Sa nga Akoto’m be yoli’n 9:1-43
9 Sanngɛ Sɔlu te fɛ i ɲin te ci e Min’n i sɔnnzɔnfuɛ mun, yɛ ɔ wla be srɛ kɛ ɔ́ kún be.+ Ɔ maan ɔ ko toli Ɲanmiɛn ɲrun jranfuɛ dan’n.
2 Kpɛkun ɔ seli i kɛ ɔ mɛn i fluwa naan ɔ́ kɔ́ Zifu’m be Ɲanmiɛn sulɛ sua nga be o Damasi lɔ’n be nun. I liɛ’n, be ng’ɔ to be mɔ be fa Atin’n su’n,+ i yasua-o, i bla-o, ɔ́ cí be kwlaa naan ɔ́ fá be bá Zerizalɛmun.
3 Kɛ ɔ fali atin’n m’ɔ́ wá jú Damasi’n, ɲanmiɛn’n ka lɛ kpajali piaa guɛli i su,+
4 yɛ ɔ tɔli-ɔ. Kpɛkun ɔ tili sran kun nɛn. Sran sɔ’n seli i kɛ: “?Sɔlu, Sɔlu, ngue ti yɛ a kle min yalɛ-ɔ?”
5 Sɔlu usali kɛ: “?Nannan, wan yɛle wɔ?” Ɔ seli kɛ: “N bɔbɔ min Zezi-ɔ.+ Min yɛ a kle min yalɛ’n niɔn.+
6 Jaso naan kɔ klɔ’n nun lɔ, yɛ bé klé wɔ like ng’ɔ fata kɛ a yo’n.”
7 Kɛ ɔ́ yó sɔ’n, nn be nga ɔ nin be san nun’n, be jinjin lɛ, be kwlá ijɔman. Be tili sran kun nɛn, sanngɛ nanwlɛ b’a wunman sran fi.+
8 Sɔlu jasoli. I ɲinma’m be gua su, sanngɛ ɔ wunman ase. Ɔ maan be trɛli i sa’n, naan b’a fɛ i b’a wɔ Damasi.
9 W’a wunman ase lele cɛn ba nsan, yɛ w’a diman like,+ w’a nɔnman nzue mlɔnmlɔn.
10 Zezi i sɔnnzɔnfuɛ kun o Damasi lɔ, be flɛ i Ananiasi.+ E Min’n seli i aolia nun kɛ: “Ananiasi!” Ɔ tɛli su kɛ: “E Min, min yɛ n wo yɛ.”
11 Yɛ e Min’n seli i kɛ: “Jaso, fa atin nga be flɛ i Trele’n su, naan kɔ Zida i awlo lɔ. Usa sran nga be flɛ i Sɔlu m’ɔ fin Tasi’n+ i osu. Afin ɔ su srɛ Ɲanmiɛn,
12 yɛ ɔ wunnin bian kun mɔ be flɛ i Ananiasi’n aolia nun, ɔ bali ɔ wa fɛli i sa fuɛli i su naan ɔ wun ase.”+
13 Sanngɛ Ananiasi tɛli su kɛ: “E Min, n tili bian sɔ’n i su ndɛ nga be kan’n. N tili i sran kpanngban be nuan nun kɛ ɔ kleli Ɲanmiɛn i sran nga be o Zerizalɛmun lɔ’n, be yalɛ kpa.
14 Kpɛkun Ɲanmiɛn ɲrun jranfuɛ’m be su kpɛn’m be mɛnnin i atin kɛ be kwlaa nga be bo ɔ dunman wa’n, ɔ tra be.”*+
15 Sanngɛ e Min’n seli i kɛ: “Kɔ! Afin n kpali bian sɔ’n+ kɛ ɔ bo min dunman kle be nga be timan Zifu’n+ nin famiɛn mun,+ ɔ nin Izraɛlifuɛ mun.
