JIʼTE 13
Tchi paʼ potse tsye mtchôsi shyeshwe gôm neng gre a, gre ge pou yô Si m tchwepoung a
A pe ge Si be koungne, be nweke mtchôsi pye wap gôm ge wap bing Si a, be wap ghe medou potse tchwepoung téʼé ? A be ge, mtchôsi bô be mtchôsi shyeshwe. Wap gre ge pômneng yô Si m tchwepoung. A be wap ghe ya m tchi ge ke ? Si djouʼ ne é m ge ke ne ? É gô neng ghe la ?
1. Mtchôsi shyeshwe tchye m ne mjiʼte map, gre ge pou yô Si m tchwepoung m tchi ge ke ?
Mtchôsi shyeshwe be wap “le tchwanwe kwyepgne nyenyô ne Si” (Roma 1:25) Boʼgwye mtchôsi be wap ka lagne tso Si bi pô pap. Daʼge Bible gôm ge pou gô pe wim tso Si. (Roma 10:13, 14) She mtadye tchôsi gôm ge tchwe ye taʼ ywe tchwepoung ŋwak a, a be ye ne koung Si. Daʼge, a be tchwanwe. Si te daʼ gre ywe tchwepoung pe. (Ké Yakop 1:13.) A bo djè ne yô ge mtchwanwe mtchôsi, be a ghe ge a tuô bi pômneng ne koung Si.
2. Mtchôsi shyeshwe tchye m ne tse tsye wap gre a, gre ge pou yô Si m tchwepoung m tchi ge ke ?
Mtchôsi shyeshwe te gre ne pômneng paʼ Jéova gre a pe. Bible gôm ne mtchôsi shyeshwe ge, “mhônwe [map] be a tchwôpte te khem kèbeng” (Apokalipse 18:5) Ne medou mgouʼdzu kre, mtchôsi be wap ko ne nwe krekre, tchu pou ne mshou neng jwete, ke bing ge pou jwete medou pô le. She mtadye tchôsi tcheng ne ji, poʼo, wap pe gôm bi pô pye wap kho mtchôsi map a, ge wap pe ha khap bi pou. Tse tsenge daʼte ge wap ka jye be Si, poʼo, a be wap ka khouʼgne ne pe pô pye wap gô jiʼte ywe ne Si bi pyeshe pô a.—Ké 1 Yohané 4:8.
3. Si djouʼ ne é m tchi ge ke ne mtchôsi shyeshwe ?
A pe ge potse tsye mtchôsi shyeshwe gre a, gre ge o yèloung, be o kwè ge Jéova djouʼ ne é m tchi ge ke ? Si koung pômneng, daʼge é djèloung ne mtadye tchôsi pye wap gre ge pou yô é m tchwepoung, neng be de pô pyé wap kho mtchôsi map a ne djô goʼ a. É khaʼgne ge é gô sôʼ saʼte mtchôsi shyeshwe, ba m ge “pou te gô sôʼ ping yô [wap] pe.” (Apokalipse 18:21) A tchuʼ mouywe Si simgne goung mtchôsi shyeshwe awè.—Apokalipse 18:8.
PING TCHENG NE GÔ DZE
Lagne poste ne tchi paʼ Si ne djouʼ ne é ne mtchôsi shyeshwe a. Ping djô she potse tsye mtchôsi shyeshwe ghe a, neng djô ba nweke a te tcheng ge potse bô ghe ge o yaʼ ne ping be dagne ne jye Jéova a pe.
4. Si te bing goung mtchôsi awè pe
Boʼgwye pô kwè ge mtchôsi be paʼ tchitchi medjye mye a gô khem pe ne taʼ tsuʼ a, beng Si. Daʼge, te a be nyenyô le ? Ké Matio 7:13, 14, neng gômte ne hente yenge :
-
Bible gôm ge ke ne medjye ye a gô m ne vôk a ?
Yô VIDÉO, neng gômte ne hente yenge.
-
Bible gôm ge medou mtchôsi be si be boung bi Si a ?
5. Mtchôsi shyeshwe te daʼte koungne Si pe
Mtchôsi be wap ghe ge pou yô Si m tchwepoung ne tchitchi mtchi. Taʼ tchi ye a bing bat téʼ a be ge a be wap tu pou ne shou. Ne ne djô taʼ foʼte, yô VIDÉO. Neng gômte ne mhente menge.
