1-2. Aha do buktina na massai penting goar ni Jahowa di Jesus?

 MASSAI penting do goar ni Jahowa di Jesus. Aha ma buktina? Marsitutu do Jesus lao pabadiahon goar ni Bapakna. Songon naung tabahas di artikel na sebelumna, rade do Jesus mangalehon ngoluna lao pabadiahon dohot paiasson goar ni Jahowa. (Mrk. 14:36; Heb. 10:​7-9) Jala dung marujung Pamarettaon Saribu Taon, rade do Jesus paulakkon Harajaon i tu Jahowa asa Jahowa na dipasangap. (1 Kor. 15:​26-28) Sudena on patuduhon na massai holong do roha ni Jesus tu Bapakna.

² Marhite goar ni Jahowa do Jesus ro tu tano on. (Joh. 5:43; 12:13) Dipaboa ibana do goar ni Bapakna i tu akka siseanna. (Joh. 17:​6, 26) Jala marhite goar ni Jahowa do Jesus mangajari akka halak dohot mambahen akka mukjizat. (Joh. 10:25) Asing ni i, hea do didok Jesus di tangiangna, “Jaga ma [akka sisean i] alani goarmu.” (Joh. 17:11) Sian on taboto, massai penting do goar ni Jahowa di Jesus. Jadi dang masuk akkal molo adong sasahalak na mangakku siihutton Jesus, alai dang diboto goar ni Jahowa jala dang dipakke ibana goar i.

3. Aha do na lao tabahas di artikel on?

³ Massai penting do goar ni Jahowa di Jesus. Ala hita siihutton Jesus, tatiru ma ibana. (1 Ptr. 2:21) Di artikel on, lao tabahas ma boasa dilehon Jahowa goarna tu akka halak na pasahatton “barita na uli taringot tu Harajaon i”. (Mat. 24:14) Jala lao taulas ma muse sadia penting do goar ni Jahowa di hita.

 “BANGSO NA PASANGAPPON GOARNA”

4. (a) Andorang so nakkok Jesus tu surgo, aha do na didokkon ibana tu akka siseanna? (b) Sukkun-sukkun aha do na lao tabahas?

⁴ Andorang so nakkok Jesus tu surgo, didok ibana do tu akka siseanna, “Molo dung ro tondi parbadia i tu hamu gabe margogo ma hamu. Paboaonmuna ma taringot tu au di Jerusalem, di sude luat na di Judea, di Samaria, sahat tu ujung ni tano on.” (Ul. 1:8) Jadi lao dibaritahon akka sisean ma barita na uli i di sude luat di tano on, dang holan di Israel. Jala boi ma akka halak sian marragam bangso gabe siihutton Jesus. (Mat. 28:​19, 20) Alai di hatana i didok Jesus do, “Paboaonmuna ma taringot tu au.” Attong molo songon i, holan taringot Jesus do na dipaboa akka siseanna? Manang porlu do diboto nasida goar ni Jahowa jala dipaboa taringot goar i tu na asing? Asa taboto alusna, tabahas ma Ulaon ni Apostel bindu 15.

5. Sian rapat ni akka apostel dohot akka sintua di Jerusalem, aha do na ikkon diulahon sude halak Kristen? (Ida gambar.)

⁵ Di taon 49 M, marpungu ma akka apostel dohot akka sintua di Jerusalem. Dibahas nasida ma taringot aha do na ikkon diulahon akka halak na so marsunat asa boi gabe halak Kristen. Di ujung ni rapat i, didok si Jakobus, anggi ni Jesus ma songon on, “Nungnga takkas dipaboa [si Petrus], naung diparrohahon Debata bangso na asing. Dipillit Debata do deba sian nasida gabe bangso na pasangappon goarna.” Goar ni ise do na dimaksud si Jakobus? Dikutip ibana ma hata ni Panurirang Amos, jala didok ibana, “Asa toktong dilului akka na tinggal i Jahowa rap dohot akka halak na sian sude bangso na pasangappon goarhu, ninna Jahowa.” (Ul. 15:​14-18) Jadi, ikkon diparsiajari akka sisean na baru i do taringot Jahowa. Alai dang holan i. Ikkon ‘dipasangap’ nasida do tong goar i. Lapatanna, ikkon dipaboa nasida do goar ni Debata tu halak na asing, jala ikkon ditanda do nasida naposo ni Jahowa.

