Ezekiɛli 42:1-20
42 I sin’n, ɔ fa min ɔli awlo klun dan’n i nglo lɔ lika’n nun.+ Ɔ fa min ɔli like diwlɛ nga be o lika nga b’a kataman su’n+ i wun lɛ’n be wun lɔ, be o sua ng’ɔ o Ɲanmiɛn sua’n i sin lɔ’n i nglo lɔ lika’n nun.+
2 Sua sɔ’n i bue ng’ɔ o anuan ng’ɔ o nglo lɔ lika’n nun i bue liɛ’n su lɔ’n, i tɛnndɛn nun’n ti kude* ya kun (100), yɛ i tɛtrɛ nun’n ti kude ablenun (50).
3 Ɔ o awlo klun kaan’n mɔ i tɛtrɛ nun’n ti kude ablaɔn’n (20)+ ɔ nin awlo klun dan’n i dalasi’n be afiɛn’n nun. Be sinwlɛ’m be ɲin’n wɔ su yɛ ɔ ti sɔ etazi nsan.
4 Sinwlɛ kun o like diwlɛ’m* be ɲrun lɛ,+ i tɛtrɛ nun’n ti kude blu, yɛ i tɛnndɛn nun’n ti kude ya kun (100).* Be anuan’m be kpɛ nglo lɔ lika’n nun.
5 Sinwlɛ’m be ti’n, like diwlɛ nga be o etazi’n i ti su nglo lɔ’n be ti kanngan tra like diwlɛ nga be o ja ngua nin afiɛn lɛ’n.
6 Afin be ti etazi nsan, sanngɛ be leman ja mlomlo kɛ awlo klun’m be ja mlomlo mun sa. I sɔ’n ti yɛ be lika liɛ’n ti kaan tra like diwlɛ nga be o etazi’n i ja ngua’n nin i afiɛn’n be liɛ’n niɔn.
7 Yɔbuɛ talɛ nga i ɲin kaci gua su lɔ’n, m’ɔ mantan like diwlɛ’m be koko’n, m’ɔ o awlo klun dan’n i wun lɛ’n, mɔ i ɲin kpɛ like diwlɛ onga’m be su lɔ’n i tɛnndɛn nun’n ti kude ablenun (50).
8 Afin like diwlɛ nga be o awlo klun dan’n i wun lɛ’n be tɛnndɛn nun’n ti kude ablenun (50). Sanngɛ nga be o Ɲanmiɛn sua’n i ɲrun ndɛnman su’n, be tɛnndɛn nun’n ti kude ya kun (100).
9 Sinwlɛ kun o wia afiliɛ lɔ lika’n nun. Be kwla fɛ i awlo klun dan’n nun lɛ be sin lɛ be kɔ like diwlɛ’m be nun lɔ.
10 Like diwlɛ wie mun ekun be o ngua lɔ lika’n nun. Awlo klun’n i yɔbuɛ talɛ’n ɔ o be wia afiliɛ lɔ. Be mantan lika nga b’a kataman su’n, ɔ nin sua’n.+
11 Atin kun o be ɲrun lɛ. Ɔ ti kɛ like diwlɛ nga be o nglo lɔ lika’n nun’n+ be liɛ’n sa. Be tɛnndɛn nun’n nin be tɛtrɛ nun’n be sɛ. Be lika nga be sin lɛ be fite’n ɔ ti kun, yɛ wafa nga be kplannin be’n ɔ ti kun. Be lika nga be sin lɛ be wlu’n,
12 ɔ nin like diwlɛ nga be o ja ngua lɔ lika’n nun’n be liɛ’n ti kun. Lika nga atin’n bo i bo lɛ’n, yɔbuɛ talɛ ng’ɔ o wia afiliɛ lɔ’n i ɲrun lɛ’n, sinwlɛ kun o lɛ be kwla sin lɛ be wlu lɔ.+
