1. Songon dia do parngoluon ni halak Jahudi na ditawan di Babel?

 SALELENG martaon-taon, nungnga mulak-ulak halak Jahudi mangalo tu Jahowa. Akibatna, diloas Jahowa do halak Babel manghancurhon Jerusalem jala diboan ma halak Jahudi i tu Babel. Songon dia do parngoluon ni nasida disi? (2 Kron. 36:​15, 16, 20, 21) Memang, boi do halak Jahudi i mangulahon ulaon ni nasida ganup ari. (Jer. 29:​4-7) Alai, dang mura parngoluon disi. Jala dang parngoluon sisongon i na dihalomohon nasida. Songon dia do perasaan ni nasida tikki i? Sada sian halak Jahudi i mandok, “Tikki hundul hami di labbung ni akka sunge na di Babel, mangangguki do hami molo diingot hami Sion.” (Ps. 137:1) Porlu do halak Jahudi i diapuli. Alai, ise do na lao mangapuli nasida?

2-3. (a) Aha do na diulahon Jahowa tu halak Jahudi na ditawan di Babel? (b) Aha do na lao tabahas di artikel on?

² “Debata Sipangapul na sumurung” do Jahowa. (2 Kor. 1:3) Holong do rohana tu akka naposona. Jala lomo do rohana mangapuli nasida. Diboto Jahowa do lao adong ma piga-piga halak Jahudi na bertobat jala olo manomba Ibana muse marhite cara na sittong. (Jes. 59:20) Alani i, lobi sian 100 taon andorang so diboan halak Jahudi i tu Babel, disuru Jahowa do si Jesaya manurat sada bukku tu nasida. Digoari ma i bukku Jesaya. Aha do tujuan ni bukku Jesaya? Didok si Jesaya do, “‘Apuli, apuli hamu ma bangsokki’, ninna Debatamuna.” (Jes. 40:1) Marhite bukku Jesaya, dilehon Jahowa do pangapulion tu halak Jahudi na ditawan di Babel.

³ Songon halak Jahudi na ditawan di Babel, hita pe porlu do torus diapuli. Di artikel on, tabahas ma tolu cara ni Jahowa mangapuli halak Jahudi na ditawan di Babel: (1) Marjanji do Ibana lao mengampuni halak na bertobat, (2) dilehon Ibana do  harapan tu naposona, jala (3) diurupi Ibana do nasida asa unang holsoan manang mabiar. Tabahas ma muse songon dia Jahowa mangapuli hita marhite cara na sarupa.

OLO DO JAHOWA MENGAMPUNI HITA

4. Songon dia do Jahowa patuduhon molo Ibana Debata parasi roha? (Jesaya 55:7)

⁴ “Ama parasi roha” do Jahowa. (2 Kor. 1:3) Dipatudu Jahowa do sifatna i tikki marjanji Ibana lao mengampuni halak Jahudi na bertobat. (Jaha Jesaya 55:7.) Didok Jahowa, “Alai alani holong ni rohakku na saleleng ni lelengna i, patuduokku do asi ni rohakku tu ho.” (Jes. 54:8) Songon dia do Jahowa patuduhon asi ni rohana? Nang pe halak Jahudi gabe tinggal di Babel saleleng martaon-taon ala mangalo tu Jahowa, marjanji do Jahowa dang na lao disi nasida saleleng ni lelengna. (Jes. 40:2) Pasti dipatogu do halak Jahudi na bertobat dung mamboto on!

5. Dibandingkon halak Jahudi najolo, boasa umpos rohatta na olo Jahowa mengampuni hita?

⁵ Aha do na taparsiajari? Lomo do roha ni Jahowa mengampuni sude naposona. Dibandingkon halak Jahudi na di Babel najolo, unggodang do bukti na paposson rohatta na olo Jahowa mengampuni hita. Boasa tadok songon i? Alana nungnga taboto aha na diulahon Jahowa lao mengampuni hita. Hira-hira 700 taon dung dipaboa si Jesaya taringot pengampunan ni Jahowa, disuru Jahowa do Anak hasianna tu portibi on lao manobus sude halak na bertobat. Ala mate Jesus humokkop hita, gabe boi ma disesa Jahowa akka dosatta. (Ul. 3:19; Jes. 1:18; Eps. 1:7) Takkas ma, Debata parasi roha do Jahowa i!

