1-2. Aha do na dipaboa sada suru-suruan tu akka borua di kuburan ni Jesus, jala aha do tudu-tudu na dilehon Jesus tu nasida?

PARROHAHON ma na masa di manogot ni 16 Nisan taon 33 M. Lao ma piga-piga borua na setia jala na marhabot ni roha tu kuburan. Lobi sian 36 jam andorang so i, dikubur do bakke ni Jesus disi. Naeng diusehon akka borua i do rempah-rempah dohot miak na angur tu bakke ni Jesus. Alai dung sahat nasida di kuburan i, tarsonggot ma nasida ala nungnga kosong kuburan i! Dipaboa sada suru-suruan ma tu nasida naung dipahehe Jesus. Dung i didok suru-suruan i ma, “Nunga dijoloani ibana hamu tu Galilea. Idaonmuna do ibana disi.”​—Mat. 28:1-7; Luk. 23:56; 24:10.

² Dung lao akka borua i sian kuburan, didapothon Jesus ma nasida jala dilehon ma tudu-tudu, “Laho ma hamu, paboa ma tu angka haha anggingku asa ro tu Galilea jala idaon ni nasida ma ahu disi.” (Mat. 28:10) Dung dipahehe Jesus, na parjolo sahali diulahon ibana, i ma manjuppangi akka siseanna. Di tikki i, dilehon Jesus do akka tudu-tudu na massai rikkot!

3-4. Boasa boi tadok paretta ni Jesus na disurat di Mateus 28:19, 20 dang holan diparettahon tu akka apostel? (Ida gambar sampul.)

³ Jaha Mateus 28:16-20. Tikki pajuppang dohot akka siseanna, dipaboa Jesus do taringot sada ulaon na ikkon diulahon nasida di tikki i. Jala on ma na taulahon saonari. Didok Jesus, “Alani i, laho ma hamu, bahen ma saluhut halak sian nasa bangso gabe siseanku. . . . Ajari hamu ma nasida mangulahon sude naung huparentahon tu hamu.”

 ⁴ Diparettahon Jesus do sude siseanna asa lao marbarita. Dang holan 11 apostelna na mangulahon i. Boasa boi tadok songon i? Alana tikki dilehon Jesus paretta asa mambahen sisean, dang holan akka apostelna i na adong di dolok di Galilea tikki i. Sian dia taboto? Ingot ma na didok suru-suruan tu akka borua i, “Idaonmuna do ibana [di Galilea].” Alani i, dohot do akka borua i manjuppangi Jesus di tikki i. Alai dang holan nasida. Didok apostel Paulus, dipatuduhon Jesus “do muse dirina tu lobi sian 500 halak dongan sahaporseaon na marpungu di sada inganan”. (1 Kor. 15:6) Didia ma i?

5. Aha do na boi taboto taringot hatorangan di 1 Korint 15:6 dohot Mateus bindu 28?

⁵ Boi do tadok hatorangan di 1 Korint 15:6 paboahon situasi na masa di Galilea na disurat di Mateus bindu 28. Boasa? Na parjolo, alana halak Galilea do godangan sisean ni Jesus. Alani i gabe mura do Jesus marpungu dohot godang halak di dolok di Galilea sian apala marpungu di sada jabu di Jerusalem. Na paduahon, dung dipahehe, nungnga pajuppang Jesus dohot 11 apostelna di sada jabu di Jerusalem. Molo holan tu 11 apostelna i diparettahon lao marbarita dohot mambahen sisean, tontu paboaon ni Jesus do i tikki di Jerusalem. Dang porlu suruonna akka apostelna, akka borua na di kuburan i, dohot sisean na asing asa manjuppangi ibana di Galilea.​—Luk. 24:33, 36.

6. Boasa paretta na disurat di Mateus 28:20 marlangku di tikkitta saonari, jala songon dia akka halak mangoloi i?

⁶ Na patoluhon, paretta lao mambahen sisean dang holan ditugashon Jesus tu halak Kristen di abad na parjolo. Sian dia taboto? Dung dipaboa Jesus paretta i, didok ibana tu akka siseanna, “Sai na dongananku do hamu sahat tu panutup ni jaman on.” (Mat. 28:20) Songon na didok Jesus, saonari godang halak na mambahen sisean. Buktina, ganup taon adong hira-hira 300.000 halak na gabe sisean ni Jesus jala tardidi gabe Sitindangi Ni Jahowa!

