Fluwa nɲɔn su nga Zan klɛli’n 1:1-13
1 Mmo,* min mɔ n ti kpɛnngbɛn’n,* ń klɛ́ ndɛ nga ń blɛ́ wɔ mɔ Ɲanmiɛn kpali wɔ’n nin ɔ mma mun. N klo amun kpa. Nán min ngunmin yɛ n klo amun sɔ-ɔ. Be kwlaa nga be si ndɛ nanwlɛ’n be klo amun sɔ wie.
2 Afin ndɛ nanwlɛ’n wo e awlɛn’n nun yɛ ɔ́ trán nun tititi.
3 E Si Ɲanmiɛn nin Zezi Klisi m’ɔ ti i Wa’n bé wá yó e ye dan, bé sí e aunnvɔɛ, yɛ bé yó maan é dí fɔundi. Bé kló e yɛ bé klé e ndɛ nanwlɛ’n.
4 Min klun ti jɔwa kpa. Afin n wunnin kɛ ɔ mma’m be nun wie’m be nanti ndɛ nanwlɛ atin’n su+ kɛ nga Siɛ’n seli e kɛ e fa nanti’n sa.
5 Ɔ maan siɛn’n, mmo, ń srɛ́ wɔ kɛ maan e klo e wiengu. Nán mmla uflɛ yɛ n su klɛ n blɛ wɔ-ɔ. Sanngɛ kɛ ɔ fɛ i i bo bolɛ nun’n mmla nga be mannin e’n yɛ ɔ o lɛ-ɔ.+
6 Klolɛ sɔ’n yɛle kɛ maan e nanti Siɛ’n i mmla’m be su titi.+ Ndɛ nga kɛ ɔ fɛ i i bo bolɛ nun’n amun tili’n yɛ ɔ o lɛ-ɔ. I sɔ’n ti’n, maan amun fa su titi.
7 Afin sran mɔ be laka sran’n, be kpanngban b’a ba mɛn’n nun.+ Sran sɔ’m be waan Zezi Klisi w’a baman mɛn’n nun kɛ klɔ sran sa.+ Sran kwlaa ng’ɔ kan sɔ’n, i yɛ ɔ ti sran lakafuɛ nin Klisi i kpɔfuɛ’n niɔn.+
8 Amun nian amun wun su naan junman nga e dili’n i nuan like’n w’a fiman amun sa, sanngɛ maan like nga amún ɲɛ́n i nun’n, ɔ yo dan.+
9 Sran kwlaa ng’ɔ faman like nga Klisi kle’n su naan ɔ kle like uflɛ’n, ɔ nin Ɲanmiɛn be nunman nun.+ Sanngɛ sran ng’ɔ fa like ng’ɔ kle’n su titi’n, i yɛ ɔ nin Siɛ’n nin Ba’n be o nun-ɔn.+
10 Sɛ sran kun to amun naan like ng’ɔ kle’n, ɔ nin Klisi liɛ’n be timan kun’n, nán amun sɔ i nun amun awlo lɔ.+ Yɛ nán amun yo i like.
11 Afin sran ng’ɔ yo i like’n, nn w’a yo i sa tɛtɛ mun wie.
12 N le ndɛ kpanngban mɔ n kunndɛ kɛ ń kán klé amun-ɔn. Sanngɛ n kunndɛman kɛ ń klɛ́ be fluwa su. N lafi su kɛ ń tó amun lɔ naan e nin amun é kókó yalɛ, i liɛ’n amun klun jɔ́ dan.
13 Ɔ niaan bla mɔ be kpɛli i’n, i mma’m bé yó wɔ like.