6. Aha do manfaatna molo tarimangi pengampunan ni Jahowa? (Ida gambar.)

⁶ Adong do ra sian hita na hea mangulahon dosa jala bertobat di pudian ni ari. Alai olo do hita torus merasa bersalah, tarlumobi molo gabe susa hita alani dosatta i. Nang pe songon i, boi do tarapul rohatta alani hata di Jesaya 55:7. Molo nungnga bertobat hita jala muba, pos ma rohatta nungnga diampuni Jahowa hita. Jala molo nungnga diampuni Jahowa dosatta, dang diingot-ingot Ibana be i. (Bandingkon tu Jeremia 31:34.) Jadi molo dang diingot-ingot Jahowa be dosatta i, hita pe ikkon songon i do. Na penting di Jahowa, i ma aha na taulahon saonari, dang kesalahanta di tikki naung salpu. (Hes. 33:​14-16) Jala satokkin nai, salpuhonon ni Jahowa Debata  parasi roha do annon sude hasusaan na tahilala alani kesalahanta.

7. Aha do na boi mangonjar rohatta asa olo mangido bantuan ni akka sintua tikki tabahen dosa na balga?

⁷ Aha do na porlu taulahon molo gabe targanggu panggora ni rohatta ala nungnga manabunihon dosa na balga? Didok Bibel, tapangido ma bantuan ni akka sintua. (Jak. 5:​14, 15) Memang, dang mura mangakkui kesalahanta tu nasida. Alai taingot ma, dipakke Jahowa do akka sintua lao mangurupi hita. Jala pasti ditiru nasida do Jahowa na parholong jala parasi roha. Molo taingot i jala bertobat hita, gabe taronjar ma rohatta makkatai tu nasida. Parrohahon ma songon dia Jahowa mamakke akka sintua lao mangapuli donganta na margoar si Arthur. a Targanggu do panggora ni rohana ala hea mangulahon dosa na balga. Didok ibana, “Saleleng hira-hira sataon, manonton pornografi do au. Alai tikki hubege jamita na mambahas taringot panggora ni roha, huakkui ma dosakku tu istrikku dohot tu akka sintua. Dukkon i, gabe lega ma huhilala. Alai kecewa dope au tu dirikku. Dipaingot akka sintua do au, dang na ditolak Jahowa au. Dipissang Jahowa do hita ala holong rohana tu hita. Hata ni nasida i paposson rohakku jala mangurupi au asa padenggatton cara marpikkirhu.” Saonari, nga gabe perintis biasa si Arthur dohot parhobas di huria. Pasti tarapul do rohatta mamboto molo bertobat hita, sai rade do Jahowa mengampuni hita.

DILEHON JAHOWA DO HARAPAN TU HITA

8. (a) Aha do janji ni Jahowa tu halak Jahudi na ditawan di Babel? (b) Songon na disurat di Jesaya 40:​29-31, songon dia do perasaan ni halak Jahudi i dung mambege janji ni Jahowa?

⁸ Bisa jadi halak Jahudi marpikkir dang mungkin boi nasida mulak muse tu hutana. Alana biasana dang olo halak Babel mambebasson tawananna. (Jes. 14:17) Alai, dilehon Jahowa do harapan tu naposona. Marjanji do Ibana lao paluahon nasida jala dang adong na boi mangabbati sakkapna i. (Jes. 44:26; 55:12) Di adopan ni Jahowa, tarsongon orbuk na massai halus do Kota Babel i. (Jes. 40:15) Pasti tor mago do orbuk molo diombusson. Dos songon i ma Kota Babel. Dang maol di Jahowa paluahon naposona sian Kota Babel. Boha do perasaan ni halak Jahudi dung mamboto janji on? Pasti tarapul do roha ni nasida. Alai dang holan i. Didok si Jesaya, “Halak na marhaposan tu Jahowa margogo do muse.” (Jaha Jesaya 40:​29-31.) Alani harapan on, gabe margogo ma halak Jahudi i, dos songon “lali na boi habang timbo” di langit.