16 Afin ń má klé i weiin kɛ min dunman’n ti’n, ɔ́ wún ɲrɛnnɛn sunman.”+
17 Yɛ Ananiasi ɔli-ɔ. Ɔ wluli sua’n nun lɔ, kpɛkun ɔ fɛli i sa’n fuɛli i su, naan w’a se kɛ: “Sɔlu, min niaan, e Min Zezi m’ɔ yili i wun nglo kleli wɔ atin’n nun lɔ’n, ɔ sunmannin min ɔ sin naan n yo naan a wun ase, naan Ɲanmiɛn wawɛ’n jra ɔ su.”+
18 Kpɛkun be ja nun lɛ’n, like wie mɔ be ti kɛ jue wun bui sa’n be fin i ɲin su guali. Yɛ ɔ wunnin ase-ɔ. Ɔ maan ɔ jasoli, naan b’a yo i batɛmun.
19 Ɔ dili like kan, kpɛkun ɔ ɲannin wunmiɛn.
Ɔ kali Zezi i sɔnnzɔnfuɛ nga be o Damasi lɔ’n, be wun lɛ le nɲɔn kun.+
20 Kpɛkun w’a sisimɛn i bo, ɔ ɔli Zifu’m be Ɲanmiɛn sulɛ sua’m be nun ko kannin Zezi i ndɛ. Ɔ seli kɛ Zezi ti Ɲanmiɛn i Wa.
21 Sanngɛ ndɛ ng’ɔ kan’n, ɔ bo be kwlaa nga be ti’n be nuan. Yɛ be se kɛ: “?Nán bian nga yɛ ɔ kleli be nga be o Zerizalɛmun lɔ mɔ be bo dunman sɔ’n, be ɲrɛnnɛn’n niɔn?+ ?W’a baman wa kɛ ɔ́ trá be naan ɔ́ fá be kó wlá Ɲanmiɛn ɲrun jranfuɛ’m be su kpɛn’m be sa nun?”+
22 Sanngɛ kɛ ɔ́ kɔ́ i ɲrun’n, nn Sɔlu sí Ɲanmiɛn ndɛ’n i kan kpa. Kpɛkun kɛ ɔ kleli Zifu nga be o Damasi lɔ’n be weiin kɛ Zezi yɛ ɔ ti Klisi’n,+ b’a kwlaman ndɛ fi kan.
23 Kɛ ɔ dili le nɲɔn kun’n, Zifu’m be kwlaa be cicili i wun ndɛ kɛ bé kún i.+
24 Sanngɛ Sɔlu tili ndɛ sɔ’n. Kɛ mɔ be kunndɛ kɛ bé kún i’n ti’n, be nian anuan’m be su wia nun nin kɔnguɛ.
25 Ɔ maan kɔnguɛ’n, i sɔnnzɔnfuɛ’m be fɛ i sieli gbogbo kun nun, naan b’a fɛ i b’a sin fenɛtri kun nun b’a jrɛ i talɛ’n i sin lɔ.+
26 Kɛ ɔ juli Zerizalɛmun lɔ’n,+ ɔ kunndɛli kpa kɛ ɔ́ fɛ́ i wun mántan Zezi i sɔnnzɔnfuɛ mun. Sanngɛ be kwlaa be sro i, afin be lafiman su kɛ w’a kaci Zezi i sɔnnzɔnfuɛ sakpa.
27 I sɔ’n ti’n, Baanabasi+ ukɛli i. Ɔ fɛ i ɔli akoto’m be wun lɔ. Ɔ maan Sɔlu yiyili nun weiin kleli be kɛ atin nun’n, ɔ wunnin e Min’n+ naan ɔ nin i be ijɔli. Ɔ seli be ekun kɛ i nun ng’ɔ o Damasi lɔ’n, ɔ ijɔli yakpa su Zezi dunman nun.+
28 Ɔ kali be wun lɛ. Ɔ wlanwlannin Zerizalɛmun klɔ’n nun, sran fi w’a klemɛn i yalɛ. Kɛ ɔ́ yó sɔ’n, nn ɔ́ íjɔ yakpa su e Min’n i dunman nun.
