Nga Zan klɛli’n 11:1-57
11 Be flɛ bian kun kɛ Lazaa. Ɔ tɔli tukpacɛ. I klɔ’n yɛle Betanin. Klɔ kunngba’n su yɛ Mari nin i niaan bla Maati+ be fin-ɔn.
2 Mari sɔ’n yɛ ɔ fali ngo fannin guali e Min’n i wun m’ɔ fɛli i timuɛn’n nunnunnin i ja wun’n niɔn.+ I niaan bian yɛle Lazaa m’ɔ tɔli tukpacɛ’n.
3 Ɔ maan Lazaa i niaan bla’m be sunmannin sran kɛ ɔ ko se Zezi kɛ: “E Min, nian! sran mɔ a klo i sa’n, w’a tɔ tukpacɛ.”
4 Kɛ Zezi tili i sɔ’n, ɔ seli kɛ: “Tukpacɛ sɔ’n timɛn i wie liɛ, sanngɛ ɔ ti Ɲanmiɛn i manmanlɛ liɛ,+ kɛ ɔ́ yó naan b’a yi Ɲanmiɛn i Wa’n i ayɛ’n ti.”
5 Zezi klo Maati nin i niaan bla, ɔ nin Lazaa be sa.
6 Sanngɛ kɛ ɔ tili i kɛ Lazaa w’a tɔ tukpacɛ’n, ɔ kali kan ɔ o lɛ’n, ɔ dili cɛn ba nɲɔn.
7 I sin’n, ɔ seli i sɔnnzɔnfuɛ’m be kɛ: “Maan e wɔ Zide lɔ ekun.”
8 I sɔnnzɔnfuɛ’m be seli i kɛ: “Rabi,+ Zidefuɛ’m be kunndɛli kɛ bé fínfín wɔ yɔbuɛ ɔ nin-a cɛman.+ ?Kpɛkun a su kɔ lɔ ekun?”
9 Zezi tɛli su kɛ: “?Kɛ lika cɛn m’ɔ́ fá sán’n, ɔ diman dɔ blu-nin-nɲɔn (12)?+ Sɛ sran kun nanti wia nun’n, i ja kplaman like fi su. Afin ɔ wun mɛn nga nun kannin’n.
10 Sanngɛ sɛ kɔnguɛ yɛ sran kun nanti’n i ja kpla, afin kannin’n nunmɛn i nun.”
11 Kɛ ɔ kannin sɔ wieli’n, ɔ seli ekun kɛ: “E janvuɛ Lazaa su lafi.+ Sanngɛ n su ko tinnge i.”
12 Yɛ i sɔnnzɔnfuɛ’m be seli i kɛ: “E Min, sɛ ɔ su lafi’n, ɔ́ yó juejue.”
13 Sanngɛ Zezi liɛ’n, i wie’n i ndɛ yɛ ɔ su kan-ɔn. Sanngɛ be buli i kɛ ɔ su kan lafilɛ kpakpa ndɛ.
14 Ɔ maan Zezi seli be weiin kɛ: “Lazaa w’a wu.+
15 Yɛ amun ti’n, kɛ n nunman lɔ’n, ɔ yo min fɛ, i liɛ’n amún láfi min su. Maan e wɔ i wun lɔ.”
16 Ɔ maan Toma mɔ be flɛ i kɛ Nda’n, ɔ seli i wiengu mun kɛ: “Maan e wɔ wie naan e nin i e ko wu.”+
17 Kɛ Zezi juli lɔ’n, ɔ wunnin kɛ be sieli Lazaa w’a di cɛn ba nnan.
18 Betanin o Zerizalɛmun i wun koko lɛ. Be afiɛn’n ti nun kilo kɔe nsan.*
19 Ɔ maan Zifu kpanngban be bali Maati nin Mari be fɔnvɔlɛ, be niaan bian’n i wie’n ti.
