Fluwa nga Pɔlu klɛli Galasifuɛ mun’n 1:1-24
1 Min Pɔlu, n ti akoto. Sanngɛ nán klɔ sran mun yɛ be sieli min akoto-ɔ. Zezi Klisi+ nin e Si Ɲanmiɛn+ m’ɔ cɛnnin i’n, be yɛ be sieli min akoto-ɔ.
2 E nin aniaan’m be kwlaa yɛ e klɛ Galasi lɔ asɔnun’m be fluwa nga-ɔ.
3 Maan e Si Ɲanmiɛn nin e Min Zezi Klisi be yo amun ye, yɛ maan be yo naan amun di fɔundi.
4 E sa tɛ’m be ti’n e Min’n fɛli i wun mannin.+ Ɔ yoli sɔ naan w’a de e mɛn* tɛ nga nun.+ Like sɔ m’ɔ yoli’n ɔ ti e Si Ɲanmiɛn i klun su.+
5 Maan aɲrunɲan’n yo Ɲanmiɛn liɛ tititi. Maan ɔ yo sɔ.
6 Sa kun bo min nuan. Yɛle kɛ, amun su kpli kaci amun sin si Sran mɔ Klisi i aklunye dan’n ti’n ɔ flɛli amun’n, kpɛkun ndɛ uflɛ yɛ amun su fa su kɛ ɔ ti jasin fɛ-ɔ.+
7 Nán kɛ jasin fɛ uflɛ o lɛ ti-ɔ. Sanngɛ sran wie’m be su kle amun yalɛ,+ yɛ be kunndɛ kɛ bé kpɛ́ Klisi’n i su jasin fɛ’n i wun.
8 I sɔ’n ti’n, sɛ e nun kun, annzɛ sɛ anzi wie bɔbɔ fin ɲanmiɛn su lɔ ɔ wa bo jasin fɛ wie kle amun, naan ɔ nin jasin fɛ nga e boli e kleli amun’n be timan kun’n, maan be bo i sannzan.
9 Kɛ nga e dun mmua fa kannin’n sa’n, ń kɛ́n i ekun kɛ sran ng’ɔ bo jasin fɛ wie kle amun naan ɔ nin nga amun fali su’n be timan kun’n, maan be bo i sannzan.
10 ?Klɔ sran’m be ɲrun dunman yɛ n kunndɛ-ɔ? ?Annzɛ Ɲanmiɛn ɲrun dunman yɛ n kunndɛ-ɔ? Nanwlɛ, n kunndɛman dunman klɔ sran’m be ɲrun. Sɛ n kunndɛ dunman klɔ sran’m be ɲrun’n, nn n timan Klisi i kanga.
11 Aniaan mun, n kunndɛ kɛ amun wun i wlɛ kɛ jasin fɛ nga n bo kleli amun’n, ɔ finman klɔ sran.+
12 Afin nán klɔ sran mun yɛ be fa wlali min sa nun-ɔn, yɛ kusu nán klɔ sran mun yɛ be kan kleli min-ɔn. Sanngɛ Zezi Klisi yɛ ɔ yili i nglo kleli min-ɔn.
13 Amun tili i kɛ i nun nga n te fa like nga Zifu’m be kle’n su’n,+ m’an yaciman Ɲanmiɛn i asɔnun’n i ɲrɛnnɛn klelɛ. N kunndɛli kɛ ń sáci i.+
14 Like nga Zifu’m be kle’n i su falɛ’n nun’n, n ɔli min ɲrun kpa. N yoli sɔ n trali min manngu nga be tran min nvle’n nun’n be nun sunman. N fali min nannan’m be nzuɛn’n su kpa n trali su.+
15 Sanngɛ Ɲanmiɛn m’ɔ yoli maan min nin’n wuli min’n, yɛ ɔ flɛli min-ɔn. Ɔ maan ɔ yoli min ye dan,+ ɔ wunnin kɛ ɔ ti kpa kɛ
16 ɔ yi i Wa’n i nglo kle min naan n bo i su jasin fɛ’n n kle be nga be timan Zifu’n.+ Kɛ blɛ sɔ’n juli’n, m’an ko wunman klɔ sran fi wun.
17 Asa ekun’n, be nga be o Zerizalɛmun lɔ mɔ be dun mmua sieli be akoto naan b’a sie min akoto’n, m’an ɔman be wun wunlɛ. Sanngɛ n ɔli Arabi mɛn’n nun lɔ. I sin’n, n sali min sin Damasi lɔ.+
18 Kɛ afuɛ nsan sinnin’n, n ɔli Sefasi*+ i wun wunlɛ Zerizalɛmun lɔ.+ N trɛnnin i wun lɔ cɛn ba blu-nin-nnun (15).
19 Sanngɛ m’an wunman akoto onga’m be nun wie fi. E Min’n i niaan bian Zaki+ kunngba cɛ yɛ n wunnin i-ɔ.
20 Ndɛ nga n su klɛ n blɛ amun yɛ’n, Ɲanmiɛn ti min lalofuɛ, n buaman ato.
21 I sin’n, n ɔli Siri mɛn’n nin Silisi mɛn’n be nun lɔ.+
22 Asɔnun nga be nin Klisi be o nun Zide lɔ’n, be nunfuɛ’m be liɛ’n, be siman min.
23 Ɔ maan ndɛ nga be kan kle be titi’n yɛ: “Bian m’ɔ kleli e ɲrɛnnɛn laa’n,+ m’ɔ kunndɛli kɛ ɔ́ sáci asɔnun’n,+ ɔ su bo like nga e lafi su’n i su jasin fɛ’n siɛn’n.”
24 Ɔ maan min ti’n, be manmannin Ɲanmiɛn.
