Godang do saonari negara na gogo na mambahen sinjata nuklir. Gariada lam godang jala lam jago do sinjata nuklir i dibahen nasida. Alani i godang halak na marpikkir ala nungnga lam godang sinjata nuklir, boi ma terjadi porang nuklir manang sadihari pe. Jala adong muse na mandok molo adong pe sada negara na mamakke sinjata nuklir, boi do gabe dohot negara na asing mamakke sinjata nuklir ni nasida. Molo nga terjadi i boi do masa porang nuklir jala gabe hancur ma tano on. Songon on ma na didok Bulletin of the Atomic Scientists, “Boi do terjadi porang nuklir manang sadihari pe.”

 Toho do boi terjadi porang nuklir? Boha do annon tano on molo terjadi porang nuklir? Jala songon dia ma carana asa unang pabiarhu hita tu porang nuklir? Aha do na didok Bibel taringot i?

Di artikel on, lao tabahas ma

•  Adong do dipaboa di Bibel na lao masa porang nuklir?

•  Pasombuon ni Debata do terjadi porang nuklir?

•  Na lao hancur do tano on alani porang nuklir?

•  Songon dia ma carana asa unang pabiarhu hita tu porang nuklir?

•  Sarupa do porang nuklir dohot Armagedon na dipaboa di Bibel?

•  Boi do Harajaon ni Debata pasohon porang?

•  Na paboahon taringot porang nuklir do bukku Pangungkapon?

 Adong do dipaboa di Bibel na lao masa porang nuklir?

 Dang adong dipaboa di Bibel na lao masa porang nuklir. Alai dipaboa do di Bibel akka peristiwa dohot akka sifat na ujungna boi mambahen gabe adong porang nuklir.

 Bandingkon ma na didok akka ayat on tu akka na masa saonari:

 Na didok Bibel: Disukkun akka siseanna ma Jesus, “Aha do tanda ni harorom dohot tanda ni panutup ni jaman on?” Didok Jesus ma, “Marporang ma bangso tu bangso jala harajaon tu harajaon.”—Mateus 24:3, 7.

 Na masa saonari: Gabe unjotjot do saonari marporang akka negara na adong sinjata nuklirna.

 “Piga-piga taon na parpudi on lam godang do terjadi kekerasan di portibi on. Jala lam godang do negara na marporang.”—Proyek Data Lokasi dan Peristiwa Konflik Bersenjata.

 Na didok Bibel: “Di tikki ari parpudi, ro ma Raja Selatan mangalo [Raja Utara].”—Daniel 11:40.

 Na masa saonari: Songon naung dipaboa Bibel hian, na lao bersaing jala saling mengancam do piga-piga negara asa gabe na unjago. Dang hea memang taida marporang akka negara na adong sinjata nuklirna, alai sering do dipaboa-boa nasida tu negara na asing na lam jago sinjata nuklir ni nasida.

 “Sappulu taon na parpudi on, lam godang do taida negara na marporang. Jala dohot do akka negara na gogo mangurupi akka negara na marporang i.”— Program Data Konflik Uppsala.

 Na didok Bibel: ‘Ro ma tikki hasusaan di ari parpudi. Godang halak . . . dang olo mardos ni roha, paroa-roahon donganna, dang diboto mangorom diri, parmuruk-muruk.’—2 Timoteus 3:1-3.

 Na masa saonari: Sarupa do akka pamimpin negara saonari on songon godangan halak, dang olo mardos ni roha. Molo adong dua negara na marbadai dang berupaya nasida lao mardame. Gariada saling mengancam ma nasida jala pittor naeng marporang. On ma na boi mambahen gabe masa porang nuklir.

 “Molo dang berupaya hita lao marsiurupan, lam mura ma terjadi porang jala lam godang ma jolma na mate.”—S. Saran dan J. Harman, Forum Ekonomi Dunia.

 Pasombuon ni Debata do terjadi porang nuklir?

 Dang adong didok Bibel songon i. Alai didok Bibel na lao masa ma “akka na parohon biar” di jamanta on. (Lukas 21:11) Contohna serangan bom atom tikki porang dunia na paduahon. Dipaboa Bibel do muse boasa dipasombu Debata masa porang. Asa diboto hamu taringot on, tonton ma video Boasa Dipaloas Debata Masa Hasusaan?

