2 Be Ɲoliɛ 6:1-42
6 Kɛ ɔ yoli sɔ’n, Salomɔn seli kɛ: “Zoova, a seli kɛ á trán aosin tritri’n nun.+
2 Yɛ m’an kplan sua klanman dan kpa kun m’an man wɔ, m’an man wɔ lika trele kun naan a tran nun tititi.”+
3 I sin’n, famiɛn’n kpɛli i ɲin Izraɛlifuɛ’m be kwlaa nga be yiali mɔ be jinjin lɛ’n, be su lɔ. Kpɛkun ɔ boli muae mannin be.+
4 Ɔ seli kɛ: “Maan manmanlɛ’n yo Zoova m’ɔ ti Izraɛli Ɲanmiɛn’n i liɛ. I bɔbɔ i nuan nun’n, ɔ tali min si Davidi i nda, kpɛkun ɔ fɛli i sa’n fa yiɛli i nuan. Ɔ seli kɛ:
5 ‘Kɛ ɔ fɛ i cɛn nga n fali min sran mun Ezipti mɛn’n nun lɔ fiteli’n, m’an kpaman Izraɛli akpasua’m be klɔ’m be nun kun kɛ i su yɛ be kplan sua kun naan min dunman’n tran su tititi-ɔ.+ Yɛ m’an kpaman sran kun kɛ ɔ yo Izraɛli m’ɔ ti min nvle’n i su kpɛn.
6 Sanngɛ siɛn’n, m’an kpa Zerizalɛmun+ naan min dunman’n tran su tititi, yɛ m’an kpa Davidi kɛ ɔ sie Izraɛli m’ɔ ti min nvle’n.’+
7 Min si Davidi kunndɛli kpa kɛ ɔ́ kplán sua kun naan Zoova m’ɔ ti Izraɛli Ɲanmiɛn’n i dunman’n tran su.+
8 Sanngɛ Zoova seli min si Davidi kɛ: ‘A kunndɛli kpa kɛ á kplán sua kun naan min dunman’n tran su. Akunndan kpa yɛ a buli-ɔ.
9 Sanngɛ nán wɔ yɛ á wá kplán sua sɔ’n niɔn. Ba yasua nga á wá wú i’n, i yɛ ɔ́ kplán sua nga min dunman’n trán su’n niɔn.’+
10 Zoova yiali nda ng’ɔ tali’n i nuan. Afin m’an sin min si Davidi i ja nun m’an tran Izraɛli famiɛn bia’n su,+ kɛ nga Zoova fa kannin’n sa.+ Asa ekun’n, n kplannin sua kun naan Zoova m’ɔ ti Izraɛli Ɲanmiɛn’n i dunman’n tran su.
11 Kpɛkun n fali Alaka mɔ yɔbuɛ plaplaapla nɲɔn’m be o nun’n, n sieli i sua’n nun.+ Aenguɛ nga Zoova nin Izraɛlifuɛ’m be trali’n yɛ ɔ klɛ yɔbuɛ sɔ’m be su-ɔ.”
12 I sin’n, ɔ ko jrannin Zoova i tɛ yiwlɛ’n i ndɛnman su lɛ, Izraɛlifuɛ’m be kwlaa be ɲrun lɛ, kpɛkun ɔ mɛnnin i sa’m be su.+
13 (Afin Salomɔn fali aaba yoli cenje kun, ɔ fa sieli i awlo klun’n i afiɛn lɛ.+ I tɛnndɛn nun’n ti kude* nnun, i tɛtrɛ nun’n ti kude nnun yɛ i nglonglo su’n ti kude nsan. Kpɛkun ɔ fuli su.) Ɔ kotoli Izraɛlifuɛ’m be kwlaa be ɲrun lɛ, yɛ ɔ mɛnnin i sa’m be su nglo+
14 naan w’a se kɛ: “Zoova, wɔ mɔ a ti Izraɛli Ɲanmiɛn’n, nglo lɔ-o, asiɛ’n su-o, Ɲanmiɛn uflɛ fi nunman lɛ m’ɔ nin wɔ sɛ-ɔ. Aenguɛ nga a nin ɔ sufuɛ’m be tra’n a di su, yɛ a kle ɔ sufuɛ nga be tu be klun be nanti klanman ɔ ɲrun’n kɛ a klo be dan.+
15 Nda nga a tali ɔ sufuɛ Davidi m’ɔ ti min si’n, a yiɛli i nuan.+ Ɔ bɔbɔ ɔ nuan nun yɛ a tali nda sɔ’n niɔn. Yɛ ɔ bɔbɔ ɔ sa’n yɛ w’a fa yiɛ i nuan andɛ-ɔ.+
16 Siɛn’n, Zoova, wɔ mɔ a ti Izraɛli Ɲanmiɛn’n, yia nda nga a tali min si Davidi m’ɔ ti ɔ sufuɛ’n i nuan. A seli i kɛ: ‘Sɛ ɔ mma’m be nian be wun su naan be fa min mmla’n su+ kɛ nga a fa nantili min ɲrun’n sa’n,+ bé ɲán sran tititi ɔ osu’n nun naan ɔ tran Izraɛli famiɛn bia’n su.’