9. Aha do bukti na paposson roha ni halak Jahudi pasti saut do annon janji ni Jahowa tu nasida?

⁹ Dilehon Jahowa do tong bukti tu halak Jahudi i asa pos roha ni nasida tu janjina. Aha ma i? Pasti diingot nasida do akka surirang naung masa di tikki i. Misalna, diboto nasida do na ro halak Asiria manaluhon harajaon sappulu marga ni Israel, jala diboan do bangso i gabe tawanan. (Jes. 8:4) Diida nasida do halak Babel manghancurhon Jerusalem jala mamboan nasida tu Kota Babel. (Jes. 39:​5-7) Diboto nasida do tong tikki Raja Sedekia dipapitung jala diboan tu Babel. (Jer. 39:7; Hes. 12:​12, 13) Saut do sude na dipaboa Jahowa. (Jes. 42:9; 46:10) Pasti gabe lam pos ma roha ni nasida pasti saut do tong janji ni Jahowa lao paluahon nasida!

10. Boha do carana asa toktong togu harapanta saleleng ari parpudi on?

¹⁰ Aha do na taparsiajari? Tikki lungun rohatta, boi do gabe dipatogu jala margogo muse hita molo torus taingot janji ni Jahowa di ari na naeng ro. Saonari, lam parah do situasi ni portibi on. Jala songon na umgogo do akka  musu ni Jahowa sian hita. Alai unang pola metmet rohatta. Nungnga dilehon Jahowa tu hita harapan na luar biasa, i ma hangoluan na salelengna di Paradeiso. Marlas ni roha ma annon hita disi, aman, jala dame tahilala. Ikkon torus do taingot harapanta on. Alana molo daong, sarupa ma hita songon halak na mangida pemandangan na bagak marhite jandela na kotor. Gabe dang apala takkas tarida pemandangan i. Attong, songon dia do carana “asa toktong ias jandelatta”, manang toktong togu harapanta? Taratur ma hita mambayakkon songon dia annon ngolutta di Paradeiso. Boi do tajaha akka artikel, tatonton akka video, jala tabege akka ende na paboahon taringot harapanta. Jala boi do tapaboa di tangiangta akka janji na tapaima-ima di Paradeiso.

11. Aha do na mangurupi sahalak donganta borua na marsahit na posi asa margogo muse?

¹¹ Taparrohahon ma pengalaman ni donganta borua na margoar si Joy na marsahit na posi. Dipatogu jala diapuli do rohana ala mangingot janji ni Jahowa. Didok ibana, “Tikki marsak au alani godang ni sitaononku, hupaboa ma i tu Jahowa. Hupaboa do sude na di bagasan rohakku. Jala huboto, diattusi Ibana do perasaanki. Dung i, dilehon Jahowa do tu au gogo ‘lobi sian gogo ni sahalak jolma’.” (2 Kor. 4:7) Asing ni i, dibayakkon si Joy do dirina mangolu di tano na imbaru. Disi, dang adong be halak na mandok, “Marsahit do au.” (Jes. 33:24) Hita pe tapaboa ma sude perasaanta tu Jahowa di bagasan tangiang jala toktong ma taingot harapanta. Molo taulahon i, gabe margogo ma hita lao mangadopi sitaononta.

12. Boasa boi pos rohatta tu janji ni Jahowa? (Ida gambar.)

¹² Najolo, dilehon Jahowa do akka bukti tu halak Jahudi na ditawan di Babel asa pos roha ni nasida tu janjina. Songon i do na dibahen Jahowa tu hita. Rimangi ma akka surirang naung terjadi di jamanta saonari. Misalna, taboto do ‘gogo do deba [kuasa dunia Anglo-Amerika] alai gale do na deba nai’. (Dan. 2:​42, 43) Tabege do muse barita taringot “gempa di godang inganan”. Jala dohot do hita mambaritahon barita na uli “di liat portibi on”. (Mat. 24:​7, 14) Akka surirang on dohot godang muse surirang na asing paposson rohatta pasti saut do annon janji ni Jahowa taringot Paradeiso.

 DIURUPI JAHOWA DO ASA UNANG MABIAR HITA

13. (a) Aha do na lao dihadapi halak Jahudi andorang so dibebasson nasida? (b) Songon na disurat di Jesaya 41:​10-13, songon dia do Jahowa paposson roha ni halak Jahudi na ditawan di Babel?

