Pos do rohanta na laho masa sude janji ni Debata? Diparhatutu Jesus do i jala pangajarionna patoguhon haporseaon ni angka na manangihon ibana. Parrohahon ma tudosan na dipaboa ibana tingki marjamita di dolok, na disurat di Mateus 5:18, Bibel siganup ari, ”Na tutu do on! Ndang boi mago nanggo sada hurup manang sada titik pe sian patik i, ingkon sude do i saut andorang so marujung nasa na adong.”

Huruf na umgelleng sian hata Heber, i ma י (yod), na parjolo sian Tetragramaton, goar ni Debata, i ma Jahowa. * Asing ni Hata dohot Patik ni Debata, porsea do halak Parise dohot siboto surat molo ’sada titik pe sian patik i’ mansai ringkot.

Didok do di Bibel, manongtong do langit dohot tano on. (Psalmen 78:69) Jadi, boasa didok Jesus molo ganup hatorangan, nang pe saotik di Patik i ingkon digohi, nang pe salpu langit dohot tano on? Hata ni Jesus na mambahen longang roha on patangkashon, ndang adong nanggo saotik pe sian hatorangan di Patik i na so digohi.

Ringkot do di Debata hatorangan na saotik on? Tontu ringkot do. Parrohahon ma on: Didok do tu Halak Israel asa unang diponggolhon holiholi ni birubiru pelean Paskah. (2 Musa 12:46) Ra, holan hatorangan na jempek do i. Diantusi nasida do boasa ndang boi diponggolhon holiholi i nanggo sada pe? Ra, ndang diantusi. Alai, diboto Debata Jahowa do, hatorangan i surirang na laho masa tu Mesias, na so diponggolhon holiholina nanggo sada pe sahat tu na mate ibana di sada tiang.​—Psalmen 34:21; Johannes 19:31-33, 36.

Parsiajaran aha do na tadapot sian hata ni Jesus on? Pos ma rohanta, ingkon saut do sude janji ni Debata Jahowa, ro di ganup hatorangan na saotik pe. Pos situtu do rohanta tu huruf na umgelleng sian hata Heber on!