Nga Zan klɛli’n 20:1-31
20 Lemɔcuɛ’n i cɛn klikli’n su’n, nglɛmun ndɛ kpa mɔ lika’n te lu’n, Mari m’ɔ fin Magdala’n ɔli asieliɛ’n su lɔ.+ Ɔ wunnin kɛ b’a yi yɔbuɛ ng’ɔ o asieliɛ’n i nuan’n su’n.+
2 Ɔ maan ɔ wanndi ɔli Simɔn Piɛli nin Zezi i sɔnnzɔnfuɛ ng’ɔ klo i kpa’n,+ be sin. Ɔ seli be kɛ: “B’a yi e Min’n asieliɛ’n nun b’a ɔ,+ yɛ e siman lika nga b’a ko sie i-ɔ.”
3 Kpɛkun Piɛli nin Zezi i sɔnnzɔnfuɛ kun’n be ɔli asieliɛ’n su lɔ.
4 Be sran nɲɔn’n be wanndi yɛ be kɔ-ɔ. Sanngɛ Zezi i sɔnnzɔnfuɛ kunfuɛ’n wanndili ndɛndɛ kpa trali Piɛli, ɔ maan ɔ dun mmua juli asieliɛ’n su lɔ.
5 Ɔ klu niɛnnin i klun lɔ. Ɔ wunnin kɛ lɛn tanmue’m be guagua lɛ.+ Sanngɛ w’a wluman lɔ.
6 Simɔn Piɛli m’ɔ su i su’n, i kusu juli lɛ. Ɔ wluli asieliɛ’n i klun lɔ, kpɛkun ɔ wunnin kɛ lɛn tanmue’m be guagua lɛ.
7 Tannin mɔ be fa cicili i ti’n, ɔ nunman tannin tanmue onga’m be wun lɛ. Sanngɛ ɔ ti ɲɔnɲɔnwa, yɛ ɔ guɛ i liɛ ngunmin lika uflɛ.
8 I sin’n, Zezi i sɔnnzɔnfuɛ kun ng’ɔ dun mmua juli asieliɛ’n su lɔ’n, ɔ wluli lɔ wie. Ɔ wunnin sa sɔ’n, yɛ ɔ lafili ndɛ nga be kan kleli be’n su.
9 Sanngɛ nn blɛ sɔ’n nun’n, be nin-a wunman Ɲanmiɛn i ndɛ m’ɔ se kɛ ɔ fata kɛ ɔ cɛn nguan’n i wlɛ.+
10 Ɔ maan i sɔnnzɔnfuɛ’m be sali be sin be awlo.
11 Sanngɛ Mari kali asieliɛ’n i wun lɛ. Ɔ o lɛ sún. Kɛ ɔ́ sún’n, ɔ klu niannin asieliɛ’n i klun lɔ.
12 Kpɛkun ɔ wunnin anzi nɲɔn,+ be wun tralɛ’n ti ufue, be titi kan be lali Zezi i fuɛn’n lɛ’n. Kun wo i ti lika, kpɛkun kun wo i ja lika.
13 Be usɛli i kɛ: “?Mmo, ngue ti yɛ a sun-ɔn?” Ɔ tɛli be su kɛ: “Be yili min Min’n be ɔli. N siman lika nga be ko sieli i’n.”
14 Kɛ Mari i nuan tɔli cɛ’n, ɔ kpɛli i wun kpɛkun ɔ wunnin kɛ Zezi jin lɛ. Sanngɛ w’a wunmɛn i wlɛ kɛ Zezi-ɔ.+
15 Zezi usɛli i kɛ: “?Mmo, ngue ti yɛ a sun-ɔn? ?Wan yɛ a su kunndɛ i-ɔ?” Ɔ bu i kɛ fie’n i sunianfuɛ’n niɔn. Ɔ maan ɔ tɛli i su kɛ: “Nja, sɛ wɔ yɛ a yili i ɔli’n, kle min lika nga a ko sieli i’n maan n ko fɛ i.”
16 Zezi seli i kɛ: “Mari!” Kpɛkun Mari kpɛli i ɲin seli i Ebre nun kɛ: “Rabunin!” (I bo’n yɛle “Like Klefuɛ!”)
17 Zezi seli i kɛ: “Yaci min nun. Afin n nin-a fuman Siɛ’n i wun lɔ. Sanngɛ kɔ min niaan’m be wun lɔ+ naan se be kɛ: ‘N su fu kɔ min Si+ m’ɔ ti amun Si wie’n, ɔ nin min Ɲanmiɛn+ m’ɔ ti amun Ɲanmiɛn wie’n, i wun lɔ.’”
