Zozie 2:1-24
2 I sin’n, Zozie m’ɔ ti Nɛn i wa’n ɔ sunmannin yasua nɲɔn nvialiɛ nun kɛ be fɛ i Sitimun+ lɛ naan be ko kpla mɛn’n be nian. Ɔ seli be kɛ: “An wɔ be ko kpla mɛn’n be nian, i li Zeriko klɔfuɛ’n yɛ amun kpla niɛn i kpa-ɔ.” Ɔ maan be ɔli, kpɛkun be wluli tekle bla kun mɔ be flɛ i Raabu’n+ i sua’n nun lɔ, yɛ be kali lɛ.
2 Be wa seli Zeriko famiɛn’n kɛ: “Nian! Izraɛli yasua wie’m be bali wa kɔnguɛ naan bé wá kplá mɛn’n bé nían.”
3 Zeriko famiɛn’n sunmannin sran kɛ be ko se Raabu kɛ: “Fa yasua nga be bali mɔ be o ɔ sua’n nun’n fite, afin be bali kɛ bé kplá mɛn wunmuan’n bé nían.”
4 Sanngɛ bla’n fali yasua nɲɔn sɔ mun fiali. Yɛ ɔ seli kɛ: “Ɛɛn, bian sɔ’m be bali min wun wa, sanngɛ n siman kan be ɔli’n.
5 Kɔnguɛ’n kɛ bé wá ɲín klɔ’n i anuan’n, be ɔli. N siman kan be ɔli’n. Sanngɛ sɛ amun su be su ndɛndɛ’n amún tó be.”
6 (Kusu nn ɔ fali be fuli sua’n i ti su nglo lɔ, kpɛkun ɔ fa be fiali sua’n i ti su lɔ lɛn ja mɔ be siesieli be sɛsɛsɛ’n be afiɛn.)
7 Ɔ maan yasua wie’m be ɔli be kunndɛlɛ, be toli be ti kan be kpɛ Zurdɛn’n be ja nun lɛ’n.+ Kɛ be kunndɛfuɛ’m be fiteli cɛ’n be ɲinnin klɔ’n i anuan’n.
8 Kwlaa naan yasua nɲɔn sɔ’m b’a la b’a lafi’n, ɔ toli be sua’n i ti su lɔ.
9 Ɔ seli be kɛ: “N si kɛ Zoova wá fá mɛn’n mán amun.+ Amun wun srɛ w’a tɔ e kwlaa e su.+ Nvlefuɛ’m be kwlaa be wla w’a bo be wun amun dunman nun ti.+
10 E tili i kɛ blɛ mɔ amún fín Ezipti lɔ bá’n, Zoova yoli maan Jenvie Ɔkwlɛ’n i nun nzue’n wieli nun amun ɲrun.+ Yɛ Amɔɔfuɛ’m be famiɛn nɲɔn’n, Siɔn+ nin Ɔgu+ mɔ amun nunnunnin be Zurdɛn’n i bue kun lɔ’n* i nganniɛn guali e su nun.
11 Kɛ e tili i sɔ’n, e wawɛ’n tɔli blo,* yɛ amun dunman nun ti’n e kwlaa e sa sin bubuli e, afin amun Ɲanmiɛn Zoova ti nglo nin asiɛ’n be Ɲanmiɛn.+
12 Amun yaci, amun ta min nda Zoova ɲrun kɛ, kɛ mɔ n yili i nglo n kleli amun kɛ n klo amun dan’n ti’n, amun kusu amún wá yí i nglo kɛ amun klo min si i awlofuɛ mun wie. Amun kle min nzɔliɛ kun m’ɔ kle kɛ n kwla lafi amun su’n.*
13 Ɔ fata kɛ amun yaci min si nin min nin, ɔ nin min niaan bian nin min niaan bla mun, ɔ nin be sran’m be kwlaa be nguan nun. Ɔ fata kɛ amun de e wie’n i sa nun.”+
14 I sin’n, be seli i kɛ: “Sɛ ɔ ti mɔ amun wu’n, é fá e nguan é mán naan amun a wuman. Sɛ w’a kanman like nga e bɛli i yolɛ’n i ndɛ w’a kleman sran’n, kɛ Zoova wá fá mɛn’n mán e’n, é yí i nglo é klé wɔ kɛ e klo wɔ, yɛ é dí ndɛ nga e kannin’n su.”
15 I sin’n, ɔ yoli maan be fali ɲanman kun be sinnin fenɛtri’n nun be jrali. Afin i sua’n nin klɔ’n i wun talɛ’n be sa su kunngba. I kpa bɔbɔ’n, i sua’n wo klɔ’n i wun talɛ’n su.+
16 I sin’n, ɔ seli be kɛ: “Amun wɔ okaoka lika’m be nun lɔ, yɛ amun fia lɔ cɛn nsan naan be nga be su kunndɛ amun’n b’a wunman amun. Kɛ be ko sa be sin’n, amun kwla fa amun atin’n siɛn’n.”
17 Yasua nɲɔn sɔ’m be seli i kɛ: “Sɛ ɔ waan e di nda nga a seli e kɛ e ta’n su’n naan ɔ mmoja’n w’a kaman e ti su’n,+
18 kɛ é bá amun mɛn’n nun’n, fa ɲanman ɔkwlɛ bioun nga cici fenɛtri nga a fali e sinnin nun’n su. Yia ɔ si nin ɔ nin, ɔ nin ɔ niaan mun, ɔ nin ɔ si i awlofuɛ mun naan be bla ɔ sua’n nun wa.+
19 Sɛ sran kun fin ɔ sua’n i anuan’n nun fite gua su lɔ’n, i mmoja’n kɛ́ i bɔbɔ ti su. Ɔ maan i wie’n su kaman e su. Sanngɛ sɛ sa kekle wie ju sran kwlaa ng’ɔ nin wɔ o sua’n nun’n i su’n, i mmoja’n ká e ti su.
20 Sanngɛ sɛ a kan like nga e bɛli i yolɛ’n i ndɛ kle sran’n,+ e su diman nda nga a seli e kɛ e ta’n su kun.”
21 Ɔ tɛli be su kɛ: “Maan ɔ yo kɛ nga amun fa kannin’n sa.”
Kɛ ɔ yoli sɔ’n, ɔ mannin be atin kɛ be wɔ, yɛ be fali be atin’n niɔn. I sin’n, ɔ fali ɲanman ɔkwlɛ bioun’n cicili i fenɛtri’n su.
22 I sin’n, be jasoli lɛ ɔli okaoka lika’m be nun lɔ. Be kali lɔ cɛn nsan, be kali lɔ lele be kunndɛfuɛ’m be sali be sin. Be kunndɛfuɛ’m be kunndɛli be atin’m be kwlaa be su, sanngɛ b’a wunman be.
23 Yasua nɲɔn sɔ’m be fin okaoka lika’m be nun lɔ jrali, be kpɛli nzue ba’n, kpɛkun be toli Zozie m’ɔ ti Nɛn i wa’n i lɔ. Be kannin sa kwlaa ng’ɔ juli be su’n kleli i.
24 Be seli Zozie kɛ: “Zoova w’a fa mɛn’n i kwlaa w’a man e.+ I kpa bɔbɔ’n, e dunman nun ti’n be kwlaa nga be tran mɛn’n nun’n, be wla w’a bo be wun.”+
Ja ngua lɔ ndɛ mun
^ Yɛle kɛ, wia afiliɛ lɔ.
^ Ebr., “e awlɛn’n kloli.”
^ Annzɛ “nzɔliɛ kun mɔ n kwla fa min wla n gua su’n.”
