1-2. (a) Boasa Armagedon i sada barita na uli tu jolma? (b) Sungkun-sungkun aha do na laho taulas di parsiajaran on?

GODANG do halak porsea na laho hancur do tano on alani porang nuklir manang bencana alam. Alai ndang songon i na diajarhon Bibel. Gariada, dipaboa do di Bibel laho masa ma sada porang na parohon laba na denggan tu hita. Porang i, i ma Armagedon, jala dipaboa do di Bibel molo porang i sada barita na uli na boi mambahen hita marlas ni roha. (Pgk. 1:3) Porang Armagedon i ndang laho mangaripashon jolma, alai paluahon nasida do! Songon dia carana?

² Bibel mandok, porang Armagedon i paluahon jolma marhite pasohon pamarentaon di portibi on. Di porang i, diripashon ma angka parjahat, alai mangolu do angka partigor. Jala dijaga do tano on asa unang hancur asa boi angka partigor tongtong mangolu disi. (Pgk. 11:18) Asa lam taantusi taringot i, taulas ma opat sungkun-sungkun on: Aha do Armagedon i? Aha do na laho masa andorang so ro porang i? Songon dia hita boi malua sian Armagedon? Songon dia hita boi tongtong setia ala lam jonok Armagedon i?

3. (a) Aha do lapatan ni hata “Armagedon”? (b) Hombar tu Pangungkapon 16:14, 16, boasa tadok Armagedon i ndang sada inganan na adong di tano on?

³ Jaha Pangungkapon 16:14, 16. Hata “Armagedon” holan sahali do dipaboa di Bibel, jala hata i dibuat sian hata Heber na lapatanna “Dolok Megiddo.” (Pgk. 16:16; surat na di toru) Megiddo, i ma sada kota di Israel najolo. (Jos. 17:11) Alai, Armagedon  na didok dison ndang sada inganan na adong di tano on. Armagedon, i ma sada situasi tingki sude raja di portibi on dohot angka pasukanna mamorangi naposo ni Debata. (Pgk. 16:14) Alai di parsiajaran on, tapangke do hata “Armagedon” laho patuduhon porang na laho masa ndang leleng dung dipapungu angka raja di tano on. Sian dia taboto molo Armagedon i holan sada gambaran? Na parjolo, ndang adong dolok di Megiddo. Na paduahon, ndang siat i inganan i tu “angka raja na di tano on”, angka tentara, dohot angka sinjata ni nasida. Na patoluhon, songon na laho taulas di parsiajaran on, Armagedon laho dimulai tingki “angka raja” di portibi on mamorangi naposo ni Debata na adong di liat portibi on.

4. Boasa dipangke Jahowa hata Megiddo laho manggombarhon porangna?

⁴ Boasa dipatudos Jahowa porangna dohot Megiddo? Najolo, jotjot do masa porang di Megiddo dohot di Rura Jisreel. Jala jotjot do diurupi Jahowa naposona monang tingki marporang disi. Umpamana, “di topi ni batangaek Megiddo”, diurupi Debata do Hakim ni halak Israel si Barak manaluhon tentara Kanaan na dipimpin si Sisera. Mandok mauliate do si Barak dohot panurirang borua si Debora tu Jahowa ala monang nasida. Diendehon nasida ma, “Marporang ma bintang sian langit . . . diporangi bintang i ma si Sisera. Diauphon aek magodang ma nasida di batangaek Kison.”​—Pangh. 5:19-21, Bibel siganup ari.

