1, 2. Aha do na ingkon tapatudu tu ari ni Jahowa?

DIPAIMAMA halak na porsea do andigan digohi angka surirang ni Jahowa. Umpamana, maimaima do si Jeremia disiaphon halak Babilon huta Juda na masa di taon 607 A.S.M. (Jeremia 25:8-11) Disurirangkon si Jesaya, diboan Jahowa mulak muse halak Jahudi sian habuangan tu Juda, jala didok ma: ”Martua ma sude na mangkaposi ibana.” (Jesaya 30:18) Panurirang Mika, maimaima do tu bagabaga ni Jahowa, jala didok ma: ”Jahowa do hupaimaima.” (Mika 7:7, Bibel Siganup ari) Marribu taon lelengna, pos do roha ni naposo ni Debata tu janjiNa taringot Messias manang Kristus.—Lukas 3:15; 1 Petrus 1:10-12. *

² Saonari pe, tapaima do andigan surirang taringot Harajaon ni Jahowa digohi. Jesus paluahon angka naposo ni Debata sian portibi na jahat on. Ripashononna ma halak parjahat jala salpuhononna sude sitaonon.  (1 Johannes 5:19) Alani i, sai tapaima ma ari ni Jahowa ganup tingki jala sai dungo ma hita.

3. Molo nunga leleng hita paimahon ari ni Jahowa, sungkunsungkun aha do na ro tu rohanta?

³ Tapaima do saut sude sangkap ni Debata tu tano on. (Mateus 6:10) Alai, molo nunga leleng hita paimahon, ra sungkunsungkun do rohanta, ’Boasa ingkon sai tapaima ari ni Jahowa?’

4. Boasa ringkot asa sai ”dungo” hita?

⁴ Diparentahon Jesus do tu angka siihuthon ibana asa ”dungo” jala ”jaga” nasida. Alani i, ringkot do hita paimahon ari ni Jahowa. (Mateus 24:42; Lukas 21:34-36, Bibel Siganup ari) Organisasi ni Jahowa, sai paingothon hita asa ”paimaimahon jala mangkasiholi haroro ni ari ni Debata” jala sai tapaima ma sangkap ni Jahowa taringot tano na imbaru.—Jaha 2 Petrus 3:11-13.

5. Aha do na mambahen hita ingkon paimahon ari ni Jahowa?

⁵ Di abad na parjolo, siihuthon Jesus ingkon sai paimahon ari ni Jahowa, tarlumobi ma hita saonari. Boasa? Ala tanda na dilehon ni Jesus nunga digohi, na patuduhon nunga jongjong Harajaon ni Debata di taon 1914. Jala hita pe nunga mangolu di ari parpudi, manang ”ajal ni hasiangan on.” Umpamana, disurirangkon Jesus do lam tu jahatna ma angka jolma, jala barita na uli ingkon dibaritahon di liat portibi on. (Mateus 24:3, 7-14) Ndang dipaboa Jesus sadia leleng masa ari parudi i, alani i, porlu do sai dungo hita tu ari ni Jahowa.

6. Boasa didok lam tu jahatna ma angka jolma?

⁶ Tingki didok ”ajal ni hasiangan on” na lam tu jahatna do portibi on di ari na naeng ro? Bibel paboahon lam tu jahatna ma angka jolma di ”tingki parpudi.” (2 Timoteus 3:1,13; Mateus 24:21; Pangungkapon 12:12) On patuduhon nang pe jahat jolma saonari, lam tu jahatna dope nasida.

7. Hombar tu Mateus 24:37-39 aha do na masa di tingki parpudi?

⁷ Deba sian naposo ni Jahowa marpingkir andorang so masa ”haporsuhon godang” masa ma porang di ganup negara, sahit dohot haraparon. (Pangungkapon 7:14) Alai, molo i do na masa, botoon ni sude halak ma andigan ro haporsuhon godang. Jala na so manjangkon barita na uli pe, tangkas ma mamboto andigan masa i. Ingot ma, Jesus mandok, godang halak ”laos so mamoto” tu ari i. Alani i, tarsonggot do nasida tingki ro ari ni Jahowa ala mangulahon ulaon na somal do nasida. (Jaha Mateus 24:37-39.) Ndang ingkon lam susa portibi on asa masa ”haporsuhon godang”, na mambahen jolma porsea nunga jonok ari i.—Lukas 17:20; 2 Petrus 3:3, 4.

