Tikki i, mangan ma si Sandra di jabu ni simatuana. Dung i, dibereng ibana ma adong api kaluar sian toru ni pintu ni gudang na di lambung ni jabu i. Pittor didok ibana ma, “Kebakaran! Kebakaran!”. Pittor hatop ma si Sandra dohot si Thomas suamina marlojong. Dibuat si Sandra ma alat pemadam api, dipareso suamina ma aha na masa. Pittor dilehon si Sandra ma alat pemadam api tu si Thomas, jala dipakke ma i lao pamatehon api i. Didok si Sandra, “Molo dang hatop hian dipamate hami api i, nga tarbakar be sude isi ni gudang i.”

Boasa dang panik si Thomas dohot si Sandra tikki i? Alana, tikki di kantor cabang na di Selters, Jerman, dilatik do nasida dohot 1.000 relawan. Jala dipaboa do tu nasida aha do na ikkon diulahon molo masa kebakaran.

Bolak ni kantor cabang on 30 hektar. Disi adong kantor dohot inganan ni akka relawan. Alai, asing ni i adong do muse disi laundry, percetakan, dohot inganan karejo na asing. Sudena on mura do tarbakar. Alani i, dibahen Departemen Keselamatan dan Lingkungan sian kantor cabang ma sada pelatihan. Pelatihan on taringot aha do na ikkon diulahon molo masa kebakaran. Na parjolo, Tim Respon Darurat nungnga dilatik dinas pemadam kebakaran na adong disi. Dung i, sude ma relawan na adong di kantor cabang dilatik asa mamboto:

• Cara evakuasi manang menghindari api.

• Songon dia asa unang masa kebakaran.

• Songon dia pamatehon api asa unang lam balga.

Jadi, diboto akka relawan i ma aha na ikkon diulahon molo toppu masa kebakaran.

Tikki pelatihan diparsiajari akka relawan on do songon dia asa aman tikki pamatehon api. Adong sahalak relawan, goarna si Christin. Tikki SD ma parpudi sahali ibana mamparsiajari on. Jadi, dipaboa ibana ma taringot pelatihan di kantor cabang on, “Hubuat ma alat pemadam api i, hubukka kuncina. Jala molo mangullus alogo tu arah barat, tu arah barat ma husemprot apina. Asa unang gabe hona api bohikku. Sahalakku do mangulahon on! Jala huparsiajari do songon dia kerja sama rappon na asing lao pamatehon api, misalna molo adong opat manang lima halak hami.”

Pelatih ni pencegah kebakaran i, i ma si Daniel na karejo di kantor cabang. Didok ibana, “Pelatihan on boi mangurupi nasida asa unang pabiarhu tu api.” Didok ibana muse, “Molo adong kebakaran, somalna pittor tarsonggot jala panik do akka halak. Didok roha ni nasida do, ‘Boha nama on? Songon dia do cara mamakke alat pemadam api on?’ Alai, molo nga diboto nasida aha na ikkon diulahon, boi ma hatop dipamate api i asa unang lam balga.” Tikki pelatihan i didok ibana, “Dilatik do akka halak songon dia cara na denggan maniop jala mamakke alat pemadam i tikki adong api. Jala songon dia lao pamatehon api. Ujungna, dang panik be nasida jala gabe barani pamatehon api tikki adong kebakaran.”

Godang do na las rohana ala dohot tu pelatihan on. Si Christin naung dipaboa nangkin mandok, “On dope hea hupangke alat pemadam. Huhilala porlu do sude halak dohot tu pelatihan songon on.” Adong muse sahalak parkarejo paruh waktu di kantor cabang jala karejo di bandara, goarna si Nadja. Didok ibana, “Nunga lobi sampulu taon ahu diajari sisongon on di bandara. Alai holan teori do. Molo di pelatihan na di kantor cabang on, adong do praktekna. Jadi saonari molo adong pe kebakaran, nga huboto aha na ikkon huulahon.”

Didok si Sandra, ala dohot tu pelatihan di kantor cabang i, gabe diboto ibana ma aha na ikkon diulahon tikki kebakaran jabu ni simatuana. Didok ibana muse, “Dang bingung be au lao mamakke alat pemadam i. Jadi, adong do labana ala dohot au tu pelatihan i ganup taon.”

Nungnga somal dinas pemadam kebakaran di inganan i mambahen pelatihan di Kantor Cabang. Kepala dinas pemadam kebakaran, i ma si Theo Neckermann. Didok ibana, “Hami martanggung jawab di daerah Selters, di luar kota. Jadi somalna akka jabu dohot apartemen do na kebakaran. Alai molo di Kantor Cabang on bolak do, balga-balga bangunanna, jala godang do akka ulaon parkarejoan dison. Jadi godang nai dope na porlu diparsiajari hami taringot inganan on, asa boi denggan hami mangurupi molo masa kebakaran. Las do rohanami mambahen pelatihan dison.”

Adong lobi sian 100 anggota Tim Respon Darurat di Kantor Cabang na dohot tu pelatihan on. Didok si Neckermann, “Dipujihon hami do Tim Respon Daruratmuna. Alani nasida do gabe denggan pelatihan on diulahon.”

Nungnga hea Tim Respon Darurat on mangadopi kebakaran. Di tikki botari di bulan Februari 2014, adong ma sada kamar di Kantor Cabang na terbakar. Si Daniel na dipaboa nakkin mandok, “Godang hian do asap tikki i, sampe tanganku sandiri pe dang boi be huida! Pittor ditelepon hami ma pemadam kebakaran. Adong 88 kamar disi, jadi disuru hami ma kaluar akka halak sian sude kamar i. Tikki ro pemadam kebakaran, dang adong be halak di bangunan i.” Didok si Neckermann ma, “Dang hurippu, boi do hatop ditadikkon hamu bangunan na balga songon i. On dope hea huida sisongon on di kota Frankfurt. Disiplin do hamuna sude, jala Tim Respon Daruratmuna pe mantap do!” Pittor dipamate pemadam kebakaran ma apina. Dang adong na luka, jala nang pe adong na sega bangunan i, alai dang pala parah.

Marsitutu do sude halak na di kantor cabang Selters manjaga asa unang be masa kebakaran. Alai molo masa pe, nungnga rade be nasida ala nungnga diparsiajari songon dia cara pamatehon api.