1-2. (a) Boasa adong piga-piga halak na ragu gabe Saksi Jahowa? (b) Aha do na lao tabahas di artikel on?

 HEA DO hamu ragu lao gabe Saksi Jahowa? Ra, mabiar do hamu annon sogo roha ni ale-alemuna, dongan sakarejo, manang keluargamuna tu hamu. Manang dihilala hamu dang tolap hamu mangulahon sude aturan ni Jahowa. Molo hea dihilala hamu songon i, pasti diattusi hamu do pakkilalaan ni parsiajar Bibelmuna na ragu lao gabe Saksi Jahowa.

² Diboto Jesus, boi do perasaan sisongon i mangabbati sasahalak mambahen kemajuan. (Mat. 13:​20-22) Alai marsitutu do Jesus mangurupi akka halak na ragu asa mangihutton ibana. Diajari Jesus do tong hita asa taurupi parsiajar Bibelta (1) mamboto aha na mangabbati ibana mambahen kemajuan, (2) asa lam bagas holongna tu Jahowa, (3) asa diutamahon Jahowa, jala (4) asa barani mangadopi akka tantangan. Asing ni i, tapakke ma bukku Mangolu Saleleng ni Lelengna lao mangurupi parsiajar Bibelta asa olo manomba Jahowa. Adong na boi tatiru sian cara ni Jesus mangajari tikki tapakke bukku i. Aha ma i?

URUPI MA IBANA MAMBOTO AHA NA MANGABBATI IBANA MAMBAHEN KEMAJUAN

3. Aha do hira-hira alasanna umbahen na maol si Nikodemus gabe sisean ni Jesus?

³ Adong sahalak bawa na margoar si Nikodemus. Pamimpin ni halak Jahudi do ibana. Maol do dihilala ibana mambahen keputusan gabe sisean ni Jesus. Sasittongna onom bulan dung dimulai Jesus ulaonna marbarita, nungnga diakkui si Nikodemus  molo Jesus i Messias. (Joh. 3:​1, 2) Alai ala ‘mabiar tu halak Jahudi’, gabe sipsip ma si Nikodemus manjuppangi Jesus. (Joh. 7:13; 12:42) Boasa? Ra, mabiar ibana dibuat annon jabatanna dohot artana. a

4. Aha do na diulahon Jesus lao mangurupi si Nikodemus?

⁴ Nungnga diboto si Nikodemus Patik ni si Musa. Alai, porlu dope ibana diurupi lao mangattusi aha na dipangido Jahowa sian ibana. Aha ma na diulahon Jesus lao mangurupi si Nikodemus? Dilehon Jesus do tikkina asa boi pajuppang dohot ibana, bahkan tikki borngin. Takkas do dipaboa Jesus aha na ikkon diulahon si Nikodemus asa boi gabe siseanna. Ikkon bertobat do ibana, tardidi, jala dipatudu ibana haporseaonna tu Anak ni Debata.—Joh. 3:​5, 14-21.

5. Aha do na boi taulahon lao mangurupi parsiajar Bibelta?

⁵ Nang pe nungnga diboto parsiajar Bibelmuna piga-piga ayat ni Bibel, porlu do tong diurupi hamu ibana mamboto aha na mangabbati ibana mambahen kemajuan. Contohna, karejona do manang keluargana? Alani i, lehon ma tikki lao mangurupi parsiajar Bibelmuna. Ajak ma ibana mardalani manang manginum kopi. Di situasi sisongon i, olo do ra gabe dipaboa ibana aha na mangabbati ibana mambahen kemajuan. Dung i, urupi ma ibana mambahen perubahan. Alai paboa ma, tujuanna mangulahon i dang na lao pasonakkon rohamuna alai lao pasonakkon roha ni Jahowa.

