1-2. Songon na disurat di 1 Timoteus 6:20, aha do na ikkon diulahon si Timoteus?

SERING do tapangido halak manjaga barangta na arga. Misalna, tasippan do hepengta di bank, asa unang mago jala unang ditakko halak. Jadi boi ma taattusi boasa olo hita mangalehon barangta na arga asa dijaga halak na asing.

² Jaha 1 Timoteus 6:20. Dipasingot si Paulus do si Timoteus taringot tu silehon-lehon na massai arga naung dijalo ibana, i ma hasittongan taringot tu lomo ni roha ni Debata. Dilehon do tong tugas tu si Timoteus lao ‘mambaritahon hata ni Debata’. (2 Tim. 4:2, 5) Dijujui si Paulus do si Timoteus asa manjaga aha naung dijalo ibana. Songon si Timoteus, dilehon Jahowa do tong silehon-lehon na massai arga tu hita. Aha ma i? Jala boasa ikkon tajaga silehon-lehon ni Jahowa i?

3-4. Boasa massai arga hasittongan na adong di Bibel?

³ Dilehon Jahowa do tu hita parbinotoan taringot tu hasittongan na adong di Bibel. Massai arga do hasittongan on ala diurupi do hita asa boi marale-ale tu Jahowa jala asa boi hita marlas ni roha. Molo pos rohatta tu hasittongan jala taihutton i, boi ma tapasiding ajaran na sala dohot ulaon na so dihalomohon Debata.​—1 Kor. 6:9-11.

⁴ Alasan na asing boasa massai arga hasittongan ni Bibel, ala holan tu halak na serep roha “na marpangalaho na denggan” do i dilehon Jahowa. (Ul. 13:48) Porsea do nasida molo naposo haposan jala na marbisuk do na mangajarhon hasittongan tu hita saonari. (Mat. 11:25; 24:45) Dang boi taattusi Bibel molo dang adong na mangurupi,  jala dang adong na ummarga sian mangattusi hasittongan ni Bibel.​—Poda 3:13, 15.

5. Aha do tugas na massai arga na dilehon Jahowa tu hita?

⁵ Dilehon Jahowa do tugas na massai arga tu hita lao mangajarhon hasittongan taringot Ibana dohot lomo ni rohana tu akka halak. (Mat. 24:14) Massai arga do barita na tapaboa i, alana boi do i mangurupi halak gabe bagian sian keluarga ni Jahowa. Jala boi ma nasida mandapot hangoluan salelengna. (1 Tim. 4:16) Dang soal sadia godang na taulahon di ulaon marbarita, sude do hita mendukung ulaon na rikkot on. (1 Tim. 2:3, 4) Sada hasangapon do di hita ala boi rap saulaon dohot Debata!​—1 Kor. 3:9.

6. Aha do na masa tu halak na so mangargai tugas ni nasida boi rap saulaon dohot Debata?

⁶ Di tikki ni si Timoteus adong do halak Kristen na so mangargai tugas ni nasida boi rap saulaon dohot Debata. I ma na masa tu si Demas. Ala dihaholongi ibana portibi on gabe ditadikkon ibana do si Paulus. (2 Tim. 4:10) Si Pigelus dohot si Hermogenes pe dang olo be marbarita ala mabiar dianiaya songon si Paulus. (2 Tim. 1:15) Ditadikkon si Himeneus, si Aleksander, dohot si Piletus do hasittongan jala gabe murtad do nasida. (1 Tim. 1:19, 20; 2 Tim. 2:16-18) Di mulana dihaholongi nasida do Jahowa. Alai ujungna, dang mararga be dianggap nasida aha naung dilehon Jahowa tu nasida.

7. Aha do cara na dipakke Sibolis lao mambahen hita mangulahon lomo ni rohana?

⁷ Songon dia do Sibolis mambahen hita dang be manjaga silehon-lehon ni Jahowa? Parrohahon ma cara na dipakke ibana. Dipakke Sibolis do hiburan dohot media lao mangajarhon pikkiran dohot pangalaho na sala tu hita, asa unang gomos be tatiop hasittongan. Dipakke Sibolis do penganiayaan manang tekanan ni akka halak mambahen hita dang be marbarita. Jala dipakke Sibolis do ajaran ni halak na murtad mambahen hita manadikkon hasittongan.​—1 Tim. 6:20, 21.

