n i sin ekun yɛle kɛ saan Davidi w’a kun Filistifuɛ’m be nun sran ya kun (100) yɛ ɔ́ fɛ́ i wa bla Mikali mɛ́n i kɛ ɔ jɛ i ɔ. An bɔbɔ an bu i sin be nian! Saili sunnzun kɛ Filistifuɛ’m bé kún Davidi. Sanngɛ w’a yoman sɔ, naan Saili w’a fɛ i wa bla’n w’a man Davidi kɛ ɔ jɛ i.

Cɛn kun Saili kan kleli i wa Zonatan ɔ nin i sufuɛ kwlaa’m be kɛ ɔ kunndɛ kɛ ɔ́ kún Davidi. Sanngɛ Zonatan seli i si kɛ: ‘Nán yo Davidi tɛ. Ɔ nin a yoman wɔ tɛ le. I kpa bɔɔ, ye yɛ ɔ yo wɔ ɔ. Ɔ klɛnnin i wun yɛ ɔ kunnin Goliati ɔ. Ɔ bɔbɔ a wunnin i, ɔ yoli wɔ fɛ.’

Saili wunnin kɛ ndɛ nga Zonatan kannin’n, ɔ ti su. Ɔ tali nda kɛ ɔ su yoman Davidi tɛ. Davidi bali Saili sin, naan w’a su i nin i awlofuɛ mun kɛ laa’n sa. Sanngɛ cɛn kun kɛ Davidi bó jru’n, Saili toli cua’n ekun. Davidi ciɛli i wun naan cua’n w’a kplan talɛ’n wun. I kpɛ nsan su yɛ! Davidi wunnin kɛ wanndilɛ yɛ w’a to i siɛn’n niɔn!

Kɔnguɛ kunngba sɔ nun’n Davidi ɔli i bɔbɔ i awlo lɔ. Sanngɛ Saili sunmannin sran kɛ be ko kun i. Mikali m’ɔ si i si i angunndan’n, ɔ seli i wun’n kɛ: ‘Sɛ w’a wanndiman kɔnguɛ nga’n, ainman a wuli yɛ a wo lɛ ɔ.’ Naan Mikali w’a uka Davidi naan w’a sin fenɛtri nun w’a ɔ kɔnguɛ sɔ nun. Davidi fiafia sa lele afuɛ kɔe nso, ɔ maan Saili w’a wunmɛn i.