1-2. Sebelum didok Jesus hatana parpudi di hau partinaonan, aha do na masa tu ibana?

DI TANGGAL 14 Nisan 33 M, dipakkuhon ma Jesus di hau partinaonan. Sebelumna nungnga dileai, disiksa, jala ditudu Jesus mangulahon hajahaton na so hea diulahon ibana. Ala dipakkuhon tangan dohot patna, pasti haccit hian do dihilala Jesus molo bergerak manang makkatai. Alai nang pe songon i haccitna, adong do na dihatahon Jesus jala massai penting do hatana i.

² Saonari taparsiajari ma hata ni Jesus tikki di hau partinaonan jala taulas ma parsiajaranna tu hita. Molo taulahon parsiajaran i, berarti nga taoloi be hata ni Jahowa na mandok, “Tangihon hamu ma ibana.”​—Mat. 17:5.

3. Dosa ni ise do na dipangido Jesus asa disesa Jahowa?

³ Hata ni Jesus. Tikki dipakkuhon di hau partinaonan i, martangiang do Jesus, “Ale Amang, sesa ma dosa ni nasida.” Dosa ni ise do maksud ni Jesus? Taboto ma alusna sian hata ni Jesus on, “Dang diboto nasida na binahen ni nasida i.” (Luk. 23:33, 34) Bisa jadi maksud ni Jesus di ayat on, i ma tentara ni Rom na mamakkuhon tangan dohot patna di hau i. Dang diboto nasida dope ise do sasittongna Jesus. Alai dang holan akka tentara i maksud ni Jesus. Termasuk do akka halak na mangido asa dipamate ibana, alai ujungna gabe sisean ni Jesus. (Ul. 2:36-38) Nang pe dibahen nasida songon i, dang muruk Jesus tu halak i jala disalpuhon do hasalaan ni nasida. (1 Ptr. 2:23) I do alana dipangido ibana asa disesa Jahowa dosa ni halak na pamatehon ibana.

4. Taringot manalpuhon hasalaan, aha do na taparsiajari sian Jesus?

⁴ Parsiajaranna. Songon Jesus, ikkon rade do hita manalpuhon hasalaan. (Kol. 3:13) Termasuk ma i hasalaan ni keluargatta na menentang hita. Bisa jadi ala dang diattusi nasida haporseaotta jala dang diattusi boasa beda parngoluonta sian nasida, gabe dipaila ma hita di jolo ni halak, dihatahon na so tutu taringot hita, dibolokkon akka bukkutta, jala adong na sappe menganiaya hita. Alai unang ma torus jut rohatta tu nasida. Tatangiakkon ma tu Jahowa, asa tertarik nasida manomba Ibana. (Mat. 5:44, 45) Sipata, maol hian do tasalpuhon hasalaan ni halak i ala nungnga pahaccittu tahilala. Alai molo tapasombu torus jut rohatta, hita sandiri do na rugi. Sahalak donganta borua mandok, “Molo husalpuhon hasalaan ni sasahalak, dang na berarti setuju au manang lomo rohakku di pambahenanna i. Alai asa unang sai torus do jut rohakku.” (Ps. 37:8) Molo olo hita manalpuhon hasalaan, berarti na tabolokkon do sian rohatta muruk dohot jut ni roha.​—Eps. 4:31, 32.

5. Aha do janji ni Jesus tu sahalak parjahat na di labbungna i, jala boasa dibahen Jesus janji i?

⁵ Hata ni Jesus. Adong do dua parjahat na dipakkuhon di sapping ni Jesus. Mulana duassa do halak i mangarehei Jesus. (Mat. 27:44) Alai gabe muba do roha ni sahalak sian parjahat i, ala disadari ibana “dang adong diulahon [Jesus] na sala”. (Luk. 23:40, 41) Jala porsea do parjahat i na lao hehe do muse Jesus, dung i mamaretta gabe raja. Didok parjahat i ma, “Jesus, ingot ma au molo dung masuk ho tu Harajaonmi.” (Luk. 23:42) Massai balga do haporseaonna tu Jesus! Jadi didok Jesus ma, “Tutu do na hudok on tu ho sadari on, rap do ho dohot au [dang di Harajaon i, alai] di Paradeiso.” (Luk. 23:43) Hata ni Jesus on patuduhon, ibana sandiri do na manjanjihon Paradeiso i tu parjahat i. Dibahen Jesus pe songon i, ala diboto ibana parasi roha do Bapakna na di surgo i.​—Ps. 103:8.