7. Aha do na lao taulas, jala boasa?

⁷ Godang do halak na marsiajar Bibel mambahen hamubaon jala ujungna tardidi. Alai adong piga-piga parsiajar Bibel na mabiar gabe sisean ni Jesus. Lomo do roha ni nasida marsiajar Bibel, alai dang olo nasida tardidi. Tontu lomo do rohatta sude mangurupi parsiajar Bibelta asa mangulahon na diparsiajari jala gabe sisean ni Jesus. Di parsiajaran on, lao taulas ma songon dia hita boi mangurupi parsiajar Bibelta asa makkaholongi Jahowa jala patoguhon parale-aleonna tu Ibana. Boasa porlu taulas taringot on? Alana sipata ikkon tabahen do keputusan, porlu dope tatorushon mangurupi sasahalak marsiajar Bibel manang na dang.

8. Sipata, boasa maol mangurupi parsiajar Bibelta asa makkaholongi Jahowa?

⁸ Lomo do roha ni Jahowa asa tasomba Ibana alani holong. Alani i, ikkon taurupi do parsiajar Bibelta asa mangattusi na disarihon Jahowa do nasida ganup marsada-sada. Jala na massai holong do roha ni Debata tu nasida. Asing ni i, taurupi ma nasida asa makkilala molo Jahowa i songon ama “na mangaramoti angka na so marama so marina dohot mangondihon angka na mabalu”. (Ps. 68:6, Bibel siganup ari) Tikki diboto parsiajar Bibelmuna holong ni Jahowa, gabe lam holong ma roha ni nasida tu Ibana. Ra, adong do piga-piga parsiajar Bibel na maol makkilala molo Jahowa i songon Ama parholong, ala dang hea nasida dihaholongi bapakna.  (2 Tim. 3:1, 3) Alani i, tikki manguluhon parsiajaran Bibel, patorang ma taringot akka parange ni Jahowa na massai denggan. Urupi ma parsiajar Bibelmuna mangattusi na lomo do roha ni Debata asa dapot ni nasida hangoluan salelengna, jala rade do Ibana mangurupi nasida. Aha do muse na boi taulahon?

9-10. Bukku aha do na tapakke tikki manguluhon parsiajaran Bibel, jala boasa?

⁹ Pakke ma bukku “Aha do na Diajarhon Bibel tu Hita?” dohot “Tongtong ma di Bagasan Holong ni Roha ni Debata.” Akka publikasi i dibahen lao mangurupi parsiajar Bibelta asa makkaholongi Jahowa. Umpamana, di pasal 1 bukku Na Diajarhon Bibel tu Hita, dialusi do sukkun-sukkun songon: Disarihon Debata do hita manang na so parduli do Ibana tu hita? Songon dia do pakkilalaan ni Debata mangida hasusaatta? Boi do hamu gabe ale-ale ni Jahowa? Suang songon i muse taringot bukku Holong ni Debata. Publikasi on mangurupi parsiajar Bibel asa mangattusi songon dia carana mangulahon prinsip ni Bibel na boi mambahen lam denggan ngolu ni nasida  jala asa lam jonok tu Jahowa. Nang pe nungnga dipakke hamu bukku i dohot parsiajar Bibel na asing, porlu do hamu mambahen persiapan muse. Jala pikkirhon ma aha na dihaporluhon ganup parsiajar Bibelmuna.

¹⁰ Ra, lomo roha ni parsiajar Bibelmuna mangulas sada topik na adong di publikasi na so tarmasuk sian Akka Alat Lao Mangajari. Molo songon i, boi do dijujui hamu nasida asa dijaha sandiri publikasi i, jala toktong ma pakke bukku Na Diajarhon Bibel tu Hita manang Holong ni Debata.

11. Andigan do hita mamukka parsiajaran Bibel dohot tangiang, jala songon dia hita patorangkon na rikkot do martangiang?

¹¹ Pukka ma parsiajaran Bibel dohot tangiang. Dung piga-piga minggu mulai marsiajar Bibel, dumenggan do molo tapukka jala tapaujung parsiajaran i marhite tangiang. Urupi ma parsiajar Bibelta asa diboto nasida holan marhite tondi parbadia do hita boi mangattusi Hata ni Debata. Piga-piga dongatta patorangkon rikkot ni martangiang marhite mangulas Jakobus 1:5, na mandok, “Molo adong sian hamu na hurangan bisuk, tongtong ma i dipangido tu Debata.” Dung i disukkun ma parsiajar Bibel i, “Songon dia carana hita mangido bisuk ni Debata?” Tontu, satolop do parsiajar Bibel i na ikkon martangiang hita tu Debata.

