2 Be Ɲoliɛ 14:1-15
14 I sin’n Abia wuli,* kpɛkun be sieli i Davidi Klɔ’n su lɔ.+ Yɛ i wa Aza sinnin i osu kacili famiɛn-ɔn. I blɛ su’n, nvle’n nun tɔli fɔuun lele afuɛ blu.
2 Aza yoli sa ng’ɔ ti kpa’n, nin sa ng’ɔ ti su i Ɲanmiɛn Zoova i ɲrun’n.
3 Ɔ nunnunnin amuin’m be tɛ yiwlɛ’n,+ nin lika nglonglo mun. Kpɛkun ɔ kpukekpukeli yɔbuɛ nga sran’m be takali be mɔ be sɔ be’n be nun.+ Yɛ ɔ kpɛkpɛli waka nga sran’m be sɔ be’n* be bo.+
4 Asa ekun’n, ɔ seli Zidafuɛ’m be kɛ be kpɛ Zoova m’ɔ ti be nannan’m be Ɲanmiɛn’n i sin atin, naan be fa Mmla’n nin ndɛ kwlaa ng’ɔ kannin be’n be su.
5 Ɔ yoli maan lika nglonglo mun, nin ansan yrawlɛ’m be tuli Zida lɔ klɔ’m be kwlaa be su.+ I blɛ liɛ’n su’n, i famiɛn diwlɛ’n nun jɔli fɔuun.
6 Ɔ kplannin Zida lɔ klɔ wie mun, kpɛkun ɔ sisili be wun.+ Afin be mɛn’n nun lɔ’n ti fɔuun. Sran fi w’a faman alɛ w’a wlɛmɛn i sin afuɛ sɔ’m be nun, afin Zoova yoli maan i lika’n nun tɔli fɔuun.+
7 Ɔ seli Zidafuɛ’m be kɛ: “Maan e kplan klɔ nga mun. Yɛ e kplan talɛ e fa sisi be wun, yɛ e kplan klɔ sasafuɛ’m be tranwlɛ mun.+ Maan e yo be anuan mun ɔ nin ninnge nga be fa tanndan anuan’m be sin’n. Dɔ nga su’n, lika’n te o e sa nun, afin e kpɛli Zoova m’ɔ ti e Ɲanmiɛn’n i sin atin. Kɛ e kpɛli i sin atin kusu’n, ɔ yoli maan e lika’n kwlaa nun ti fɔuun.” Ɔ maan be kwla kplannin klɔ sɔ mun.+
8 Aza i sonja nga be fin Zida akpasua’n nun mɔ ɲrɛn dandan nin cua o be sa nun’n, be ti sran akpiakpi ya nsan (300.000). I safuɲrɛn nga be fin Bɛnzamɛn akpasua’n nun mɔ ɲrɛn kanngan* nin ta o be sa nun’n, be ti sran akpiakpi ya nɲɔn akpiakpi ablaɔcuɛ (280.000).+
9 I sin’n, Zera m’ɔ ti Etiopifuɛ’n fali sonja miliɔn kun (1.000.000) nin kakaklolo ya nsan (300) bali+ naan ɔ nin be bé kún. Kɛ ɔ juli Maresa+ lɛ’n,
10 Aza kusu toli i lɔ naan ɔ nin i bé kún. Be sonja’m be ko jranjrannin Zɛfata kongo m’ɔ o Maresa’n nun lɔ.
11 Aza kpan flɛli Zoova m’ɔ ti i Ɲanmiɛn’n.+ Ɔ seli i kɛ: “Zoova, be nga ɔ waan á úka be’n, sɛ be sɔnnin-o, sɛ be leman wunmiɛn-o, be ukalɛ’n timan kekle ɔ sa nun.+ Zoova, e Ɲanmiɛn, uka e. Afin e fali e wla’n e guali* ɔ su.+ Yɛ ɔ dunman nun yɛ e bali naan e nin sran kpanngban nga mun é kún-ɔn.+ Zoova, a ti e Ɲanmiɛn. Nán tran lɛ naan klɔ sran m’ɔ kwla wu’n i fanngan’n tra ɔ liɛ’n.”+
12 I sɔ’n ti’n, Zoova kwlali Etiopifuɛ mun Aza nin Zidafuɛ’m be ɲin bo lɛ. Yɛ Etiopifuɛ’m be wanndili-ɔ.+
13 Aza nin i sonja nga be o lɛ’n, be suli be su lele be juli Geraa.+ Be kunnin Etiopifuɛ mun lelele, be nun kun sa w’a kaman lɛ. Afin Zoova nin i sonja mun be nunnunnin be. I sin’n, sonja’m be ko fali be bo ninnge kpanngban kpa be ɔli.
14 Asa ekun’n, be fali alɛ wlali klɔ kwlaa nga be mantan Geraa lɛ’n be sin. Afin Zoova yoli maan klɔ sɔ’m be sufuɛ’m be wawɛ tɔli blo. Be ko isali klɔ sɔ’m be kwlaa be su ninnge mun be ɔli. Klɔ sɔ’m be su ninnge nga be kwla fa kɔ’n, be sɔnnin kpa.
15 Kpɛkun be ko toli nnɛn tafuɛ mun be tannin sua’m be nun lɔ naan b’a fa alɛ b’a wla be sin. Be fali be nnɛn nin be ɲɔnngɔnmin kpanngban kpa be ɔli. I sin’n, be sali be sin Zerizalɛmun.
Ja ngua lɔ ndɛ mun
^ Ebr., “be lɛli i i nannan’m be wun lɛ.”
^ Nian Ndɛ’m be bo tulɛ lika’n nun lɔ.
^ Blɛ sunman’n, ta tofuɛ mun yɛ be tra ɲrɛn kanngan sɔ’m be nun-ɔn.
^ Ebr., “e kisali.”