8. Aha ma na taboto sian tanda naung digohi?

⁸ Dipatudu Jesus do di tingki sisongon dia angka siihuthon ibana mangolu. Nunga dipaingot Jesus hian nasida. (Mateus 24:27, 42) Sian  taon 1914, digohi ma angka tanda na didok ni Jesus. Alani i, taboto ma na mangolu do hita di tingki parpudi di ”ajal ni hasiangan on.” Jala ripashonon ni Jahowa ma angka halak parjahat.

9. Boasa ingkon sai tapaima ari ni Jahowa?

⁹ Boasa ingkon sai tapaima ari ni Jahowa? Ala taoloi Jesus Kristus. Dung i, nunga masa tanda na dilehon ni Jesus. Jala pos do rohanta pasauton ni Debata do sude surirang na adong di Bibel. Sai tongtong ma hita dungo jala jaga tu ari ni Jahowa.

10, 11. (a) Boasa didok Jesus tu angka siseanna ”dungo ma hamu”? (b) Molo ndang pintor ro ari i, aha do na ingkon diulahon siihuthon Jesus? (Ida gombar di mula ni parsiajaran.)

¹⁰ Godang sian hita nunga marsihohot manomba Jahowa, jala sai hirim do rohanta asa hatop ro ari i. Nang pe naung leleng hita paimahon, ingkon sai tapaima do ari i. Ingkon dungo do hita tingki Jesus mangaripashon harajaon ni Sibolis. Ingot ma na didok Jesus tu angka siihuthon ibana: ”Tagam ma hamu, dungo ma hamu, ai ndang diboto hamu, manang sadihari tingkina i! Umpamana: Songon halak na marhutasada na manadingkon jabuna, disagihon do huaso tu angka naposona, tu ganup siulaonna be, jala sijaga pintu i didokkon marjaga. Antong, dungo ma hamu, ai ndang diboto hamu, manang sadihari ro tuan nampuna bagas i, manang di bot ni ari, manang di na tonga borngin, manang di na martahuak manuk, manang di torang ni ari i. So tung jumpangsa hamu modom, di na ro Ibana tompu! Ai tu saluhutna hamu do hatangkon: Dungo ma hamu!”—Markus 13:33-37.

¹¹ Tingki diboto siihuthon Jesus naung mamarenta ibana di taon 1914, diboto ma boi do ro ari ni Jahowa di na so panagaman ni nasida. Alani i, sai rade do nasida marbarita na uli. Jesus mandok olo do ra marlemba haroro ni ari i, ”manang di na martahuak manuk, manang di torang ni ari i.” Molo i do na masa, aha do na ingkon diulahon siihuthon Jesus? Ibana mandok: ”Dungo ma hamu.” Nang pe naung leleng hita paimahon, ndang na gabe lelengna i ro ari i, manang ndang na laho ro di tingkinta saonari.

12. Aha do na disungkun si Habakuk tu Jahowa? Jala aha do alus ni Debata?

¹² Sai maimaima do panurirang Habakuk huhut mamaritahon na ripashonon ni Debata huta Jerusalem. Andorang si Habakuk, panurirang na asing pe nunga marbarita saleleng martaontaon. Diida si Habakuk ma lam godang hajahaton dohot na geduk. Alani i, ninna ibana ma tu Jahowa: ”Sadia leleng on, ale Jahowa, joujou ahu, matua so ditangihon ho?” Nang pe ndang dipaboa Jahowa andigan ro ari i, didok Debata do tu si Habakuk: ”Tung sura pe lumemba, sai paimaima ma i.”—Jaha Habakuk 1:1-4; 2:3.

13. Aha do na boi ro tu pingkiran ni si Habakuk, jala boasa ndang denggan i?

 ¹³ Molo didok si Habakuk songon on: ’Nunga martaontaon ahu paimahon asa diripashon huta Jerusalem. Alai, leleng dope ro ari i. Ndang porlu be ahu marbarita. Na asing ma mangulahon i.’ Aha do na masa molo songon i pingkiran ni si Habakuk? Ndang dihalomohon Jahowa be ibana. Ala ndang dungo ibana tingki ro ari i, gabe mate ma ibana.

