Sahalak pakar kesehatan mental na margoar Dr. Rick Hanson mandok, ‘Boi do sude jolma patuduhon roha sapangkilalaan.’ Roha sapangkilalaan, i ma boi mangkilala na dihilala halak na asing. Jala halak sisongon i, jotjot do didok di rohana, “Boha do molo masa tu ahu songon na dihilalana i?”

RIMANGI MA: Boasa boi jolma mangkilala na dihilala donganna? Didok di Bibel, ditompa Debata do jolma suman tu Ibana. (1 Musa 1:26) Ala ditompa hita suman tu Debata, boi ma tatiru jala taulahon angka parange ni Debata. Jadi tingki sasahalak patuduhon roha sapangkilalaan jala mangurupi donganna, on patuduhon na ditiru ibana do holong ni roha ni Debata.​—Poda 14:31.

Ndang lomo roha ni Debata mangida hita susa jala lungun do rohana molo masa sisongon i. Umpamana, tingki diparhatoban halak Israel di Mesir jala tingki 40 taon nasida di padang pasir, dipaboa do di Bibel songon dia pangkilalaan ni Debata. Didok, ‘Di nasa sitaonon ni nasida, dohot do [Debata] mangkilala i.’ (Jesaya 63:9) Jadi Debata ndang holan mangida hasusaan ni nasida. Dohot do Ibana mangkilala i. Didok Debata do, “Nunga tangkas huboto hinahansit ni sitaononnasida.” (2 Musa 3:7, Bibel siganup ari) Didok Debata muse, “Ai manang ise na mamungkul hamu, na mamungkul matangKu do i.” (Sakaria 2:8, Bibel siganup ari) Jadi tingki hansit tahilala alani pambahenan ni halak, dohot do Debata mangkilala i.

Olo do ra didok rohanta ndang patut hita mandapot asi ni roha ni Debata. Alai didok di Bibel, “Umbalga do Debata sian rohanta jala diboto ibana do saluhutna.” (1 Johannes 3:19, 20) Umbotoan do Debata taringot dirinta sian hita sandiri. Diboto Debata do sude na masa tu hita, na tapingkiri, dohot na tahilala. Boi do dihilala Ibana manang aha pe na masa tu hita.

 Angka Ayat na paposhon rohanta

• ‘Dung i joujou ma ho, jadi alusan ni Jahowa ma ho; tingki tangis ho, gabe dohononna ma: Ida ma, dison do ahu!’​—JESAYA 58:9.

• “Ai nunga tangkas huboto sangkap angka na husangkapi taringot tu hamu, ninna Jahowa, sangkap hasonangan do tahe ndada tu hamagoan, asa ahu mangalehon tu hamu ujung na hinalungunhonmuna. Jadi pajoujouonmuna ma ahu, huhut laho hamu martangiang tu ahu, gabe tangihononku ma hamu.”​—JEREMIA 29:11, 12.

• “Diparrohahon Ho do angka iluilungku. Ndang naung disurati Ho i di bukuM?”​—PSALMEN 56:9, Bibel siganup ari.

Nunga taboto, dihilala Debata do na tahilala. Alai, boha do molo masa hasusaan tu hita? Parrohahon ma pengalaman ni si Maria:

“Mansai borat do sitaononku. Alana, marsahit kanker do anakku saleleng dua taon. Ujungna mate do ibana tingki marumur 18 taon. Muruk do ahu tu Jahowa, alana ndang dipamalum Ibana anakki!

“Onom taon dungkon i, hupaboa ma pangkilalaanku tu donganku sahuria. Burju do ibana. Hudok tu ibana, ndang holong roha ni Jahowa tu ahu. Sabar do donganki manangihon ahu sampe marjom-jom. Dung i, dipaboa ibana ma 1 Johannes 3:19, 20 na mandok, ‘Umbalga do Debata sian rohanta jala diboto ibana do saluhutna.’ Dipapos ibana do rohangku, diantusi Jahowa do angka sitaonon na tahilala.

“Nang pe songon i, sai naeng muruk do ahu tu Jahowa! Alai hujaha ma Psalmen 94:19 na mandok, ‘Di hinadeak ni holso ni rohangku di bagasan, sai dipasabam angka pangapoim do tondingku.’ Pas hian do huhilala ayat on tu ahu! Dung i, hupaboa ma sude na di rohangku tu Jahowa. Pos do rohangku, ditangihon Ibana do ahu jala diantusi do pangkilalaanku.”

Tontu, las do rohanta mamboto na diantusi Debata do angka na masa di ngolunta jala dohot do Ibana mangkilala i! Alai, boasa ma gok hasusaan saonari? Na diuhum Debata do hita molo masa hasusaan tu hita? Sai dipasombu Debata do masa hasusaan on salelengna? Dialusi ma sungkun-sungkun on di halaman na mangihut.