1-3. Aha do hirahira na masa tu si Euodia dohot si Sintike? Songon dia do hita boi pasidingkon parsoalan sisongon i? (Ida gombar di mula ni parsiajaran.)

TAIHUTHON do poda di Bibel, ala taboto Hata ni Debata do i. Di Bibel, dipaboa do poda na mangurupi hita pasidingkon parsoalan jala paturehon parangenta. Songon dia do hita maradophon poda i? Pingkirhon ma dua borua na miniahan di abad na parjolo, si Euodia dohot si Sintike. Didok di Bibel, marsoal do nasida, alai ndang dipaboa aha alana. Tarimangi ma aha do hirahira na masa.

² Ra, ditogihon si Euodia do pigapiga dongan sahaporseaonna mangan di jabuna. Alai ndang ditogihon ibana si Sintike. Tingki dibege si Sintike taringot i, gabe sogo ma rohana. Ra, songon on ma didok roha ni si Sintike, ’Boasa ndang ditogihon si Euodia ahu? Hurimpu do aleale na burju ibana.’ Didok roha ni si Sintike, ndang lomo roha ni si Euodia tu ibana jala dipasiding do ibana. Alani i,  ditogihon si Sintike ma pigapiga dongan sahaporseaon i, alai ndang dohot si Euodia! Ra, on pe mambahen angka dongan na asing di huria marsogo ni roha. Dipaboa di Bibel, diurupi si Paulus do nasida na dua asa mardame. Ditangihon nasida do si Paulus jala tongtong marlas ni roha manomba Jahowa.—Plp. 4:2, 3.

³ Saonari, adong do sipata parsoalanta dohot dongan sahaporseaon. Molo taihuthon poda sian Bibel, boi do tapasae parsoalan i. Sasintongna, boi do hita pasidingkon parsoalan. Molo unduk hita tu poda sian Bibel, on patuduhon na taihuthon jala taargai do Hata ni Jahowa.—Ps. 27:11.

4, 5. Aha do poda sian Bibel taringot mangorom diri asa unang muramura muruk?

⁴ Ndang mura mangorom diri asa unang muruk. Ra, muruk situtu do hita molo adong na mambahen na so denggan manang mangarehei hita alani hasomalanta dohot penampilanta. Jala, lam hansit do rohanta molo dongan sahaporseaonta na mangarehei hita. Aha do poda sian Hata ni Debata na boi mangurupi hita?

⁵ Diboto Jahowa do aha na boi masa molo sasahalak muramura muruk. Tingki muruk, olo do taulahon manang tadok hata na so denggan, alai gabe tasolsoli muse. Di Bibel, dipaboa Jahowa do cara asa unang muramura muruk, ”Unang girgir roham mangoloi piripirion.” Rimangi ma sadia godang parsoalan na tapasiding molo taihuthon poda on jala ndang muramura muruk! (Jaha Parjamita 7:9; Poda 16:32.) Didok di Bibel, tasalpuhon ma hasalaan ni halak. Jesus mandok, molo ndang tasalpuhon hasalaan ni halak, Jahowa pe ndang olo manalpuhon hasalaanta. (Mat. 6:14, 15) Marsitutu do hamu asa sabar jala rade manalpuhon hasalaan?

6. Aha do na boi masa molo muramura hita muruk?

⁶ Molo muramura do hita muruk, boi do hita gabe marsogo ni roha tu sasahalak. On pe boi mambahen donganta na di huria mangkilala na sarupa. Nang pe ndang tapatudu na muruk hita manang marsogo ni roha, alai boi do i diboto halak sian bohinta. Gabe ndang olo jonok angka donganta tu hita. (Poda 26:24-26) Angka sintua mangurupi hita marhite Bibel, asa unang muramura muruk jala rade manalpuhon hasalaan. (3 Mus. 19:17, 18; Rom 3:11-18) Molo diurupi sintua hita, olo do hita mangihuthon tudutudu sian Hata ni Jahowa?

7, 8. (a) Songon dia do Jahowa manguluhon naposoNa? (b) Tudutudu aha do na tadapot sian Bibel, jala boasa ingkon taihuthon i?

⁷ Diuluhon Jahowa do organisasiNa na adong di tano on jala diajari do nasida. Songon dia carana? Nunga dipillit Ibana be Kristus gabe ”ulu ni huria”, jala Kristus nunga mamillit ”naposo haposan jala na marroha” asa mangajari dohot manogunogu naposo ni Debata. (Eps. 5:23; Mat. 24:45-47) Songon punguan na mangaradoti organisasi di  abad na parjolo, nasida pe mangihuthon Hata ni Debata. (Jaha 1 Tessalonik 2:13.) Tudutudu aha do na tadapot sian Bibel?

