1 Be Ɲoliɛ 26:1-32
26 Wafa nga be bubuli anuan sunianfuɛ’m+ be nun’n yɛ: Kore i osu’n nun’n: Meselemia+ m’ɔ ti Kɔre i wa’n. Kɔre sɔ’n fin Azafu i osu’n nun.
2 Ba yasua nga Meselemia wuli be’n be yɛ: Be kpɛnngbɛn’n yɛle Zakari. Be nɲɔn su’n yɛle Zediaɛli. Be nsan su’n yɛle Zebadia. Be nnan su’n yɛle Zatiniɛli.
3 Be nnun su’n yɛle Elamun. Be nsiɛn su’n yɛle Zoanan. Be nso su’n yɛle Elio-Enai.
4 Ba yasua nga Obɛdi-Edɔmun wuli be’n be yɛ: Be kpɛnngbɛn’n yɛle Semaia. Be nɲɔn su’n yɛle Zozabadi. Be nsan su’n yɛle Zoa. Be nnan su’n yɛle Sakaa. Be nnun su’n yɛle Netanɛli.
5 Be nsiɛn su’n yɛle Amiɛli. Be nso su’n yɛle Isakaa. Be mɔcuɛ su’n yɛle Peletai. Afin Ɲanmiɛn yrɛli i su.
6 Ba yasua nga i wa Semaia wuli be’n, be yoli be osu’n nun awlobo’m be su kpɛn. Afin be ti yasua sran, yɛ be kwla lafi be su.
7 Semaia i mma sɔ mun yɛ: Ɔtnin, nin Refaɛli, nin Obɛdi, ɔ nin Ɛlzabadi. I niaan bian Elii nin Semakia be kusu be ti yasua sran wie.
8 Obɛdi-Edɔmun i osu’n nunfuɛ yɛle be kwlaa sɔ mun. Be bɔbɔ nin be mma mun, nin be niaan’m be ti sran mɔ be kwla lafi be su-ɔ. Yɛ be di junman kpa. Be ti sran ablesiɛn-nin-nɲɔn (62), yɛ be fin Obɛdi-Edɔmun i osu’n nun.
9 Meselemia+ i wa yasua mun nin i niaan bian’m be ti sran blu-nin-mɔcuɛ (18), yɛ be kwla lafi be su.
10 Osa m’ɔ ti Merari i osu’n nunfuɛ’n i mma yasua mun yɛ: Simiri ti be su kpɛn. Nɛ́n i yɛ ɔ ti ba klikli’n niɔn, sanngɛ i si yɛ ɔ sieli i be su kpɛn-ɔn.
11 Be nɲɔn su’n yɛle Ilkia. Be nsan su’n yɛle Tebalia. Be nnan su’n yɛle Zakari. Osa i mma yasua mun nin i niaan bian’m be kwlaa be ti sran blu-nin-nsan (13).
12 Anuan sunianfuɛ’m be su kpɛn’m be di junman kɛ be niaan mun sa wie. Be di junman Zoova i sua’n nun.
13 Be tuli fɔtɔ+ naan bé sí be awloboawlobo’m be nun sran ng’ɔ fata kɛ be nian anuan fanunfanun’m be su’n. Sɛ awlobo’n ti kaan-o, annzɛ ɔ ti dan-o, kɛ be yoli be kwlaa sɔ-ɔ.
14 Kɛ be tuli fɔtɔ’n, wia afiliɛ lɔ anuan liɛ’n yoli Selemia liɛ. I wa Zakari liɛ’n, kɛ be tuli fɔtɔ’n, anuan ng’ɔ o nglo lɔ’n yoli i liɛ. Ɔ si afɔtuɛ man kpa.
15 Anuan ng’ɔ o ngua lɔ’n yoli Obɛdi-Edɔmun liɛ. Kpɛkun be fali ninnge siewlɛ mun wlali i mma’m+ be sa nun.
16 Anuan ng’ɔ o wia atɔliɛ lɔ’n yoli Sipimun nin Osa+ be liɛ. Ɔ mantan Salekɛti Anuan m’ɔ o atin dan ng’ɔ kɔ nglo lɔ’n i wun lɔ’n. Akpasua kun o bue kun, yɛ kun o bue uflɛ su.
17 Cɛn kwlakwla’n, Levifuɛ nsiɛn be jran wia afiliɛ lɔ, nnan be jran nglo lɔ, nnan be jran ngua lɔ. Yɛ ninnge siewlɛ’m+ be wun lɔ’n, Levifuɛ nɲɔn be jran nɲɔn ekun be wun lɛ.
18 Levifuɛ nga be nian kpata tɛnndɛn* ng’ɔ o wia atɔliɛ lɔ’n i su’n, be nun nnan be jran atin dan ng’ɔ kɔ nglo lɔ’n i nuan lɛ,+ yɛ be nun nɲɔn be jran kpata tɛnndɛn sɔ’n i bo lɛ.
