Jue Mun 78:1-72
-
Ɲanmiɛn niɛn i sran’m be lika, yɛ Izraɛli lafimɛn i su
Maskili* su. Azafu i jue-ɔ.+
78 Min nvlefuɛ mun, amun tie min mmla’n,*
amun fa amun su sie min nuan ndɛ’n i bo.
2 Ń má úke min nuan’n ń bú ɲanndra.
Ń má kán ndɛ nga be wlɛ wunlɛ ti kekle’n.+
3 Ndɛ nga e tili be mɔ e si be’n,mɔ e si’m be kan kleli e’n,+
4 e su fa fiaman be mma’m be wun.
Sa dandan nga Zoova yoli’n, ɔ nin i wunmiɛn’n,+abonuan sa ng’ɔ yoli be’n,+é kán be ndɛ é klé be nga bé wá jáso su’n.+
5 Ɔ mannin Zakɔbu i mmla kun,*
yɛ ɔ kpɛli mmla kun Izraɛli lɔ.
Ɔ seli e nannan’m be kɛ
be kan ninnge sɔ’m be ndɛ kle be mma mun.+
6 I liɛ’n, be nga bé wá jáso su’n,ba nga bé wá wú be’n, bésí be.+
Yɛ be kusu bé kán be ndɛ klé be mma liɛ mun.+
7 Ɔ maan ba sɔ’m bé fá be wla gúa Ɲanmiɛn su.
Be wla su fiman ninnge nga Ɲanmiɛn yo be’n be su,+sanngɛ bé nánti i mmla’m be su.+
8 I liɛ’n, be su yoman kɛ be nannan’m be sa.
Be nannan’m be keteli, yɛ be yoli ɲin kekle,+be awlɛn’n yoli nɲɔnnɲɔn,+yɛ be nin Ɲanmiɛn b’a nantiman klanman.
9 Ta o Efraimunfuɛ’m be sa nun,sanngɛ alɛ kunlɛ cɛn’n nun’n, be wanndili.
10 B’a diman Ɲanmiɛn i aenguɛ’n su,+yɛ b’a kplinman su kɛ bé nánti i mmla’n su.+
11 Asa ekun’n, be wla fili like ng’ɔ yoli’n su,+be wla fili abonuan sa ng’ɔ yoli be fa kleli be’n be su.+
12 Ɔ yoli abonuan sa mun be nannan’m be ɲrun lɛ,+Ezipti mɛn’n nun lɔ, Zoan asa’n su lɔ.+
13 Ɔ kpacili jenvie’n nun naan be sin,yɛ ɔ yoli maan nzue’n sili ce kɛ talɛ wie sa.+
14 Wia nun’n, ɔ fali ɲanmiɛn ble kun kleli be atin,yɛ kɔnguɛ wunmuan’n nun’n, ɔ fali sin kun i kpajalɛ’n kleli be atin.+
15 Ɔ kpacili yɔbuɛ’m be nun aawlɛ flɛnnɛn’n nun lɔ.
Ɔ yoli maan be nɔnnin nzue be ku yili, kɛ nzue danwie i nun nzue yɛ benɔnnin sa.+
16 Ɔ yoli maan nzue fin yɔbuɛ kun nun fiteli.
Ɔ yoli maan nzue’n sonjili kɛ nzue ba wie sa.+
17 Be yoli sa tɛ i ɲrun titi,be yoli ɲin kekle Ɲanmiɛn m’ɔ o Like Kwlaa Ti Su’n i su, aawlɛ flɛnnɛn’nnun lɔ.+
18 Be sali Ɲanmiɛn be awlɛn’n nun lɔ niannin.+
Be seli i kɛ ɔ man be aliɛ nga be konvi sɔ i’n.
19 Ɔ maan be kannin Ɲanmiɛn i wun ndɛ tɛtɛ.