6-7. (a) Boasa ro Jesus tu tano on? (b) Aha do alasan na uppetting umbahen na ro Jesus tu tano on?

⁶ Lapatan ni goar ni Jesus, i ma “Jahowa do Haluaon”. Jala memang, Jesus do na dipillit Jahowa lao paluahon akka halak na patuduhon haporseaon. Ro do ibana tu tano on lao  manobus sude jolma. (Mat. 20:28) Ala diulahon Jesus songon i, gabe boi ma akka jolma dipalua sian dosa jala mandapot hangoluan salelengna.—Joh. 3:16.

⁷ Alai, boasa porlu tobusan di jolma? Songon naung tabahas di artikel na sebelumna, taingot ma muse aha na masa di Taman Eden. Di tikki i, dang dioloi si Adam dohot si Hawa Jahowa. Akibatna, gabe dang boi be nasida dohot pinopparna mangolu salelengna. (1 Mus. 3:​6, 24) Alani i ma ro Jesus tu tano on lao paluahon sude pinoppar ni si Adam dohot si Hawa. Alai, adong do alasan na uppetting umbahen na ro ibana tu tano on. Taingot ma, tikki di Taman Eden i, difitnah Sibolis do tong goar ni Jahowa. (1 Mus. 3:​4, 5) Jadi, pabadiahon goar ni Jahowa i do na uppetting. Alana diboto Jesus, molo nungnga dipabadia goar ni Jahowa, boi ma sude jolma benar-benar dipalua. Jala Jesus do na terutama berperan lao mangulahon i. Alana ibana do na mewakili Jahowa, jala diulahon ibana do sude na dipangido Jahowa.

8. Aha do na ikkon diingot sude siihutton Jesus?

⁸ Sude siihutton Jesus, dang soal halak Jahudi manang sian bangso na asing, ikkon diingot nasida do molo haluaon i ro sian Bapak ni Jesus, i ma Debata Jahowa. (Joh. 17:3) Asing ni i, ikkon diingot nasida do tong na massai penting pabadiahon goar ni Jahowa. Alana molo diulahon nasida i, boi ma nasida mambahen las roha ni Debata jala mangolu salelengna. (Ul. 2:​21, 22) Jala songon Jesus, ikkon ditanda halak do nasida naposo ni Jahowa. Jadi sude siihutton Jesus ikkon marsiajar taringot Jahowa dohot Jesus. Alani i ma di ujung ni tangiangna na disurat di Johannes bindu 17, didok Jesus, “Nungnga hupaboa goarmu tu nasida jala toktong dope paboaokku i, asa adong holong ni roha di nasida songon holong ni rohami tu au, jala asa marsada au dohot nasida.”—Joh. 17:26.

“HAMU DO AKKA SAKSIKKU”

9. Songon dia do hita patuduhon na massai penting goar ni Jahowa di hita?

⁹ Nungnga tabahas be, sude siihutton Jesus ikkon pabadiahon goar ni Jahowa. (Mat. 6:​9, 10) Ikkon dibahen nasida do i gabe na uppetting di ngoluna, jala ikkon tarida do i sian pambahenan ni nasida. Alai aha do na ikkon taulahon lao pabadiahon goar ni Jahowa, jala mambuktihon sala do hata ni Sibolis taringot Jahowa?

10. Taringot aha do na dipaboa di Jesaya bindu 42-44? (Jesaya 43:9; 44:​7-9) (Ida gambar.)

¹⁰ Di Jesaya bindu 42-44, dipaboa do aha na ikkon taulahon lao pabadiahon goar ni Jahowa. Didok di akka bindu i, hira na di pengadilan do Jahowa. Dipangido Jahowa do tu akka halak na so manomba Ibana asa dibuktihon nasida tutu do adong akka debata ni nasida manang na daong. Jala dipangido Ibana do asa dijou nasida akka saksi na boi mambuktihon i. Alai dang adong nanggo sada pe na boi mangulahon i!—Jaha Jesaya 43:9; 44:​7-9.