⁸ Bibel paboahon asa ringgas hita ro tu ganup parpunguan. (Heb. 10:24, 25) Dijujui do hita sude mangkaporseai ajaran ni Bibel na sarupa. (1 Kor. 1:10) Dipaboa tu hita, ”Sai jumolo ma lului hamu harajaon ni Debata.” (Mat. 6:33) Bibel paboahon asa marbarita hita sian jabu tu jabu, di inganan na ribur, manang didia pe hita. (Mat. 28:19, 20; Ul. 5:42; 17:17; 20:20) Dijujui do angka sintua manjaga huria asa tongtong badia. (1 Kor. 5:1-5, 13; 1 Tim. 5:19-21) Dipaboa muse asa tongtong badia parniulaonta dohot pamingkirionta, jala pasidingkon angka ulaon na dihasogohon Jahowa.—2 Kor. 7:1.

9. Ise do na dipillit Jesus laho mangurupi hita mangantusi Bibel?

⁹ Adong na mandok, ndang porlu halak na asing laho patorangkon Bibel tu nasida. Alai mulai sian taon 1919, nunga dipillit Jesus ”naposo haposan jala na marroha” mangurupi naposo ni Debata mangantusi Bibel jala mangihuthon i. Molo taihuthon poda sian Bibel, hita manjaga huria tongtong badia, dame, jala marsada. Sungkun ma dirimuna, ’Marsihohot do ahu tu Jesus jala huihuthon do tudutudu sian naposo haposan?’

10. Songon dia do buku Hesekiel manggombarhon organisasi ni Jahowa na di surgo?

¹⁰ Ala marsiajar Bibel, gabe taboto ma naposo ni Jahowa di surgo pe denggan do diatur. Umpamana, diida si Hesekiel do Jahowa hundul di huretaNa na boi hatop marlojong tudia pe dihalomohon rohaNa. (Hes. 1:4-28) Hureta i manggombarhon organisasi ni Debata na di surgo, na pintor hatop mangihuthon tudutuduNa. On pe mangalehon pangkorhon na denggan tu organisasiNa di tano on. Pingkirhon ma angka penyesuaian na dibahen organisasi ni Debata di bagasan sampulu taon na parpudi on. Ingot ma, Jahowa do na mambahen i. Satongkin nai, disalpuhon Kristus dohot surusuruanna ma hajahaton. Ndang adong be na mangaleai manang mangalo Jahowa laho mamarenta tano on!

11, 12. Aha do naung dibahen organisasi ni Jahowa di tingki parpudi on?

¹¹ Pingkirhon ma angka ulaon ni organisasi ni Jahowa di tingki parpudi on. Ulaon pajongjongkon. Marratus dongan sahaporseaonta marhiras ni roha pajongjongkon kantor pusat na baru di Warwick, New York, AS. Marribu angka relawan di liat portibi on pajongjongkon Bale Harajaon dohot  kantor cabang. Angka relawan on ditugashon Departemen Rancang/Bangun Sedunia. Mandok mauliate do hita tu nasida na mangurupi ulaon on! Sude naposo ni Jahowa mangalehon pangurupion di parhepengon tu ulaon on. Dipasupasu Jahowa do naposoNa ala serep rohanasida jala marsihohot tu Ibana.—Luk. 21:1-4.

¹² Pangajarion. Lomo do roha ni Jahowa mangajari naposoNa. (Jes. 2:2, 3) Pingkirhon ma angka singkola na diparade organisasi. Adong do Singkola Dinas Perintis, Singkola tu Parbarita Harajaon, Singkola Gilead, Singkola Dinas Betel, Singkola tu Pengawas Wilayah dohot Tungganeboruna, Singkola tu Sintua di Huria, Singkola Pangkobasion tu Harajaon, dohot Singkola tu Anggota Panitia Cabang dohot Tungganeboruna. Di situs web jw.org, boi do tadapot Bibel dohot angka publikasi di marratus bahasa. Di situs web on, adong do bagian tu dakdanak dohot tu keluarga, jala adong do bagian na baru. Dipangke hamu do jw.org tingki  marbarita dohot tingki panombaon na sasaripe?

13. Aha do tanggung jawab ni naposo ni Jahowa?

¹³ Hak na sumurung do boi dohot di organisasi ni Jahowa, jala mamboto na dihalomohon Ibana! Ala taboto aha na pasonangkon Debata, martanggung jawab do hita unduk tu Ibana jala mangulahon na denggan. Nang pe halak mangulahon na jahat, tatiru ma Jahowa na mandok, ”Sai hagigihon hamu ma na jat!” (Ps. 97:10) Unang tatiru halak na mandok, ”Na jat denggan do i, jala tu na denggan na jat do i.” (Jes. 5:20) Asa las roha ni Jahowa, marsitutu ma hita asa badia. (1 Kor. 6:9-11) Marlaba do sude na dipaboa Jahowa di Bibel. Tahaholongi do Ibana jala marsihohot tu Ibana. Alani i ma olo hita mangihuthon tudutuduNa di jabu, di huria, di parkarejoan, di singkola, manang didia pe hita. (Poda 15:3) Pingkirhon ma tingki sadihari hita porlu marsihohot tu Debata.