Be seli kɛ: “?Ɲanmiɛn kwla siesie tabli kun aawlɛ flɛnnɛn nga nun waman e?”+
20 Amun nian! Ɔ finnin yɔbuɛ kun su
naan nzue fite, naan nzue kpanngban kpa sonji.+
“?Sanngɛ ɔ kwla man e kpanwun wie?
?Annzɛ ɔ kwla mɛn i nvlefuɛ’m be nnɛn?”+
21 Kɛ Zoova tili ndɛ nga be kannin’n, ɔ fali ya dan kpa.+
Sin kun+ jueli Zakɔbu su,Ɔ fali Izraɛli i wun ya,+
22 Afin b’a lafiman Ɲanmiɛn su.+
B’a lafiman su kɛ ɔ kwla de be.
23 Ɔ maan ɔ kannin ndɛ kleli ɲanmiɛn ble m’ɔ onglo lɔ’n,yɛ ɔ tikeli ɲanmiɛn su lɔ anuan mun.
24 Ɔ yoli maan manin’n guali titi naan be di.
Ɔ mannin be like mma m’ɔ fin ɲanmiɛn su’n.+
25 Be dili safuɲrɛn’m* be kpanwun’n.+
Ɔ mannin be kaka kpa naan be ku yi.+
26 Ɔ yoli maan wia afiliɛ lɔ aunmuan’n fitali ɲanmiɛn su lɔ,yɛ ɔ fɛli i tinmin’n yoli maan aunmuan kun fin ngua lɔ fitali.+
27 Yɛ ɔ yoli maan nnɛn fin nglo lɔ guali be su kɛ ndutre sa,anunman’m be guali be su kɛ jenvie nuan aunɲan’n sa.
28 Ɔ yoli maan be guɛli i nanmue’n i afiɛn,be guɛli i tannin sua’m be wun.
29 Be dili, be dili i lelele.
Ɔ mannin be like nga be konvi o su’n.+
30 Sanngɛ ka naan be konvi’n w’a kan ase’n,kɛ aliɛ’n te o be nuan nun bɔbɔ’n,
31 Ɲanmiɛn fali be wun ya.+
Ɔ kunnin be nun yasua nga be le wunmiɛn kpa’n.+
Ɔ kunnin Izraɛli gbanflɛn mun.
32 Ɔ nin i sɔ ngba’n, be yoli sa tɛ trali laa liɛ’n,+yɛ b’a lafiman abonuan sa ng’ɔ yoli be’n be su.+
33 Ɔ yoli maan be cɛn’m be sinnin kɛ aunmuanwie sa.+
Ɔ fali ɲrɛnnɛn yili be su kpɛ kunngba, ɔ maan be afuɛ’m be wieli.
34 Sanngɛ blɛ kwlaa ng’ɔ kun be’n, be kunndɛ i.+
Be sa be sin, yɛ be kunndɛ Ɲanmiɛn,
35 be wla kpɛn su kɛ Ɲanmiɛn ti be Yɔbuɛ,+yɛ be wla kpɛn su kɛ Ɲanmiɛn m’ɔ o Like Kwlaa Ti Su’n, ɔ ti be Ti Kpɔfuɛ.*+
36 Sanngɛ be kunndɛli kɛ bé fá be nuan’n bé lɛ́kɛ i,yɛ be fali be taaman’n be buali ato kleli i.
37 Be awlɛn’n w’a trɛnmɛn i su kpa.+
Yɛ b’a dimɛn i aenguɛ’n su nanwlɛ su.+
38 Sanngɛ ɔ ti aunnvɔɛ sifuɛ.+
Ɔ yaci be fɔnlɛ’n cɛ be,* yɛ ɔ nunnunman be.+
Blɛ sunman’n, ɔ guɛ i ya’n i ase,+ɔ yimɛn i ya’n kwlaa nglo.