13 Kpɛkun ɔ seli min kɛ: “Like diwlɛ nga be o nglo lɔ lika’n nun’n, ɔ nin like diwlɛ nga be o ngua lɔ lika’n nun mɔ be o lika nga b’a kataman su’n+ i wun lɛ’n, be ti like diwlɛ mɔ be ti Ɲanmiɛn liɛ klonglo-ɔ. Be nun yɛ Ɲanmiɛn ɲrun jranfuɛ nga be kɔ Zoova ɲrun’n be di ninnge nga be fa mɛn i’n, mɔ be ti i liɛ klonglo’n niɔn.+ Be nun yɛ be fa ninnge nga be fa man Ɲanmiɛn m’ɔ ti i liɛ klonglo’n, ɔ nin ble annzɛ i wunsu like mɔ be fa man Ɲanmiɛn’n, ɔ nin sa tɛ’n i ti tɛ’n, ɔ nin sa tɛ’n i ti kpatalɛ tɛ’n be sie-ɔ. Afin lika’n ti Ɲanmiɛn liɛ klonglo.+
14 Kɛ Ɲanmiɛn ɲrun jranfuɛ’m be ko wlu lika m’ɔ ti Ɲanmiɛn liɛ klonglo’n i nun lɔ’n, sɛ be nin-a yiman be wun tralɛ nga be fa dili junman’n,+ ɔ fataman kɛ be fite be kpɛn awlo klun dan’n nun wa. Afin be ti Ɲanmiɛn liɛ klonglo. Ɔ fata kɛ be wla tralɛ uflɛ naan b’a kwla wɔ lika nga be man sran kwlaa atin kɛ ɔ wɔ lɔ’n.”
15 Kɛ ɔ wieli Ɲanmiɛn sua’n i klun lɔ’n* i sunnzun’n, ɔ fali min sinnin anuan nga i ɲin kpɛ wia afiliɛ lɔ’n+ nun fiteli. Kpɛkun ɔ sunnzunnin lika wunmuan’n.
16 Ɔ fali ndɛma nga be fa sunnzun like’n* ɔ fa sunnzunnin lika’n i bue nga i ɲin kpɛ wia afiliɛ lɔ’n. Kɛ ɔ fali ndɛma nga be fa sunnzun like’n ɔ fa sunnzunnin’n, kɛ ɔ fɛ i i bue kun su m’ɔ́ fá jú i bue uflɛ su’n, i tɛnndɛn nun’n ti ndɛma ya nnun (500).
17 Ɔ sunnzunnin i bue nga i ɲin kpɛ nglo lɔ lika’n su’n. Kɛ ɔ fali ndɛma nga be fa sunnzun like’n ɔ fa sunnzunnin’n, i tɛnndɛn nun’n ti ndɛma ya nnun (500).
18 Ɔ sunnzunnin lika nga i ɲin kpɛ ngua lɔ lika’n su’n. Kɛ ɔ fali ndɛma nga be fa sunnzun like’n ɔ fa sunnzunnin’n, i tɛnndɛn nun’n ti ndɛma ya nnun (500).
19 Ɔ ɔli i bue ng’ɔ kpɛ wia atɔliɛ lɔ lika’n nun’n i su lɔ. Ɔ fali ndɛma nga be fa sunnzun like’n ɔ fa sunnzunnin. I tɛnndɛn nun’n ti ndɛma ya nnun (500).
20 Ɔ sunnzunnin i bue nnan mun. Talɛ kun bo sin yiɛ i.+ Talɛ sɔ’n yo maan be wun ngbaciɛ ng’ɔ o like ng’ɔ ti Ɲanmiɛn liɛ klonglo’n ɔ nin ng’ɔ timan Ɲanmiɛn liɛ klonglo’n be afiɛn’n.+ I tɛnndɛn nun’n ti ndɛma ya nnun (500) yɛ i tɛtrɛ nun’n ti ndɛma ya nnun (500).+
Ja ngua lɔ ndɛ mun
^ Annzɛ “sua ba mun.”
^ Biblu nga be yili i Glɛki nun’n mɔ be flɛ i kɛ Sɛptanti’n i nun’n, be se kɛ “kude 100.” Ebre liɛ nun’n, be se kɛ “Atin kun m’ɔ ti kude kun’n.” Nian Nd. B14 nun.
^ Ebr., “sua’n i klun lɔ sua’n.”
