Zakari 9:1-17
9 Ndɛ cinnjin kun:
“Zoova kan ndɛ’n wɔ Adraki mɛn’n,Damasi yɛ ɔ kan wɔ i kpa’n niɔn.+
(Afin Zoova ɲin ta klɔ sran mun,+ɔ nin Izraɛli akpasua’m be kwlaa.)
2 Yɛ ɔ kan wɔ Amati,+ m’ɔ nin i be ja awɛ’n,ɔ nin Tir+ nin Sidɔn,+ afin be ti ngwlɛlɛfuɛ dan.+
3 Tir kplannin talɛ* kun i bɔbɔ i wun.
Ɔ tiannin sika i nuan kɛ ndutre sa,ɔ tiannin sika ɔkwlɛ i nuan kɛ akpɔ su nnɔtiɛ sa.+
4 Amun nian! Zoova wá dé i sa nun ninnge mun,yɛ ɔ́ kún i sonja mun jenvie’n nun.*+
Kpɛkun sin dí i.+
5 Askalɔn wún i, yɛ srɛ kún i.
Gaza i wla wá bó i wun dan kpa,yɛ Ekrɔn i wla wá bó i wun dan wie, afin klɔ m’ɔ fɛli i wla guɛli i su’n i ɲin w’a gua ase.
Gaza su ɲanman famiɛn kun,yɛ sran su tranman Askalɔn lɔ kun.+
6 Aofuɛ kun yɛ ɔ́ wá trán Asdɔdu lɔ-ɔ,yɛ ń má yó maan Filistifuɛ’n i wun tulɛ’n wíe.+
7 Ń má yí ninnge nga mmoja o be wun’n i nuan nun,ɔ nin ninnge kainkain mun i je’n nun,yɛ sran ng’ɔ́ ká lɛ’n ɔ́ yó e Ɲanmiɛn’n i liɛ.
Yɛ ɔ́ káci kɛ sɛki* kun sa Zida lɔ,+kpɛkun Ekrɔn káci kɛ Zebisifuɛ’n sa.+
8 Ń má jrán min sua’n i wun lɛ naan ń sɛ́sɛ́ i.+
I liɛ’n, sran fi su wluman lɔ yɛ sran fi su fiteman.
Yɛ junman su kpɛn* wie fi su sinman lɔ kun,+afin siɛn’n, min bɔbɔ min ɲinma w’a wun i.*
9 Ee, Siɔn i wa bla, maan ɔ klun jɔ.
Ee, Zerizalɛmun i wa bla, kpan aklunjɔɛ kpanlɛ.
Nian! Ɔ famiɛn’n su ba ɔ sin,+ɔ ti sran kpa, yɛ ɔ de sran,*
ɔ ti wun ase kanfuɛ,+ yɛ ɔ ti aflunmun kun su,ɔ ti aflunmun ba kun* su, aflunmun bla kun i wa-ɔ.+
10 Ń má núnnún alɛ kunlɛ kakaklolo’n Efraimun lɔ,ɔ nin nnɛn kpanngɔ’n Zerizalɛmun lɔ.
Ń má núnnún alɛ kunlɛ ta’n.
Yɛ ɔ́ kán fɔundi dilɛ ndɛ klé nvlenvle mun.+
I sielɛ’n fɛ́ i jenvie’n i bue kun su lele fá jú i bue kun’n su lɔ,yɛ ɔ́ fɛ́ i Nzue Ba’n* su lele fá jú asiɛ’n i tiwa lɔ.+
11 Ee mmo bla, ɔ kusu, ɔ aenguɛ’n i mmoja’n ti’n,ń má fá ɔ bisuafuɛ mun kunman mɔ nzue nunman nun’n i nun ń fíte.+
12 Bisuafuɛ mun, amun mɔ amun wla o like su’n, amun sa amun sin fiawlɛ’n nun.+
Ń kán klé wɔ andɛ:
‘Mmo bla, ń má túa ɔ kalɛ sɔ kpɛ nɲɔn.+
13 Afin ń má blí Zida* kɛ min ta sa.
Yɛ ń fá Efraimun ń wlɛ́ i ta’n nun.
Ee Siɔn, ń má yó maan ɔ mma mun
bé jáso Glɛki mɛn’n nun ba mun be wun,yɛ ń má yó maan á káci kɛ safuɲrɛn kun i tokofi’n sa.’
14 Bé wá wún Zoova be ti su nglo,yɛ i ta mma’n wá sín kɛ ɲanmiɛn m’ɔ kpa sin’n sa.
Miɛn Zoova m’ɔ Sie Like Kwlakwla’n ɔ́ wá bó awɛ’n,+yɛ ɔ nin ja ngua lɔ aunmuan dan’n yɛ bé bá-ɔ.
15 Zoova m’ɔ ti sonja’m be su kpɛn’n, ɔ́ kplí be ti,yɛ bé wá dí kpafloko’m be nun yɔbuɛ mun, kpɛkun bé ɲán kwlalɛ be su.+
Bé nɔ́n nzan, yɛ be ɲin su’n yó be kɛ b’a nɔn duvɛn sa.
Bé yí kɛ kpongbo ba sa,bé yó kɛ tɛ yiwlɛ’n i cɔnjɔ mun sa.+
16 Cɛn sɔ’n nun’n, be Ɲanmiɛn Zoova dé be,ɔ́ wá dé i nvlefuɛ mun kɛ nga nnɛn kankanfuɛ kun fa de i nnɛn mun’n sa.+
Afin bé wá yó kɛ famiɛn kle’n i nun yɔbuɛ kpakpa mɔ be bo mianmian’n sa i asiɛ’n su.+
17 Afin i klun ufue’n ti dan,+yɛ ɔ yo ɲɛnmɛn dan!
Ble’n wá mán gbanflɛn’m be wunmiɛn,yɛ duvɛn lɔflɛ’n mán talua mɔ be nin-a siman bian’n be wunmiɛn.”+
Ja ngua lɔ ndɛ mun
^ Annzɛ “fiawlɛ lika.”
^ Be kwla se ekun kɛ “jenvie’n su lɔ.”
^ Akpasua’m be su kpɛnngbɛn mun yɛ be flɛ be kɛ sɛki’n niɔn.
^ Ɔ ti weiin kɛ i nvlefuɛ’m be ɲrɛnnɛn’n i ndɛ yɛ ɔ kan-ɔn.
^ Annzɛ “yalɛ klefuɛ.”
^ Annzɛ “ɔ kwla.”
^ Annzɛ “aflunmun yasua kun.”
^ Yɛle kɛ, Efrati.
^ Ebr., “ń má tía Zida su.”