14. Songon dia do natuatua marsihohot tu Jahowa?

¹⁴ Cara mangalatik ianakhon. Di Bibel, dipaboa Jahowa do tu natuatua cara mangalatik ianakhon. Ingkon manat do halak Kristen asa unang mangihuthon pamingkirion ni portibi on. (Eps. 2:2) Umpamana di pigapiga inganan, olo do ra angka ama mandok, ’Borua do na mangajari ianakhon.’ Alai, tangkas do Bibel manogihon angka ama asa mangajari ianakhonna taringot Jahowa. (Eps. 6:4) Natuatua na mangkaholongi Jahowa mangkalomohon asa solhot ianakhonna tu Jahowa, songon si Samuel tingki dakdanak.—1 Sam. 3:19.

15. Songon dia do hita marsihohot tu Jahowa tingki laho mambahen keputusan?

¹⁵ Cara mamillit na denggan. Andorang so mambahen keputusan, ingkon taboto do songon dia pamingkirion ni Jahowa asa marsihohot hita tu Ibana. Bibel dohot organisasiNa mangurupi hita. Umpamana, adong do natuatua na laho tu negara na asing jala mangalehon ianakhonna asa dijaga keluargana. Dibahen nasida pe i, asa boi do nasida karejo jala marhepeng. Tutu do, nasida na mambahen keputusan. Alai porlu do nasida manungkun diri sandiri, ’Songon dia do pangkilalaan ni Jahowa molo hubahen songon on?’ (Jaha Rom 14:12.) Marbisuk do hita molo tapingkirhon na didok Bibel andorang so mambahen keputusan taringot keluarga dohot parkarejoan. Tahaporluhon do pangurupion ni Jahowa, ala ndang boi hita manontuhon dalanta sandiri.—Jer. 10:23.

16. Aha do na diulahon sahalak ina tingki tubu ianakhonna? Aha do na mangurupi ibana mamillit na denggan?

 ¹⁶ Dung pinda sada natuatua tu luat na asing, tubu ma ianakhonna, jala lomo rohanasida asa ompungna manjaga dakdanak i. Alai di tingki i, tungganeboruna marsiajar Bibel dohot Sitindangi Ni Jahowa. Diboto ibana, tanggung jawabna do mangajari ianakhonna taringot Jahowa. (Ps. 127:3; Poda 22:6) Martangiang ma ibana tu Jahowa, jala mangido pangurupion asa boi ibana mangulahon na sintong. (Ps. 62:8, 9) Dipaboa ibana do parsoalanna tu donganta borua na mangurupi ibana marsiajar Bibel dohot tu angka na asing di huria. Nang pe keluarga dohot donganna manjujui ibana mangalehon ianakhonna asa dijaga ompungna, alai ndang olo ibana mangulahon i. Diparrohahon tungganedolina ma songon dia angka dongan sahaporseaon mangurupi tungganeboruna dohot ianakhonna. Las situtu rohana, gabe marsiajar Bibel ma ibana jala rap marpungu dohot keluargana. Pingkirhon ma las ni roha ni donganta borua on, tingki diboto ibana na dialusi Jahowa do tangiangna!

17. Tingki marsiajar Bibel dohot sasahalak, tudutudu aha do na ingkon taihuthon?

¹⁷ Cara mangihuthon tudutudu. Molo marsihohot hita tu Debata, taihuthon do tudutudu sian organisasiNa. Umpamana, pingkirhon ma na porlu taulahon dung mamparsiajari buku Aha do na Diajarhon Bibel tu Hita? dohot sasahalak. Dipaboa do tu hita asa taulas taringot organisasi ni Jahowa dohot ibana saleleng pigapiga minut, dungkon sae ganup parsiajaran. Boi do tapangke video Aha do na Dipatupa di Bale Harajaon? dohot brosur Ise do na Mangulahon Lomo ni Roha ni Jahowa Saonari On? Dung sae mamangke buku Na Diajarhon tu Hita, taurupi ma parsiajar Bibel i lam ”togu marhaporseaon” mamangke buku Tongtong ma di Bagasan Holong ni Roha ni Debata, nang pe nunga tardidi ibana. (Kol. 2:7) Diihuthon hamu do tudutudu on na sian organisasi ni Jahowa?

18, 19. Aha do na mambahen hita ingkon mandok mauliate tu Jahowa?

¹⁸ Godang do na mambahen hita ingkon mandok mauliate tu Jahowa! Umpamana, ”di bagasan Ibana do hita mangolu”. (Ul. 17:27, 28) Ibana pe mangalehon HataNa, i ma Bibel. Songon halak Kristen di Tessalonik, marlas ni roha do hita ala boi mamboto Hata ni Debata.—1 Tes. 2:13.

¹⁹ Bibel mangurupi hita jonok tu Jahowa, jala Ibana pe nunga jonok tu hita. (Jak. 4:8) Mandok mauliate do hita ala ditogihon Jahowa hita dohot tu organisasiNa! Sarupa ma pangkilalaanta songon panurat ni psalmen, ”Mandok mauliate ma hamu tu Jahowa, ai pardengganbasa do Ibana, ai ro di salelenglelengna do asi ni rohana.” (Ps. 136:1) Di ganup ayat di psalmen i, jotjot do disurat ”ai ro di salelenglelengna do asi ni rohana”. Molo marsihohot tu Jahowa jala taihuthon tudutudu sian organisasiNa, dilehon ma tu hita ngolu salelengna jala ndang tadingkononNa hita!