-
Medou mtchôsi le ghe la ne tchwe bate shou gwye demtchaʼ ?
-
O djouʼ ne o m tchi ge ke ne ywe ye wap le ghe a ?
Ké Yohané 13:34, 35 ba 17:16. Neng gômte ne mhente menge :
-
O kwè ge Jéova djouʼ ne é m tchi ge ke ne paʼ mtchôsi tchu pou ne shou a ?
-
Mtchôsi shyeshwe gre medou potse tchwepoung. O yô ma potse tsye a daʼte ge mtchôsi te foʼte koungne Si a ?
Mtchôsi shyeshwe te foʼte koungne Si pe
6. Si bo tcheng ne kwite pômneng ne tem tchum mtchôsi shyeshwe
Ké Apokalipse 18:4, * neng gômte ne hente yenge :
-
Ne jye ge Si bo tcheng ne kwite pô pye mtchôsi shyeshwe fute wap a gre ge o youʼ ne o m tchi ge ke ?
7. Le ne lagne potse ne Si nyenyô ne gô pe m dze
A tcheng ge potse tsye mtchôsi shyeshwe gôm neng gre a, ghe ywe ne tchi paʼ o ne djô Si a ? Naʼ kwègne ge taʼ mou mbè tuôtse bi tap é, fe dye pou gôô, neng gre medou potse tsye a pôk téʼ a. Tap é te bo bing potse tsye é si bo gre a pe. Nweke a te gô pe dendeng, ne yèloung ne pepa ne potse tchwepoung tsye mou é bo gre a ?
-
A gô pe dendeng ne yèloung ne Jéova neng djaʼ ne lagne ne jye é, dou ne potse tchwepoung tsye mtchôsi shyeshwe gre a ?
SHE PÔ GÔM GE : “Ne jye Si te theng a pe, nekele mtchôsi né gre ge medou potse tchwepoung pe si.”
-
O kwè you poʼ a ?
-
Nweke a te tcheng ge potse tsye mtchôsi shyeshwe gre a, ghe ywe ne tchi paʼ o ne djô Jéova a ?
YE NE KHAMTE
Mtchôsi shyeshwe be wap tchye m ne mjiʼte tchwanwe map, ba bôkbôk potse tsye wap gre a, ne gre ge pou yô Si m tchwepoung. Si gô ti simgne mtchôsi shyeshwe.
O lagne ke ?
-
O sè ge ke ne potse tsye mtchôsi shyeshwe jiʼte bi pô a, ba ne potse tsye wap gre a ?
-
Jéova djouʼ ne é m tchi ge ke ne mtchôsi shyeshwe ?
-
Si gô ti ghe la ne mtchôsi shyeshwe ?
YÔ SHE POTSE NE
Lagne potse mebue mye boʼgwye mtchôsi gre a pe bôk Si a.
“Toutes le religions se valent-elles ? Mènent-elles toutes à Dieu ?” (Ne jw.org)
Nweke Jéova tcheng ge pe pemte gamte é pou a pyeshe pô ?
“Est-il nécessaire dʼappartenir à une religion organisée ?” (Ne jw.org)
Taʼ fala le youʼ ne é m tchwepoung ne potse tsye a le tchyete tchum ye tchôsi a. Daʼge ya bô late ghe ge é yaʼ ne lagne nyenyô ne Si.
“Pourquoi un prêtre a quitté son Église” (Réveillez-vous !, février 2015)
Ne medou mgouʼ kre, mtchôsi be wap ghôm mtchwanwe ne Si, mye a gre ge pou kwè ge é te dé wôkpe a pe, ba ge é djap nwe a. Lagne nyenyô ne metha ne mtchwanwe bô.
“Des mensonges qui empêchent dʼaimer Dieu” (La Tour de Garde, 1er novembre 2013)
^ Ne ne djô nweke ŋwaʼgne Apokalipse gôm nwe ne mtchôsi shyeshwe paʼ taʼ mdjwi tso tsye pe Babilôn gwye a, yô Ywe ne thoute nouba 1.