¹³ Marjanji do Jahowa lao mambebasson halak Jahudi na ditawan di Babel. Alai diboto Jahowa, maol do annon situasi ni nasida andorang so dibebasson. Nungnga dipaboa Jahowa hian, na lao adong sahalak raja na menyerang jala menguasai akka bangso di sakaliling ni Babel, jala lao ditaluhon ibana do tong Kota Babel. (Jes. 41:​2-5) Alai porlu do halak Jahudi i mabiar? Piga-piga taon sebelumna nungnga dipapos Jahowa roha ni akka naposona. Didok ibana, “Unang ho mabiar, ai hudongani do ho. Unang ganggu roham, ai Au do Debatam.” (Jaha Jesaya 41:​10-13.) Aha do maksud ni Jahowa tikki didok Ibana “Au do Debatam”? Jahowa dang na paingotton halak Jahudi asa manomba Ibana, alana nungnga diboto nasida i. Alai dipaingot Jahowa do na didongani Ibana do nasida, jala lao urupanna do nasida.—Ps. 118:6.

14. Aha do muse na dibahen Jahowa lao mangurupi halak Jahudi asa unang mabiar?

¹⁴ Aha do muse na dibahen Jahowa lao mangurupi halak Jahudi asa unang mabiar? Dipaingot Jahowa do nasida tu huaso dohot parbinotoanna na luar biasa. Contohna, dipangido Jahowa do nasida asa mangida akka bintang. Dipaboa Jahowa do, Ibana dang holan mambahen akka bintang i, alai boi do tong dijou Ibana goar ni nasida sada-sada. (Jes. 40:​25-28) Haru akka bintang i diboto Jahowa do goarna, tarlumobi ma hita. Pasti diboto Jahowa do tong goar ni akka naposona ganup marsada-sada. Jala molo sanggup do Jahowa manoppa akka bintang i, pasti sanggup do Ibana mangurupi naposona. Takkas ma, dang porlu mabiar halak Jahudi manang holsoan.

15. Aha do na diparettahon Jahowa tu halak Jahudi na tinggal di Babel andorang so dibebasson?

¹⁵ Dipaboa Jahowa do tong aha na ikkon diulahon naposona andorang so dibebasson nasida. Di bukku Jesaya, didok Jahowa do tu naposona, “Masuk ma hamu tu akka kamarmuna, jala tutup hamu ma pintu na di pudimuna. Martabuni ma hamu satokkin, sahat tu na  salpu rimas i.” (Jes. 26:20) Bisa jadi diihutton halak Jahudi do paretta on tikki ro Raja Sirus menyerang Babel. Sahalak sejarawan Junani najolo mandok, “Tikki ro si Sirus tu Kota Babel, diparettahon ibana do tu tentarana asa dibunu sude halak na adong di luar ni jabu.” Pasti mabiar do akka halak na tinggal di Babel di tikki i. Alai bisa jadi gabe selamat do halak Jahudi ala diihutton nasida paretta ni Jahowa.

16. Boasa unang pola paholsohu hita mamikkiri aha na lao masa? (Ida gambar.)

¹⁶ Aha do na taparsiajari? Satokkin nai, naeng taadopi ma hasusaan bolon. Tikki masa i, pasti gabe mabiar do akka halak di portibi on, jala dang diboto nasida aha na ikkon diulahon. Alai dang songon i naposo ni Jahowa. Taboto, Debatanta do Jahowa i. Gabe barani ma hita ala taboto ‘nungnga jonok be haluaonta’. (Luk. 21:28) Nang pe punguan ni akka bangso ro menyerang hita, torus do hita porsea tu Jahowa. Disuru Jahowa do akka suru-suruan asa mangalinggomi hita jala mangalehon petunjuk lao menyelamatton ngolutta. Songon dia do petunjuk i dipaboa tu hita? Tabereng ma annon. Alai bisa jadi sian huria do tadapot petunjuk sisongon i. Dipatudos do huria songon ‘kamar’ na mambahen hita aman. Songon dia do hita mempersiappon diri tu akka na lao masa di ari na naeng ro? Tapajonok ma diritta tu akka dongan di huria, taihutton ma petunjuk sian organisasi ni Jahowa, jala porsea ma hita Jahowa do na mamimpin organisasitta.—Heb. 10:​24, 25; 13:17.

17. Boha do carana asa tarapul rohatta?

¹⁷ Nang pe susa ngolu ni halak Jahudi na ditawan di Babel i, diapuli Jahowa do nasida. Songon i do tong na diulahon Jahowa tu hita. Jadi manang aha pe na masa, andalhon ma Jahowa asa tarapul rohatta. Boha do carana? Pos ma rohamuna, diampuni Jahowa do akka naposona na setia jala diparrohahon Ibana do hamu. Toktong ma ingot harapanmuna. Jala ingot ma ala Jahowa do Debatamuna, dang porlu hamu mabiar tu manang aha pe.