20 Kɛ Maati tili i kɛ Zezi su ba’n, ɔ ɔli i atin kpalɛ. Sanngɛ Mari+ kali awlo lɔ.
21 Maati seli Zezi kɛ: “Min Min, sɛ ɔ ti kɛ a o wa’n, nn min niaan bian’n w’a wuman.
22 Sanngɛ n si kɛ like kwlaa nga a srɛ Ɲanmiɛn’n, Ɲanmiɛn mán wɔ.”
23 Zezi seli i kɛ: “Ɔ niaan bian wá cɛ́n.”
24 Maati seli i kɛ: “N si kɛ blɛ kasiɛn’n nun’n, ɔ́ wá cɛ́n.”+
25 Zezi seli i kɛ: “Min yɛ n cɛn sran-ɔn. Yɛ min yɛ n man sran nguan-ɔn.+ Sran ng’ɔ kle kɛ ɔ lafi min su’n, kannzɛ ɔ wu’n, ɔ́ ɲán nguan.
26 Sran kwlaa ng’ɔ o nguan nun m’ɔ kle kɛ ɔ lafi min su’n, ɔ su wuman le.+ ?A lafi ndɛ sɔ’n su?”
27 Ɔ tɛli i su kɛ: “Ɛɛn, min Min, n lafi su kɛ wɔ yɛ a ti Klisi’n niɔn, yɛ wɔ yɛ a ti Ɲanmiɛn i Wa m’ɔ fata kɛ ɔ bla mɛn’n nun’n niɔn.”
28 Kɛ ɔ seli sɔ’n, ɔ ɔli ko flɛli i niaan bla Mari. Ɔ seli i blɛlɛlɛ kɛ: “Like Klefuɛ’n+ w’a ba. I waan a bla.”
29 Kɛ ɔ tili i sɔ’n, ɔ jasoli waka, ɔ ɔli i wun lɔ.
30 Zezi nin-a wluman klɔ’n nun. Ɔ te o kan Maati nin i yiali lɛ’n.
31 Kɛ Zifu nga be o sua’n i klun lɔ bé fɔ́nvɔ Mari’n, be wunnin kɛ ɔ su fite ndɛndɛ’n, be suli i su. Be buli i kɛ ɔ su kɔ asieliɛ’n su lɔ,+ ɔ́ kó sún.
32 Kɛ Mari juli kan Zezi o lɛ’n, m’ɔ wunnin i’n, ɔ kotoli i bo, yɛ ɔ seli i kɛ: “Min Min, sɛ ɔ ti kɛ a o wa sa’n, nn min niaan bian’n w’a wuman.”
33 Kɛ Zezi wunnin kɛ ɔ su sun’n, mɔ kusu Zifu nga be nin i be bali’n, be su sun wie’n, i awlɛn’n kpɛli i klun, kpɛkun i wla boli i wun.
34 Ɔ seli kɛ: “?Amun sieli i nin?” Be seli i kɛ: “E Min, bla wa nian.”
35 Zezi sunnin.+
36 Kɛ Zifu’m be wunnin i sɔ’n, be seli kɛ: “Amun nian kɛ ɔ klo i-ɔ!”
37 Sanngɛ be nun wie’m be seli kɛ: “?I m’ɔ tikeli aɲinsifuɛ’n i ɲinma’n,+ ngue ti yɛ ɔ yacili bian nga lɛ m’ɔ wuli-ɔ?”
38 Zezi i awlɛn’n kpɛli i klun ekun. I sin’n, ɔ ɔli asieliɛ’n su lɔ. Asieliɛ’n ti yɔbuɛ buɛ. Kpɛkun yɔbuɛ kun kɛtɛ i nuan.
39 Zezi seli kɛ: “Amun yi yɔbuɛ’n.” Maati m’ɔ ti bian m’ɔ wuli’n i niaan bla’n, ɔ seli i kɛ: “Min Min, ɔ su kpɛ, afin ɔ wuli i cɛn ba nnan yɛ.”
40 Zezi seli i kɛ: “?M’an seman wɔ kɛ, sɛ a lafi min su’n, á wún kɛ Ɲanmiɛn i tinmin’n cɛnnin?”+
41 Ɔ maan be yili yɔbuɛ’n. Zezi mɛnnin i ɲin su niannin ɲanmiɛn su lɔ,+ naan w’a se kɛ: “Min Si, ń yó wɔ kwla, afin a tili min nuan ndɛ’n.