6. Boha do carana mangurupi parsiajar Bibelmuna asa barani mangulahon na sittong? (1 Korint 16:13)

⁶ Molo pos roha ni sahalak parsiajar Bibel na urupan ni Jahowa ibana mangulahon na sittong, pasti barani do ibana mangulahon akka naung diparsiajari ibana. (Jaha 1 Korint 16:13.) Boi dokkonon dos songon guru di sikkola do hamu. Tikki marsikkola dope hamu, guru na songon dia do na dihalomohon rohamuna? Ra, lomo do rohamuna tu guru na sabar mangurupi hamu asa lam percaya diri mangulahon akka tugasmuna. Dos songon i ma, guru na denggan dang holan mangajarhon aha na dipangido Jahowa. Alai ikkon dipapos ibana do tong roha ni parsiajar Bibelna, pasti urupan ni Jahowa do ibana muba. Boha do cara mangulahon i?

URUPI MA IBANA ASA LAM MAKKAHOLONGI JAHOWA

7. Aha do na diulahon Jesus lao mangurupi akka halak asa lam makkaholongi Jahowa?

⁷ Diboto Jesus do molo holong roha ni sasahalak tu Jahowa, pasti taronjar do rohana mangulahon akka naung diparsiajari ibana. Alani i ma jotjot do diajarhon Jesus tu akka siseanna taringot Bapakna. Tujuanna, asa lam holong roha ni nasida tu Jahowa. Misalna, dipatudos Jesus do Jahowa i songon sahalak ama na burju tu akka gellengna. (Mat. 7:​9-11) Ra, piga-piga halak di tikki i dang hea makkilala holong sisongon i sian bapak ni nasida. Jadi bayakkon ma pakkilalaan ni nasida tikki mambege tudosan ni Jesus taringot sahalak ama na massai holong rohana tu anakna. Nang pe godang akka na so hasea na diulahon anakna i, olo do bapakna i manjalo ibana muse. Sian tudosan i, gabe diboto nasida ma massai holong do roha ni Jahowa tu nasida.—Luk. 15:​20-24.

8. Songon dia do hamu mangurupi parsiajar Bibelmuna asa lam makkaholongi Jahowa?

⁸ Hamu pe boi do mangurupi parsiajar Bibelmuna asa lam makkaholongi Jahowa. Carana, jotjot ma paboa tu ibana akka sifat ni Jahowa. Tikki marsiajar hamu, urupi ma ibana mangattusi songon dia parsiajaranna i patuduhon na holong do roha ni Jahowa tu ibana. Misalna,  tikki mambahas taringot tobusan, patorang ma molo tobusan i dilehon Jahowa do tong tu ibana. (Rom 5:8; 1 Joh. 4:10) Molo dirimangi parsiajar Bibelmuna i na holong do roha ni Jahowa tu ibana, gabe lam bagas ma holongna tu Jahowa.—Gal. 2:20.

9. Aha do na mambahen gabe olo si Michael manomba Jahowa?

⁹ Taida ma pengalaman ni si Michael na sian Indonesia. Saksi Jahowa do natua-tuana. Alai, dang olo ibana tardidi. Tikki marumur 18 taon, lao ma ibana karejo tu luar negeri gabe supir truk. Dung i, mulak ma ibana tu Indonesia ala naeng menikah. Alai, lao do muse ibana karejo tu luar negeri jala dang dohot istri dohot boruna. Saleleng di luar negeri ibana, marsiajar Bibel do istri dohot boruna jala dibahen nasida do kemajuan. Dung mate omakna, mulak ma si Michael lao mangurus bapakna jala marsiajar Bibel ma ibana. Massai hona do tu rohana bagian “Asa Lam Taattusi” di parsiajaran 27 sian bukku Mangolu Saleleng ni Lelengna. Dirimangi ibana do pakkilalaan ni Jahowa tikki disiksa Anakna, jala gabe tangis ma si Michael. Diattusi ibana ma massai holong do roha ni Jahowa dohot Jesus tu ibana. Las hian do rohana mamboto i. Dibahen ibana ma perubahan, jala tardidi ma ibana.