5. Aha do imbar ni Armagedon dohot parporangan di tingki ni si Barak?

⁵ Di ujung ni ende ni si Barak dohot si Debora didok nasida, “Ingkon songon i ma nian hamamago ni saluhut angka musum, ale Jahowa! Alai anggo jolma, angka na mangkaholongi Ho, ingkon marsinondang do songon habibinsar ni mata ni ari di hagogoanna.” (Pangh. 5:31) Di Armagedon, ripashonon ni Debata ma sude musuna jala paluaonna do naposona. Alai adong do imbar ni porang na masa di tingki ni si Barak dohot porang Armagedon. Di Armagedon, ndang laho marporang naposo ni Debata. Jala ndang laho adong sinjata ni nasida! Nang pe songon i, pos do roha ni nasida tu Jahowa dohot tu angka tentarana na di surgo.​—Jes. 30:15; Pgk. 19:11-15.

6. Songon dia do Jahowa mangaripashon musuna di Armagedon?

⁶ Songon dia do Jahowa mangaripashon musuna di Armagedon? Ra, boi do dipangke Ibana marragam cara. Umpamana, marhite gempa bumi, udan es, dohot ronggur. (Job 38:22, 23; Hes. 38:19-22) Manang dibahen ibana masibunuan angka musuna. (2 Kron. 20:17, 22, 23) Jala ra boi do dipangke Ibana suru-suruanna laho mambunu angka parjahat. (Jes. 37:36) Aha pe carana, na laho monang do Debata. Sude musuna laho diripashon, alai malua do angka naposona.​—Poda 3:25, 26.

7-8. (a) Hombar tu 1 Tessalonik 5:1-6, boa-boa aha do na laho dibahen angka pamarenta? (b) Boasa boa-boa on gabus na berbahaya?

⁷ Andorang so ro “ari ni Jahowa”, adong ma boa-boa na mandok “dame do jala ndang adong be sihabiaran!” (Jaha 1 Tessalonik 5:1-6.) Di 1 Tessalonik 5:2, na didok “ari ni Jahowa” i ma “hasusaan bolon”. (Pgk. 7:14) Songon dia do hita mamboto na laho masa hasusaan bolon i? Adong do didok di Bibel taringot boa-boa na so hea masa. Jala i do na gabe tanda laho dimulai hasusaan bolon i.

⁸ Laho adong boa-boa na mandok “dame do jala ndang adong be sihabiaran!” Boasa didok angka pamarenta songon i? Dohot do angka  pamimpin ni agama disi? Ra, dohot do nasida. Alai taboto ma molo boa-boa i gabus sian suru-suruan na jahat do. Bahaya do gabus i, alana dirimpu angka halak aman do nasida. Hape, laho ro nama hasusaan bolon na so hea masa di portibi on. Di tingki i, “tompu ma diripashon nasida. Tompu do i masa dos songon pangae ni sahalak ina na laho tubu-tubuan.” Aha ma na laho masa tu naposo ni Jahowa na setia? Ala ndang tangkas diboto nasida andigan dimulai hasusaan bolon i, ra tarsonggot do nasida tingki masa i. Alai nunga rade be nasida.

9. Songon dia cara ni Jahowa mangaripashon portibi ni Sibolis on?

⁹ Ndang pintor sahali sude diripashon Jahowa portibi ni Sibolis on, songon na dibahen Ibana di tingki ni si Noak. Na parjolo sahali diripashon Debata, i ma Babel na Balga na manggombarhon sude agama palsu. Dungkon i, di Armagedon ma diripashon Jahowa sude bagian na asing sian portibi ni Sibolis, i ma sistem politik, militer, dohot perdagangan. Taulas ma dua situasi na laho masa on.

10. Hombar tu Pangungkapon 17:1, 6 dohot 18:24, boasa naeng diripashon Jahowa Babel na Balga?

¹⁰ “Panguhuman na laho masa tu boru-boru na so hasea.” (Jaha Pangungkapon 17:1, 6; 18:24.) Gabe lea do goar ni Debata dibahen Babel na Balga ala diajarhon nasida na so sintong taringot Debata. Songon boru-boru na so hasea, ndang setia agama palsu tu Debata ala parsidohot tu politik. Kejam jala holan hepeng do na diharingkothon nasida. Godang do muse halak na mate dibahen agama palsu on, dohot ma i angka naposo ni Debata. (Pgk. 19:2) Songon dia do cara ni Jahowa laho mangaripashon Babel na Balga?