8. Aha do na boi taparsiajari sian pengalaman ni si Daniel?

⁸ Molo dang manat hita, lam leleng boi do gabe dang gomos be tatiop hasittongan. Parrohahon ma pengalaman ni si Daniel * na lomo rohana margame. Didok ibana, “Mulai sian umur sappulu taon nungnga margame au. Mulana game na denggan do na humaetton. Alai  lam leleng, humaetton ma game kekerasan dohot ilmu sihir manang begu-begu.” Ujungna, sai margame ma ibana 15 jom sadari. Didok si Daniel, “Sasittongna, game na humaetton i dohot tikki na habis tusi mambahen au dao sian Jahowa. Alai didok rohakku, dang pola boha i, dang marlakku prinsip ni Bibel i tu au.” Jadi molo dang manat hita, boi do hiburan na tanikmati mambahen hita dang gomos be maniop hasittongan. Ujungna boi do gabe mago silehon-lehon na massai arga naung dilehon Jahowa tu hita.

9. Songon aha do dipatudos si Paulus si Timoteus?

⁹ Jaha 1 Timoteus 1:18, 19. Dipatudos si Paulus do si Timoteus songon sahalak tentara. (2 Tim. 2:3) Dijujui ibana do si Timoteus asa toktong ‘mangulahon na denggan sian nasa gogona’. Boasa dipatudos halak Kristen songon tentara? Akka parange aha do na porlu tapatudu asa boi gabe tentara ni Kristus? Taulas ma lima parsiajaran na boi tadapot sian tudosan ni si Paulus asa toktong tajaga hasittongan.

10. Boasa ikkon toktong hita setia tu Debata?

¹⁰ Toktong mangoloi paretta ni Debata. Setia do sahalak tentara na burju. Marsitutu do sahalak tentara manjaga na arga di ibana dohot manjaga halak na dihaholongi ibana. Dijujui si Paulus do si Timoteus asa marsitutu mangoloi paretta ni Debata. I do buktina na setia ibana tu Debata. (1 Tim. 4:7) Molo setia hita tu Debata jala taoloi parettana, gabe boi ma toktong tajaga hasittongan i.​—1 Tim. 4:8-10; 6:6.

11. Boasa ikkon talatik diritta mangulahon na sittong?

¹¹ Mangalatik diri mangulahon na sittong. Ikkon sering do marlatik sahalak tentara, asa rade ibana marporang. Suang songon i ma, ikkon dilatik si Timoteus do dirina asa toktong togu parale-aleonna tu Jahowa. Diihutton ibana do poda ni si Paulus. Marsitutu do ibana mangalo keinginan na sala, toktong do dipatudu ibana parange na denggan, jala marsaor do ibana dohot akka dongan sahaporseaonna. (2 Tim. 2:22) Jadi hita pe, ikkon talatik do diritta asa boi taalo keinginan na sala. (Rom 7:21-25) Porlu do hita muse mangalatik diri asa boi tatanggalhon pangalaho na leleng jala mamakke pangalaho na imbaru. (Eps. 4:22, 24) Ikkon talatik do muse diritta asa toktong marpungu nang pe nungnga loja hita karejo di bagasan sadari.​—Heb. 10:24, 25.

12. Songon dia do carana asa lam denggan mamakke Bibel?

¹² Ikkon sering do marlatik sahalak tentara asa jago ibana mamakke sinjatana. Dos songon i ma, ikkon marlatik do hita asa boi denggan mangajarhon jala patorakkon hasittongan. (2 Tim. 2:15) Di parpunguan ma hita marlatik mangulahon i. Alai asa boi tapapos roha ni halak na massai arga do hasittongan i, ikkon jolo tapatogu do haporseaotta. Ikkon taratur do taparsiajari Bibel. Alai dang sae holan manjaha i, ikkon tarimangi jala tariset do i asa boi tadapot pangattusion na sittong jala boi tapatorang tu akka halak. (1 Tim. 4:13-15) Dung i, tapakke ma Bibel tikki mangajari akka halak. Alai dang sae holan manjahahon ayat. Taurupi ma nasida mangattusi ayat i jala mangulahon i di  parngoluan ni nasida. Molo taratur hita mamparsiajari Bibel, boi ma lam malo hita mangajarhon i tu halak.​—2 Tim. 3:16, 17.

13. Songon na disurat di Heber 5:14, boasa ikkon tapakke pangattusionta?

¹³ Pakke ma pangattusionmuna. Ikkon boi do diboto sahalak tentara didia adong bahaya jala ikkon pasidingonna do i. Hita pe, ikkon taboto do situasi na boi parohon jea tu hita jala ikkon tapasiding do i. (Poda 22:3; jaha Heber 5:14.) Misalna, ikkon marbisuk do hita mamillit rekreasi dohot hiburan. Jotjot do acara TV dohot film patuduhon pangalaho na rorang. Ikkon tapasiding do hiburan sisongon i, ala boi do i mambahen hita dang be makkaholongi Jahowa. Sogo do roha ni Jahowa tu pangalaho sisongon i, jala boi do i parohon jea tu hita dohot tu na asing.​—Eps. 5:5, 6.