URUPI MA IBANA ASA MANGUTAMAHON JAHOWA

10. Aha do na diulahon Jesus lao mangurupi akka siseanna asa mangutamahon Jahowa? (Lukas 5:​5-11) (Ida gambar.)

¹⁰ Diboto akka sisean di abad na parjolo do molo Jesus i Messias na dijanjihon. Alai, porlu dope nasida diurupi asa mangutamahon ulaon marbarita. Misalna, si Petrus dohot si Andreas. Dung piga-piga bulan gabe sisean ni Jesus, ditogihon Jesus ma nasida melayani sepenuh waktu. (Mat. 4:​18, 19) Sasittongna, adong do bisnis ni nasida raphon si Jakobus dohot si Johannes, i ma bisnis manjala dekke. Parohon godang hepeng do bisnis i. (Mrk. 1:​16-20)  Alai, “pittor ditadikkon nasida ma jala ni nasida”, laos diihutton nasida ma Jesus. Pasti dipikkirhon nasida do tong songon dia annon memenuhi kebutuhan keluarga ni nasida. Alai, aha do na mambahen olo nasida mangutamahon ulaon marbarita? Songon na disurat si Lukas, dibahen Jesus ma mukjizat na paposson roha ni nasida pasti paradeon ni Jahowa do kebutuhan ni nasida.—Jaha Lukas 5:​5-11.

11. Asa togu haporseaon ni parsiajar Bibelta, aha do na boi tapaboa tu ibana?

¹¹ Memang, dang boi tabahen mukjizat songon Jesus. Alai, boi do tapaboa tu parsiajar Bibelta songon dia Jahowa mamasu-masu halak na mangutamahon Ibana. Misalna, diingot hamu dope tikki parjolo sahali hamu naeng marpungu? Songon dia do Jahowa mangurupi hamu asa boi ro tu parpunguan i? Ra ikkon dijuppangi hamu do bosmuna, jala ikkon dipatorang hamu do boasa dang boi be hamu lembur di ari parpunguan. Jadi, paboa ma tu parsiajar Bibelmuna molo pengalaman i patoguhon haporseaonmuna. Alana, boi diida hamu songon dia Jahowa mangurupi hamu mambahen keputusan lao mangutamahon Ibana.

12. (a) Boasa ikkon margatti-gatti diboan hamu akka dongan lao mangurupi parsiajar Bibelmuna? (b) Aha do muse na boi mangurupi parsiajar Bibelmuna asa mangutamahon Jahowa? Bahen ma contoh.

¹² Boi do tong gabe dipatogu haporseaon ni parsiajar Bibelmuna molo mambege pengalaman ni akka dongan na mangutamahon Jahowa. Jadi tikki naeng marsiajar Bibel hamu, margatti-gatti ma togihon akka dongan tusi. Pangido ma tu akka donganta asa paboahon songon dia nasida mamboto hasittongan, jala aha do na diulahon nasida lao mangutamahon Jahowa. Asing ni i, tonton jala bahas ma akka video di bagian “Asa Lam Taattusi” manang “Lului ma” sian bukku Mangolu Saleleng ni Lelengna. Misalna tikki mambahas parsiajaran 37, urupi ma parsiajar Bibelmuna mangattusi akka prinsip na adong di video Digohi Jahowa do na Tahaporluhon.

URUPI MA IBANA ASA RADE MANGADOPI TANTANGAN

13. Songon dia do Jesus mangurupi akka siseanna asa rade mangadopi tantangan?

¹³ Dipaboa Jesus do piga-piga hali tu akka siseanna, pasti adong do tantangan na ikkon diadopi nasida. Bahkan boi do i ro sian keluarga ni nasida sandiri. (Mat. 5:11; 10:​22, 36) Jala andorang so mate Jesus, dipaboa ibana do tu akka siseanna olo do ra sappe naeng dipamate nasida ala manomba Jahowa. (Mat. 24:9; Joh. 15:20; 16:2) Jadi dipaingot ibana ma akka siseanna asa manat tikki marbarita. Misalna dipaboa Jesus, ikkon marbisuk do nasida jala unang berdebat tu halak na mangalo hasittongan.

