Fluwa klikli nga Pɔlu klɛli Korɛntifuɛ mun’n 8:1-13
8 Amuin aliɛ’n i su ndɛ liɛ’n,+ e si kɛ e kwlakwla e si nun ndɛ.+ Sa silɛ’n yo maan sran di tutre, sanngɛ sran klolɛ’n yo maan sran yo kpa.+
2 Sɛ sran kun bu i kɛ ɔ si sa’n, ɔ nin-a simɛn i kɛ ng’ɔ nin i fata’n sa.
3 Sanngɛ sran ng’ɔ klo Ɲanmiɛn’n, Ɲanmiɛn si i sɔfuɛ’n.
4 Amuin aliɛ’n i dilɛ liɛ’n, e si kɛ amuin’n timan like fi+ mɛn’n nun, naan Ɲanmiɛn ti kunngba cɛ.+
5 Kannzɛ sran’m be flɛ nglo lɔ nin asiɛ’n su wa ninnge kpanngban kɛ ɲanmiɛn’n+ naan i sɔ’n ti’n, sran’m be se kɛ “ɲanmiɛn mun” nin “miɛn mun,” be sɔnnin’n,
6 sanngɛ e liɛ’n, e si kɛ Ɲanmiɛn ti kunngba.+ Yɛle Siɛ’n.+ I fanngan nun ti yɛ ninnge’m be kwlaa be o lɛ-ɔ, yɛ e ti i liɛ.+ Asa ekun’n, e Min’n ti kunngba, yɛle Zezi Klisi. Ɲanmiɛn fɛli i kɛ ɔ yi mɛn’n nun ninnge’m be kwlaa,+ yɛ ɔ fɛli i kɛ ɔ yi e wie.
7 Sanngɛ nán sran ngba yɛ ɔ si sɔ-ɔ.+ Afin sran wie’m be ti amuin sɔfuɛ laa. I sɔ’n ti’n, kɛ be di aliɛ nga be fa mannin amuin mun’n, ɔ yo be kɛ be su sɔ amuin sa.+ Ɔ maan be akunndan’n sanngan, yɛ be akunndan’n bu be fɔ.*+
8 Sanngɛ nán aliɛ ti yɛ e nin Ɲanmiɛn e afiɛn’n mántan kpa-ɔ.+ Sɛ y’a diman’n, ɔ su yoman e tɛ. Sɛ e di kusu’n, ɔ su yoman e kpa traman laa’n.+
9 Sanngɛ an nian amun wun su titi naan like nga amun le atin be yo’n w’a kaciman kɛ yɔbuɛ sa naan be nga be nin-a tinman’n be ja kpla su.+
10 ?Afin sɛ sran wie wun kɛ wɔ mɔ a wun ninnge’m be wlɛ kpa’n, a su di like amuin sua kun nun’n, i sɔ’n su suman sran sɔ m’ɔ nin-a tinman’n i bo naan ɔ di aliɛ mɔ be fa man amuin mun’n?
11 Ɔ maan ɔ sa mɔ a si i’n ti’n, sran ng’ɔ nin-a tinman mɔ i dunman nun wie ti yɛ Klisi wuli’n, ɔ su saci.+
12 Kɛ an yo amun niaan’m be tɛ kɛ ngalɛ’n sa mɔ amun sanngan be akunndan’n,+ Klisi yɛ amun su yo i tɛ-ɔ.
13 I sɔ’n ti’n, sɛ aliɛ ti’n min niaan’n i ja ko kpla’n, n su diman wie kun mlɔnmlɔn naan min ti’n, min niaan’n i ja w’a kplaman.+
Ja ngua lɔ ndɛ mun
^ Glk., “be akunndan’n yo fiɛn.”