18 Mari m’ɔ fin Magdala’n ko kannin sa sɔ’m be ndɛ kleli Zezi i sɔnnzɔnfuɛ mun. Ɔ seli be kɛ: “N wunnin e Min’n!” Kpɛkun ɔ kannin ndɛ ng’ɔ kan kleli i’n kleli be.+
19 Cɛn sɔ’n ti lemɔcuɛ’n i cɛn klikli’n, yɛ kusu aliɛ w’a san. Anuan’m be nun ti towa, afin srɛ kun Zezi i sɔnnzɔnfuɛ mun Zifu’m be ti. Kpɛkun Zezi bali wa jrannin be afiɛn naan w’a se be kɛ: “Maan amun wun jɔ amun fɔuun.”+
20 Kɛ ɔ kannin ndɛ sɔ’n wieli’n, ɔ fɛli i sa nin i nvɛnwun’n kleli be.+ Ɔ maan i sɔnnzɔnfuɛ’m be klun jɔli, afin be wunnin e Min’n.+
21 Zezi seli be ekun kɛ: “Maan amun wun jɔ amun fɔuun.+ Kɛ Siɛ’n fa sunmannin min sa’n,+ n kusu ń súnman amun wie.”+
22 Kɛ ɔ kannin ndɛ sɔ’n, ɔ fitali be su naan w’a se be kɛ: “Maan Ɲanmiɛn wawɛ’n tran amun su.+
23 Sɛ amun yaci sran kun i wun sa’n be cɛ i’n, nn Ɲanmiɛn w’a yaci w’a cɛ i. Sanngɛ sɛ amun a yaciman sran kun i wun sa’n b’a cɛmɛn i’n, nn Ɲanmiɛn w’a yaciman w’a cɛmɛn i.”
24 Sanngɛ kɛ Zezi bá’n, Toma+ m’ɔ ti i akoto blu-nin-nɲɔn (12) mun be nun kun’n, mɔ be flɛ i kɛ Nda’n, ɔ nunman be wun lɛ wie.
25 Ɔ maan Zezi i sɔnnzɔnfuɛ onga’m be seli i kɛ: “E wunnin e Min’n!” Sanngɛ ɔ seli be kɛ: “Sɛ m’an wunman kpɛngbɛ’m be osu* i sa’m be klun’n, naan m’an faman min sa mma’n m’an wlɛmɛn i kpɛngbɛ’m be osu’n nun’n, yɛ sɛ m’an faman min sa m’an kɛnmɛn i nvɛnwun’n,+ n su lafiman ndɛ sɔ’n su le.”
26 Kɛ ɔ dili lemɔcuɛ’n, i sɔnnzɔnfuɛ’m be yiali sua’n i klun lɔ ekun. Toma o be nun wie. Anuan’m be nun ti towa, sanngɛ Zezi bali. Ɔ jrannin be afiɛn lɛ naan w’a se kɛ: “Maan amun wun jɔ amun fɔuun.”+
27 I sin’n, ɔ seli Toma kɛ: “Fa ɔ sama’n sie i wa. Nian min sa mun. Fa ɔ sa kan min nvɛnwun’n. Yaci akplowa silɛ’n, sanngɛ lafi su.”
28 Toma tɛli i su kɛ: “Min Min, min Ɲanmiɛn!”
29 Zezi seli i kɛ: “?Kɛ mɔ a wunnin min’n, i ti yɛ a lafi su-ɔ? Be nga b’a wunman min mɔ sanngɛ be lafi su’n, be liɛ su ti ye.”
30 Nanwlɛ, Zezi yoli abonuan sa kpanngban wie mun ekun i sɔnnzɔnfuɛ’m be ɲrun mɔ be timan klɛwa fluwa nga nun-ɔn.+
31 Sanngɛ be klɛli ndɛ nga mun naan amun lafi su kɛ Zezi yɛ ɔ ti Klisi’n niɔn, naan ɔ ti Ɲanmiɛn i Wa. Yɛ sɛ amun lafi su sɔ’n, amún ɲán nguan m’ɔ leman awieliɛ’n i dunman nun.+
Ja ngua lɔ ndɛ mun
^ Annzɛ “nzɔliɛ.”
