Nga Zan klɛli’n 10:1-42
10 “Nanwlɛ, ń kán klé amun kpa kɛ sran nga kɛ ɔ́ wlú bua’m be tuin’n nun’n, ɔ sinman anuan’n nun m’ɔ fu lika uflɛ jra lɔ’n, sran sɔ’n ti awiefuɛ.+
2 Sanngɛ sran ng’ɔ sin anuan’n nun’n, sran sɔ’n yɛ ɔ ti bua’m be tafuɛ’n niɔn.+
3 Anuan sunianfuɛ’n tike i anuan,+ kpɛkun bua’m be ti i aniɛn’n.+ Ɔ fa be dunman mun flɛflɛ be, kpɛkun ɔ fa be fite.
4 Kɛ ɔ fa be kwlaa fite’n, ɔ dun mmua be ɲrun, kpɛkun bua’m be su i su, afin be si i nɛn’n.
5 Be su suman aofuɛ su mlɔnmlɔn, sanngɛ bé wánndi i, afin be siman aofuɛ’m be nɛn’n.”
6 Zezi fali sunnzun ase yɛ ɔ kannin ndɛ sɔ’n kleli be-ɔ. Sanngɛ b’a wunman ndɛ ng’ɔ su kan kle be’n i wlɛ.
7 Ɔ maan Zezi seli be ekun kɛ: “Nanwlɛ, ń kán klé amun kpa kɛ min yɛ n ti anuan mɔ bua’m be sin nun’n niɔn.+
8 Be kwlaa nga be bali mɔ be waan min yɛle be’n, be ti awiefuɛ. Yɛ bua’m b’a sieman be su be nuan bo.
9 Min yɛ n ti anuan’n niɔn. Sran kwlaa ng’ɔ sin min nun’n, ɔ́ ɲɛ́n i ti. Sran sɔ’n, ɔ́ wlú, ɔ́ fíte, kpɛkun ɔ́ ɲán didiwlɛ.+
10 Nnɛn’m be wualɛ nin be kunlɛ, ɔ nin be nunnunlɛ ti yɛ awiefuɛ’n ba-ɔ.+ Min liɛ’n, n bali be nguan manlɛ naan be nguan ɲanman’n yo tɛnndɛn.
11 Min yɛ n ti bua tafuɛ kpafuɛ’n niɔn.+ Bua’m be ti’n, bua tafuɛ kpa’n fɛ i nguan’n man.+
12 Sran nga be tuɛ i kalɛ kɛ ɔ nian bua’m be su’n, m’ɔ timan bua tafuɛ kpa’n, mɔ kusu bua’m be timɛn i liɛ’n, kɛ ɔ wun kɛ gboklo’n su ba’n, ɔ yaci bua’m be lɛ wanndi. Ɔ maan gboklo’n tra be nun wie mun, yɛ ɔ wlu be onga’m be nun, kpɛkun be bo sanndi.
13 Like nga ti yɛ sran sɔ’n wanndi’n, yɛle kɛ i sika yɛ ɔ kunndɛ-ɔ. Bua’m be ndɛ lomɛn i.
14 Min yɛ n ti bua tafuɛ kpafuɛ’n niɔn. N si min bua mun, yɛ min bua’m be kusu be si min,+
15 kɛ nga Siɛ’n fa si min mɔ n kusu n fa si Siɛ’n sa.+ Yɛ min bua’m be ti’n, n fa min nguan’n n man.+
16 “N le bua wie mun ekun. Be nunman tuin nga nun.+ Ɔ fata kɛ n fa be n bla wie. Bé tí min nɛn’n, yɛ bé yó bua fa kun, kpɛkun be tafuɛ’n yó kun.+
17 I sɔ’n ti yɛ Siɛ’n klo min sa’n niɔn.+ Afin n fa min nguan’n n man+ naan m’an kwla ɲɛn i ekun.
18 Nán sran yɛ ɔ de i min sa nun-ɔn, sanngɛ n bɔbɔ yɛ n fa man-ɔn. N le atin n fa man, yɛ n le atin n ɲɛn i ekun.+ Min Si yɛ ɔ seli min kɛ n yo sɔ-ɔ.”
