1, 2. Aha do na maol na diadopi naposo ni Debata saonari? (Ida ma gombar di mula ni parsiajaran.)

JOTJOT do angka dokter dohot perawat jonok tu angka na marsahit. Sai rade do nasida laho mangubati angka na marsahit. Alai ingkon porlu do jagaon ni nasida dirina be, asa unang bali angka sahit i tu nasida. Dos songon i ma situasi ni Sitindangi Ni Jahowa saonari. Ganup ari, godang do sian hita na karejo dohot angka halak na patuduhon parange na roa, jala marimbar sian parange na dihalomohon Debata. Ndang mura laho mangadopi i.

² Di tingki parpudi saonari on, godang do angka halak na so mangkalomohon Debata, jala ndang olo mamboto uhumNa. Dipatorang apostel Paulus do angka parange ni nasida di bagasan suratna tu si Timoteus. Didok si Paulus, lam rarat do angka parange na roa on di tingki parpudi. (Jaha 2 Timoteus 3:1-5, 13.) Nang pe nunga taboto ndang denggan parange on, alai ingkon tajaga do dirinta asa unang taihuthon cara marpingkir, pangkataion dohot parniulaon ni nasida. (Poda 13:20) Di parsiajaran on, taida ma imbar ni parange na roa i sian angka parange ni  naposo ni Debata. Jala songon dia hita boi mangalinggomi dirinta asa unang mangihuthon parange i, nang pe ingkon taurupi angka halak laho mananda Jahowa.

3. Hombar tu 2 Timoteus 3:2-5, Songon dia do parange ni angka halak saonari?

³ Disurat si Paulus, masa do ”hasusaan, di angka tingki parpudi”. Dung i, disurat ibana ma muse taringot 19 parange na roa di angka halak saonari on. Dos do angka parange i tu na dipaboa si Paulus di Rom 1:29-31. Alai, angka parange na dipaboa tu si Timoteus ndang adong disurathon di buku na asing sian Kitab Junani Kristen. Didok si Paulus do molo angka parange on masa di angka ”jolma disi”. Alai ndang sude jolma marparange sisongon i. Asing do molo parange ni halak Kristen.​—Jaha Maleaki 3:18.

4. Aha do lapatanna parroha haginjangon?

⁴ Dung didok si Paulus molo parange ni angka halak holan mangkaholongi dirina dohot hepeng, didok ibana do muse, godang halak parhata manggang dohot parroha haginjangon. Dirimpu nasida, dumenggan do nasida sian na asing, ala nasida bagak, malo, mamora, jala diparsangapi halak. Adong do pigapiga halak ndang puas molo holan dipuji. Songon pandapot ni sahalak pakar, ”di bagas roha ni halak sisongon i lomo do nasida asa disomba”. Jala pigapiga halak na ginjang roha pe, ndang lomo rohana mangida halak na tong ginjang roha.

5. Songon dia do naposo ni Jahowa na burju hian boi gabe ginjang roha?

⁵ Sogo do roha ni Jahowa mangida na ginjang roha. Didok do di Bibel, halak na ”mata haginjangon” do na songon i. (Poda 6:16, 17) Sasintongna, ginjang ni roha boi mambahen sasahalak gabe dao sian Debata. (Ps. 10:4) Parange ni Sibolis do on. (1 Tim. 3:6) Alai, naposo ni Jahowa pe boi do gabe ginjang roha. Umpamana, saleleng martaontaon burju do Raja Usia. Alai didok Bibel, ”Dung marhuaso rajai, dipaginjang ma rohana mambahen hamagoanna; ai mardosa ibana dompak Jahowa.” Ditutung si Usia do daupa di bagas joro, hape sasintongna ndang tugasna i. Asing ni i, Raja Hiskia pe hea do gabe ginjang rohana.​—2 Kron. 26:16; 32:25, 26.

6. Aha do na mambahen si Daud tongtong marserep ni roha?

⁶ Pigapiga halak boi do gabe ginjang rohana ala uli manang bagak, ditanda godang halak, jago marmusik, gogo, manang ala dipuji angka halak. Sudena i adong do di diri ni si Daud, alai tongtong do ibana marserep ni roha. Sian dia taboto i? Tingki dibunu ibana si Goliat, dipangido Raja Saul ma asa gabe helana ibana. Alai didok si Daud, ”Tung ise ma ahu pola jala aha ngolungku pola nang pinompar ni damang di Israel, umbahen ingkon gabe hela ni rajai ahu?” (1 Sam. 18:18) Aha do na mambahen ibana tongtong marserep ni roha? Ala diboto ibana do molo sude parange dohot hapistaranna i boi didapot ibana, ala burju do Debata jala olo mamparrohahon ibana. (Ps. 113: 5-8) Jala diboto ibana do molo sude na denggan marharoroan sian Jahowa.​—Bandingkon 1 Kor. 4:7.