14. Songon dia do hita mangurupi parsiajar Bibelta asa rade mangadopi tantangan? (2 Timoteus 3:12)

¹⁴ Songon Jesus, tapaboa ma tong tu parsiajar Bibelta akka tantangan i boi do ro sian dongan sakarejona, ale-alena, manang keluargana. (Jaha 2 Timoteus 3:12.) Ra, gabe direhei akka dongan sakarejona do ibana annon ala mangihutton hasittongan. Asing ni i, olo do ra akka halak na asing, termasuk keluargana, gabe paroa-roahon hasittongan. Jadi, pittor urupi ma parsiajar Bibelmuna asa rade mangadopi tantangan na lao masa.

15. Boha do carana mangurupi parsiajar Bibelta asa boi diadopi ibana tantangan sian keluargana?

¹⁵ Molo diadopi parsiajar Bibelmuna tantangan sian keluargana, urupi ma ibana mangattusi boasa songon i pambahenan ni nasida. Ra didok roha ni keluargana, nungnga dioto-otoi be ibana manang dang lomo roha ni nasida mangida Saksi Jahowa. Ikkon diingot ibana, Jesus pe hea do mangadopi tantangan sian keluargana. (Mrk. 3:21; Joh. 7:5) Jadi, urupi ma parsiajar Bibelmuna asa sabar jala lambok tikki  makkatai tu halak na asing manang keluargana na mangalo hasittongan.

16. Boha do caratta mangurupi parsiajar Bibelta asa denggan patorakkon haporseaonna?

¹⁶ Alai adong do ra keluarga ni parsiajar Bibelmuna na olo mamboto taringot Bibel. Molo songon i, urupi ma parsiajar Bibelmuna asa unang pittor sude dipatorang tu keluargana. Boasa? Alana boi do gabe bingung keluargana i molo diulahon ibana songon i. Jala dang olo be annon nasida manangihon hasittongan di tikki na asing. Jadi urupi ma parsiajar Bibelmuna asa unang pagodangku hatorangan na dipaboa ibana. (Kol. 4:6) Ra, boi do dipaboa ibana situs web jw.org tu keluargana asa boi nasida mangalului hatorangan taringot Saksi Jahowa.

17. Songon dia do caramuna mangalatik parsiajar Bibelmuna asa rade patorakkon haporseaonna? (Ida gambar.)

¹⁷ Urupi ma parsiajar Bibelmuna asa rade mangalusi sukkun-sukkun ni keluarga manang dongan sakarejo taringot haporseaonna. Bahas ma akka artikel di bagian “Na Jotjot Disukkun Halak taringot Saksi Jahowa” di jw.org. (2 Tim. 2:​24, 25) Asing ni i, bahas ma bagian “Adong do na Mandok” di ganup parsiajaran di bukku Mangolu Saleleng ni Lelengna. Urupi ma ibana asa denggan patorakkon haporseaonna, jala marlatik ma hamu. Molo adong na ikkon dipature ibana sian carana patorakkon haporseaonna, paboa ma i tu ibana. Molo denggan dilatik hamu parsiajar Bibelmuna, boi ma percaya diri ibana patorakkon haporseaonna.

18. Boha do carana mangurupi parsiajar Bibelmuna asa olo gabe penyiar? (Mateus 10:27)

¹⁸ Dipangido Jesus do tu akka siseanna asa marbarita. (Jaha Mateus 10:27.) Molo pittor tajujui parsiajar Bibelta marbarita, gabe marsiajar ma ibana asa lam mangandalhon Jahowa. Attong, songon dia do hamu mangurupi parsiajar Bibelmuna asa olo gabe penyiar? Misalna, adong ma kegiatan pengabaran khusus di huriamuna, songon mambagihon undangan tu acara Parningotan manang tu parpunguan regional. Paboa ma tu ibana, biasana ummura do marbarita di tikki sisongon i. Jadi patorang ma aha do na ikkon ulahononna asa boi gabe penyiar. Asing ni i, jujui ma tong ibana asa dohot pasahatton tugas siswa di parpunguan di parsitongaan ni minggu. Molo diulahon ibana i, boi ma ibana dilatik jala denggan patorakkon haporseaonna.