39 I wla kpɛn su kɛ be ti klɔ sran,+be ti kɛ aunmuan m’ɔ fita kɔ m’ɔ sɛmɛn i sin’n sa.*
40 Be yoli ɲin kekle i su wie pɛ aawlɛ flɛnnɛn’n nun lɔ,+yɛ be kpɔtɔli i awlɛn’n aawlɛ flɛnnɛn’n nun lɔ.+
41 Be sali Ɲanmiɛn kpɛ sunman be niannin,+be fɔkɔli Izraɛli Ɲanmiɛn m’ɔ ti Sanwun’n i awlɛn.
42 Be wla w’a kpɛnmɛn i tinmin*
m’ɔ fa deli be* be kpɔfuɛ’n i sa nun’n, i su.+
43 Be wla w’a kpɛnman su kɛ ɔ yoli abonuan sa mun Ezipti lɔ,+yɛ be wla w’a kpɛnman su kɛ ɔ yoli abonuan sa mun Zoan asa’n su lɔ.
44 Ɔ yoli maan Nili nzue’n i sama’m be kacili mmoja,+yɛ b’a kwlá nɔnman be nzue ba mun.
45 Ɔ sunmannin tuin kpanngban kpa naan be wa di be,+ɔ nin klɛ mun naan be wa nunnun be.+
46 Ɔ fali be fie’m be su ninnge nga be kpɛli’n ɔ fa mannin lalo mɔ be saci like’n.
Ɔ fali junman nga be dili’n i nuan like’n fa mannin lalo mɔ be tu likawlɛ’n.+
47 Ɔ fali nzraama mɔ kɛ nzue tɔ́’n ɔ gua’n, ɔ fa sacili be viɲin mun,+ɔ nin be sikomɔɔ waka mun.
48 Ɔ yili be nnɛn nga be fa sua be trɔ mun’n mannin nzraama mɔ kɛ nzue tɔ́’n ɔ gua’n,+yɛ ɔ yili be nnɛn mun mannin angblannan’n.*
49 Ɔ yoli maan i ya’n jueli be su,ya dan nin ya ble nin ɲrɛnnɛn jueli be su.
Ɔ sunmannin anzi kpanngban naan be fa ɲrɛnnɛn be bla.
50 Ɔ yili i ya’n i nglo.
W’a deman be wie’n i sa nun.
Yɛ ɔ yili be mannin tukpacɛ m’ɔ sa ndɛndɛ’n.
51 I agualiɛ su’n, ɔ kunnin Ezipti lɔ ba klikli’m be kwlaa.+
Ɔ kunnin be wa klikli mun Kamun lɔ tannin sua’mbe nun.
52 Kɛ ɔ yoli sɔ’n, ɔ fɛli i nvlefuɛ mun fiteli kɛ bua mun sa,+yɛ ɔ kleli be atin kɛ nnɛn akpasua kun sa aawlɛ flɛnnɛn’n nun lɔ.
53 Ɔ fali be ɔli, like fi w’a yoman be,yɛ srɛ w’a kunman be.+
Jenvie’n katali be kpɔfuɛ’m be su.+
54 Ɔ fali be ɔli i lika m’ɔ ti i liɛ klonglo’n nun lɔ,+Okaoka lika m’ɔ fɛli i sa fama’n fali’n nun lɔ.+
55 Ɔ fuannin nvlenvle mun be ɲrun.+
Ɔ fali like sunnzunlɛ ɲanman’n sunnzunnin aja like kun mannin be.+
Ɔ fali Izraɛli akpasua mun trannin be sua’m be nun.+
56 Sanngɛ be klɔklɔli Ɲanmiɛn m’ɔ o Like Kwlaa Ti Su’n sa trilili, yɛ be yoli ɲin kekle i su.+
B’a faman be ɲin b’a siemɛn i i afɔtuɛ’m be su.+
57 Asa ekun’n, be fali atin uflɛ, yɛ be yoli gblɛfuɛ kɛ be nannan mun sa.+
Be kwlá lafiman be su, be ti kɛ ta mɔ b’a cuɛnmɛn i ɲanman’n nun kpa’n sa.+
58 Be fali be amuin sɔwlɛ mun be fa fɔkɔli i awlɛn titi,+yɛ be fali be amuin ba mɔ be sɛ be’n klɔklɔli i ya’n.+
59 Ɲanmiɛn tili, yɛ ɔ fali ya dan,+ɔ maan ɔ yili Izraɛli i blo mlɔnmlɔn.