12. Songon dia hamu mamakke ayat di Psalmen 139:2-4 lao mangurupi parsiajar Bibelmuna asa paboahon pakkilalaanna tu Jahowa marhite tangiang?

¹² Ajari ma parsiajar Bibelmuna carana martangiang. Papos ma roha ni nasida na lomo roha ni Jahowa manangihon tangiang sian ias ni roha. Patorang ma, tikki martangiang sahalakta, boi do tapaboa sude na adong di rohatta tu Ibana na so boi tapaboa tu halak na asing. Ingot ma, diboto Jahowa do aha na di bagas rohatta. (Jaha Psalmen 139:2-4.) Jala, boi do tajujui parsiajar Bibelta martangiang asa diurupi Debata pasidikkon pikkiran na sala dohot hasomalan na roa. Umpamana, ra lomo do roha ni parsiajar Bibelmuna tu perayaan sian agama palsu. Nungnga diboto ibana sala i, alai lomo dope rohana tu akka na adong di perayaan i. Jujui ma ibana asa paboahon pakkilalaanna tu Jahowa jala mangido asa diurupi makkalomohon na dihalomohon Debata.​—Ps. 97:10.

13. (a) Boasa ikkon tatogihon parsiajar Bibelta tu parpunguan? (b) Songon dia hita mangurupi parsiajar Bibelta asa unang maila ro tu parpunguan?

¹³ Togihon ma parsiajar Bibelmuna tu parpunguan. Sian na dibege dohot na diparrohahon parsiajar Bibelmuna di parpunguan, boi do i mangonjar rohana lao manomba Jahowa jala patoguhon parale-aleonna tu Ibana. Patudu ma video Aha do na Dipatupa di Bale Harajaon? dung i togihon ma ibana asa rap dohot hamu tu parpunguan. Molo porlu, boi do dialap hamu ibana. Asing ni i, marganti-ganti ma boan donganmu tikki mangurupi ibana marsiajar Bibel. Gabe boi ma ditanda ibana akka dongan di huria. Jala gabe dang maila be ibana ro tu parpunguan.

14. Aha do na mangonjar roha ni parsiajar Bibel asa patoguhon parale-aleonna tu Debata?

¹⁴ Tujuatta, i ma mangurupi parsiajar Bibelta patoguhon parale-aleonna tu Debata. (Eps. 4:13) Tikki olo sasahalak marsiajar Bibel, ra didok rohana boi do ibana mandapot laba sian parsiajaran i. Molo dung holong rohana tu Jahowa, tontu gabe taronjar do rohana lao mangurupi na asing, dohot ma i akka dongan di huria. (Mat. 22:37-39) Di tikki na pas, boi  ma dipaboa hamu tu ibana taringot hak istimewa lao mangalehon sumbangan tu ulaon marbarita.

15. Songon dia hita boi mangurupi parsiajar Bibelta tikki mangadopi parsoalan?

¹⁵ Ajari ma parsiajar Bibelmuna carana mangadopi parsoalan. Ra, nungnga gabe penyiar na so tardidi parsiajar Bibelmuna i. Didok ma tu hamu, haccit rohana dibahen sasahalak di huria. Unang ma pittor didok hamu ise na sittong dohot na sala. Alai paboa ma aha na didok Bibel na ikkon ulahononna. Ra, boi do pittor disalpuhon hasalaan ni donganta i. Molo dang pittor boi diulahon i, jujui ma ibana asa denggan makkatai tu donganta i lao mardame. (Bandikkon Mateus 18:15.) Urupi ma parsiajar Bibelmuna asa mamikkirhon aha na lao sidohononna. Patudu ma carana mamakke aplikasi JW Library^®, Tudutudu na Dipangke Sitindangi Ni Jahowa Laho Marsiajar, dohot jw.org^® lao mamboto carana pasaehon parsoalan. Molo nungnga tarlatik ibana pasaehon parsoalan dohot akka dongan di huria andorang so tardidi, gabe boi ma ibana denggan marale-ale dohot nasida dung tardidi.