14. Aha do na mambahen hita mandok mauliate tu Jahowa?

¹⁴ Hilala ma molo nunga di tano na imbaru hamu, idaonmu ma Jahowa manggohi sude surirang taringot tingki parpudi. Gabe pos ma rohamuna pasautonNa do sude sangkapNa. (Jaha Josua 23:14.) Mandok mauliate ma hamu tu Jahowa ala dipasaut Ibana ariNa i di tingki na pas, jala sai dipasingot naposoNa asa tongtong paimahon ari i.—Ulaon 1:7; 1 Petrus 4:7.

15, 16. Boasa ingkon marbarita na uli hita?

¹⁵ Organisasi ni Jahowa sai paingothon hita asa tongtong manomba Ibana. Taboto ma ndang holan manomba Ibana hita alai, ingkon marbarita do hita ala i do ulaon na rumingkot. Pos do rohanta tanda na dilehon ni Jesus nunga masa jala ro nama ari ni Jahowa. Alani i, mangulahon lomo ni roha ni Jahowa huhut marbarita taringot Harajaon, i do na ringkot di ngolunta.—Mateus 6:33; Markus 13:10.

¹⁶ Molo marbarita hita tu na asing, taurupi ma nasida malua sian ari ni Jahowa. Tingki bonom kapal Wilhelm Gustloff di taon 1945, marribu halak mate. Sahalak borua dohot tunggani dolina malua sian i. Diingot ibana ma, dung bonom kapal i, tumatangis ma sahalak borua huhut mandok: ”Koperhu! Koperhu! Mashu! Sude mashu di kapal i dope. Nunga bonom be sude!” Alai, anggo na deba marsitutu do mangurupi na asing asa malua, jala i do na rumingkot. Saonari, lam tu susana do parngoluonta. Ndang holan na ringkot tu dirinta na tapingkiri alai, marbarita do hita tu na asing. Taurupi ma na asing, asa malua sian ari ni Jahowa, ala on do na rumingkot.

17. Aha do na mambahen ari ni Jahowa boi ro manang andigan pe?

 ¹⁷ Nunga tangkas taida naung masa angka tanda i, on patuduhon nunga lam jonok ari ni Jahowa. Tapaima do ”tanduk na sampulu” dohot ”binatang i” mangalo agama pargapgap, Babel na balga. (Pangungkapon 17:16) Unang ma ro tu pingkiranta leleng dope masa i. Unang lupa hita ”dipahehe Debata do rohanasida” laho mangalo agama pargapgap. Jala boi do hatop masa on! (Pangungkapon 17:17) Nunga jonok ajal ni harajaon ni Sibolis. Alani i, taoloi ma na didok ni Jesus: ”Jaga hamu ma dirimuna, unang sorat rohamuna binahen ni parminumon dohot parmabuhon dohot panarihon di hangoluan on, gabe tompu ditahopi ari i hamu songon tali rambang.” (Lukas 21:34, 35; Pangungkapon 16:15) Sai dungo ma hita jala marsitutu manomba Jahowa, pos ma rohanta na bahenonNa do ”halongangan tu angka na marhaposan di ibana.”—Jesaya 64:3.

18. Sungkunsungkun aha do na diulas di artikel na mangihut?

¹⁸ Huhut tapaima ari ni Jahowa, taingot ma poda ni si Judas na mandok: ”Alai hamu, angka haholongan, pauliuli hamu ma dirimuna di atas haporseaonmuna na badia situtu, jala martangiang di bagasan Tondi Parbadia! Ramoti hamu ma dirimuna di bagasan holong ni roha ni Debata! Maimaima ma hamu di asi ni roha ni Tuhanta Jesus Kristus, asa sahat hamu tu hangoluan salelenglelengna.” (Judas 20, 21) Alai, songon dia do patuduhon na maimaima hita tu ari i jala sai manatap tu tano na imbaru? Diulas ma on di artikel na mangihut.