17 Siɛn’n Zoova, wɔ mɔ a ti Izraɛli Ɲanmiɛn’n, yo maan nda nga a tali ɔ sufuɛ Davidi’n i nuan yia.
18 “?Sanngɛ Ɲanmiɛn, a nin klɔ sran’m bé trán asiɛ’n su wa sakpasakpa?+ Afin a sɔnman ɲanmiɛn m’ɔ la nglo lɔ plaii’n su lɔ bɔbɔ+ naan se kɛ sua nga m’an kplɛn i yɛ’n, yɛ á sɔ́n nun-ɔn!+
19 Siɛn’n, sie ɔ su naan tie ɔ sufuɛ’n i srɛlɛ’n, si min aunnvɔɛ. Ee Zoova, min Ɲanmiɛn, tie ɔ sufuɛ’n i kpanlɛ m’ɔ kpan flɛ wɔ kɛ a ukɛ i’n. Sie ɔ su tie srɛlɛ nga n su srɛ wɔ’n.
20 Tike ɔ ɲinma’n naan ɔ ɲin tran sua nga su wia nun nin kɔnguɛ. Maan ɔ ɲin tran lika nga a seli kɛ á fá ɔ dunman’n síe su’n,+ i su naan kɛ n* kpɛ min ɲin lika nga su wa mɔ n srɛ wɔ’n, w’a tie min srɛlɛ’n.
21 Tie srɛlɛ mɔ min mɔ n ti ɔ sufuɛ’n n srɛ ɔ kɛ a uka min’n. Yɛ kɛ Izraɛlifuɛ mɔ be ti ɔ nvle’n nunfuɛ’n be kpɛ be ɲin lika nga su wa be srɛ wɔ’n,+ tie be srɛlɛ’n. Kɛ a o ɔ tranwlɛ’n nun ɲanmiɛn su lɔ’n, sie ɔ su tie.+ Sie ɔ su naan yaci e wun sa tɛ mun cɛ e.+
22 “Sɛ be waan sran kun yoli i wiengu kun i sa naan be se i kɛ ɔ ta nda,* naan nda* sɔ’n i nuan su sa ɲɛn i’n, sɛ sran sɔ m’ɔ tali nda’n,* ɔ ba ɔ tɛ yiwlɛ’n i ɲrun lɛ, sua nga nun wa’n,+
23 kɛ a o ɲanmiɛn su lɔ’n, sie ɔ su tie, yi ɔ wun nglo yɛ di ɔ sufuɛ’m be jɔlɛ. Yɛle kɛ fa sa nga klunwifuɛ’n yoli’n, i nuan su like’n mɛn i. Yɛ yo maan sa ng’ɔ yoli’n kaci tɔ i bɔbɔ su.+ Sran kpa’n i liɛ’n, se kɛ w’a yoman sa, kpɛkun fɛ i sa kpa m’ɔ yo’n, i nuan like mɛn i.+
24 “Yɛ sɛ Izraɛlifuɛ mun mɔ be ti ɔ nvle’n nunfuɛ’n be yo sa tɛtɛ ɔ ɲrun sa trilili’n, naan i sɔ’n ti’n be kpɔfuɛ’m be kwla be’n,+ sɛ be kaci be sa naan be manman ɔ dunman’n,+ naan be srɛ wɔ’n,+ naan be ba ɔ ɲrun be wa kpata wɔ kpa liɛ su sua nga nun’n,+
25 kɛ a o ɲanmiɛn su lɔ’n,+ sie ɔ su tie. Yaci Izraɛlifuɛ mɔ be ti ɔ nvle’n nunfuɛ’n be sa tɛ mun cɛ be. Kpɛkun fa be sa be sin mɛn nga a fa mannin be nin be nannan mun’n i nun.+