POS MA ROHAMUNA TU PARSIAJAR BIBELMUNA

19. Songon dia do Jesus patuduhon na pos rohana tu akka siseanna, jala songon dia do caratta maniru ibana?

¹⁹ Andorang so lao Jesus tu surgo, dipaboa ibana do tu akka siseanna na lao rap do muse  ibana dohot nasida. Alai, dang diattusi akka siseanna i na lao tu surgo do nasida rap dohot Jesus. Nang pe songon i, tetap do pos roha ni Jesus pasti toktong do setia nasida tu ibana. (Joh. 14:​1-5, 8) Diboto Jesus, porlu do di nasida tikki asa boi mangattusi sude na diajarhon ibana, termasuk ma i taringot hangoluan salelengna di surgo. (Joh. 16:12) Jadi, tatiru ma Jesus. Pos ma rohatta tu parsiajar Bibelta. Tapaboa ma tu ibana pasti boi do ibana mambahen las roha ni Jahowa.

20. Songon dia do sahalak donganta di Malawi patuduhon na pos rohana tu parsiajar Bibelna?

²⁰ Taida ma pengalaman ni sahalak donganta borua di Malawi na margoar si Chifundo. Adong sahalak borua na diurupi ibana marsiajar Bibel. Goar ni borua i si Alinafe, jala Katolik do ibana. Di parsiajaran 14 sian bukku Mangolu Saleleng ni Lelengna, dibahas nasida ma taringot mamakke patung lao manomba Debata. Dung i, disukkun si Chifundo ma pandapot ni si Alinafe taringot i. Alai jut ma roha ni si Alinafe jala didok ibana ma, “Bah, lomokku do molo naeng mamakke patung au!” Tikki i, dirippu si Chifundo dang olo be si Alinafe marsiajar. Alai, sabar do si Chifundo mangurupi si Alinafe. Berharap do tong si Chifundo asa diattusi si Alinafe na sala do pangattusionna i. Piga-piga bulan dukkon i, di parsiajaran 34, disukkun si Chifundo ma tu si Alinafe, “Aha do manfaatna di ho dung marsiajar Bibel jala dung marsiajar taringot Jahowa?” Didok si Chifundo, “Dipaboa si Alinafe, godang do manfaat na dihilala ibana. Misalna, gabe diboto ibana ma dang olo Saksi Jahowa mangulahon ulaon na diorai Jahowa.” Dang leleng dukkon i, dang olo be si Alinafe mamakke patung, jala ujungna tardidi ma ibana. Jadi pos ma rohatta tu parsiajar Bibelta, pasti olo do nasida mangulahon lomo ni roha ni Jahowa.

21. Songon dia do caratta mangurupi parsiajar Bibelta asa olo ibana manomba Jahowa?

²¹ Memang, Jahowa do ‘na mambahen tubu’ boni hasittongan i di roha ni sasahalak. Alai, ikkon berupaya do tong hita mangurupi parsiajar Bibelta mambahen kemajuan. (1 Kor. 3:7) Jadi, unang ma holan mangajarhon aha na dipangido Jahowa sian ibana. Alai, taurupi ma ibana asa lam bagas holongna tu Jahowa jala mangutamahon Jahowa. Asing ni i, taajari ma ibana asa mangandalhon Jahowa tikki adong tantangan. Molo tapatudu na pos rohatta tu parsiajar Bibelta, gabe lam barani ma ibana mangihutton aturan ni Jahowa jala mambahen keputusan gabe Saksi Jahowa.