Di bagasan onom taon on, dipabidang Saksi Jahowa do Perladangan Menara Pengawal di Wallkill, New York. Asa hatop sae, dihaporluhon do gumodang sukarelawan dohot inganan ni nasida. Alani i, disewa ma 25 jabu na jonok tu perladangan i.

Songon dia do pakkilalaan ni nampunasa jabu tu akka Saksi Jahowa?

• Sahalak nampunasa jabu mandok, “Las hian rohanami mangida nasida. Jonok di inganan ni nasida i do au tading dohot tungganedolikku, ringgas jala burju do nasida huida.”

• Nampunasa inganan na asing na tading jonok tusi mandok, “Denggan do sude na niida hami sian akka na poso i. Di pudi ni jabunami adong do kolam renang jala jotjot ditogihon hami nasida asa ro tusi. Manang andigan pe nasida ro, toktong do nasida taratur jala burju. Las do rohanami molo boi muse di tikki na asing nasida ro tuson. Sada pengalaman na mararga do on di hami.”

• Massai denggan do ala nasida dang holan manewa alai boi gabe dongannami.

Songon dia do pakkilalaan ni nampunasa jabu dung sae jabu i disewa?

• “Digarar nasida do sewa ni jabu i di tikki na pas jala denggan do sude akka barang-barang, dang adong na sega.”

• Sahalak nampunasa jabu mandok, “Mauliate ma hudok tu organisasi Menara Pengawal ala denggan do dijaga nasida jabunami.”

• Sahalak borua mandok, “Ala huboto do burju organisasimuna, dang hupangido uang jaminan. Sude jabu na disewa hamu massai ias.”

• Dung diurupi Saksi Jahowa nasida paturehon na sega di jabuna, sahalak nampunasa jabu manukkun tu Saksi, “Olo do hamu gabe partungkangnami? Alana boi do dipasae hamu karejomuna di tikki na pas. Dang hea dope adong partungkangnami na songon hamu.”

• Andorang so sae kontrak ni jabu i, didok nampunasa jabu i do molo lao manewa muse Saksi, lehononna do diskon.

• Na asing mandok, “Las do rohanami mangalehon jabunami lao disewa organisasi Menara Pengawal muse.”