26 “Sɛ be fɔn ɔ wun sa trilili+ naan i sɔ’n ti’n, ɲanmiɛn su lɔ’n tannin naan nzue tɔman’n,+ sɛ be kpɛ be ɲin lika nga su wa naan be srɛ wɔ naan be manman ɔ dunman’n, sɛ a gua be ɲin ase* naan be yaci be sa tɛtɛ’m be yolɛ’n,+
27 kɛ a o ɲanmiɛn su lɔ’n, sie ɔ su tie, yɛ yaci ɔ sufuɛ mun, Izraɛlifuɛ mɔ be ti ɔ nvle’n nunfuɛ’n be sa tɛ mun cɛ be. Afin á wá klé be atin kpa ng’ɔ fata kɛ be fa su’n.+ Yɛ yo maan nzue’n tɔ+ ɔ mɛn mɔ a fa mannin ɔ nvlefuɛ mun kɛ ɔ yo be aja like’n i nun.
28 “Sɛ awe kpɛn nvle’n nun’n,+ annzɛ sɛ tukpacɛ kun m’ɔ sa ndɛndɛ’n tru’n,+ annzɛ sɛ aunmuan’n lo fiaan naan ninnge’m be wu kee’n, annzɛ sɛ tukpacɛ wie saci fie su ninnge mun’n,*+ annzɛ sɛ lalo mun annzɛ aɛcɛ’m+ be ba nvle’n nun kpanngban’n, annzɛ kusu sɛ be kpɔfuɛ’m be tɔ be nvle’n nun klɔ’m* be nun kun su bɔbɔ’n,+ annzɛ sɛ tukpacɛ uflɛ m’ɔ sa ndɛndɛ’n annzɛ tukpacɛ wie tɔ be su’n,+
29 srɛlɛ wafa kwlaa nga be srɛ wɔ’n,+ annzɛ kpatalɛ wafa kwlaa+ nga sran kun annzɛ Izraɛlifuɛ mɔ be ti ɔ nvle’n be kwlaa be kpata wɔ’n (afin sran kun bɔbɔ yɛ ɔ si ɲrɛnnɛn nin afɛ nga be o i su’n niɔn),+ kɛ be man be sa’m be su mɔ be tinngɛ be sua nga i ndɛnman’n,+
30 wɔ mɔ a o ɔ tranwlɛ’n nun ɲanmiɛn su lɔ’n,+ sie ɔ su tie naan yaci be sa tɛ mun cɛ be.+ Yɛ nian sa kwlaa nga sran kun yo’n su fɛ i nuan like mɛn i. Afin a si i awlɛn’n nun lɔ (ɔ kunngba cɛ yɛ a si klɔ sran’n i awlɛn’n nun lɔ sakpasakpa-ɔ).+
31 I liɛ’n, blɛ kwlaa nga bé trán mɛn nga a fa mannin e nannan mun’n i nun’n, bé sró wɔ. Yɛle kɛ bé nánti ɔ atin’m be kwlaa be su.
32 “Asa ekun’n, sɛ aofuɛ wie m’ɔ nunman Izraɛlifuɛ mɔ be ti ɔ nvle nunfuɛ’n be nun’n, mɔ ɔ dunman dan’n,+ nin ɔ tinmin nin ɔ wunmiɛn dan’n be ti’n, ɔ fin mɛn wie nun mmua ba’n, naan ɔ kpɛ i ɲin sua nga su wa ɔ srɛ wɔ’n,+
33 kɛ a o ɔ tranwlɛ’n nun ɲanmiɛn su lɔ’n, sie ɔ su tie. Yɛ yo like kwlaa nga aofuɛ’n srɛ wɔ’n. I liɛ’n, asiɛ’n su sran’m be kwlaa bé sí ɔ dunman’n,+ kpɛkun bé sró wɔ kɛ Izraɛlifuɛ mɔ be ti ɔ nvle’n nunfuɛ’n be fa yo’n sa. Yɛ bé sí kɛ ɔ dunman’n wo sua nga n kplannin’n su.
