Di liat portibi on, jotjot do martangiang akka halak sian marragam suku dohot agama. Adong na martangiang sahalakna manang rap dohot halak na asing. Martangiang do nasida di gareja, di kuil, di sinagoga, dohot di mesjid. Dipakke nasida do karpet manang sajadah, rosario, roda doa, patung, dohot buku doa. Jala adong do na manurat tangiangna di sada papan na gelleng, dung i digattung di sada rak.

Godang do persamaan ni jolma dohot binatang. Dos songon binatang porlu do di hita aek, udara, dohot sipanganon. Jala parputaran ni ngolutta pe sarupa do, i ma tubu, magodang dung i mate. (Parjamita 3:19) Alai adong do perbedaan ni jolma dohot binatang, i ma tangiang. Holan jolma do na boi martangiang. Boasa?

Alana memang butuh do hita martangiang. Boi dohonon marhite tangiang gabe boi ma jolma makkata-hatai tu pribadi na dianggap nasida badia jala mangolu saleleng ni lelengna. Bibel paboahon nungnga disuanhon akka sisongon i tu roha ni jolma tikki ditoppa. (Parjamita 3:11) Jala hea do didok Jesus, “Marlas ni roha ma na mamboto rikkot ni marale-ale tu Debata.”​—Mateus 5:3.

Godang do bangunan dohot peninggalan sejarah na patuduhon, sian najolo diboto halak do “rikkot ni marale-ale tu Debata”. Jala godang do tikki na dipakke nasida lao martangiang. Memang adong do na mangandalhon diri sandiri manang halak na asing. Alai songon na taboto, dang sai boi jolma mangurupi hita, dang i? Gale do jolma, pendek do umurna, jala dang pola godang na binotona. Holan halak na dao ummalo jala umgogo sian hita do na boi mangurupi hita. Asing ni i, ikkon mangolu salelengna do ibana asa boi mangalehon na porlu di hita. Alai aha do lapatanna “mamboto rikkot ni marale-ale tu Debata”?

Uppamana: Hea do hamu merasa butuh petunjuk, poda, manang alus ni sukkun-sukkun na mungkin dang taralusi jolma? Hea do lungun hian rohamuna ala adong na mate jala butuh hamu dihibur? Manang hea do hamu manolsoli alani sada masalah jala naeng minta maaf?

Molo taida di Bibel, akka i ma alasanna boasa hita martangiang. Bibel ma bukku na pas lao mangalusi sukkun-sukkun taringot tangiang. Di Bibel disurat do tangiang ni akka halak na setia najolo. Tikki martangiang, dipangido nasida do tu Debata asa dihibur, asa diampuni dosa ni nasida, jala asa dilehon poda dohot alus ni sukkun-sukkun ni nasida na massai maol.​—Psalmen 23:3; 71:21; Daniel 9:4, 5, 19; Habakuk 1:3.

Memang marmaccam do tangiang ni nasida, alai adong do persamaanna. Diboto nasida do ikkon tu ise tangiang i dipasahat. On ma na so dipardulihon akka halak saonari.