Hea do hamu marsak tingki marhabot ni roha alealemu? Sipata, olo do ndang taboto aha na laho tadok manang taulahon, gabe sai sip ma hita. Alai, adong do pigapiga ulaon na boi taulahon.

Sasintongna, na jotjot dihaporluhon i ma haroronta manang mandok hata songon ”Sabar ma hamu da”. Di pigapiga hasomalan, maniop tangan manang mangkaol halak na marhabot ni roha, boi do patuduhon na diparrohahon nasida. Molo marsarito halak na marhabot ni roha i, denggan ma tangihon. Alai, na dumenggan marhite parniulaonta. Umpamana, songon mangalompa, marorot ianakhon, manang molo dihaporluhon, urupi ma mangurus na ringkot tu acara penguburan. Alani i, dumengganan do parniulaon sian holan mandok hata pangapulion.

Sipata, boi do hamu marsarito taringot parange na denggan manang pengalaman na mambahen las roha sian na monding i. On boi mangapul roha ni halak na marhabot ni roha. Umpamana si Pam, nunga mate tungganedolina, si Ian onom taon naung salpu. Ibana mandok, ”Sipata, olo do dipaboa angka dongan ulaon ni si Ian na denggan, na so hea huboto. On mambahen las rohangku.”

 Angka peneliti paboahon, disi marhabot ni roha sasahalak, godang do halak na mangalehon pangapulion. Alai lam leleng, ndang adong be na mangalehon pangapulion, ala nasida mangulahon ulaon siganup ari. Alani i, jotjot ma telepon manang sungkun baritana, nang pe naung leleng nasida marhabot ni roha. * Godang do na marhabot ni roha mangkilala, on sada pangurupion na denggan di nasida.

Parrohahon ma na masa tu si Kaori, sahalak anak boru di Jepang. Lungun hian do rohana ala nunga mate omakna jala 15 bulan dungkon i, mate ma kakakna siangkangan. Alai, tongtong do ibana mandapot pangapulion sian dongan di huria. Umpamana, si Ritsuko na umtua sian ibana rade gabe alealena. Si Kaori mandok, ”Sasintongna, ndang lomo rohangku ibana gabe alealengku. Ndang lomo rohangku adong na manggantihon omakku jala huhilala ndang adong na boi mangulahon i. Alai, ala burju Mama Ritsuko tu ahu, gabe lam solhot ma hami. Ganup minggu, rap marbarita do hami jala rap laho tu parpunguan. Ditogihon ibana do ahu ro tu jabuna, dilehon do sipanganon jala jotjot do dilehon surat manang kartu ucapan laho patoguhon haporseaonku. Mangkorhon na denggan do ulaon ni Mama Ritsuko on tu ahu.”

Nunga sampulu dua taon mate omak ni si Kaori. Saonari, ibana dohot tungganedolina gabe pelayan sepenuh waktu. Si Kaori mandok, ”Tongtong dope diparrohahon Mama Ritsuko ahu. Jala molo mulak ahu tu huta, sai ro do ahu tu jabuna laho masipajujuan tu na denggan.”

Na asing muse, si Poli, sahalak Sitindangi Ni Jahowa sian Siprus, marlas ni roha ala tongtong mandapot pangapulion sian angka dongan. Tungganedolina si Sozos, sahalak sintua na jotjot manogihon angka na so marama so marina dohot na mabalu, ro tu jabuna laho mangan jala marsaor. (Jakobus 1:27) Alai, tingki marumur 53 taon, mate ma ibana ala marsahit tumor otak. Si Poli mandok, ”Mansai lungun do huhilala ala nunga 33 taon ahu marrumatangga dohot ibana.”

Ndang sadia leleng, pinda ma si Poli tu Kanada rap dohot anakna si Daniel na marumur 15 taon. Marsaor do nasida dohot angka dongan di huria na adong disi. Si Poli mandok, ”Ndang diboto nasida aha na masa jala songon dia susa ni pangkilalaannami. Alai, marsitutu do nasida asa boi solhot tu hami marhite pangkataion dohot pangurupion. Mansai huargai do pangurupion on jala ndang tanda be si Daniel na so marama! Sai diparrohahon angka sintua di huria do si Daniel. Sahalak sian sintua jotjot do manogihon si Daniel marbola dohot marsaor dohot angka dongan.” Saonari, nunga lam denggan pangkilalaan ni si Poli dohot anakna.

Tangkas ma, godang do na boi taulahon mangurupi jala mangapul roha ni na marhabot ni roha. Dilehon Bibel do pangapulion tu hita marhite pangkirimon na mansai denggan di ari na naeng ro.