11. Ise do “binatang buas na rara songon api”, jala songon dia do Jahowa mamangke ibana laho mangaripashon Babel na Balga?

¹¹ Dipangke Jahowa do “sampulu tanduk” sian “binatang buas na rara songon api” laho mangaripashon “boru-boru na so hasea”. Binatang buas i manggombarhon Perserikatan  Bangsa-Bangsa. Jala sampulu tanduk, i ma sude pamarentaon na dohot tu Perserikatan Bangsa-Bangsa. Di tingki naung ditontuhon Debata, laho diserang nasida ma Babel na Balga. “Buaton ni nasida ma sude artana jala bahenon ni nasida ma ibana ndang marpangkean” marhite mambuat hamoraonna jala paboahon hajahatonna. (Pgk. 17:3, 16) Tompu do i masa songon “di bagasan sadari”. Alani i, tarsonggot ma angka na parsidohot tu agama palsu, tarlumobi ala sai didok Babel na Balga i, “Ratu do ahu, ndang sahalak na mabalu ahu jala ndang hilalaonku lungun ni roha.”​—Pgk. 18:7, 8.

12. Aha do na diulahon Jahowa tu naposona, jala boasa?

¹² Ndang paloason ni Jahowa naposona diripashon angka musu. Las do roha ni nasida gabe naposo ni Debata, jala dioloi nasida do parentana asa kaluar sian Babel na Balga. (Ul. 15:16, 17; Pgk. 18:4) Jala marsitutu do nasida mangurupi angka halak asa kaluar sian Babel na Balga. Alani i, tingki diripashon Babel na Balga i, ndang dohot naposona “hona uhum”. Alai ingkon tongtong do togu haporseaon ni nasida asa boi martahan mangadopi situasi na laho masa dungkon i.

13. (a) Ise do Gog i? (b) Hombar tu Hesekiel 38:2, 8, 9, andigan do dimulai porang Armagedon?

¹³ Serangan sian Gog. (Jaha Hesekiel 38:2, 8, 9.) Dung diripashon sude agama palsu, holan sada ma agama na adong di tano on, i ma organisasi ni Jahowa. Gabe muruk ma Sibolis alani i. Dibahen ibana ma “surirang na ramun” na mambahen marpungu angka pamarenta laho menyerang naposo ni Jahowa. (Pgk. 16:13, 14) Angka pamarenta na marpungu i, i ma ‘Gog na sian Magog’. Tingki diserang nasida naposo ni Jahowa, mulai ma porang Armagedon.​—Pgk. 16:16.

14. Aha ma na laho botoon ni Gog?

¹⁴ Dipangke Gog do angka pasukan militerna laho menyerang naposo ni Debata. (2 Kron. 32:8) Pos do rohanta tu Jahowa nang pe hira na so margogo hita diida nasida.  Dirimpu Gog jago do Babel na Balga i, hape ndang boi debatana i paluahon nasida sian “binatang buas” dohot sian “sampulu tanduk”! (Pgk. 17:16) Alani i, dirimpu Gog mura do laho mangaripashon naposo ni Debata. Jala diserang ma nasida “songon ombun laho manutup tano”. (Hes. 38:16) Alai botoon ni Gog ma, ndang boi nasida malua. Dos songon si Firaun tingki di Laut Rara, botoon ni Gog ma, Jahowa do na dialo nasida.​—2 Mus. 14:1-4; Hes. 38:3, 4, 18, 21-23.

