“Ale sitangihon tangiang! Tu Ho do ro nasa sibuk.”​—Psalmen 65:3.

Adong na mandok, martangiang boi mambahen lubbang pakkilalaan ni nasida, nang pe dang porsea nasida adong do na manangihon tangiangna i. Alai martangiang dang holan lao mambahen lubbang pakkilalaanta. Didok Bibel do tu hita, “Donok do Jahowa * di sude angka na manjou Ibana, tongon tahe di sude angka na manjou Ibana di bagasan hasintongan. . . . dibege do angguknasida i.”​—Psalmen 145:18, 19.

Alani i, boi do pos rohatta ditangihon Jahowa do tangiang ni akka halak na manomba Ibana. Ai didok Ibana do, “Jadi pajoujouonmuna ma ahu, huhut laho hamu martangiang tu ahu, gabe tangihononku ma hamu.”​—Jeremia 29:12.

“Tongtong ma martangiang.”​—Rom 12:12.

Didok do di Bibel, asa “sai martangiang” hita huhut “pasahathon marragam tangiang dohot pangidoan ganup tingki”. Takkas ma dipangido Debata Jahowa do asa martangiang hita tu Ibana.​—Mateus 26:41; Epesus 6:18.

Boasa dipangido Debata asa martangiang hita tu Ibana? Pikkirhon ma on, adong do natua-tua na so lomo rohana mambege gellengna mandokkon, “Tolong jo urupi au Bapa!” Sasittongna diboto Bapakna i do aha na dihaporluhon gellengna jala songon dia pakkilalaan ni gellengna. Alai tikki dibege ibana pangidoan ni gellengna, on patuduhon na pos do roha ni gellengna i tu ibana jala dang mabiar gellengna i tu ibana. Suang songon i ma tikki martangiang hita tu Debata Jahowa, on patuduhon na pos do rohatta tu Ibana jala na lomo rohatta gabe ale-alena.​—Poda 15:8; Jakobus 4:8.

“Pasahat hamu ma sude holso ni rohamuna tu Ibana, ai disarihon do hamu.”​—1 Petrus 5:7.

Holong do roha ni Debata tu hita jala parduli do Ibana tu hita. Alani i ma dipangido Ibana hita asa martangiang tu Ibana. Diboto Ibana do aha na tapikkiri dohot arsak ni rohatta jala lomo do rohana mangurupi hita.

Saleleng ngolu ni Raja Daud, sai martangiang do ibana tu Debata Jahowa. Martangiang do ibana tikki mangido asa diurupi jala tikki paboahon pakkilalaanna. (Psalmen 23:1-6) Ala holong roha ni Debata tu si Daud, ditangihon Ibana do tangiangna. (Ulaon ni Apostel 13:22) Suang songon i ma ditangihon Debata do tangiangta, ai parduli do Ibana tu hita.

On ma sada sian hata ni panurat psalmen. Pos do rohana na ditangihon Debata do tangiangna. Jala marguna do tangiangna i tu ibana. Marhite tangiang i, boi ma ibana lam jonok tu Debata. Jala boi ma gabe margogo ibana tikki marsak manang tikki marlungun ni roha.​—Psalmen 116:1-9.

Molo pos rohatta na ditangihon tangiangta, gabe olo ma hita toktong martangiang tu Debata. Songon i ma na dihilala si Pedro na tinggal di Spanyol sebelah utara. Mate marlanggar anakna na marumur 19 taon. Gabe lungun ma rohana. Tikki lungun rohana, dipaboa ibana ma lungun ni rohana i tu Debata. Jala jotjot ma ibana martangiang asa boi tarapul rohana jala margogo. Didok si Pedro, “Dialusi Jahowa do tangiakku. Gabe tarapul do rohakku jala gabe margogo do au, ala diurupi istrikku dohot dongan sahaporseaon.”

Nang pe dang gabe hehe anakna i alani tangiangna i, alai godang do guna ni tangiangna i tu si Pedro dohot tu keluargana. Didok istrina si María Carmen, “Tikki lungun rohakku gabe sabar ma au ala martangiang. Huboto ma diattusi Jahowa do pakkilalaanku. Alana molo dung sae au martangiang, gabe dame ma pakkilalaanku jala tenang ma pikkiranku.”

Sian hata na disurat di Bibel dohot sian pengalaman ni godang halak patuduhon, boi do pos rohatta na ditangihon Debata do tangiangta. Alai dang sude tangiang dialusi Debata. Boasa songon i?