“Boi do dame portibi on molo saling toleransi akka halak.”—UNESCO Declaration of Principles on Tolerance, 1995.

 Molo toleransi hita tu sasahalak, pasti taargai do ibana. Alai molo dang adong sikap toleransi di hita, gabe dang taargai be ibana, bahkan gabe sogo rohatta. Molo nga songon i perasaanta, gabe kasar ma hatatta dohot tindakanta tu ibana, jala gabe dang olo be hita mardongan tu ibana.

 Alai marasing-asing do pandapot ni halak taringot toleransi. Adong do na mandok, halak na toleran i berarti ikkon setuju tu sude tindakan dohot pangalaho ni halak na asing. Alai molo menurut Bibel, halak na toleran i dang berarti ikkon setuju tu sude pandapot dohot keputusan na dibahen halak na asing, alai tetap do diargai ibana i.

 Adong do dipaboa di Bibel akka nasehat na boi mangurupi hita asa bersikap toleransi.

Nasehat ni Bibel taringot toleransi

 Didok do di Bibel, “Patuduhon ma tu saluhut halak na [masuk akkal] do hamu.” (Pilippi 4:5) Halak na masuk akkal burju do tu halak na asing, sopan, jala adil. Jadi molo halak na masuk akkal do hita, dang taorai halak mangulahon aha na dihalomohon rohana, nang pe ra dang setuju hita tu keputusanna i.

 Alai nang pe songon i dang berarti boi lomo-lomo ni jolma mangulahon lomo ni rohana. Alana dipaboa do di Bibel ikkon songon dia do pangalaho ni jolma asa las roha ni Debata. Didok, “Ale jolma, nungnga dipaboa Jahowa tu hamu akka na denggan.” a (Mika 6:8) Molo taulahon akka paretta ni Debata, gabe marlas ni roha jala denggan ma ngolutta.—Jesaya 48:17, 18.

 Asing ni i, dilehon Debata do tu hita sude kebebasan lao mamillit. Jala hita masing-masing do na bertanggung jawab tu keputusan na tabahen. (5 Musa 30:19) Jadi unang ma tahakimi keputusan ni halak na asing ala dang marhak hita mangulahon i. Didok do di Bibel, “Ai holan sada do Silehon Patik dohot Hakim. . . Ise ma ho, umbahen diuhumi ho donganmu?”—Jakobus 4:12.

Aha do na didok Bibel taringot mangargai halak na asing?

 Didok do di Bibel ikkon ‘tapasangap do sude jolma’. (1 Petrus 2:17) Molo taihutton nasehat ni Bibel on, tottu taargai do sude halak dang soal aha haporseaonna jala songon dia gaya hidupna. (Lukas 6:31) Nang pe songon i dang berarti ikkon tasetujui manang tadukung sude pandapot dohot keputusan ni halak na asing. Alai dang olo tong hita mangaleai jala kasar tu halak na berbeda pilihanna sian hita. Tatiru do Jesus na mangargai halak na asing.

 Misalna di sada tikki, hea ma Jesus pajuppang tu sahalak borua na berbeda haporseaonna dohot ibana. Rappak tinggal do borua i dohot sahalak bawa na so suamina. Hape diboto Jesus sala do gaya hidup sisongon i. Alai nang pe songon i, diargai Jesus do borua i jala sopan do Jesus makkatai tu ibana.—Johannes 4:9, 17-24.

 Ala siihutton Jesus do hita, tatiru do ibana. Molo naeng tapaboa haporseaotta tu halak na asing, sopan ma hita tikki makkatai jala ‘taparsangapi ma nasida’. (1 Petrus 3:15) Unang ma tapaksahon pandapotta tu halak na asing. Ai didok do di Bibel, “Dang porlu marbada naposo ni Tuhan i, alai ikkon lambok do tu sude halak,” termasuk ma tu halak na beda haporseaonna tu hita.—2 Timoteus 2:24.

Aha do na didok Bibel taringot marsogo ni roha tu halak na asing?

 Didok di Bibel, “Bahen hamu ma sian nasa tolapmuna lao mardame tu sude halak.” (Heber 12:14) Molo lomo roha ni sasahalak mardame, tottu dang sogo rohana tu halak na asing. Berupaya do ibana mardame tu manang ise pe, termasuk tu halak na berbeda haporseaonna. Alai dang gabe diihutton ibana pilihan ni halak na asing, adong do pendirianna sandiri. (Mateus 5:9) Didok do muse di Bibel, ikkon dihaholongi halak Kristen do musu ni nasida jala ikkon burju do nasida tu halak na mambahen na jahat tu nasida.—Mateus 5:44.

 Memang adong do dipaboa di Bibel akka tindakan na mambahen “sogo roha” ni Debata jala na “dihagigihon” Ibana. Sogo do rohana molo adong na mangaleai jala jahat tu halak na asing. (Poda 6:16-19) Alai dang tu halakna “sogo roha” ni Debata, tu tindakanna na jahat i do. Gariada molo olo do sasahalak i muba jala mangulahon lomo ni roha ni Debata, rade do Debata manalpuhon hasalaanna jala mangurupi ibana.—Jesaya 55:7.

Akka ayat ni Bibel taringot toleransi dohot mangargai halak na asing

 Titus 3:2: “Parroha na dame, jala lambok tu sude halak.”

 Mateus 7:12: “Sude na dihalomohon rohamuna bahenon ni halak tu hamu, ikkon songon i do bahenonmuna tu nasida.”

 Josua 24:15: “Pillit ma saonari ise na lao sombaonmuna.”

 Ulaon ni Apostel 10:34: ‘Dang marimbar jolma di jolo ni Debata.’

 Habakuk 1:12, 13: “Dang tarpaida-ida [Debata] masa hajahaton.”

 Rom 12:19: “Pasombu ma Debata patuduhon rimasna tu halak na mangulahon na jahat. Ai tarsurat do ‘Au do na marhak mambalos. Balosokku do hajahaton ni nasida,’ ninna Jahowa.”

 Dang diloas Debata Jahowa hita balas dendam. Alai ala Debata na adil do Ibana, pasti bertindak do Ibana di tikki na pas. Lao mamboto gumodang hatorangan taringot on, jaha ma artikel “Tutu do Boi Terjadi Keadilan di Portibi on?”