15. Aha do na laho diulahon Jesus di Armagedon?

¹⁵ Paluaon ni Jesus dohot angka tentarana na di surgo ma naposo ni Debata. Alai ripashonon ni nasida ma angka pamarenta dohot pasukan militerna. (Pgk. 19:11, 14, 15) Aha do na laho masa tu Sibolis na margabus tu pamarenta na mambahen nasida gabe menyerang naposo ni Debata di Armagedon? Sampathonon ni Jesus ma Sibolis dohot angka suru-suruanna tu lombang na mansai bagas. Jala dirante ma nasida saleleng saribu taon.​—Pgk. 20:1-3.

16. (a) Songon dia hita patuduhon na ‘tatanda Debata’? (b) Di Armagedon, aha do na laho masa tu angka halak na mananda Jahowa?

¹⁶ Sadia leleng pe hita di hasintongan, ingkon tapatudu do na ‘tatanda Debata’ jala taoloi “barita na uli taringot tu Tuanta Jesus” asa boi malua di Armagedon. (2 Tes. 1:7-9) Na tatanda do Debata molo taboto angka aturanna, aha na dihalomohon dohot na so dihalomohon rohana. Jala tapatudu do muse na tatanda Ibana molo tahaholongi, taoloi jala tasomba Ibana. (1 Joh. 2:3-5; 5:3) Molo taulahon i sude, gabe “tandaon ni Debata do” hita. Lapatanna, las do roha ni Debata tu hita. (1 Kor. 8:3) Ujungna, gabe malua ma hita di Armagedon!

17. Aha do lapatanna “mangoloi barita na uli taringot tu Tuanta Jesus”?

¹⁷ “Barita na uli taringot tu Tuanta Jesus”, i ma sude hasintongan na diajarhon Jesus na adong di Bibel. Taoloi do barita na uli tingki taulahon i di ngolunta. Asing ni i, tajumolohon  do Harajaon ni Debata, mangihuthon sude prinsip ni Bibel, jala mamaritahon Harajaon ni Debata. (Mat. 6:33; 24:14) Jala, taurupi do angka halak Kristen na miniahan na mangulahon tanggung jawab na ringkot di organisasi.​—Mat. 25:31-40.

18. Songon dia do halak Kristen na miniahan mambalos haburjuon na hea dipatudu tu nasida?

¹⁸ Baloson ni halak Kristen na miniahan do haburjuon na hea dipatudu angka ‘biru-biru na asing’. (Joh. 10:16) Boasa didok songon i? Alana andorang so dimulai porang Armagedon, nunga diboan be sude 144.000 halak Kristen na miniahan tu surgo. Dohot do nasida gabe tentara na di surgo laho mangaripashon Gog jala manjaga “punguan bolon”. (Pgk. 2:26, 27; 7:9, 10) Mansai las do roha ni punguan bolon ala boi mangurupi angka halak Kristen na miniahan tingki di tano on dope nasida!

19-20. Nang pe mangadopi hasusaan, songon dia hita boi tongtong setia paima ro Armagedon?

¹⁹ Saleleng di ari parpudi, godang naposo ni Jahowa na mangadopi hasusaan. Nang pe songon i, boi do hita martahan ala marlas ni roha. (Jak. 1:2-4) Sada cara na boi mangurupi hita, i ma tongtong martangiang. (Luk. 21:36) Asing ni i, ingkon ringgas do hita marsiajar Bibel jala mangarimangi na taparsiajari, dohot ma i angka surirang na laho masa. (Ps. 77:13) Angka ulaon i dohot ulaonta marbarita, boi patoguhon haporseaon dohot pangkirimonta!

²⁰ Bayangkon ma las ni rohamuna tingki ndang adong be Babel na Balga jala nunga sae Armagedon! Alai na rumingkot, las hian do rohamuna tingki sude halak pabadiahon goar ni Jahowa jala unduk tu Ibana! (Hes. 38:23) I do alana boasa Armagedon i sada barita na uli tu angka halak na mananda Debata, na mangoloi Jesus dohot na martahan sahat ro di ujung.​—Mat. 24:13.