7. Aha do na mangurupi hita marserep ni roha?

⁷ Hita pe boi do marserep ni roha songon si Daud. Porlu taboto, molo Jahowa sandiri serep do rohaNa nang pe Ibana Natumimbul sian sasudena. Boi do taulahon songon na didok ayat on, ”Solukkon hamu ma parasirohaon situtu, habasaron, haserepon, lambok dohot lambas ni roha!” (Kol. 3:12) Ala taboto do, molo holong i mambahen sasahalak ndang gabe ginjang roha (1 Kor. 13:4) Molo serep rohanta, gabe taronjar do roha ni halak laho mananda Jahowa. Parange na denggan sian sahalak borua Kristen boi mangonjar roha ni tungganedolina laho mananda Jahowa. Suang songon i ma, boi do sasahalak gabe taronjar rohana laho jonok tu Debata molo tapatudu serep ni roha.​—1 Ptr. 3:1.

8. (a) Songon dia do godangan halak saonari mangida dakdanak na so mangoloi natorasna? (b) Aha do didok Bibel asa diulahon angka dakdanak?

⁸ Dipaboa si Paulus do songon dia halak maradophon halak na asing di tingki parpudi. Didok ibana, angka dakdanak gabe so mangoloi natorasna. Saonari, godang do angka film, buku, dohot acara tv na patuduhon ndang sala molo marparange sisongon i. Sasintongna, on boi mambahen keluarga gabe sursar. Sian najolo, nunga leleng diboto halak taringot on. Umpamana, najolo di halak Junani molo adong ianakhonna na mamungkul natuatuana boi do diusir ibana sian hutana. Alai di halak Rom, molo sasahalak mangulahon sisongon i, sarupa do uhum tu ibana dohot uhum tu sahalak pambunu. Disurat do di Bibel molo dakdanak ingkon mamparsangapi natuatuana.​—2 Mus. 20:12; Eps. 6:1-3.

9. Aha do na mangurupi angka dakdanak asa unduk tu natuatuana?

⁹ Aha do na mangurupi dakdanak asa unduk tu natuatuana, nang pe saonari nunga godang na so unduk be? Molo sai diingot nasida angka na denggan na dibahen natuatuana, tontu gabe taronjar do rohana asa mangargai jala unduk. Porlu do nasida mangantusi, dihalomohon Jahowa do asa nasida mangoloi natorasna. Tingki sahalak na poso paboahon haburjuon ni natuatuana, on mangurupi angka na poso na asing asa mangargai natuatuana. Alai, molo hira na so parduli do natuatuana tu ianakhonna, on mambahen maol di ianakhonna asa unduk. Sahalak dolidoli na margoar si Austin mandok, ”Sipata, ro do tu pingkiranku asa mangulahon na so denggan. Alai, tangkas do dipaboa natuatuangku boasa ingkon  taoloi aturan i. Jala denggan do i dipaboa nasida. Jadi mura ma ahu mangoloi nasida. Huboto do holong do nasida tu ahu. Jadi porlu do hubahen las rohanasida.”

10, 11. (a) Angka parange aha do na patuduhon halak saonari ndang mangkaholongi halak na asing? (b) Songon dia halak Kristen patuduhon molo nasida mangkaholongi halak na asing?

¹⁰ Dipaboa si Paulus do muse molo angka halak saonari ndang be mangkaholongi na asing. Dung i, dipaboa ibana do muse taringot angka halak na so mamboto mandok mauliate. Angka halak na songon on, ndang mangargai haburjuon na dibahen halak tu nasida. Didok si Paulus do muse nasida halak na tois. Ndang olo nasida mardame tu na asing. Angka panginsahi do nasida. Diparoaroa nasida do angka halak, songon i nang Debata. Jala lomo do rohanasida mandok na so sintong taringot halak. *

¹¹ Marimbar do naposo ni Debata sian angka halak di portibi on. Alana dipatudu nasida do holong tu na asing. Sasintongna, didok Jesus do hombar tu Patik ni si Musa, ingkon tahaholongi do angka dongan molo dung tahaholongi Debata. (Mat. 22:38, 39) Didok Jesus, ingkon ditanda halak do nasida halak Kristen marhite holong na dipatudu nasida tu na asing. (Jaha Johannes 13:34, 35.) Gariada, musu nasida pe ingkon dihaholongi do.​—Mat. 5:43, 44.

12. Songon dia do Jesus patuduhon holong tu halak na asing?

¹² Dipatudu Jesus do holongna tu angka halak. Olo do ibana marpindapinda tu sada kota tu kota na asing laho marbarita na uli. Dipamalum ibana do halak na mapitung, na pangpang, na marsahit kusta, na nengel. Jala dipahehe ibana do halak na mate. (Luk. 7:22) Dilehon ibana do ngoluna laho manobus jolma, nang pe adong na marsogo ni roha tu ibana. Mansai suman do Jesus maniru holong ni Amana. Saonari, di liat portibi on Sitindangi Ni Jahowa pe maniru Jesus do, jala dihaholongi nasida do halak na asing.