29 Ɔ nin Zifu nga be kan Glɛki’n be koko yalɛ, kpɛkun ɔ nin be si akplowa. Sanngɛ be liɛ’n, be cicili i wun ndɛ naan bé kún i.+
30 Kɛ aniaan’m be tili ndɛ’n nun’n, be fɛ i ɔli Sezare, naan b’a fɛ i b’a ɔ Tasi.+
31 Kɛ ɔ yoli sɔ’n, asɔnun’n i nunfuɛ nga be o Zide, nin Galile, ɔ nin Samari lɔ’n,+ be dili fɔundi dan. Kpɛkun be lafili Ɲanmiɛn su kpa trali laa’n. Asa kusu’n, be sroli Zoova* kpa, kpɛkun Ɲanmiɛn wawɛ’n fɔnvɔli be kpa.+ I sɔ’n ti’n, sran kpanngban be wa kacili Ɲanmiɛn i sufuɛ.
32 Kɛ Piɛli wlánwlán akpasua sɔ’n i bue kwlaa su’n, ɔ ɔli Ɲanmiɛn i sran nga be o Lida lɔ’n be wun lɔ wie.+
33 Kɛ ɔ juli lɔ’n, ɔ wunnin bian kun, be flɛ i Ene. Bian sɔ’n ti bubuwafuɛ, ɔ lɛ i bɛ’n su w’a di afuɛ mɔcuɛ.
34 Piɛli seli i kɛ: “Ene, Zezi Klisi w’a yo ɔ juejue.+ Jaso naan siesie ɔ bɛ’n.”+ Yɛ be ja nun lɛ’n, ɔ jasoli-ɔ.
35 Kɛ be nga be o Lida nin Sarɔn i lika kpɛtɛkplɛɛ’n nun lɔ’n be wunnin sa sɔ’n, be fali be wun mannin e Min’n.
36 Zezi i sɔnnzɔnfuɛ kun o Zope lɔ, ɔ suan Tabita. Dunman sɔ’n i bo’n yɛle “Dɔɔkasi.”* Ɔ yo sran’m be ye kpa. Kpɛkun ɔ cɛ yalɛfuɛ’m be ninnge kpanngban kpa.
37 Blɛ sɔ’n nun’n, ɔ tɔli tukpacɛ, yɛ ɔ wuli. Ɔ maan be wunnzinnin i, kpɛkun be lɛli i sua ba ng’ɔ o nglo lɔ’n nun.
38 Lida klɔ’n nin Zope klɔ’n be mantan su. Ɔ maan kɛ Zezi i sɔnnzɔnfuɛ’m be tili i kɛ Piɛli o klɔ sɔ’n su’n, be sunmannin yasua nɲɔn lɔ. Be srɛli i kɛ: “Nán sisi ɔ bo, bla e wun wa.”
39 Ɔ maan Piɛli jasoli, kpɛkun ɔ nin be ɔli. Kɛ be juli lɔ’n, be fɛ i ɔli sua ba ng’ɔ o nglo lɔ’n nun. Angbeti bla’m be kwlaa be toli i lɔ. Kɛ ɔ́ yó sɔ’n, nn bé fá tralɛ nin ninnge kpanngban nga Dɔɔkasi kpali be’n i nun mɔ i ɲin te o su’n bé klé i, nn bé sún.
40 Piɛli seli sran’m be kwlaa kɛ be fite gua su lɔ.+ Kpɛkun ɔ kotoli, ɔ srɛli Ɲanmiɛn. I sin’n, ɔ kpɛli i ɲin fuɛn’n su lɔ, naan w’a se kɛ: “Tabita, jaso!” Bla’n tikeli i ɲinma. Kɛ ɔ wunnin Piɛli cɛ’n, ɔ jaso trannin ase.+
41 Piɛli trɛli i sa’n naan w’a mɛn i su. Kpɛkun ɔ flɛli Ɲanmiɛn i sran mun nin angbeti bla mun naan w’a fa bla mɔ i ɲin o su’n w’a kle be.+
42 Ndɛ sɔ’n truli Zope klɔ wunmuan’n nun. Ɔ maan sran kpanngban kpa be wa lafili e Min’n su.+
43 Ɔ dili le nɲɔn kun Zope lɛ. Ɔ trannin bian kun m’ɔ di nnɛn kplo wun junman’n i awlo lɔ. Be flɛ bian sɔ’n kɛ Simɔn.+
Ja ngua lɔ ndɛ mun
^ Glk., “ɔ ci be.”
^ Glɛki dunman Dɔɔkasi nin Aramun dunman Tabita’n, be bo’n yɛle “Wannzannin.”
