Tingki dibege hamu hata, ”ajal ni portibi on” aha ma na tubu di bagasan rohamu? Na pintor dipingkiri hamu do madabu meteor sian langit tu tano on na pamatehon angka jolma? Manang masa ma porang dunia na patoluhon? Molo on do na adong di pingkiran ni angka halak, boi mambahen mabiar, ganggu roha nasida, jala geok dihilala.

Bibel mandok: ”ro ma ujung ni portibi on.” (Mateus 24:14 Bibel Siganup Ari) Manang digoari ma i, ”ari na bolon i, ari ni Debata” manang ”Armagedon.” (Pangungkapon 16:14, 16) Pigapiga ajaran ni ugamo taringot ajal ni portibi on ndang boi diantusi angka halak. Alai tangkas do dipaboa Bibel aha na laho masa dohot na so masa di ari i. Jala Bibel pe mangurupi hita asa tangkas mangantusi naung jonok do ari i manang na ndang dope. Alai na rumingkot, Bibel paboahon tu hita songon dia do asa boi malua. Na parjolo, taulas ma jo pigapiga pandapot na sintong dohot na so sintong taringot ajal ni portibi on. Songon dia do hatorangan ni Bibel taringot ajal ni portibi on?

1. NDANG NA LAHO MATUTUNG JALA SIAP TANO ON.

   Bibel mandok: ”Nunga dipaojak [Debata] tano on tu angka ojahanna i, asa unang lalolalo salelenglelengna.” (Psalmen 104:5) Ayat on dohot godang ayat na asing di Bibel paposhon rohanta na so jadi siaphonon ni Debata tano on jala ndang pasombuonNa tano on disegai.—Parjamita 1:4; Jesaya 45:18.

2. NDANG NA SO DITONTUHON TINGKINA.

   Bibel mandok nunga ditontuhon Debata tingki na pas tu ajal ni portibi on. Didok: ”Alai anggo arina dohot sadiharina, ndang adong na umbotosa, nang surusuruan na di banua ginjang, nang Anak i pe; nda holan Ama i. Tagam ma hamu; dungo ma hamu, ai ndang diboto hamu, manang sadihari tingkina i!” (Markus 13:32, 33) Tangkas ma, Debata (”Ama i”) nunga manontuhon ”sadihari tingkina” laho mamungka ajal ni portibi on.

3. NDANG NA BINAHEN NI JOLMA MANANG ALANI METEOR NA MADABU SIAN LANGIT.

   Molo songon i, ala ni aha? Pangungkapon 19:11 mandok: ”Dung i huida ma mungkap banua ginjang, tarida ma disi sada hoda sihapaspili; ia na hundul di ginjangna margoar Haposan jala Parsintong.” Diuduti Ayat 19: ”Jadi huida ma binatang i dohot angka raja ni tano on ro di angka parangan nasida, nunga marluhut laho marmusu dompak na hundul di atas hoda i nang dompak angka paranganna.” (Pangungkapon 19:11-21) Nang pe songon sada gombaran na disurat di ayat on, alai boi do taantusi angka surusuruan do na laho pangkeon ni Jahowa laho mangaripashon angka musuNa.

1. LAHO MANGALENGSEHON PAMARENTAON NI JOLMA.

   Bibel mandok: ”Padirion ni Debata, na di surgo i, sada harajaon na so tarpapatu ro di salelenglelengna, gomgomanna pe ndang pasahatonna tu  bangso na asing; ropuhanna do tahe sogot saluhut angka harajaon i, jala pansingkononna, alai hot do anggo na sasada i ro di saleleng ni lelengna.” (Daniel 2:44) Songon na disurat di nomor 3 sian ”na so masa di ari i,” na laho ripashononna do ”angka raja ni tano on ro di angka parangan nasida” naung ”marluhut laho marmusu dompak na hundul di atas hoda i nang dompak angka paranganna.”—Pangungkapon 19:19.

2. LAHO PASOHOTHON PORANG, PARBADAAN, DOHOT HAGEDUHON.

   ”[Debata] do pasohothon hamusuon ro di ujung ni tano on.” (Psalmen 46:10) ”Ai halak partigor i mangingani tano on sogot, jala halak na daulat roha tading disi. Alai anggo halak parjahat siap sian tano on, jala halak pangoseose pidom sian i.” (Poda 2:21, 22) ”Ida ma, saluhutna do hupaimbaru!”—Pangungkapon 21:4, 5.

3. LAHO MANGARIPASHON UGAMO NA SO MANJUJUI PARALEALEON TU DEBATA.

   Bibel mandok, ”Angka panurirang mangkatahon gabus dohot angka malim mangajarhon lomolomona sambing. . . . Alai aha ma na naeng bahenon nasida molo marujung i sude?” (Jeremia 5:31, Bibel Siganup Ari) Didok Jesus muse, ”Ai torop do sogot di ari parpudi na mandok tu ahu: Ale Tuhan! Ale Tuhan! Nda manurirangi hami nahinan mangasahon Goarmu? Nda hupabali hami najolo angka Sibolis mangasahon Goarmu? Nda lan angka ulaon na balga huula hami mangasahon Goarmu? Dung i dohononku ma tu nasida: ’Ndang dung hutanda hamu; laho ma hamu sian lambungkon, hamu angka na mambaen na so jadi!’”—Mateus 7:21-23.

4. LAHO MANGARIPASHON ANGKA HALAK NA SIPARDOHOT TU ULAON NI PORTIBI NA JAHAT.

   Jesus mandok: ”Alai on ma uhum i: Nunga ro na tiur i tu portibi on, jadi holongan do roha ni angka jolma di holom i asa di na tiur i, ai na jahat do parulaon nasida.” (Johannes 3:19) Dipatudos Bibel do ajal ni portibi on songon tingki masa ni si Noak. ”Mago uju i tano on dilantaphon aek i. Jala marhite sian hata i do diramoti Ibana langit dohot tano i nuaeng; dipeop do, asa tu api di ari paruhuman jala hamagoan ni jolma angka na jahat.”—2 Petrus 3:5-7.

Surirang taringot haroro ni ”ajal ni portibi on” dipatudos tu ajal ni ”portibi” di masa ni si Noak. Na laho siap do tano on? Sai na hot do anggo tano on; angka ”halak parjahat”—i ma musu ni Debata—do na laho ”siap.” Saleleng masa ”ajal ni portibi on” angka halak na mamillit gabe musu ni Debata, ripashononNa ma. Alai paluaonNa do angka alealeNa songon si Noak dohot keluargana.—Mateus 24:37-42.

Hilala ma dame ni portibi on dung diripashon Debata angka parjahat sian tano on! Tangkas ma barita sian Bibel taringot ajal ni portibi on ndang na barita na roa alai barita na palashon roha do. Sungkunsungkun do ra rohamu: ’Dipaboa Bibel do andigan ajal ni portibi on? Tutu do naung jonok ari i? Songon dia do asa boi ahu malua sian i?’