19 Be nga be ti anuan sunianfuɛ mɔ be fin Kore osu’n nun’n nin Merari osu’n nun’n, be yɛ be o lɛ-ɔ.
20 Levifuɛ’m be nun’n, Aia yɛ ɔ nian sua ba nga be nun yɛ be sie Ɲanmiɛn Kpli i sua’n nun ninnge kpakpa mun’n nin sua ba nga be nun yɛ be sie ninnge nga be yoli be sanwun’n,*+ be su-ɔ.
21 Ladan i mma’m be nun’n, yɛle kɛ Gɛɛsɔn i osu’n nun ba nga Ladan wuli be’n, mɔ be ti be si’m be awlobo’m be su kpɛn mun’n, be yɛle Zeiɛli+
22 ɔ nin Zeiɛli i mma mun, nin Zetamun nin i niaan bian Zoɛli. Be yɛ be nian Zoova i sua’n nun lɔ sua ba nga be nun yɛ be sie ninnge kpakpa mun’n be su-ɔ.+
23 Amramun osu’n nun’n, nin Izeari osu’n nun’n, nin Ebrɔn osu’n nun’n, ɔ nin Uziɛli+ osu’n nun’n,
24 kpɛnngbɛn kun o lɛ’n, be flɛ i kɛ Sebuɛli. Moizi i wa Gɛɛsɔmun i wa-ɔ. I yɛ ɔ nian ninnge siewlɛ’m be su-ɔ.
25 I niaan mɔ be ti Eliezɛɛ+ i osu’n nunfuɛ’n be yɛ: Reabia,+ nin Zesaya, nin Zoramun, nin Zikri, ɔ nin Selomɔtu.
26 Selomɔtu sɔ’n nin i niaan bian’m be nian sua ba nga be nun yɛ be sie ninnge nga be yoli be sanwun’n be kwlaa be su.+ Famiɛn Davidi+ nin awlobo su kpɛn mun,+ nin sran akpi su kpɛn mun, nin sran ya su kpɛn mun, nin sonja’m be su kpɛn mun yɛ be yoli ninnge sɔ’m be sanwun-ɔn.
27 Ninnge nga be ɲɛnnin+ i alɛ’n nun’n,+ be yoli wie sanwun naan be fa nian Zoova i sua’n i lika.
28 Ninnge nga Samiɛli m’ɔ ti jeliwafuɛ’n,+ nin Kisi i wa Saili, nin Nɛɛ i wa Abnɛɛ,+ nin Zeruya+ i wa Zoabu+ be yoli be sanwun’n be o nun wie. Ninnge kwlaa nga sran kun yoli i sanwun’n, be fa mannin Selomiti nin i niaan mun naan be nian su.
29 Izeari i osu’n nun’n,+ Kenania nin i mma’m be ti sran’m be su kpɛn nin jɔlɛ difuɛ.+ Nán Ɲanmiɛn sua’n nun yɛ be di be junman liɛ’n niɔn.
30 Ebrɔn osu’n nun’n,+ Asabia nin i niaan bian mun. Be ti akpi kun ya nso (1.700) yɛ be kwla lafi be su. Be yɛ be nian Izraɛli nvle’n i bue ng’ɔ o Zurdɛn’n i wia atɔliɛ lɔ’n su-ɔ. Be nian junman kwlaa nga be di man Zoova nin famiɛn’n lika sɔ’n nun’n be su.
31 Ebrɔn osu’n nun’n, Zɛria+ ti Ebrɔn osu’n nunfuɛ nga be klɛli be dunman be awlobo’m be fluwa’n nun’n be su kpɛn. Kɛ Davidi yoli famiɛn’n i afuɛ ablanan (40) su’n,+ be nianniannin Ebrɔn osu’n nun’n, kpɛkun be wunnin kɛ yasua sran nga be kwla lafi be su’n, be wie’m be o Zazɛɛ+ lɔ. Zazɛɛ wo Galaadi asa’n su.
32 I niaan’m be ti sran akpi nɲɔn ya nso (2.700) yɛ be kwla lafi be su. Be ti be si’m be awlobo’m be su kpɛn. Ɔ maan Famiɛn Davidi fa be sieli i Ribɛnin akpasua’n, nin Gadi akpasua’n, ɔ nin Manase akpasua’n i bue kun’n su naan be nian Ɲanmiɛn Kpli i ninnge kwlaa nin famiɛn’n i ninnge’m be su.
Ja ngua lɔ ndɛ mun
^ Nian Ndɛ’m be bo tulɛ lika’n nun lɔ.
^ Annzɛ “ninnge nga be fa mannin Ɲanmiɛn’n.”