34 “Sɛ a sunman ɔ nvlefuɛ’m be kɛ be nin be kpɔfuɛ mun be ko kun alɛ’n,+ sɛ be kpɛ be ɲin klɔ nga a kpali’n su’n nin sua nga n kplannin mɔ ɔ dunman’n wo su’n i su wa+ naan be srɛ wɔ’n,+
35 kɛ a o ɲanmiɛn su lɔ’n, tie be srɛlɛ’n, ɔ nin kpatalɛ mɔ be kpata wɔ kɛ a si be aunnvɔɛ’n. Yɛ kan be ti ndɛ.*+
36 “Sɛ be fɔn ɔ wun’n (afin ɔ leman sran kun m’ɔ yoman sa tɛ-ɔ),+ naan a fa be wun ya naan a fa be wla be kpɔfuɛ wie sa nun’n, naan be tra be kɔ mɛn wie nun’n, sɛ mɛn sɔ’n wo mmua-o, annzɛ ɔ o koko-o,+
37 sɛ be ju mɛn sɔ’n nun lɔ naan be kaci be akunndan’n, sɛ be sa be sin ɔ wun naan be srɛ wɔ kɛ a si be aunnvɔɛ mɛn nga be trali be ɔli lɔ’n nun’n, naan be se kɛ: ‘E yoli sa tɛ, sa nga e yoli’n ɔ timan kpa, e yoli klunwi,’+
38 naan kɛ be o kan be trali be ɔli lɔ’n, mɛn nga be fali be ɔli’n nun’n,+ sɛ be fa be awlɛn’n kwlaa+ nin be nguan’n kwlaa be sa be sin ɔ wun naan be kpɛ be ɲin be mɛn mɔ a fa mannin be nannan mun’n i su’n, nin klɔ nga a kpali’n i su’n,+ nin sua nga n kplannin mɔ ɔ dunman o su’n i su naan be srɛ wɔ’n,
39 kɛ a o ɔ tranwlɛ’n nun ɲanmiɛn su lɔ’n, tie be srɛlɛ’n ɔ nin kpatalɛ mɔ be kpata wɔ kɛ a si be aunnvɔɛ’n. Yɛ kan be ti ndɛ+ naan yaci sa nga ɔ nvlefuɛ’m be yoli wɔ’n cɛ be.
40 “Min Ɲanmiɛn, yaci, tike ɔ ɲinma’n yɛ sie ɔ su tie srɛlɛ nga e srɛ wɔ lika nga nun wa’n.+
41 Siɛn’n, Ɲanmiɛn Zoova, kɔ ɔ wunmiɛn lolɛ lika’n nun lɔ.+ A nin Alaka’n m’ɔ kle kɛ a le tinmin’n be wɔ. Ɲanmiɛn Zoova, sɛ sran’m be delɛ’n ti tralɛ’n, maan ɔ ɲrun jranfuɛ’m be wla tralɛ sɔ’n. Yɛ maan sran nga be nin wɔ nanti klanman’n be klun jɔ ɔ klun ufue’n ti.+
42 Ɲanmiɛn Zoova, nán yi ɔ sran nga a kpɛli i’n i blo.+ Maan ɔ wla kpɛn klolɛ dan mɔ a fa kloli ɔ sufuɛ Davidi’n i su.”+
Ja ngua lɔ ndɛ mun
^ Ebr., “ɔ sufuɛ’n.”
^ Ebr., “ɔ bo sannzan.”
^ Ebr., “sannzan.”
^ Ebr., “boli sannzan’n.”
^ Annzɛ “a fa awlabɔɛ yi be su.”
^ Ebr., “nvle’n i anuan mun.”
^ Nian Ndɛʼm be bo tulɛ likaʼn nun lɔ.
^ Ebr., “di jɔlɛ man be.”