19 I ndɛ sɔ’m be ti’n, Zifu’m be bubuli be wun nun+ ekun.
20 Be nun kpanngban be seli kɛ: “Mmusu kun kle i yalɛ. I ti w’a saci. ?Ngue ti yɛ amun sie amun su i nuan bo-ɔ?”
21 Sanngɛ wie’m be seli kɛ: “Sran nga mmusu kle i yalɛ’n, ɔ kanman ndɛ kɛ nga sa. ?Mmusu kwla tike sran ɲinma?”
22 Kɛ ɔ́ yó sɔ’n, nn be su di Ɲanmiɛn i Sua’n i Sanwun Yolɛ’n i ti Cɛn’n Zerizalɛmun lɔ. Blɛ sɔ’n ti ayrɛ blɛ,
23 yɛ Zezi su wlanwlan Ɲanmiɛn sua’n nun lɔ, lika nga Salomɔn i kpata’n+ wo lɛ’n.
24 Zifu’m be bo sin yiɛli i. Kpɛkun be seli i kɛ: “?Cɛn onin yɛ á kán ndɛ sɔ’n klé e-ɔ? Sɛ wɔ yɛ a ti Klisi’n, kɛn i weinwein kle e.”
25 Zezi tɛli be su kɛ: “N kan kleli amun, sanngɛ amun lafiman su. Junman nga n su di be min Si i dunman nun’n, be di min ti lalo.+
26 Sanngɛ amun lafiman su, afin amun timan min bua wie.+
27 Min bua’m be tie min nɛn’n, n si be, kpɛkun be su min su.+
28 N man be nguan m’ɔ leman awieliɛ’n.+ Ɔ maan be su nunnunman le, yɛ sran fi su deman be min sa nun le.+
29 Be nga min Si fa be mannin min’n, be ndɛ lo min tra like kwlaa. Yɛ sran fi kwlá deman be Siɛ’n i sa nun.+
30 Min nin Siɛ’n e ti kun.”*+
31 Zifu’m be isali yɔbuɛ ekun kɛ bé fá fínfín i.
32 Zezi seli be kɛ: “Siɛ’n i dunman nun’n, n yoli sa kpanngban n kleli amun. ?Sa sɔ’m be nun onin ti yɛ amun kunndɛ kɛ amún fínfín min yɔbuɛ-ɔ?”
33 Zifu’m be tɛli i su kɛ: “Nán kɛ sa kpa mɔ a yoli’n ti yɛ e waan é fínfín wɔ yɔbuɛ-ɔ, sanngɛ kɛ mɔ a saci Ɲanmiɛn i wun’n ti-ɔ.+ Afin wɔ mɔ a ti klɔ sran’n, a se kɛ a ti kɛ Ɲanmiɛn sa.”
34 Zezi tɛli be su kɛ: “?B’a klɛmɛn i amun Mmla’n nun kɛ: ‘N seli kɛ: “Amun ti ɲanmiɛn”’?*+
35 Ɔ maan be nga Ɲanmiɛn ndɛ’n bu be fɔ’n, Ɲanmiɛn flɛli be kɛ ‘ɲanmiɛn.’+ Kusu’n, klɔ sran kwlá nunnunman Ɲanmiɛn ndɛ’n.
36 ?Sɛ ɔ ti sɔ’n niɔn, ngue ti yɛ min mɔ Ɲanmiɛn kpali min sieli min ngunmin’n, m’ɔ sunmannin min mɛn’n nun’n, kɛ n seli kɛ: ‘N ti Ɲanmiɛn Wa’n,’+ amun se min kɛ: ‘N saci Ɲanmiɛn wun-ɔn?’
37 Sɛ nán min Si i junman yɛ n di’n, nán amun lafi min su.
38 Sanngɛ sɛ n yo sa sɔ mun’n, kannzɛ amun lafiman min su’n, maan amun lafi sa sɔ’m be su+ naan amun wun i wlɛ kɛ Siɛ’n nin min o nun, naan n kusu e nin Siɛ’n e o nun.+ Yɛ amún wún i wlɛ sɔ titi.”
39 I sɔ’n ti’n, be kunndɛli ekun kɛ bé trɛ́ i, sanngɛ ɔ jasoli lɛ.
40 Ɔ kpɛli Zurdɛn’n, ɔ ɔli lika nga Zan yo sran’m be batɛmun lɔ laa’n i nun lɔ.+ Kpɛkun ɔ kali lɔ.
41 Sran kpanngban be bɛli i wun lɛ. Be seli kɛ: “Zan w’a yoman abonuan sa fi. Sanngɛ bian nga i su ndɛ kwlaa ng’ɔ kannin’n ti nanwlɛ.”+
42 Ɔ maan sran kpanngban be lafili i su lika sɔ’n nun lɛ.