60 I agualiɛ su’n, ɔ jasoli Silo lɔ Ɲanmiɛn i tannin sua’n nun,+tannin sua m’ɔ trannin nun sran’m be afiɛn’n.+
61 Ɔ yacili i wunmiɛn’n i nzɔliɛ’n i lɛ maan be fa ɔli.
Ɔ fɛli i aɲrunɲan’n wlali i kpɔfuɛ’n i sa nun.+
62 Ɔ yili i nvlefuɛ mun mannin tokofi’n,+yɛ ɔ fali ya dan kpa i aja like’n i wun.
63 Sin yrɛli i gbanflɛn mun kɔlikɔli,yɛ b’a toman atɔnvlɛ falɛ jue b’a mɛnmɛn i talua mɔ be nin-a siman bian’n.*
64 Be fali tokofi kunnin i ɲrun jranfuɛ mun,+yɛ be angbeti’m b’a sunman.+
65 Ɔ maan Zoova jasoli kɛsran m’ɔ su lafi mɔ w’a jaso’n sa,+ɔ jasoli kɛ safuɲrɛn+ wie mɔ duvɛn’n w’a titi i ɲin su’n sa.
66 Ɔ yoli maan i kpɔfuɛ’m be cuɛnnin be wun.+
Ɔ fali ɲannzuɛn’n yili be su mlɔnmlɔnmlɔn.
67 Ɔ yili Zozɛfu i tanninsua’n i blo.
W’a faman Efraimun akpasua’n.
68 Sanngɛ ɔ fali Zida akpasua’n,+ɔ fali Siɔn Oka m’ɔ klo i’n.+
69 Ɔ kplɛnnin i sua’n naan ɔ ka lɛ tititi kɛ ɲanmiɛn’n sa,+kɛ asiɛ m’ɔ yili i naan ɔ ka lɛ tititi’n sa.+
70 Ɔ fali Davidi+ m’ɔ ti i sufuɛ’n,ɔ fɛli i bua tui’m be nun,+
71 ɔ fɛli i kan ɔ nian bua nga be te man be mma’m be wunflɛn’n be lika lɔ’n.
Ɔ fɛ i sieli i Zakɔbu su, yɛle kɛ i nvle’n i su,+ naan ɔ niɛn i lika kɛ bua sunianfuɛ’n fa niɛn i bua’m be lika’n sa.
Ɔ fɛ i sieli Izraɛli m’ɔ ti i aja like’n i su.+
72 Ɔ tuli i klun kpa niannin be lika,+yɛ ɔ fɛli i sa m’ɔ si like yo’n kleli be atin.+
Ja ngua lɔ ndɛ mun
^ Nian Ndɛ’m be bo tulɛ lika’n nun lɔ.
^ Annzɛ “like nga n kle amun’n.”
^ Annzɛ “wla kpɛnlɛ like kun.”
^ Annzɛ “anzi mun.”
^ Annzɛ “Klunngbɔ Tufuɛ.”
^ Ebr., “Ɔ kata be fɔnlɛ’n su.”
^ Be kwla se ekun kɛ “nguan’n fite yɛ ɔ sɛmɛn i sin.”
^ Ebr., “i sa.”
^ Ebr., “m’ɔ kpɔli be ti.”
^ Be kwla se ekun kɛ “ayrɛ dan guali be wun.”
^ Ebr., “b’a yimɛn i talua mɔ be nin-a siman bian’n be ayɛ.”