11. Aha do na didok Jahowa tu akka naposona? (Jesaya 43:​10-12)

¹¹ Jaha Jesaya 43:​10-12. Didok Jahowa do tu akka naposona, “Hamu do akka saksikku, . . . jala Au do Debata na sittong.” Dung i disukkun Jahowa do muse tu nasida, “Adong  do Debata na sittong asing ni Au?” (Jes. 44:8) Sada hasangapon do di hita boi mangalusi sukkun-sukkun i. Alai boha ma carana? Tapatudu ma sian hata dohot pambahenatta, holan Jahowa do Debata na sittong. Jala ganup ari dang soal manang aha pe na dibahen Sibolis tu hita, sai tapatudu ma na holong do rohatta tu Jahowa. Jala toktong ma hita setia tu Ibana. Jadi, boi do hita dohot pabadiahon goar ni Jahowa jala mambuktihon massai penting do goarna i di ngolutta.

12. Songon dia do surirang di Jesaya 40:​3, 5 dipasaut?

¹² Saonari, tabahas ma sada surirang na patuduhon saksi ni Jahowa do tong Jesus jala dipabadia ibana do goar ni Bapakna. Didok Panurirang Jesaya, na lao adong do sasahalak na ‘paradehon dalan ni Jahowa’. (Jes. 40:3) Saut ma on tikki diparade si Johannes Pandidi dalan ni Jesus. Alai sabotulna, dalan ni Jahowa do na diparade ibana. Alana marhite goar ni Jahowa do ro Jesus tu tano on, jala  dipasahat ibana do hata ni Jahowa. (Mat. 3:3; Mrk. 1:​2-4; Luk. 3:​3-6) Di surirang i pe didok do, “Pataridaonna ma hamuliaon ni Jahowa.” (Jes. 40:5) Songon dia do Jesus mangulahon i? Tikki ro Jesus tu tano on, sempurna do ibana maniru Jahowa. Sappe hira na Jahowa ma na ro tu tano on. (Joh. 12:45) Takkas ma sian hata dohot pambahenan ni Jesus, dipatudu ibana do na saksi ni Jahowa ibana jala dipabadia ibana do goar ni Jahowa.

13. Aha do na ikkon taulahon lao maniru Jesus?

¹³ Songon Jesus, hita pe saksi ni Jahowa do jala tapasangap do goar ni Jahowa. Alani i, tapaboa ma tu sude halak taringot akka ulaonna. Asing ni i, ikkon tapaboa do tong taringot Jesus. Alana Jesus do na terutama berperan lao pabadiahon goar ni Jahowa. (Ul. 1:8) Jala Jesus do Saksi na paling mananda Jahowa. Jadi tatiru ma ibana. (Pgk. 1:5) Alai, aha do muse na ikkon taulahon lao patuduhon na massai penting goar ni Jahowa i di hita?

PATUDU MA NA MASSAI PENTING DO GOAR NI JAHOWA DI HITA

14. Ikkon songon dia do perasaanta tu goar ni Jahowa? (1 Korint 1:​31, surat na di toru.)

¹⁴ Bangga ma hita alani goar ni Jahowa. (Jaha 1 Korint 1:​31, surat na di toru.) Massai las do roha ni Jahowa molo bangga hita alani goarna. (Jer. 9:​23, 24; 2 Kor. 10:17) ‘Bangga alani goar ni Jahowa’ lapatanna bangga do hita gabe sisomba Jahowa. Sada hasangapon do di hita boi dohot pabadiahon jala paiasson goarna. Unang ma maila hita paboahon molo hita Saksi Jahowa. Misalna tu donganta sakarejo, donganta sasikkola, tetangga, dohot na asing. Memang, lomo do roha ni Sibolis asa unang tapaboa goar ni Jahowa. (Jer. 11:21; Pgk. 12:17) Jala lomo do rohana dohot akka na mangihutton ibana asa unang adong na mamboto goar ni Jahowa. (Jer. 23:​26, 27) Alai ala massai penting goar ni Jahowa di hita, sai tapuji do goar ni Jahowa “ganup ari”.—Ps. 5:11; 89:16.