14. Songon dia do si Daniel mamakke pangattusionna?

¹⁴ Si Daniel na dipaboa nakkin ujungna mangattusi sala do margame kekerasan dohot margame begu-begu. Diriset ibana do di Watchtower Library bahan na cocok tu situasina i. Aha do pengaruhna tu ibana? Dang olo be ibana margame sisongon i. Dang marlangganan game online be ibana, jala dang mardongan be ibana dohot akka pemain na di game online i. Didok si Daniel, “Dang margame be au. Hupakke ma tikkiku tu kegiatan na asing, manang marsaor dohot akka dongan di huria.” Saonari nungnga gabe sahalak perintis jala sintua si Daniel.

15. Aha do bahayana manangihon informasi na so sittong?

¹⁵ Songon si Timoteus, ikkon tapakke do pangattusionta lao mamboto bahaya ni ajaran ni halak na murtad. (1 Tim. 4:1, 7; 2 Tim. 2:16) Misalna, dibahen halak na murtad do informasi na so sittong taringot akka donganta, manang mambahen hita dang porsea be tu organisasi ni Jahowa. Boi do on mambahen gale haporseaotta. Ikkon tapasiding do akka informasi sisongon i. Boasa? Alana informasi sisongon i ro sian akka halak “naung sega pingkiranna dohot na so adong be hasintongan di rohana”. Holan  “naeng marsoal jala marbada” do tujuan ni nasida. (1 Tim. 6:4, 5) Lomo do roha ni nasida asa porsea hita tu gabus ni nasida jala asa unang tahaporseai be akka donganta.

16. Aha do na boi mambahen hita gabe dang fokus?

¹⁶ Toktong ma fokus. Sahalak “tentara ni Kristus Jesus na burju” do si Timoteus. Fokus do ibana tu ulaon marbarita, dang tu hamoraon manang tu ulaon na asing. (2 Tim. 2:3, 4) Songon si Timoteus, toktong ma hita fokus. Unang ma sai hamoraon na talului. Molo “holongan tu hamoraon” do hita dang tahaholongi be Jahowa, dang taargai be hata ni Debata, jala dang marbarita na uli be hita tu halak. (Mat. 13:22) Tabahen ma sederhana ngolutta, jala tapakke ma tikki dohot gogotta lao ‘manjumolohon Harajaon ni Debata’.​—Mat. 6:22-25, 33.

17-18. Aha do na ikkon taulahon asa boi tajaga parale-aleotta tu Jahowa?

¹⁷ Hatop ma hamu bertindak. Ikkon dibahen sahalak tentara do rencana, aha na lao ulahononna asa boi melindungi dirina. Hita pe ikkon hatop do bertindak tikki adong bahaya, asa boi tajaga aha naung dilehon Jahowa tu hita. Aha do na boi mangurupi hita mangulahon i? Ikkon tabahen do rencana aha na lao ulahonotta molo adong bahaya.

¹⁸ Uppamana tikki adong acara di sada gedung, ikkon diboto na ro i do didia pintu kaluar ni gedung i. Boasa? Asa boi nasida hatop kaluar molo adong situasi na berbahaya. Suang songon i ma, ikkon taboto do aha na lao taulahon molo toppu taida adegan na rorang, adegan kekerasan, manang informasi na dibahen halak na murtad di internet, film, dohot acara TV. Molo nungnga taboto hian aha na lao taulahon, boi ma hita hatop bertindak molo masa situasi sisongon i. Molo taulahon i, boi ma toktong tajaga parale-alaeotta tu Jahowa jala toktong ias di jolona.​—Ps. 101:3; 1 Tim. 4:12.

19. Aha do pasu-pasu na tadapot molo toktong tajaga aha naung dilehon Jahowa tu hita?

¹⁹ Ikkon tajaga do aha naung dilehon Jahowa tu hita, i ma hasittongan na arga na adong di Bibel dohot tugas lao mangajarhon i tu na asing. Molo taulahon i, ias ma panggora ni rohatta, adong ma tujuan ni ngolutta, jala dapotta ma silas ni roha ala mangurupi na asing mananda Jahowa. Marhite pangurupion ni Debata, boi ma tajaga aha naung dilehon Ibana tu hita.​—1 Tim. 6:12, 19.