Ɛstɛɛ 3:1-15
3 I sin’n, Famiɛn Asierisi mannin Amɛdata m’ɔ ti Agagifuɛ’n+ i wa Aman+ i sasu. Famiɛn’n fɛ i sieli i awlo lɔ sran dandan nga be mɛntɛn i’n be kwlaa be ti su.+
2 Famiɛn’n i sufuɛ nga be o famiɛn’n i anuan’n nun lɛ’n, be kwlaa be koto Aman bo yɛ be utu be ɲin ase. Afin i sɔ yɛ famiɛn’n seli be kɛ be yo-ɔ. Sanngɛ Maadose w’a kplinman su kɛ ɔ́ kóto i bo annzɛ ɔ́ útu i ɲin ase.
3 Ɔ maan famiɛn’n i sufuɛ nga be o famiɛn’n i anuan’n nun lɛ’n be usali Maadose kɛ: “?Ngue ti yɛ a diman ndɛ nga famiɛn’n kannin’n su-ɔ?”
4 Cɛn kwlakwla’n be usɛ i sa kunngba’n, sanngɛ ɔ nianman be lɔ. Ɔ maan be ko kan kleli Aman naan bé nían sɛ like nga Maadose yo i lɛ’n, ɔ́ yáci cɛ́ i-o.+ Afin ɔ seli be kɛ ɔ ti Zifu.+
5 Kɛ Aman wunnin kɛ Maadose kplinman su kɛ ɔ́ kóto i bo annzɛ ɔ́ útu i ɲin ase’n, ɔ fali ya dan.+
6 Ɔ kunndɛli kɛ ɔ́ kún Maadose, sanngɛ w’a kunndɛman kɛ ɔ́ kún i ngunmin.* Afin be kannin Maadose i nvle’n i ndɛ be kleli i. I sɔ’n ti’n, Aman kunndɛli kɛ ɔ́ núnnún Zifu nga be o Asierisi i famiɛn diwlɛ’n nun’n be kwlaa. I waan ɔ́ núnnún Maadose i nvle’n nunfuɛ’m be kwlaa.
7 Kɛ Asierisi kacili famiɛn’n i afuɛ blu-nin-nɲɔn (12) su’n,+ Nizan* anglo’n i cɛn klikli’n su’n, be guali Puri’n+ (yɛle kɛ be tuli Fɔtɔ) Aman ɲrun naan bé sí cɛn nin anglo’n. Fɔtɔ’n tɔli anglo blu-nin-nɲɔn (12) su’n su, yɛle kɛ Adaa* anglo’n su.+
8 I sin’n, Aman seli Famiɛn Asierisi kɛ: “Nvle kun flanflan nvlenvle+ nga a sie be’n+ be kwlaa be nun. Nvle sɔ’n i mmla mun nin nvle onga’m be mmla’m be timan kun. Yɛ be diman famiɛn’n i mmla’m be su. Ɔ maan sɛ famiɛn’n yaci be lɛ’n i bo su guaman kpa mɛnmɛn i.
9 Sɛ ɔ ti famiɛn’n i klun su’n, maan e kpɛ mmla kun naan be nunnun be. Ń má mán famiɛn’n i junman difuɛ’m be sika talan* akpiakpi blu (10.000) naan be fa guɛ i famiɛn’n i ninnge kpakpa’m be siewlɛ’n nun.”*
10 Kɛ ɔ yoli sɔ’n, famiɛn’n yili i sa mma ti nga m’ɔ fa sie ninnge’m be nzɔliɛ’n,+ kpɛkun ɔ fa mannin Amɛdata m’ɔ ti Agagifuɛ’n+ i wa Aman+ m’ɔ ti Zifu’m be kpɔfuɛ’n.
11 Famiɛn’n seli Aman kɛ: “M’an fa sika’n nin nvlefuɛ mun m’an wla ɔ sa nun, like kwlaa nga ɔ waan á yó be’n, yó.”
12 Anglo klikli’n i cɛn ba blu-nin-nsan (13) su’n, be yiali famiɛn’n i fluwa klɛfuɛ mun.+ Be klɛli+ ndɛ nga Aman kannin’n be ko mannin famiɛn’n i janunfuɛ mun, nin siefuɛ nga be o nvlenvle’m be su’n, ɔ nin nvlenvle’m be su sran dandan mun. Be niannin wafa nga nvle kun nunfuɛ’m be klɛ ndɛ’n i su yɛ be klɛli-ɔ, yɛ be klɛli ndɛ’n be aniɛn’n nun. Famiɛn Asierisi i dunman nun yɛ be klɛli fluwa sɔ’n niɔn, yɛ be fɛli i sa mma ti nga’n i nzɔliɛ’n be sieli su.+
13 Sran nga be sunman be’n, be fali fluwa mun ko mannin nvlenvle nga famiɛn’n sie be’n be kwlaa, naan be nunkun Zifu mun, be kun be, be nunnun be. I gbanflɛn nin talua mun-o, i kpɛnngbɛn-o, i bakan-o, i bla-o, be nunnun be kwlaa cɛn kunngba, be nunnun be anglo blu-nin-nɲɔn (12) su’n i cɛn ba blu-nin-nsan’n (13) su, yɛle kɛ Adaa anglo’n+ nun, yɛ be fa be bo ninnge mun.+
14 Fluwa sɔ’n i nun ndɛ’n ɔ́ káci mmla nvlenvle’m be kwlaa be nun, yɛ bé bó i jɔ bé klé nvlefuɛ’m be kwlaa naan be siesie be wun be minndɛ cɛn sɔ’n.
15 Kɛ famiɛn’n fa kannin’n sa’n, ngaliɛ kanfuɛ’m be ɔli ndɛndɛ.+ Be boli mmla’n i jɔ Sizi+ m’ɔ ti famiɛn klɔ’n* i nun. I sin’n, famiɛn’n nin Aman be trannin ase be nɔnnin nzan. Sizi klɔ’n nunfuɛ’m be akunndan’n sanngannin.
Ja ngua lɔ ndɛ mun
^ Ebr., “ɔ́ fɛ́ i sa síe i ngunmin su.”
^ Be kwla se ekun kɛ “Ń má mán sika talan 10.000 naan be fa guɛ i famiɛn’n i ninnge kpakpa’m be nun naan be fa man be nga bé wá dí junman sɔ’n.”
^ Annzɛ “famiɛn sua’n”, “sua fleiin’n.”