6. Aha do parsiajaran na tadapot sian hata ni Jesus tu parjahat i?

⁶ Parsiajaranna. Suman situtu do Jesus tu Debata. (Heb. 1:3) Jadi pos ma rohatta lomo do roha ni Jahowa manalpuhon hasalaan jala dipatudu Ibana do asi ni rohana tu hita. Alai asa disalpuhon hasalaatta i, ikkon jolo muba do hita jala tapatudu haporseaon tu tobusan ni Jesus. (1 Joh. 1:7) Nang pe songon i, adong do ra sian hita na so pos dope rohana naung disalpuhon Jahowa hasalaanna di tikki naung salpu. Molo songon i do pakkilalaanmuna, pikkirhon ma on: Molo tu parjahat na baru bertobat sajo asi roha ni Jesus, pos ma rohatta pasti asi do roha ni Jahowa tu akka naposona na berupaya mangihutton parettana.​—Ps. 51:1; 1 Joh. 2:1, 2.

7. Sesuai tu Johannes 19:26, 27, aha do didok Jesus tu si Maria dohot tu si Johannes jala boasa didok ibana songon i?

⁷ Hata ni Jesus. (Jaha Johannes 19:26, 27.) Parduli do Jesus tu omakna naung mabalu i. Alani i didok ibana ma asa diurus si Johannes omakna i. Alai boasa si Johannes disuru ibana? Ala dang adong dope tikki i bukti na patuduhon naung gabe sisean ni Jesus akka anggina. Jadi nang pe boi nasida mangurus sude kebutuhan ni si Maria, alai dang boi dope halak i mangurupi si Maria asa toktong setia tu Jahowa. I do alana disuru Jesus si Johannes, apostel jala ale-alena i, mangurus omakna i. Alana, dianggap Jesus do akka siseanna keluargana. (Mat. 12:46-50) Dihaholongi jala dipardulihon Jesus do omakna si Maria. Pos do roha ni Jesus tu si Johannes, boi do urupanna omakna i toktong setia tu Jahowa. Didok ibana ma tu si Maria, “Inang, ibana ma anakmu!” Jala didok ibana ma muse tu si Johannes, “Ibana ma inangmu!” Mulai sian i, gabe hira anak ni si Maria ma si Johannes. Jala diurus si Johannes ma si Maria songon omakna. Takkas ma, dipatudu Jesus do holong tu omakna i, naung mangurus ibana sian mulai tubu jala na toktong mandongani ibana sahat tu na mate.

8. Parsiajaran aha do na tadapot sian hata ni Jesus tu si Maria dohot tu si Johannes?

⁸ Parsiajaranna. Ala sakeluarga do hita dohot akka dongan sahaporseaon, gabe unjonok do tahilala hubunganta tu nasida sian tu keluargatta sandiri. Nang pe ditentang keluargatta hita bahkan dang dianggap be anggota keluarga, alai marjanji do Jesus jalootta do “100 hali loppit unggodang” sian na tatinggalhon. Asal ma toktong hita setia tu Jahowa dohot tu organisasina. Godang do na boi gabe anakta, borutta, omakta, dohot bapakta. (Mrk. 10:29, 30) Pasti las do rohatta gabe bagian sian keluarga na masihaholongan, na sahaporseaon, jala na rap makkaholongi Jahowa.​—Kol. 3:14; 1 Ptr. 2:17.

