Sa nga be yili i nglo kleli Zan’n 6:1-17
-
Bua Ba’n tutuli ninnge nsiɛn klikli nga be fa trali fluwa’n i nuan’n i ase’n (1-17)
-
Sran ng’ɔ kwla’n wo nnɛn kpanngɔ ufue’n su (1, 2)
-
Nnɛn kpanngɔ ng’ɔ ti ɔkwlɛ kɛ sin sa’n i su fufuɛ’n yó maan fɔundi’n tú asiɛ’n su (3, 4)
-
Nnɛn kpanngɔ ble’n i su fufuɛ’n yó maan awe’n kpɛ́n (5, 6)
-
Nnɛn kpanngɔ nga w’a kpa fuai kɛ sran mɔ tukpacɛ w’a ti i kpa’n sa’n i su fufuɛ’n suan Wie’n (7, 8)
-
Be nga be kunnin be’n be o tɛ yiwlɛ’n i bo (9-11)
-
Asiɛ’n kejeli dan kpa (12-17)
-
6 I sin’n, n niannin lɔ ekun. Kɛ Bua Ba’n+ tuli like nso nga be fa trali fluwa’n i nuan’n i ase’n+ be nun kun’n, n tili anzi nnan’m+ be nun kun i nɛn’n. Ɔ tɛ kɛ ɲanmiɛn’n su kpla sa. Ɔ seli kɛ: “Bla!”
2 Kpɛkun n wunnin nnɛn kpanngɔ ufue kun.+ Ta o sran ng’ɔ ti su’n i sa nun. Yɛ be mɛnnin i famiɛn kle kun,+ kpɛkun ɔ ɔli kɛ ɔ nin i kpɔfuɛ’m bé kó kún alɛ naan ɔ́ kwlá be.+
3 Kɛ ɔ tuli like nɲɔn su nga be fa trali fluwa’n i nuan’n i ase’n, n tili anzi nɲɔn su’n+ i nɛn’n. Ɔ seli kɛ: “Bla!”
4 Kpɛkun nnɛn kpanngɔ uflɛ fiteli. Ɔ ti ɔkwlɛ kɛ sin sa. Be mannin sran ng’ɔ ti su’n i atin kɛ ɔ yo naan fɔundi’n tu asiɛ’n su naan klɔ sran’m be kun be wiengu. Kpɛkun be mɛnnin i tokofi dan kpa kun.+
5 Kɛ ɔ tuli like nsan su nga be fa trali fluwa’n i nuan’n i ase’n,+ n tili anzi nsan su’n+ i nɛn’n. Ɔ seli kɛ “Bla!” Kpɛkun n wunnin nnɛn kpanngɔ ble tuun kun. Toe kun wo sran ng’ɔ ti su’n i sa nun.
6 N tili like kun ngan. Ɔ tɛ kɛ sran kun nɛn sa anzi nnan’m be afiɛn lɔ. Ɔ seli kɛ: “Ble kilo* kun ti denie kun,*+ ɔɔzu kilo nsan ti denie kun. Sanngɛ nán an yo olivie ngo’n nin duvɛn’n be finfin.”+
7 Kɛ ɔ tuli like nnan su nga be fa trali fluwa’n i nuan’n i ase’n, n tili anzi nnan su’n+ i nɛn’n. Ɔ seli kɛ: “Bla!”
8 Kpɛkun n wunnin nnɛn kpanngɔ kun. W’a kpa fuai kɛ sran mɔ tukpacɛ w’a ti i kpa’n sa. Be flɛ sran ng’ɔ ti su’n kɛ Wie. Yɛ Ndia’n* su i su, ɔ mɛntɛn i koko kpa. Yɛ be mɛnnin i atin kɛ ɔ fa tokofi tɛnndɛn kun, nin awe,+ nin tukpacɛ tɛ, ɔ nin asiɛ’n su blo nnɛn mun, ɔ fa kun asiɛ’n mɔ be bubuli nun nnan’n i bue kun i sufuɛ mun.+
9 Kɛ ɔ tuli like nnun su nga be fa trali fluwa’n i nuan’n i ase’n, be nga Ɲanmiɛn ndɛ’n nin jasin mɔ be boli’n ti’n be kunnin be’n, n wunnin be mmoja’n+ tɛ yiwlɛ’n+ i bo lɛ.+
10 Be kpan kekle kpa se kɛ: “?E Min, wɔ mɔ a Sie Like Kwlakwla’n, wɔ mɔ a ti sanwun mɔ a ti nanwlɛfuɛ’n,+ cɛn onin ko yɛ á dí asiɛ’n sufuɛ’m be jɔlɛ-ɔ? ?Cɛn onin ko yɛ á tú e mɔ be guali e mmoja’n i ase’n e klunngbɔ-ɔ?”+
11 Be mannin be tinuntinun tralɛ ufue tɛnndɛn kun.+ Kpɛkun be seli be kɛ be minndɛ kan naan be wiengu junman difuɛ mɔ be ti be niaan’n, mɔ be su wa kun be wie’n, be nuan yia ka.+
12 I sin’n, n niannin lɔ ekun. Kɛ ɔ tuli like nsiɛn su nga be fa trali fluwa’n i nuan’n i ase’n, asiɛ’n kejeli dan kpa. Yɛ wia’n luli tuun kpa kɛ tralɛ ble mɔ be fali nnɛn ndrɛ* be yoli’n sa. Anglo ba wunmuan’n bloli bioun kɛ mmoja sa.+
13 Kpɛkun nzraama’m be fin ɲanmiɛn su lɔ be guali asiɛ’n su kɛ figie waka mɔ aunmuan dan wie fitɛ i mɔ i mma amuɛn’m be gua’n sa.
14 Ɲanmiɛn su lɔ’n ɲɔnɲɔnnin kɛ fluwa mɔ b’a ɲɔnɲɔn i’n sa, kpɛkun ɔ mlinnin.+ Yɛ be tuli oka mun nin lika nga nzue bo sin yia be’n be kwlaa be bo be osu’n nun lɛ.+
15 Ɔ maan asiɛ’n su famiɛn mun nin sran dandan mun, ɔ nin sonja akpi su kpɛn mun nin aɲanbeunfuɛ mun, ɔ nin be nga be le wunmiɛn mun nin kanga mun, ɔ nin diewa mun, be fiali yɔbuɛ buɛ’m be nun nin oka’m be su yɔbuɛ’m be afiɛn.+
16 Yɛ be se oka mun nin yɔbuɛ’m be kɛ: “Amun tɔ e su,+ yɛ amun fa e fia naan Sran ng’ɔ ti famiɛn bia’n su’n+ w’a wunman e, naan Bua Ba’n w’a yimɛn i ya’n i nglo e su.+
17 Afin be ya cɛn dan’n w’a ju.+ ?Yɛ wan yɛ ɔ kwla jran be ɲrun-ɔn?”+
Ja ngua lɔ ndɛ mun
^ Rɔmunfuɛ’m be sika mma kun-ɔn. Kɛ sran kun di junman cɛn ba kun nun’n akatua nga be fa mɛn i’n yɛ ɔ o lɛ-ɔ. Nian Nd. B14 nun.
^ Annzɛ “Adɛsi’n.” Nian Ndɛ’m be bo tulɛ lika’n nun lɔ.
^ Kɔlɛ’n, boli ndrɛ ndɛ yɛ be kan-ɔn.