13. Songon dia holong na tapatudu, boi mangonjar roha ni halak laho mananda Jahowa?

¹³ Molo tapatudu holong tu na asing, gabe taronjar ma roha ni halak laho mananda Jahowa. Songon pengalaman ni sahalak baoa na tading di Thailand. Tingki ro ibana tu kebaktian regional, songgot do rohana mangida angka donganta na marsihaholongan. Dung mulak ibana sian kebaktian i, pintor dipangido do asa diurupi ibana marsiajar Bibel dohot Sitindangi Ni Jahowa dua hali saminggu. Marbarita na uli do ibana tu angka keluargana. Dung onom bulan, dapot tugas panjahaion Bibel ma ibana di parpunguan. Songon dia do molo hita? Tapatudu do holong tu halak na asing? Rimangi ma sungkunsungkun on, ’Marsitutu do ahu mangurupi keluargangku, angka dongan di huria, dohot halak tingki marbarita? Hutiru cara ni Jahowa mangida halak?’

14, 15. Angka parange na roa aha do muse na dipatudu angka halak saonari on? Jala Songon dia do godangan halak boi mambahen hamubaon?

¹⁴ Saonari on, ingkon tapasiding do angka halak na patuduhon parange na roa. I ma na sogo rohana di na denggan, na so boi mangarajai diri, parmurukmuruk, dohot parroha na neang manang si jogal rungkung. Ndang jolo dipingkiri nasida pangkorhonna molo diulahon nasida sisongon i.

¹⁵ Godang do halak na roa hian pangalahona najolo, alai boi do muba. Jala nunga dipaboa surirang on di Bibel. (Jaha Jesaya 11:6, 7.) Molo tajaha di ayat i, boi do mardame gompul dohot singa tu birubiru dohot lombu. Boasa boi songon i? Didok panurirang i, ”Ai gok parbinotoan di Jahowa tano on sogot.” (Jes. 11:9) Molo binatang ndang boi mananda Jahowa. Jadi sasintongna, surirang on manggombarhon angka jolma na boi paubahon parange ni nasida.

16. Songon dia do Bibel boi mangurupi halak mambahen hamubaon?

¹⁶ Godang do pengalaman ni angka donganta naung mambahen hamubaon. Boi ma i taida di jw.org, di bagian ”Bibel Mambahen Denggan Ngolungku”. Imbar do nasida sian halak na munafik. Molo naposo ni Debata, diulahon nasida do ayat na  mandok, ”solukkon hamu ma jolma na imbaru, na tinompa suman tu Debata, di bagasan hatigoran dohot hapolinon na marhasintongan!” (Eps. 4:23, 24) Dung marsiajar Bibel diantusi nasida ma, ingkon ihuthonon ni nasida do uhum ni Debata. On ma na mangurupi nasida mambahen hamubaon tu cara marpingkir, parniulaon dohot haporseaon nasida. Ndang mura laho mangulahon on. Alai tondi parbadia ni Debata boi do mangurupi nasida laho pasonangkon roha ni Debata.

17. Songon dia asa boi tapasiding angka halak na marparange na roa?

¹⁷ Tangkas ma taboto imbar ni halak na sisomba Jahowa dohot halak na so mananda Jahowa. Ingkon manat ma hita asa unang taihuthon parange na roa sian halak na asing. Alani i, ihuthon ma poda ni Jahowa, asa boi tapasiding angka halak na marparange songon na dipaboa di 2 Timoteus 3:2-5. Tutu, ndang boi tongtong tapasiding sude angka halak na marparange sisongon i. Ra, adong do dongan sakarejonta na songon i, manang donganta di singkola, manang keluarganta. Alai, unang ma taihuthon cara marpingkir dohot parniulaon ni nasida. Aha do na boi mangurupi hita? Tapatogu ma paralealeonta tu Jahowa marhite marsiajar Bibel. Jala maraleale ma tu halak na mangkaholongi Debata.

18. Songon dia angka halak boi gabe olo mananda Jahowa?

¹⁸ Las do rohanta mangurupi halak laho mananda Jahowa. Marsitutu ma hita laho marbarita, huhut tatangiangkon ma asa boi hita denggan pasahathon i. Ingkon diboto halak do molo hita sahalak Sitindangi Ni Jahowa. Jadi, angka parangenta na denggan i pe gabe parohon sangap ma tu Jahowa. Dijujui Jahowa do hita asa ”tasoadahon roha na so daulat ro di angka hisaphisap tano on, asa taparangehon hatomanon, hatigoran dohot hadaulaton, tagan di hasiangan on”. (Tit. 2:11-14) Molo tatiru Jahowa jala taulahon na dihalomohon rohaNa, gabe panindangion ma on tu na asing. Gabe adong ma halak na mandok, ”Rap hita sauduran, ai nunga hubege hami: Debata do donganmuna.”​—Sak. 8:23.