15. Aha do lapatan ni manjou goar ni Jahowa?

¹⁵ Torus ma manjou goar ni Jahowa. (Joel 2:32; Rom 10:​13, 14) Memang, nungnga taboto goar ni Debata jala tapakke do i. Alai dang cukkup holan i. Manjou goar ni Jahowa berarti ikkon takkas do tatanda Ibana, porsea hita tu Ibana, jala tapangido bantuan dohot petunjuk sian Ibana. (Ps. 20:7; 99:6; 116:4; 145:18) Asing ni i, ikkon tapaboa do goarna dohot akka sifatna tu halak na asing. Jala taurupi ma nasida paubahon pangalaho ni nasida asa sesuai tu lomo ni roha ni Jahowa. Alana molo diulahon nasida i, boi ma nasida malua.—Jes. 12:4; Ul. 2:​21, 38.

16. Songon dia do caratta mambuktihon na pargabus do Sibolis i?

¹⁶ Rade ma marsitaonon lao pasangappon goar ni Jahowa. (Jak. 5:​10, 11) Nang pe marsitaonon hita, toktong ma setia hita tu Jahowa. Molo taulahon i, boi ma tabuktihon pargabus do Sibolis i. Di jaman ni si Job, hea do didok Sibolis songon on, “[Lehonon ni jolma] do manang aha pe na di ibana asal ma boi mangolu.” (Job 2:4) Jadi didok Sibolis, olo pe jolma manomba Jahowa ala tabo do ngolu ni nasida. Alai molo susa, pasti dang olo be nasida manomba Jahowa. Boha do molo si Job? Toktong do setia ibana tu Jahowa jala dibuktihon ibana do sala hata ni Sibolis i. Dos songon si Job, toktong ma setia hita tu Jahowa, dang soal aha pe na dibahen Sibolis tu hita. Pos ma rohatta, pasti sai jagaon ni Jahowa do hita alani goarna.—Joh. 17:11.

17. Songon na dipaboa di 1 Petrus 2:​12, aha do muse na ikkon taulahon lao pasangappon goar ni Jahowa?

¹⁷ Puji ma goar ni Jahowa. (Poda 30:9; Jer. 7:​8-11) Ala mewakili Jahowa hita jala saksina do hita, balga do pengaruh ni pangalahotta tu  goarna. Boi do i pasangappon Ibana manang mambahen gabe marlea goarna. (Jaha 1 Petrus 2:12.) Jadi, marsitutu ma hita manjaga hata dohot pangalahotta. Molo taulahon i, boi ma tapasangap goar ni Jahowa nang pe dang sempurna hita.

18. Aha do muse na ikkon taulahon lao mambuktihon massai penting goar ni Jahowa di ngolutta? (Ida surat na di toru.)

¹⁸ Tabahen ma goar ni Jahowa na uppetting di ngolutta. (Ps. 138:2) Boasa? Alana molo tapillit manomba Jahowa, olo do ra gabe sogo roha ni akka halak mangida hita. Akibatna, gabe didokkon nasida ma akka na so sittong taringot hita. a I ma na dihilala Jesus najolo. Ditudu do ibana sahalak parjahat, jala sappe dihukum mate do ibana alani i. Alai ‘dang gabe maila’ Jesus jala dang gabe pamarsakku ibana alani hata ni akka jolma di tikki i. Justru rela do ibana mate lao pasangappon goar ni Jahowa. (Heb. 12:​2-4) Boasa boi songon i Jesus? Alana, mangulahon lomo ni roha ni Jahowa do na uppetting di ngoluna.—Mat. 26:39.

19. Sadia penting do goar ni Jahowa di hamu, jala boasa?

¹⁹ Bangga do hita manomba Jahowa. Jala sada hasangapon do di hita boi gabe Saksi Jahowa. Alani i, torus ma tapuji Ibana nang pe gabe direhei halak hita alani i. Tabahen ma goar ni Jahowa na uppetting di ngolutta. Jadi bertekad ma hita asa torus pasangappon goar ni Jahowa, dang soal aha pe na dibahen Sibolis tu hita. Molo taulahon i, boi ma tabuktihon massai penting do goar ni Jahowa di ngolutta, songon na diulahon Jesus.