16. Boasa denggan molo tatogihon dongatta na asing tikki manguluhon parsiajaran Bibel?

¹⁶ Tikki manguluhon parsiajaran Bibel, togihon ma dongan na asing manang pengawas wilayah tikki ro tu huriamuna. Boasa? Asing ni alasan naung taulas nakkin, boi do dongatta na asing mangurupi parsiajar Bibelmuna i. Ra, dang hea diadopi hamu situasi songon na diadopi parsiajar Bibelmuna i. Umpamana, marsitutu do parsiajar Bibelmuna i asa unang marisap be. Alai, maol dope ibana pasohon i. Molo ditogihon hamu Sitindangi na hea makkilala maol pasohon marisap alai ujungna marhasil, boi do ibana paboahon tu parsiajar Bibelmuna i songon dia carana pasohon hasomalan i. Molo dihilala hamu hurang pas do hamu na manguluhon parsiajaran Bibel di tikki i, boi do dipangido hamu asa dongatta na marpengalaman i na manguluhon. Gabe boi ma parsiajar Bibelmuna mandapot laba sian pengalaman ni akka dongan na asing. Ingot ma, tujuatta i ma mangurupi parsiajar Bibelta asa lam togu parale-aleonna tu Debata.

17-18. Aha do na ikkon dipikkirhon hamu andorang so pasohon parsiajaran Bibel?

¹⁷ Molo dang dibahen parsiajar Bibelmuna hamubaon, sukkun ma dirimuna, ‘Ikkon hupaso do parsiajaran i?’ Andorang so dibahen hamu keputusan, pikkirhon ma kemampuan ni parsiajar Bibelmuna. Alana adong do piga-piga halak na umleleng mambahen hamubaon marimbakkon na asing. Sukkun ma dirimuna: ‘Masuk akkal do leleng ni parsiajar Bibelhu mambahen hamubaon?’ ‘Olo do ibana “mangulahon” akka naung diparsiajari ibana?’ (Mat. 28:20) Ra, leleng do sahalak parsiajar Bibel asa boi gabe sisean ni  Jesus. Alai ikkon adong do hamubaon na dibahen ibana.

¹⁸ Alai aha do na ikkon taulahon molo nungnga leleng sasahalak marsiajar Bibel alai dang dipatuduhon na diargai ibana do akka naung diparsiajari? Bayakkon ma situasi on: Nungnga sae diparsiajari ibana bukku Na Diajarhon Bibel jala nungnga mulai mamparsiajari bukku Holong ni Debata, alai dang hea ro ibana tu parpunguan manang tu Borngin Parningotan! Jala jotjot ibana marsidalian asa unang marsiajar. Molo songon i do parsiajar Bibelmuna, takkas ma paboa hamu tu ibana. *

19. Aha do na boi disukkun hamu tu sasahalak na so mangargai naung diparsiajari ibana sian Bibel, jala aha do na porlu dipikkirhon hamu?

¹⁹ Boi do disukkun hamu tu parsiajar Bibelmuna, ‘Aha do ambat-ambat na umborat na dihilala hamu lao gabe Sitindangi Ni Jahowa?’ Ra olo do didok ibana, ‘Lomo do rohakku marsiajar Bibel, alai dang olo ahu gabe Sitindangi Ni Jahowa!’ Molo songon i alusna hape nungnga leleng ibana marsiajar Bibel, porlu dope torushononmuna parsiajaran i? Alai sipata, adong do parsiajar Bibel na pittor paboahon aha na mangambati ibana. Umpamana, ra didok rohana dang tolap ibana marbarita sian jabu tu jabu. Molo nungnga diboto hamu pakkilalaanna, gabe diattusi hamu ma carana mangurupi ibana.

20. Songon dia ayat di Ulaon ni Apostel 13:48 mangurupi hita manontuhon ise na taurupi marsiajar Bibel?

²⁰ Alai, adong do parsiajar Bibel na songon halak Israel di tikki ni si Hesekiel. Didok Jahowa tu si Hesekiel, “Songon sahalak parende do ho di nasida, parende na mangendehon ende taringot tu holong, na mansai tabo soarana jala malo marhasapi, dibege nasida do sude jamitam i alai tung so adong do diulahon.” (Hes. 33:32, Bibel siganup ari) Ra, maol do hita paboahon tu ibana boasa dang tatorushon be parsiajaran i. Alai, “otik nama tingkina”. (1 Kor. 7:29) Dumenggan do molo dang tatorushon parsiajaran Bibel dohot halak na so mambahen hamubaon. Ikkon talului do halak na asing na patuduhon ibana “tama mandapot hangoluan saleleng ni lelengna”.​—Jaha Ulaon ni Apostel 13:48.

21. Aha do ayat tahunan 2020, jala on mangurupi hita lao mangulahon aha?

²¹ Ayat tahunan 2020 mangurupi hita asa lam denggan di ulaon mambahen sisean. Taulahon ma paretta ni Jesus na dipaboa ibana tikki di dolok di Galilea, “Laho ma hamu, bahen ma saluhut halak . . .  gabe siseanku, didi hamu ma nasida.”​—Mat. 28:19.