 Na lao hancur do tano on alani porang nuklir?

 Daong. Nang pe dipakke jolma muse sinjata nuklir lao marporang, dang pasombuon ni Debata hancur tano on. Didok do di Bibel na lao martahan do tano on jala diingani jolma saleleng ni lelengna.

 Adong piga-piga halak na marpikkir, di ari na naeng ro holan saotik do jolma na boi mangolu di tano on. Alana nungnga sega tano on jala harsang dibahen porang nuklir. Alai Bibel mandok songon dia pe sega ni tano on alani porang, boi do padengganon ni Debata.

 Ditoppa Debata do tano on asa boi padenggatton dirina sandiri. Jala di ari na naeng ro, pakkeon ni Debata ma huasona lao padenggatton tano on. Alani i gabe uli ma tano on jala boi diingani jolma saleleng ni lelengna.—Psalmen 37:11, 29; Pangungkapon 21:5.

 Songon dia ma carana asa unang pabiarhu hita tu porang nuklir?

 Adong do piga-piga halak na mabiar tu ari na naeng ro ala dirippu nasida na lao hancur nama tano on alani porang nuklir. Alai boi do moru biar ni roha ni nasida molo diingot nasida janji ni Debata jala mangihutton poda na adong di Bibel.

 Misalna dipaboa do di Bibel na lao dipadenggan do tano on jala diingani saleleng ni lelengna. Molo taingot janji on, boi do i gabe ‘jangkar di ngolutta’ jala dang pabiarhu be hita. (Heber 6:19) Jala asa unang pabiarhu hita, unang ma paholsohu hita mamikkiri ari na naeng ro. Alana didok Jesus, “Ganup ari adong be do hasusaanna.”—Mateus 6:34.

 Ikkon tajaga do roha dohot pikkiranta asa toktong sehat. Alani i unang ma pagodangku tabege barita na boi mambahen hita mabiar. Misalna barita taringot sinjata dohot porang nuklir na adong di portibi on. Porlu do tabahen songon i, asa unang pabiarhu hita mamikkiri akka na so masa dope dohot na so adong dalan keluarna. Alai dang na gabe so parduli hita tu keadaan ni portibi on.

 Unang ma pola tapikkiri akka barita na mambahen hita mabiar, alai pikkiri ma akka barita na denggan na mambahen hita marlas ni roha.

 Molo diparsiajari hamu janji ni Debata na adong di Bibel boi ma hamu makkilala las ni roha, dame ni roha, jala gabe adong ma harapanmuna.

 Sarupa do porang nuklir dohot Armagedon na dipaboa di Bibel?

 Adong do piga-piga halak na marpikkir na lao hancur nama tano on tikki Armagedon. Alana dirippu nasida di tikki i ma masa porang nuklir.

 Alai sasittongna, hata “Armagedon” na adong di Bibel naeng paboahon taringot porang ni Debata mangalo “akka raja na di tano on,” manang akka pamarettaon ni jolma. a (Pangungkapon 16:14, 16) Jadi dang sarupa porang nuklir dohot Armagedon. Alana molo masa porang nuklir gabe hancur do tano on jala boi do halak na burju gabe mate. Hape tikki Armagedon holan halak na jahat do na lao dipamate Debata, jala dung sae Armagedon gabe dame jala aman ma tano on.—Psalmen 37:9, 10; Jesaya 32:17, 18; Mateus 6:10.

 Boi do Harajaon ni Debata pasohon porang?

 Umbalga do huaso ni Jahowa b sian sude pamarettaon ni jolma. Alani i lao dipaso Ibana nama akka porang jala lao dihancurhon Ibana ma akka sinjata ni nasida. Diulahon Debata ma i marhite Harajaonna, i ma pamarettaon na adong di surgo. Jala pamarettaon i ma na lao manggattihon sude pamarettaon na adong di tano on.—Daniel 2:44.

 Diajari Harajaon ni Debata ma akka rakyatna asa mardame jala marsada. Ala holan sada nama pamarettaon na adong di tano on, dang adong be porang jala dang porlu be halak marsiajar marporang. (Mika 4:1-3) Alani i gabe boi ma ‘ganup halak hundul di toru ni hau anggurna be dohot di toru ni hau arana be, dang adong be na mambahen nasida mabiar.’—Mika 4:4.