9. Aha do na taparsiajari sian hata ni Jesus na disurat di Mateus 27:46?

⁹ Hata ni Jesus. Andorang so mate Jesus didok ibana do, “Debatakku, Debatakku, boasa tadikkononmu au?” (Mat. 27:46) Memang dang dipaboa di Bibel boasa didok Jesus hatana i. Alai adong do na taparsiajari sian i. Na parjolo, tikki didok Jesus hatana i gabe saut ma na tarsurat di Psalmen 22:1. * Na paduahon, gabe taboto ma dang dibahen Jahowa na songon “tembok di sakalilingna lao manjaga” Jesus Anakna i. (Job 1:10) Diboto Jesus do boasa dipaloas Jahowa musuna menganiaya ibana, asa taruji do haporseaonna sahat tu na mate. Dang adong jolma na hea makkilala penganiayaan na massai borat sisongon i. Na patoluhon, hata ni Jesus i patuduhon dang adong hajahaton na diulahon Jesus na mambahen ibana ikkon dihukum mate.

10. Parsiajaran aha do na tadapot sian hata ni Jesus tu Jahowa?

¹⁰ Parsiajaranna. Unang ma taharappon sai dijaga Jahowa hita, tikki diuji haporseaotta. Songon na dialami Jesus, hita pe bisa jadi do dianiaya bahkan sappe dipamate. (Mat. 16:24, 25) Alai pos ma rohatta dang pasombuon ni Jahowa hita manaon sitaonon lobi sian na tolapta. (1 Kor. 10:13) Parsiajaran na asing, olo do ra dianiaya hita hape dang adong hasalaatta. (1 Ptr. 2:19, 20) Alana dang taihutton portibi on jala tabaritahon hasittongan. (Joh. 17:14; 1 Ptr. 4:15, 16) Diboto Jesus do boasa dipasombu Jahowa ibana susa. Alai anggo hita, olo do sipata dang taattusi boasa dipasombu Jahowa hita susa. (Hab. 1:3) Taingot ma, Debata parasi roha jala na sabar do Jahowa. Jadi diattusi Ibana do boasa songon i perasaanta, dang alana gale haporseaotta. Alai ala porlu do hita dipatogu Ibana.​—2 Kor. 1:3, 4.

11. Boasa didok Jesus “mauas au” di Johannes 19:28?

¹¹ Hata ni Jesus. (Jaha Johannes 19:28.) Boasa didok Jesus “mauas au”? Didok Jesus pe songon i “asa saut” do na tarsurat di Psalmen 22:15 na mandok, “Dang margogo be au, dos songon hudon tano na maputtar. Lokkot do dilakku di langit-langit ni pamanganku.” Tikki digattung di hau partinaonan i, massai haccit do dihilala Jesus jala borat do sitaononna. Jadi mauas hian do ibana tikki i. Alani i pasti naeng minum do ibana.

12. Aha do na boi taparsiajari sian hata ni Jesus na mandok “mauas au”?

¹² Parsiajaranna. Songon Jesus, unang ma maila hita paboahon pakkilalaatta. Memang, dang sai mura paboahon tu akka dongan na porlu hita diurupi. Alai molo ikkon diurupi do hita, unang ma maila paboahon i. Misalna molo dung matua hita manang marsahit-sahit, porlu do ra hita diurupi belanja tu toko, manang didongani marubat tu dokter. Tikki metmet rohatta taceritahon ma i tu sintua dohot tu dongan na tahaporseai, asa dipatogu hita marhite “hata na denggan”. (Poda 12:25) Taingot ma, dihaholongi akka dongan do hita jala sai rade do halak i mangurupi “tikki masa sitaonon”. (Poda 17:17) Alai dang diboto akka dongan na porlu hita diurupi molo dang tapaboa tu halak i.

13. Tugas aha na dipasae Jesus ala toktong setia sahat tu na mate?

¹³ Hata ni Jesus. Hira-hira jam 3 botari tanggal 14 Nisan, didok Jesus ma, “Nungnga huulahon be sude na pinangidomi!” (Joh. 19:30) Ala setia do Jesus sahat tu na mate, boi ma dipasae ibana sude tugas na dilean Jahowa tu ibana. Na parjolo, dipatudu Jesus ma pargabus do Sibolis. Boi do Jesus, jolma na sempurna, toktong setia tu Jahowa dang soal tantangan aha pe na dibahen Sibolis. Na paduahon, dilean Jesus do ngoluna gabe tobusan. Alani hamateanna i, boi ma jolma na so sempurna jonok tu Jahowa, jala gabe adong ma harapan mangolu saleleng ni lelengna. Na patoluhon, dipabadia Jesus ma goar ni Jahowa jala dipatudu ibana ma holan pamarettaon ni Jahowa do na adil jala na sittong.