42 Nanwlɛ, n si kɛ a ti min nuan ndɛ’n titi. Sanngɛ sran nga b’a yia yɛ’n, be ti yɛ n kannin sɔ-ɔ, kɛ ɔ ko yo naan b’a lafi su kɛ wɔ yɛ a sunmannin min’n ti.”+
43 Kɛ ɔ kannin ndɛ sɔ’n wieli’n, ɔ kpannin kekle kpa seli kɛ: “Lazaa, fite!”+
44 Bian m’ɔ wuli’n fiteli. Tannin tanmue cici i sa nin i ja’m be wun, yɛ tannin kɛtɛ i ti. Zezi seli be kɛ: “Amun ɲannji i maan ɔ wɔ.”
45 Kɛ Zifu nga be bali Mari i wun lɛ’n, be wunnin like nga Zezi yoli’n, be nun kpanngban be lafili i su.+
46 Sanngɛ be nun wie’m be ko toli Farizifuɛ mun, kpɛkun be kannin like nga Zezi yoli’n i ndɛ kleli be.
47 Ɔ maan Ɲanmiɛn ɲrun jranfuɛ’m be su kpɛn mun nin Farizifuɛ’m be yiali Zifu’m be Jɔlɛ Difuɛ Dandan mun.* Yɛ be seli kɛ: “?Ngue yɛ ɔ fata kɛ e yo-ɔ? Afin bian nga yo abonuan sa kpanngban.+
48 Sɛ e yaci i lɛ naan ɔ yo sa sɔ mun’n, bé láfi i su, kpɛkun Rɔmunfuɛ’m bé wá dé e lika’n* nin e nvle’n e sa nun.”
49 Sanngɛ be nun sran kun mɔ be flɛ i kɛ Kaifu’n,+ m’ɔ ti Ɲanmiɛn ɲrun jranfuɛ dan’n afuɛ sɔ’n nun’n, ɔ seli be kɛ: “Amun wunman sa wlɛ mlɔnmlɔn,
50 yɛ amun wunman kɛ sɛ sran kunngba wu nvle’n i dunman nun’n, ɔ ti kpa man amun tra kɛ be nunnun nvle’n wunmuan’n.”
51 Sanngɛ ndɛ ng’ɔ kɛnnin i lɛ’n, ɔ finmɛn i bɔbɔ. Kɛ mɔ afuɛ sɔ’n nun’n, ɔ ti Ɲanmiɛn ɲrun jranfuɛ dan’n ti’n, Ɲanmiɛn fɛli i ndɛ’n wlɛli i nuan kɛ ɔ se kɛ Zezi wá wú mán nvle’n.
52 Nán nvle’n i ngunmin ti yɛ ɔ́ wú-ɔ. Sanngɛ ɔ́ wú naan Ɲanmiɛn i mma mɔ b’a sanndi’n, be kan bo nun naan be yo kun.
53 Ɔ maan kɛ ɔ fin cɛn sɔ’n nun’n, be buli i kunlɛ akunndan.
54 I sɔ’n ti’n, Zezi w’a wlanwlanman nzra nun Zifu’m be afiɛn kun. Ɔ jasoli lɛ ɔli lika ng’ɔ o aawlɛ flɛnnɛn’n i wun lɛ’n nun. Ɔ ɔli klɔ nga be flɛ i kɛ Efraimun’n+ su. Kpɛkun ɔ nin i sɔnnzɔnfuɛ’m be kali lɔ.
55 Kɛ Zifu’m be Delɛ Cɛn’n+ mantannin koko’n, sran kpanngban be fin nanmue’m be nun, be ɔli Zerizalɛmun be ko yoli be wun sanwun ka naan Delɛ Cɛn’n w’a ju.
56 Be kunndɛli Zezi. Kɛ be o Ɲanmiɛn sua’n i wun lɛ’n, be seli be wiengu kɛ: “?A bu i sɛ? ?Ɔ su baman cɛn dilɛ’n i bo mlɔnmlɔn?”
57 Sanngɛ Ɲanmiɛn ɲrun jranfuɛ’m be su kpɛn mun nin Farizifuɛ’m b’a dun mmua b’a kan kɛ, sɛ sran kun si lika nga Zezi o’n, maan ɔ kan naan be ko trɛ i.