14. Aha do na porlu tabuktihon ganup ari?

¹⁴ Parsiajaranna. Ikkon berupaya do hita toktong setia tu Jahowa ganup ari. Parrohahon ma komentar ni donganta si Maxwell Friend, instruktur ni Sikkola Gilead. Tikki marjamita ibana di sada kebaktian internasional, didok ibana, “Hatahon jala ulahon ma aha na boi diulahon hamu sadari on. Unang paima tu ari marsogot. Alana dang taboto, mangolu dope hita manang na dang marsogot. Anggap ma setiap ari kesempatan parpudi lao mambuktihon na layak do hita mandapot hangoluan na saleleng ni lelengna.” Sai anggiat ma boi hita setia tu Jahowa ganup ari. Molo tung pe ikkon mate hita, nga boi be tadok, “Jahowa, nungnga hubuktihon be kesetiaanku, nungnga hupatuduhon be na pargabus do Sibolis i, nungnga hupabadia be goarmu, jala huakkui do holan Ho do na marhak mamaretta jolma!”

15. Aha do lapatan ni hata ni Jesus na di Lukas 23:46?

¹⁵ Hata ni Jesus. (Jaha Lukas 23:46.) Pos do roha ni Jesus mandok, “Ale Amang, tu tanganmu ma hupasahat hosakkon.” Porsea do Jesus, diingot Jahowa do ibana jala paheheonna.

16. Aha do na boi taparsiajari sian pengalaman ni si Joshua?

¹⁶ Parsiajaranna. Toktong ma hita setia tu Jahowa nang pe ikkon mate. Asa boi taulahon i, ikkon ‘marhaposan tu Jahowa do hita sian nasa rohatta’. (Poda 3:5) Taparrohahon ma pengalaman ni donganta si Joshua na marumur 15 taon. Nang pe parah sahitna, alai dang olo ibana manjalo perawatan kesehatan na maralo tu hukum ni Debata. Andorang so mate, didok ibana ma tu omakna, “Omak, nungnga hupasahat ngolukku tu tangan ni Jahowa . . . Pos do rohakku paheheonna do au annon. Diboto Ibana do na di bagasan rohakku, jala diboto Jahowa do holong ni rohakku tu Ibana.” * Porlu do tasukkun tu diritta sandiri, ‘Molo ikkon mate au ala mampartahatton haporseaokku, boi do au toktong setia tu Jahowa? Pos do rohakku na paheheonna do au?’

17-18. Akka parsiajaran aha do na tadapot sian hata parpudi ni Jesus? (Ida kotak, “ Parsiajaran sian Hata Parpudi ni Jesus”.)

¹⁷ Sian hata parpudi ni Jesus, godang do parsiajaran na tadapot. Dipaingot do hita asa olo manalpuhon hasalaan ni dongan, jala pos ma rohatta olo do Jahowa manalpuhon hasalaatta. Las do rohatta sakeluarga dohot akka dongan sahaporseaon na rade mangurupi hita. Alai molo porlu hita diurupi, ikkon olo do hita paboahon i tu nasida. Taingot ma, urupan ni Jahowa do hita asa boi martahan manaon hasusaan. Asing ni i, dipaingot do hita muse asa taanggap setiap ari sebagai kesempatan parpudi patuduhon kesetiaan tu Jahowa. Pos ma rohatta molo tung pe mate hita, paheheon ni Jahowa do hita.

¹⁸ Massai godang do parsiajaran na tadapot sian hata parpudi ni Jesus di hau partinaonan i. Molo taulahon akka parsiajaran i, berarti nga taoloi be hata ni Jahowa na mandok, “Tangihon hamu ma ibana.”​—Mat. 17:5.